LECȚIA 40
Sar daisaras te avas uje andel iacha le Iehovasche?
Gândisar-tu ca iech dei cai bișalel pesche cuci șiavorres ca i școala. Voi lel sama ca o șiavorro te avel halado hai le hureaimata pa leste te aven uje hai te na aven șinde. Cadea, o șiavorro așel sastevesto hai sicavel vi le coaverenghe că siles lașe dada. Sa cadea, vi amaro Dad, o Iehova, camel te avas uje fizico hai vi amari goghi hai amaro phiraimos te aven uje. Cadai buchi si ande amaro miștimos hai anel lesche pachiv.
1. So însemnol te avas uje fizico?
O Iehova phenel amenghe: „Aven sfinți”. (1 Petru 1:16) Caște avas sfinți trebul te avas uje ande sea le buchia cai cheras-le. Cadaia însemnol te încăras uje amaro corpo, amari goghi hai amaro phiraimos. Daisaras te avas uje fizico cana halavas-ame ande fiesavo ghies hai las sama ca amaro hureaimos, amaro chăr hai amari mașina te aven uje sea o timpo. Mai daisaras te cheras ujimos vi ca i sala le Regatoschi. Cana încăras-ame uje ande sea cadal buchia, anas pachiv le Iehovasche. (2 Corinteni 6:3, 4)
2. Save buchiandar trebulas te așias dur caște avas uje?
I Biblia phenel „te ujiaras-ame catar sea so meliarel o corpo hai o spirito”. (2 Corinteni 7:1) Anda codoia, das sea amari zor te na cheras vareso cai rimosarel amaro corpo hai amari goghi. Camas ca amare gânduri te aven pala o ilo le Iehovasco, cadea că cheras sea so daisaras caște duriaras amendar le gânduri nasul. (Psalmo 104:34) Sa cadea, amen das sea amari zor te das duma ande iech modo ujo. (Citisaren Coloseni 3:8.)
So aver vareso meliarel o corpo, i goghi hai amaro phiraimos? Si chichiva substanțe cai meliaren amaro corpo. Anda codoia, ci țârdas țigări hai ci las droguri de niciech felo. Cana așas dur catar cadal buchia, sam mai sasteveste hai sicavas că o daro la viațaco si cuci anda amende. Sa cadea, așias uje andi goghi hai ande amaro phiarimos cana das sea amari zor te na mai cheras buchia neuje, sar avelas i masturbarea sau o fapto te dichas materialea pornografico. (Psalmo 119:37; Efeseni 5:5) Chiar cana si zurales pharo te na mai cheras cadal buchia, o Iehova daștil te ajutil-ame. (Citisaren Isaia 41:13.)
HACHIAR MAI MIȘTO
Va avela te hachiares sar o fapto te avas uje fizico anel pachiv le Iehovasche, hai so daștil te ajutil-ame te na mai cheras le buchia melale.
3. Cana sam uje fizico, anas pachiv le Iehovasche
Cana citisaras so legi dea o Iehova codolenghe anda o Israelo, hachiaras chichi de importanto si anda leste ca lesche manușa te aven uje. Citisaren Exodo 19:10 hai 30:17-19 hai pala codoia den duma:
-
So sicaven cadal versetea anda sar dichel o Iehova o ujimos?
-
So buchia daștis te cheres ande fiesavo ghies caște așes ujo?
Caște avas uje trebul te cheras amenghe timpo hai te das amari zor te cheras cadaia. Daisaras te avas uje chiar cana sam barvale sau ciore. Dichen o MATERIALO VIDEO hai pala codoia den duma:
-
Sar anas pachiv le Iehovasche andi lucrarea de predicare cana încăras amare buchia uje hai ca lengo than?
4. Mech-tu catar le buchia nasul
O Iehova daștil te ajutil-ame te mechas-ame catar orisavi buchi nasul
Dacă țârdes țigări sau les droguri, daștil-pe că jianes chichi de pharo si te meches-tu cadalendar. So daștil te ajutil-tu? Beș hai gândisar-tu so de nasul cheren tuche cadal buchia. Citisaren Matei 22:37-39 hai pala codoia den duma sar daștin le țigări hai le droguri te . . .
-
rimosaren chio amalimos le Iehovaia.
-
cheren nasul codolenghe andai familia hai codolenghe de pașa tute.
Cher tuche iech plano anda sar te meches-tu catar le buchia nasul. a Dichen o MATERIALO VIDEO.
Citisaren Filipeni 4:13 hai pala codoia den duma:
-
Sar daștin te ajutin-tu o manglimos, o studio la Bibliaco hai le întruniri te meches-tu catar le buchia nasul?
5. De sea chi zor caște meches le gânduri hai le buchia melale
Citisaren Coloseni 3:5 hai pala codoia den duma:
-
Catar jianas că le materialea pornografico, o sextingo hai i masturbarea si buchia zurales melale andel iacha le Iehovasche?
-
Pachias că si ande amaro miștimos că o Iehova manghel amendar te avas uje? Sostar?
Va avela te diches sar daștis te meches le gânduri melale. Dichen o MATERIALO VIDEO.
O Isus dea amen iech exemplo caște sicavel că trebul te avas gata te cheras oriso caște avas uje andi goghi hai ande amaro phiraimos, chiar cana si amenghe pharo. Citisaren Matei 5:29, 30 hai pala codoia den duma:
-
O Isus ci camlea te phenel că trebul te încalavas ciaces amari iach sau te șinas amaro vast. Vo camlea te phenel că, o manuș cai cherel buchia neuje, trebul te del sea peschi zor te duriarel pestar le gânduri neuje, chiar cana ci si lesche ușoro. Sar daștil vo te cherel cadaia? b
O Iehova dichel-tu zurales cuci cana des sea chi zor caște meches le gânduri melale. Citisaren Psalmo 103:13, 14 hai pala codoia den duma:
-
Dacă des sea chi zor caște na mai cheres iech buchi melali, sar ajutil-tu cado verseto te na meches-tu perado?
Na mech-tu dacă pelean; daștis te vazdes-tu pale!
Dacă cărdean pale vareso cai na-i lașio, daștil-pe că phenes tuche: „Ci som lașio, mai mișto ci mai cherav chanci”. Tha gândisar-tu: cana iech sportivo cai nașel malavel-pe hai perel, cadaia ci însemnol că hasardea i cursa hai că trebul te lel-la pale catar o începuto. Sa cadea, cana cărdean pale iech buchi nasul, ci însemnol că hasardean i lupta hai nici o fapto că o progreso cai cărdean-les ji acana sas de ivea. Te peres poiechdata, si vareso normalo. Tha cana vazdes-tu pale, sicaves că san po drom caring i victoria. Cadea că, na mech-tu! Cana si tut o ajutoro le Iehovasco, daștis te meches-tu catar orisavi buchi cai na-i lași.
UNII MANUȘA PHENEN: „Ci daștiv te mechav-ma. Si prea pharo anda mande”.
-
So verseto daștis te sicaves varecasche caște hachiarel că o Iehova daștil te ajutil-les te mechel-pe catar iech buchi nasul?
SO SICHILEAM
Cana sam uje fizico hai cana vi amari goghi hai amaro phiraimos sile uje, sam cuci andel iacha le Iehovasche.
So dichleam
-
Sostar si cadea de importanto te avas uje?
-
Sar daștis te aves ujo fizico?
-
Sar daștis te încăres uje che gânduri hai chio phiraimos?
RODE MAI BUT
So daștis te cheres caște așes ujo, chiar cana ci si tut but buchia?
Va avela te diches chichiva buchia cai daștin te ajutin-tu te meches le țigări.
„Sar daștin te mechen tumen catar le țigări” (Ușten!, mai 2010)
Va avela te hachiares so nasulimos daștil te cherel varecasche i pornografia.
„Pornografia – Vareso lașio sau nasul?” (O Turno de veghe, 1 augusto 2013)
Va avela te diches sar mechlea iech murș i pornografia.
„Pelem butivar ji cana reușisardem” (O Turno de veghe, nr. 4 2016)
a Andi secțiunea „Rode mai but”, va vela te araches o articolo: „Sar daștin te mechen tumen catar le țigări”, cai va sicavela tuche so trebul te cheres caște na mai țârdes.
b Caște diches sar daștil varecon te mechel-pe catar i masturbarea, citisar o capitolo 25, „Sar daștiv te mechav-ma catar i masturbarea?”, anda o lil Le tărne pușen-pe – Răspunsuri cai ajutin-le, volumo 1.
Poate că fal-tu
PUȘIMATA ȘIUTINE BUTIVAR
So si o studio biblico le Martorența le Iehovasche?
Ande cado studio biblico gratuime le Martorența le Iehovasche, daștis te folosis orisavi Biblia cames. Daștis te achares ca o studio sea chi familia sau oricas cames.
