40. LEKCIJA
Sar šaj te ova čista anglo Devlese jaćha?
Zamislin jekha daja sar spremini pe ćhave školaće. Najangleder, oj nanđari le hem uravi le čista šeja. Oj ćerela odova sebepi pe ćhaveso sastipe hem te mothovi averenđe so oj hem olako rom brininena pe ando po ćhavo. Isto ađahar, amaro Dad, o Jehova, mangela te ova čista hem avrijal hem andral. Ked hijam čista, odova tano aso amaro šukaripe hem ađahar ćeraja e Jehova bahtalo.
1. So valjani te ćera te šaj te ova čista?
O Jehova phenela amenđe: „Oven sveta“ (1. Petrova 1:16). Odova značini so mora te ova čista hem avrijal hem andral. Amen šaj te ova čista ako redovno nanđovaja, thovaja amare šeja hem čistinaja amaro ćher hem amare vorda. Isto ađahar, but tano važno hem amari dvorana te ovel čisto. Ked hijam čista, amen radujinaja amare Dade, e Jehova (2. Korinćanima 6:3, 4).
2. So valjani te cida amendar ako mangaja te ova čista?
Ki Biblija pisini so valjani „te cida svako melalipe kotar amaro telo hem duho“ (2. Korinćanima 7:1). Odolese, na mangaja te ćera diso so ka meljaćeri amaro telo ja amari godi. Amare mislija valjani te oven čista, ugodna e Jehovase. Odolese, amen daja sa amendar andi amari godi te cida o melale mislija (Psalam 104:34). Uzo odova, trudinaja amen hem te pazina ki amari ćhib. (Čitinen Kološanima 3:8.)
So šaj pana te ćera te šaj te ova čista hem avrijal hem andral? Disave buća šaj te meljaćeren amaro telo. Odolese, na laja droga, na pušinaja, na laja o iljačija ko amaro vas. Ađahar arakhaja amaro sastipe hem mothovaja so ceninaja o životi kova dobinđam sar poklon. Uzo odova, amen mangaja te ova čista hem andral. Odolese, ka cida amen ando buća kola tane melale, sar soj tani i masturbacija hem i pornografija (Psalam 119:37; Efešanima 5:5). Šaj te ovel but pharo te cida amen ando akala lošna buća, ama uzi Jehovasi pomoć amen šaj te ćera odova. (Čitinen Isaija 41:13.)
SIKLJOV POBUTER
Dikh sose tano o Jehova bahtalo ked amen hijam čista hem dikh sar šaj te cida amendar odova soj tano melalo.
3. Ked hijam čista amen mothovaja savo tano o Jehova
Ko zakon kova o Jehova dinđa e Izraelcenđe dikhaja kobor tano važno oleso narodo te ovel čisto. Čitinen Izlazak 19:10 hem 30:17-19, hem palo odova vaćeren ando akala pućiba:
-
Premalo akala stihija, sar o Jehova dikhela ki čistoća?
-
So šaj te pomožini amen te ova čista?
Te šaj te ova čista valjani vreme hem trud. Kuri god te živina, sare šaj te ova čista, bilo te ova barvale ja ćorore. Dikhen o VIDEO, hem palo odova vaćeren ando akava pućibe.
-
Sose o manuša pana pobuter ka poštujinen e Jehova ked ka dikhen so amen hijam čista?
4. Ćhinav te ćere odova soj tano lošno
O Jehova ka pomožini amen te ćhinava te ćera bilo so soj tano lošno
Ako pušineja ja leja droga, tegani šaj đaneja kobor tano pharo te aćhave odola buća. So šaj te pomožini tuće te ćere odova? Razmislin sar odola buća utičinena ko to životi. Čitinen Matej 22:37-39, hem palo odova vaćeren odolestar sar o cigare ja i droga utičinena. . .
-
ko amaro amalipe e Jehovaja?
-
upri amari porodica ja upro avera?
Te šaj te aćhave odola lošna buća, valjani tuće šukar plan. a Dikhen o VIDEO.
Čitinen Filipljanima 4:13, hem palo odova vaćeren ando akava pućibe:
-
Sar šaj i molitva, i Biblija hem o sastankija te pomožinen jekhe manušese te aćhavi disave lošna buća?
5. Cide tutar o melale mislija hem ćhinav te ćere odova soj tano lošno
Čitinen Kološanima 3:5, hem palo odova vaćeren ando akala pućiba:
-
Sar đanaja so i pornografija, o seksting b hem i masturbacija tane buća kola tane melale anglo Jehovase jaćha?
-
So mislineja, sose o Jehova isi le pravo te rodel amendar te ova čista andral?
Dikh so šaj te pomožini tuće te cide tutar o melale mislija? Dikhen o VIDEO.
O Isus vaćerđa jekh poređenje kova mothovi so valjani te da sa amendar te aćhova čista andral. Čitinen Matej 5:29, 30, hem palo odova vaćeren ando akava pućibe:
-
O Isus akaleja na manglja te phenel so valjani te sakatina kokri amen, već so valjani diso te ćera. So o manuš valjani te ćerel te šaj te cidel pestar o melale mislija? c
O Jehova but cenini tut ked dikhela sar borineja tut te cide tutar o melale mislija. Čitinen Psalam 103:13, 14, hem palo odova vaćeren ando akava pućibe:
-
Ako borineja tut te ćhinave te ćere diso soj tano lošno, sar šaj akala stihija te pomožinen tut ko odova?
Ako peljan, šaj palem te ušte!
Ako palem ćerđan diso soj tano lošno, šaj lokho te misline: „Sose te trudinav man, ked uvek grešinava.“ Ama, razmislin akalestar: Ako o trkači perela, odova na značini so našalđa i trka ja so valjani te irini pe kotar početko. Isto ađahar, ako palem ćerđan diso soj tano lošno, odova na značini so niked na ka uspine, niti so to trud ništa na vredini. Normalno tano podijekh puti te pera hem te ušta. Ama, ma vazde te vasta! Uzi Jehovasi pomoć, tu šaj te ćhinave te ćere odova soj tano lošno.
AKO NEKO PHENELA: „Našti te ćhinavav odija navika. Odova tano pozoralo mandar.“
-
Kova stih šaj te koristine te mothove nekase so uzi Jehovasi pomoć šaj te ćhinavi te ćerel odova soj tano lošno?
SO SIKLJILJAM
O Jehova tano bahtalo ked dikhela so amaro telo, amare mislija hem amare postupkija tane čista.
Te ponovina
-
Sose tano važno te ova čista?
-
Sar šaj te ova čista?
-
So šaj te ćere te šaj te mislija hem te postupkija te oven čista?
RODE POBUTER
So šaj te pomožini tut te ove čisto iako na hijan barvalo?
Sar šaj te aćhave o cigare?
Čitin sar i pornografija utičini ko to životi.
„Sose tani i pornografija opasno?“ (Stražarska kula, 1. avgust 2013)
So pomožinđa jekhe manušese te ćhinavi te dikhel i pornografija?
„But putija peljum, ama ko krajo uspinđum“ (Stražarska kula, br. 4/2016)
a Ko deo „Rode pobuter“ ki akija lekcija tano o članko „Sar te aćhavav o cigare?“ Odova članko vaćeri odolestar sar šaj te aćhave o cigare.
b O „seksting“ tano ked prekalo elektronska uređaja bićhaleja nepristojna poruke, slike ja video-snimkija.
c Dikh o 25. poglavlje „Masturbacija – da li tani opasno?“ ki knjiga Mladi pitaju – praktični odgovori na njihova pitanja, 2. tom.
Dikhen hem akava
NAJČEŠĆA PUČIBA
Sar izgledini jekh biblijako kurs ando Jehovase svedokija?
O proučibe tano besplatno, šaj te koristinen o prevod andi Biblija kova tumen mangena hem ko kurs šaj te vićinen celo tumare porodica ja nekas ando tumare amala.
