LEKTIONA 40
Har nai wah mer an i Debleskre jakka djudjo?
I latchi dai dikell pal kowa, kai hi lakro tchawo thodo, te djal lo an i sikepaskri. Te dikell li, kai hi leskro ripaske shukar un djudo, atchell o tchawo sassto. Ninna haiwenn wawar, kai denn o tchaweskro dad un i tchaweskri dai jak ap leste. O Jehowah, maro kamlo dad, kamell ninna, kai atchah djudjo — an maro rakepen, an kowa hoi mer krah, un hoi mer an maro shero mukah te well. Ko hi menge mishto, un sharell ninna i Jehowes.
1. Har nai sikrah mer, kai ham djudjo?
O Jehowah kamell, te was djudjo. Job penell menge, te was swundo (1. Petro 1:16). Ko lab swundo sikrella, kai hunte was mer ap mende un ninna an mende swundo. Ap mende ham mer djudjo, te thowah mer men, te rikrah maro ripaske, maro kheer, un ninna maro ulepaskro djudjo. Mer kamah ninna o Jehoweskro Kheer, mari saala, djudjes te rikrell. Mer te ham djudjo, sharell kowa i Jehowes (2. Korintarja 6:3, 4).
2. Hoi krell men tchiklo?
I bibla penell menge, te mukas “kol tselo djunglo koowa, un kras mare djia djudjo” (2. Korintarja 7:1). Doleske kamah mer tchi te krell, hoi maro trupo oder mari godi paash krella. Ninna mukah mer tchi an maro shero oder an maro dji te well, ap hoi o Jehowah tchilatches dikella (Gilja 19:14, 15). Mer kamah ninna an maro rakepen djudjo te atchell (Dik pal an Kolossarja 3:8, 9).
Hawo wawar koowa nai krell men tchiklo? Kote denn substanze, hoi maro trupo paash krella, koowa har zigarette oder droge. Sawo koowa lah un pijah mer gar. Mer lah witar gar budeder medikamente, har hunte las. Mer te rikrah sawo koowa mendar krik, atchah mer sassteder un sikrah, kai hi o djipen menge bud moldo. Mer kamah ninna djungle maniere mendar krik te rikrell, har kanna te krell jek lubekano koowa ap peste kokres, un te dikell jek ap wi-ladjedo koowa (Gilja 119:37; Efesarja 5:5). a Ninna te hi kowa phares, te mukas sawo koowa, nai patseh tu: O Jehowah mukell tut pash kowa gar kokres (Dik pal an Jesaja 41:13)!
RODAS DUREDER
Kanna dikeh, har i Jehowes kowa sharella, te ham djudjo, un har te mukas nai maniere, hoi men tchikles krenna.
3. Te ham djudjo, sharell kowa i Jehowes
I Jehoweske hi o djudjepen bud moldo. Ko haiwah mer, te dikah ap leskre laba, hoi lo i Israelitarjen das. Dikenn pal an 2. Mose 19:10, un 30:17-19, un rakrenn khetne pral:
-
Har dikell o Jehowah pal kola versa ap o djudjepen?
-
Hoi nai kreh tu, te atchess nai djudjo ap tute?
Hi jek, kai djiwah un har bud lowe men hi: Koi budi un ko tsiro kamah mer menge te lell, te atchas djudjo ap mende. Te dikan o VIDEO, rakrenn khetne pral:
-
Hoi nai krell kowa kolentsa, kolenge mer o latcho lab anah, te dikenn le, kai hi maro koowa djudjo?
4. Maniere, hoi hunte mukas
O Jehowah nai dell menge koi soor, te nai mukas halauter, hoi gar djudjo hi
Tu te pijeh pimangre oder te leh droge, djineh tu, har phares kowa hi, te mukess kowa. Tu te dikeh ap kowa, hoi sawo koowa tuha krella, nai dell tuke kowa koi soor, te mukess sawe maniere. Dikenn pal an Mateo 22:37-39, un rakrenn khetne pral:
-
Hoi krenn pimangre un droge tuha un i Jehoweha?
-
Hoi krenn pimangre un droge tuha, tiri familjah un wawarentsa?
Kre tuke i plana, har te mukess tchilatche maniere. b Dikenn o VIDEO.
Dikenn pal an 1. Korintarja 10:13, un rakrenn khetne pral:
-
Har nai dell i latchi routina an o rakepen o Debleha, an o Biblakro Rodepen, un te djah an o Khetnepen koi soor, te mukas tchilatche maniere?
5. Tu hunte maress kola maniere tele, kai gar djudjo hin
Dikenn pal an Kolossarja 3:5, un rakrenn khetne pral:
-
Hoske hi an i Jehoweskre jakka kowa gar djudjo, te dikah ap wi-ladjedo koowa, te bitchrah wi-ladjede laba, fotos oder videos, oder te krell jek lubekano koowa ap peste kokres?
-
Haiweh tu, hoske o Jehowah mendar kamella, te was djudjo? Hoske peneh tu kowa jaake?
Kate hatseh, har te tradess ko koowa dran tiro shero nai, hoi gar djudjo hi. Dikenn o VIDEO.
Mer hunte tchiwas mari tseli soor an kowa, te atchas djudjo. Kowa penas o Jesus wawar labentsa an i illustrationa. Dikenn pal an Mateo 5:29, 30, un rakrenn khetne pral:
-
Kola labentsa kamas o Jesus gar te penell, te dukras men tchatchepah. Job kamas te penell, kai hunte kras mer tchomone. Hoi nai krell jek konkret, te rikrell lo pes an peskro shero djudjo? c
I Jehoweske hi kowa bud moldo, tu te deh tiri soor an kowa, te atchess djudjo. Dikenn pal an Gilja 103:13, 14, un rakrenn khetne pral:
-
Har nai dell tuke ko verso soor, te kameh tchikle maniere tele te marell?
Ma de pre, te pereh!
“Kanna perum pale, kanna nai dau ninna pre” — was tuke kowa an o shero? Shun: Har hi kowa pash jekeste, kai nashella an i marathon, un te perell lo? Hunte djal lo pale ap o start? Hunte nashell lo ko tselo drom, hoi lo nashas, pale? Nashras job ko nashepen? Na-a. Job stella pre, un nashell dureder. Jaake hi kowa ninna pash mende. Tu hunte dikess ap ko drom, hoi tu pal tute mukal. Kowa his gar tchitcheske, un well tutar gar krik lino! Ma de pre! Tu nashral gar o nashepen, te anas i tchikli maniera tut jaake dur, kai peral. Khetne i Jehoweha hi tut koi soor, te nai mukess kol tchilatche maniere.
BUD PENENNA: “Me nashte mukau kowa gar, ko chatchell an mande.”
-
Hawo biblakro verso nai lals, te kamals jekeske te sikrell, kai nai mukah tchikle maniere i Jehoweskri sorjah?
HOI KATE PENLO WAS
Te atchah ap mende, an maro shero, un an maro djipen djudjo, krah mer i Jehowes bachteles.
Hoi penals tu?
-
Hoske hunte atchas mer djudjes?
-
Har nai sikrah mer, kai ham mer ap mende un ninna ap maro koowa djudjo?
-
Hoi nai krah mer, te atchah an maro shero un an mare maniere djudjo?
BUDEDER
Kate dikeh, hoi tu nai kreh, te nai atchess djudjo, ninna te hal tchorwelo.
Kate hatseh tipps, har te mukess nai i pimangre.
Kate hatseh, hoi i pornografia jekeha nai krella.
“Pornografia: Harmlos oder schädlich?” (O Gardeskro Kheer, August 1, 2013)
Kate drawereh, har i morsh kowa nai kras, te mukell lo i pornografia.
“I baro kurepen, hoi gar tchitcheske his” (O Gardeskro Kheer Nr. 4 2016)
a Ko lab, te krell jek lubekano koowa ap peste kokres, kharella Masturbationa. Ko lab, te djala pal o dikepen ap wi-ladjedo koowa, kharella Pornografia.
b Tel BUDEDER hatseh tu koi batri Djangrenna! ko labeha: “Har nai mukah i pimangre?”. Kote hatseh tu latche tipps, har te mukess tchilatche maniere.
c Latche tipps, te nai mukell jek kowa, te krell lo lubekano koowa ap peste kokres, hatsell jek an “Har nai mukau kowa, te krap lubekano koowa ap mande kokres?” an ko libro Hoi terne pen putchenn — O praktiko tchatchepen, Kotar 1, Lektiona 25.
