SIKAIMOS 40
Sar te avas vuzhe sar mangel o Del?
De tu gogi ande iek dei kai kamlimasa lasharel suako gies o jabe peske shaveske. Kana kiravel voi lel sama te avel sa vuzho, le chare ai e rig kai si te jal. Gado kerel te avel lako tsinorho sasto ai sikavel le kolavrenge ke leske dada len sama lestar. O Jehova, sar si amaro Dat ai kamel amen, mangel te avas vuzhe ande amaro kher, amaro stato, amare gada ai ande soste godi. Ai vi trobul te avel vuzho amaro ilo, amare ginduria ai amare vorbi. Kana keras sa kako anel amenge mishtimos ai luvudis le Devles.
1. Sar te avas manush vuzhe?
O Jehova phenel amenge: “Trobul te aven swuntsi” (1 Petri 1:16). Te avas suntsi, trobus te avas vuzhe ande soste godi. Sikavas ke sam vuzhe kana naiuvas ai ninkeras amare gada, amaro kher ai e matora lasharde ai vuzhe. Vi kana azhutis te khosas amari Rig kai chidas amen te luvudis le Devles. Te avasa vuzhe si te luvudis ka o Jehova ai si te azhutis te aven aver manush te luvudin les (2 Korintiana 6:3, 4).
2. Katar save prame trobus te duriuvas te avas vuzhe?
E Biblia phenel amenge te vuzharas amen katar sa so meliarel o stato ai o dujo (2 Korintiana 7:1). Pala godia thas amendar te na keras khanchi te meliarel amaro stato vai amari gogi. Ai sar kamas te veselis ka o Jehova thas amendar te na avel amen ginduria chorhe (Salmo 104:34). Ai vi kamas te aven vuzhe suako prama kai mothas (chito Colosenses 3:8, NWT).
So mai shai meliarel amen? Si uni prame kai shai meliaren amaro stato. Pala godia chi pias tsigeri, chi chambas coca (char), chi pias draba te diliaren amari gogi. Kana keras kako, sikavas ke respetis ai arakhas o traio kai dias amen o Del. Ai te avas vuzhe ando gindo ai ando ilo thas amendar te duriuvas katar le prame chorhe. Pala godia nai vorta te dikhas pornografia ke si patretsi ai videuria marime. Ai nai vorta o manush te kerel dieli sar te azbalpe korkorho, gado bushelpe masturbacion (Salmo 119:37; Efisiana 5:5). Shai avela ke nai vushoro te mekas uni anda kakala dieli, numa o Jehova kamel te azhutil amen (chito Isaías 41:13).
TE MAI SIKIOS
Aida dikhas sar luvudis ka o Jehova kana sam manush vuzhe ai so azhutil amen te mekas le prame chorhe.
3. Kana sam manush vuzhe luvudis ka o Jehova
Kana dikhas le suaturia kai phendias o Jehova ka o Israel, aliaras sode de baro si leske te avas manush vuzhe. Chiton Éxodo 19:10 ai 30:17-19, ai den duma pa:
-
Pa so mothon kakala verseturia, drago ka o Jehova te avas vuzhe vai nichi?
-
So shai keras te avas vuzhe suako gies?
Beshasa kai beshasa, avel amen but vai tsirha love, te avas manush vuzhe trobul amen vriama ai te thas amendar. Dikhen o VIDEO ai den duma pa:
-
Kana zhas te ningeras o suato ai dikhen le manush ke amare prame vuzhe le, sostar godo del barimos ka o Jehova?
4. Sar shai mekes le prame chorhe
O Jehova shai azhutil amen te mekas fersavi prama chorhi.
Te avela ke pes tsigeri vai draba kai diliaren e gogi, zhanes ke nai vushoro te mekes len. Vareso kai shai azhutil tu si, te des tu gogi andel prame nasul kai anen ande kiro traio. Chiton Mateo 22:37-39 [NWT], ai den duma pa sar kakala prame duriaren tu...
-
... katar o Jehova.
-
... katar kire niamuria ai aver manush.
De tu gogi so shai keres te mekes iek prama chorhi. a Dikhen o VIDEO.
Chiton Filipenses 4:13 [NWT] ai den duma pa:
-
Sar azhutil varekas o rhugimos, te chitol e Biblia ai te zhal kai chidas amen te mekel iek prama chorhi?
5. Durio katar so si marime ai le ginduria chorhe
Chiton Colosenses 3:5 [NWT] ai den duma pa:
-
Sar zhanes ke e pornografia, e masturbacion ai sextear b si prame marime angla o Del?
-
Gindis ke si vorta te mangel o Jehova amendar te avel amaro ilo ai amari gogi vuzhe? Sostar?
Dikhta sar te durios katar le ginduria chorhe. Dikhen o VIDEO.
O Jesus sikadias amen so te keras te avel amaro ilo ai amari gogi vuzhe. Chiton Mateo 5:29, 30 [NWT] ai den duma pa:
-
O Jesus chi sikadias ke trobus te keras amenge nasul, vo sikadias ke trobus te duriuvas katar le ginduria chorhe ai vi kana nai amenge vushoro. Sar shai keras gado? c
Te avela ke gata keres vareso te durios katar le ginduria chorhe, shai pakias chachimasa ke o Jehova dikhel e zor kai thos te na mai aven tu godola ginduria. Chiton Salmo 103:13, 14 ai den duma pa:
-
Te avela ke kames te mekes iek prama chorhi, gindis ke kakala texturia shai den tu e zor kai trobul tu? Sostar?
Na perau le vast, tu shai niris!
Si vushoro te gindis “Chi sim lasho; chi mai kerau khanchi”. Numa de tu gogi ande kako. Kana varekon prastel ande iek carrera ai perel, chi kamel te mothol ke trobul te astarel pale. Sa iek fialo si kana peres pale ande iek prama chorhi, chi kamel te phenel ke sa e zor kai thodian sas intaino. Te prastesa pe iek drom gadia shai peres, numa te ushtiesa si te sikaves ke kames te niris. Pala godo na perau le vast! O Jehova si te azhutil tu te mekes fersavi prama chorhi.
UNI MANUSH PHENEN: “Si vareso kai nashtiu te mekau”.
-
Savo texto la Bibliako azhutil tu te sikaves ke o Jehova shai del zor ka iek manush te mekel fersavi prama chorhi?
SO DIKHLIAM
Veselis o ilo katar o Jehova kana sam manush vuzhe, ai kana ninkeras vuzhe amare ginduria ai so keras.
So sas te mothos?
-
Sostar si bari prama te avas vuzhe?
-
So trobus te keras te avas manush vuzhe?
-
Sar te ninkeras vuzhe amare ginduria ai so keras?
SHAI DIKHES VARESO MAI
Makar chi avela amen but love, so shai keras te avas vuzhe?
Chito uni prame kai shai azhutin tu te mekes le tsigeri.
Dikhta le prame nasul kai anel e pornografia.
“E pornografia: si vareso nasul vai nai khanchi?” (La Atalaya, 1 anda o agosto, 2013)
Dikh so kerdias iek manush te mekel te dikhel pornografia.
“Atsadilem butivar zhi kai parhudilem” (La Atalaya, num. 4 2016)
a Kai mothol “Shai dikhes vareso mai” ande kako sikaimos, si iek artikulo kai shai azhutil tu ai bushol “Sar te mekes le tsigeri”.
b Sextear: Kana o manush tradel patretsi ai videuria bimalade po telefono, computadora vai Internet.
c Te zhanes sar te mekes iek prama chorhi sar e masturbacion, dikh o kapitulo 25 katar e publikasion Lo que los jóvenes preguntan. Respuestas prácticas (kotor 1), “Shai mekau iek prama chorhi sar e masturbacion?”.
Shai avela plachal tu
SO SHAI PUSHES TU
Sar sikaven le marturia le Jehovaske pa e Biblia?
Gadia sar sikaven le marturia le Jehovaske, tu shai les e Biblia kai tu kamesa. Ai Shai akhares sa cha familia vai le amiguria kai kamesa.
