Ndao hatao hoe misy ampela raiky mampihentsy ty anakilahiny fa handeha hianatsy. Nampiandroany anakilahiny iny, le nampisikininy akanjo malio noho milamy soa. Hahasalama ani-ajà iny raha zay sady mampiseho hoe voakarakarani-ray aman-dreniny ie. Teani-Jehovah Babantsika halio manahaky ani-zay koa tsika. Tokony halio iaby ndre ty vatantsika, ty hananantsika, noho ty fandaisam-batantsika. Mahasoa antsika raha zay sady manome voninahitsy ani-Jehovah.

1. Akory ty ampisehoantsika hoe tea fahadiova tsika?

Nivola Jehovah hoe: “Tokony ho masy nareo.” (1 Petera 1:16) Masy tsika laha malio ty vatantsika, ty hananantsika, noho ty fandaisam-batantsika. Mila mandro sanandro zany tsika sady tokony halio noho hilamy ty sikintsika noho ty tranontsika. Tokony halio koa ty hananantsika, ohatsy hoe tomabily, môtô, na bisikilety. Asehontsika koa hoe tea fahadiova tsika lafa manampy amy fanadiova Efitrano Fanjakà. Manome voninahitsy ani-Jehovah tsika lafa zatsy malio.​—2 Korintianina 6:3, 4.

2. Mba hahavy antsika halio avao, ino ty raha mila halavirintsika?

Mampirisiky antsika ho zao ty Baiboly: “Soa laha ataontsika malio ty vatantsika ho afaky amy ty raha iaby mandoto ty nofotsy noho ty say.” (2 Korintianina 7:1) Mila manalavitsy ty raha mety hanimba ty vatantsika noho handoto ty saintsika zany tsika. Tokony ho raha teani-Jehovah ro mameno ty saintsika, ka miezaky mafy tsika mba tsy hieritseritsy raha raty. (Salamo 104:34) Miezaky koa tsika hivola raha malio avao.​—Vakio Kolosianina 3:8.

Ino koa ty raha mety hahavy antsika tsy halio? Mety hanimba ty vatantsika ty raha sisany. Tsy tokony hitroky sigara na jamala zany tsika na hihina paraky, na hampiasa fanafody maha ango mba hahazoa fahafinareta. Ho salama tsika laha tsy manao ani-reo sady asehontsika koa hoe lafovily amintsika ty ay. Miezaky mafy koa tsika mba tsy hanenty sary tiva, na hikasikasiky filahia na fivavia satria fahalotoa ty fanaova ani-reo. (Salamo 119:37; Efesianina 5:5) Mety ho sarotsy kindraiky ty handresy ty fahazaran-draty, fe tiarovo fa afaky manampy anao Jehovah.​—Vakio Isaia 41:13.

 DINIHO LALIKY

3. Manome voninahitsy ani-Jehovah ty olo malio

Afaky mahita ty fomba fahitani-Jehovah ty fahadiova tsika, lafa mandiniky ty lalàna nameany ty Israelita. Vakio Eksodosy 19:10 noho 30:17-19, bakeo iaraho midiniky fanontanea retoa:

• Akory ty fiheverani-Jehovah ty fahadiova laha hentea andinin-teny reo?

• Ino iaby ty fahazara soa afaky manampy antsika ho tea fahadiova?

Mitaky fotoa noho hery ty fiezaha halio avao. Fe afaky manao malio avao tsika ndre aia ndre aia ty misy antsika, ndre mpanarivo tsika ndre mahantra. Alefaso VIDEO toy, bakeo iaraho midiniky fanontanea io.

• Manino ro parè hijanjy noho hanaja antsika soa ty olo itoriantsika lafa malio noho milamy tsika?

4. Reseo ty fahazaran-draty

Laha mitroky sigara na mampiasa raha maha ango iha, le mety hainao soa hoe tsy mora ty miala amy raha rezay. Ino ty afaky manampy anao? Diniho ty ho voka-dratini-raha rey aminao. Vakio Matio 22:37-39, bakeo iaraho midiniky hoe: Laha mitroky sigara na mampiasa raha maha ango ty olo raiky, ino ty vokatsini-raha zay amy ty...

• fifandrambesany amy Jehovah?

• fianakaviany na ty olo manodidy azy?

Manaova raha mba hialà amy fahazaran-draty. a Alefaso VIDEO toy.

Vakio Filipianina 4:13, bakeo iaraho midiniky fanontanea retoa:

• Manino ro ho afaky amy fahazaran-draty ty olo raiky laha zatsy mivavaky, mianatsy Baiboly, noho mamonjy fivoria?

 5. Miezaha tsy hieritseritsy raha raty na maloto

Vakio Kolosianina 3:5, bakeo iaraho midiniky fanontanea retoa:

• Ino ty ahaizantsika hoe maloto ty fahitani-Jehovah ty fanentea sary tiva, fandefasa hafatsy tiva, noho fikasikasiha filahia na fivavia?

• Mivola Jehovah hoe tokony halio fandaisam-bata tsika. Ho vitantsika va raha zay araky ty hevitsinao? Ino ty antony?

Ino ty hanampy antsika tsy hieritseritsy raha raty? Alefaso VIDEO toy.

Nanao fanohara Jesosy mba hampisehoa hoe mila manao raha voafaritsy soa tsika laha teantsika ty halio fandaisam-bata avao. Vakio Matio 5:29, 30, bakeo iaraho midiniky fanontanea toy:

• Tsy ta hivola Jesosy hoe mila apotakintsika ty rantsambatantsika. Ta hivola avao ie hoe mila manao raha voafaritsy soa tsika. Ino ohatsy ty raha voafaritsy mila ataon’olo raiky laha tsy ta hieritseritsy raha raty ie? b

Vatan-draha amy Jehovah ty ezaky mafy ataonao mba handresea ty eritseri-draty. Vakio Salamo 103:13, 14, bakeo iaraho midiniky fanontanea toy:

• Manino andinin-teny io ro manampy anao tsy ho kivy fa hiezaky avao handresy ty fahazaran-draty?

 FAMINTINA

Falifaly Jehovah lafa malio soa avao ty vatantsika, ty saintsika, noho ty fandaisam-batantsika.

Famerena

• Manino ro vatan-draha ty hoe malio?

• Akory ty ampisehoanao hoe olo tea fahadiova iha?

• Ino ty azonao atao mba halio avao ty raha eritseretinao noho ty fandaisam-batanao?