ЛЕКЦИЈА 40
Сар шај те ова чиста англи е Девлескере јакхја?
Замислин туке јекх дај сар спреминела пле чхаве те џал ки школа. Нанѓарела ле хем уравела ле чиста хем уредна шеја. Ој керела адава башо е чхавескоро састипе хем адава сикавела е јаверенге кај ола сар родителија грижинена пе пле чхавеске. Слично аѓаар, амаро мангло Дад о Јехова, мангела те ова чиста — физичко хем морално. Кеда сием чиста адава тано башо амаро шукарипе хем адалеа фалинаја е Јехова.
1. Сар шај те ова физичко чиста?
О Јехова вакерела аменге: „Овен света“ (1. Петрово 1:16). Те шај те ова света, мора те ова физичко хем морално чиста. Амен шај те ова физичко чиста аѓаар со редовно ка нанѓова хем ка икера уредна хем чиста амаре шеја, амаро кхер хем амаро врда. Исто аѓаар, шај те поможина кеда чистинела пе и дворана. Кеда сием физичко чиста амен фалинаја е Јехова (2. Коринќаните 6:3, 4).
2. Кола навике ваљани те цида те шај те ова чиста?
И Библија поттикнинела амен „те чистина секова мелалипе таро амаро тело хем духо“ (2. Коринќаните 7:1). Адава значинела кај ваљани те избегина са со шај те овел штетно башо амаро тело или башо амаре мисле. Амаре мисле ваљани те овен угодна е Јеховаске, адалеске даја амендар са те шај те отфрлина о нечиста мисле (Псалм 104:34). Исто аѓаар, пазинаја саве лафија користинаја. (Читин Колошаните 3:8.)
Со јавер ваљани те избегина те шај те ачхова физичко хем морално чиста? Несаве буќа шај те овен штетна башо амаро тело. Адалеске на пушинаја цигаре хем на лаја дрога. Аѓаар ка ова посасте хем ка сикава кај ценинаја о живото сар поклон таро Девел. Исто аѓаар, трудинаја амен те ачхова морално чиста аѓаар со боринаја амен против о нечиста постапке сар сој мастурбација или дикхибе порнографија (Псалм 119:37; Ефешаните 5:5). Шај ка овел пхаро те чхинава асавке лошна навикенцар, ама о Јехова шај те поможинел аменге те успејна ко адава. (Читин Исаија 41:13.)
ДОЗНАЈН ПОВИШЕ
Дознајн сар адалеа со ка ова физичко чиста фалинаја е Јехова хем дикх сар шај те чхинаве несаве нечиста навикенцар.
3. Кеда сием физичко чиста фалинаја е Јехова
Кеда читинаја о закони со денѓа о Јехова е Израелцонге сикљоваја кобор тано леске важно лескоро народо те овел чисто. Читин 2. Мојсеева 19:10 хем 30:17-19, а пало адава керен лафи башо акала пучиба:
-
Спрема акала стихија, сар о Јехова дикхела ки физичко чистота?
-
Со мислинеа, кола шукар навике баши хигиена ка поможинен туке те ачхове физичко чисто?
Те шај те ова физичко чиста ваљани време хем трудо. Ама, амен шај те успејна ко адава бизи разлика коте живинаја хем дали сием чороле или барвале. Дикх о ВИДЕОКЛИПИ, а пало адава керен лафи башо акава пучибе:
-
Соске тано важно те ова уредна хем чиста кеда проповединаја?
4. Чхинав е лошна навикенцар
О Јехова шај те поможинел аменге те победина било која лошно навика
Ако пушинеа или леа дрога, шај џанеа кобор тано пхаро те чхинаве асавке навикенцар. Ама, со шај те поможинел туке? Размислин башо адава сар адаја лошно навика влијајнела упро тло живото. Читин Матеј 22:37-39, а пало адава керен лафи башо акала пучиба. Сар о цигаре или о користибе дрога влијајнела...
-
упро тло амалипе е Јеховаја?
-
упри тли фамилија хем о јавера сој околу туте?
Те шај те чхинаве несаве лошно навикаја ваљани те кере туке плани. a Дикх о ВИДЕОКЛИПИ.
Читин Филипјаните 4:13, а пало адава керен лафи башо акава пучибе:
-
Сар шај и редовно молитва, о проучибе и Библија хем о состанокија те поможинен некаске те чхинавел несаве лошно навикаја?
5. Борин тут против о нечиста мисле хем постапке
Читин Колошаните 3:5, а пало адава керен лафи башо акала пучиба:
-
Котар џанаја кај и порнографија, о секстинг b хем и мастурбација тане нечиста англо е Јеховаскере јакхја?
-
Со мислинеа, дали амен шај те успејна те ова морално чиста сар со родела амендар о Јехова? Соске мислинеа аѓаар?
Дознајн со шај те поможинел аменге те борина амен против о нечиста мисле. Дикх о ВИДЕОКЛИПИ.
О Исус вакерѓа јекх споредба те сикавел кај мора те ова решиме те кера са сој потребно те шај те ачхова морално чиста. Читин Матеј 5:29, 30, а пало адава керен лафи башо акава пучибе:
-
О Исус на мангља те вакерел кај амен ваљани физичко те повредина амаро тело, него ов мангља те вакерел кај ваљани те ова решиме те кера са со шај. Со ваљани те ова решиме те кера те шај те избегина о нечиста мисле? c
Ако ту да боринеа тут против о нечиста мисле, ма бистре кај о Јехова бут ценинела тло трудо. Читин Псалм 103:13, 14, а пало адава керен лафи башо акава пучибе:
-
Ако ту да боринеа тут те чхинаве несаве нечисто навикаја, сар шај акала стихија те охрабринен тут те на чхинаве те борине тут?
Ма откажин тут!
Ако керѓан нешто сој погрешно шај локхесте те мислине туке: „Палем на успејнѓум, на врединела више те трудинав ман“. Ама, размислин башо акава пример: Ако јекх тркачи сопкинела пе хем перела, адава на значинела кај ов нашавѓа и трка или кај ваљани палем те иранел пе таро почеток. Слично аѓаар, ако палем керѓан нешто сој погрешно адава на значинела кај никогаш нане те успејне те победине адаја лошно навика, а ни палем кај тло трудо џи акана сине џабе. Нормално тано понекогаш те пера ко амаро друмо џи ки цел. Ама, ма откажин тут! О Јехова ка поможинел туке те чхинаве е лошно навикаја.
НЕСАВЕ ШАЈ ВАКЕРЕНА: „Ме нашти те чхинавав адале навикаја, адава тано посилно мандар“.
-
Кова библиско стихо шај те користине те шај те сикаве околеске со мислинела аѓаар, кај о Јехова шај те поможинел леске те чхинавел е лошно навикаја?
СО СИКЛИЛЕМ
О Јехова тано бахтало кеда дикхела кај амен пазинаја ки амари хигиена хем кеда даја амендар са те икера амаре мисле хем постапке чиста.
Сар ка одговорине?
-
Соске тано важно те ова чиста?
-
Сар шај те ова физичко чиста?
-
Сар шај те икера амаре мисле хем постапке чиста?
ИСТРАЖИН
Дикх несаве практична чекорија со ка поможинен туке те мукхе о цигаре.
Дознајн кобор лошно шај те влијајнел и порнографија упри туте.
„Порнографијата — безопасна или отровна?“ (Стражарска кула таро 1 август 2013)
Дикх сар јекх мануш успејнѓа те чхинавел те дикхел порнографија.
a Ко Разбудете се! е темаја „Како да ги оставиш цигарите“, сој ко дело „Истражин“ ки акаја лекција, иси практична чекорија со шај те поможинен туке те мукхе о цигаре.
b Кеда бичхалена пе еротска или порнографска пораке, слике или видеоклипија преку телефони или јавер електронско уред, адава викинела пе секстинг.
c Башо несаве корисна советија дикх ки тема „Како да престанам со мастурбирање?“ ко лил Младите прашуваат — делотворни одговори (том 1), поглавје 25.
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
