Kěnang pẹ̌tiněna piạ sěngkatau matimadẹ̌ wawine nẹ̌tul᷊ung anạe tadeạu sadia sarang sikol᷊ah. I sie němarikěsa apa anạe seng bọu něndenọ, kụ seng bọu něpakẹ pakeang burěsi dingangu rapi. Ene makakoạ anạe tatapẹ̌ masehatẹ̌ kụ měnodẹ su taumata wal᷊inẹ matimade něngurusẹ̌ anạ ene. Kerene lai, i Amang makěndagẹ̌, Yehuwa, mapulu i kitẹ burěsi secara jasmani dingangu moral. Mạeng i kitẹ burěsi, i kitẹ sarung makapěndang gunane kụ ene lai makawantugẹ̌ si Yehuwa.

1. Kerea tadeạu i kitẹ burěsi secara jasmani?

Yehuwa naul᷊ị si kitẹ, ”I kamene harusẹ̌ masusi.” (1 Petrus 1:​16) Kasasusi ene piạ sěmpụe dingangu burěsi secara jasmani lai moral. I kitẹ botonge burěsi secara jasmani mạeng marading měndenọ, měndiagạ pakeang, bal᷊e, dingangu oto arau motorẹ̌ tatapẹ̌ burěsi dingangu rapi. I kitẹ lai botonge mẹ̌tul᷊ung měmurěsi Banalang Kararatuang. Mạeng tatapẹ̌ burěsi secara jasmani, i kitẹ makawantugẹ̌ si Yehuwa.​—2 Korintus 6:​3, 4.

2. Tadeạu burěsi, i kitẹ tawe wotonge měkoạ kebiasaan kerea?

Alkitapẹ̌ němahangsang si kitẹ gunang ”měmurěsi watangeng i kitẹ bọu kěbị apang makakotorẹ̌ badang dingangu tiněnang i kitẹ”. (2 Korintus 7:1) Ini mangal᷊ene i kitẹ harusẹ̌ mẹ̌těngkarau bọu kěbị apang makarusa badang arau tiněnang i kitẹ. Apa tẹ̌tiněnang i kitẹ harusẹ̌ makal᷊uasẹ̌ si Yehuwa, hakị u ene i kitẹ mẹ̌tawakal᷊i měnděmẹ tiněna nẹ̌sal᷊a. (Mazmur 104:34) I kitẹ lai mẹ̌tawakal᷊i měndiagạ bisara tatapẹ̌ burěsi.​—Basa Kolose 3:8.

Apa lai makakoạ si kitẹ tawe wurěsi secara jasmani arau moral? Piram baụ zat makakotorẹ̌ badang i kitẹ. Hakị u ene, i kitẹ tawe měnosọ, měmama, arau měpakẹ narkoba. Mạeng tawe měkoạ manga hal᷊ẹ̌ ene, i kitẹ sarung limembong masehatẹ̌ kụ ene lai něnodẹ i kitẹ měngẹ̌ngarěga hadiah pěbawiahẹ̌. Kụ tadeạu burěsi secara moral, i kitẹ lai měngědo měkoạ kebiasaan mal᷊amuhụ, kere masturbasi dingangu měmanda pornografi. (Mazmur 119:37; Efesus 5:5) Tawe měkoạ manga kebiasaan dal᷊akị ene tantu tawe gampang, katewe Yehuwa botonge makatul᷊ung si kitẹ měngědo měkoa manga hal᷊ẹ̌ ene.​—Basa Yesaya 41:13.

 BANGKA PAKARAL᷊UNG

3. Burěsi secara jasmani makawantugẹ̌ si Yehuwa

I kitẹ botonge makasingkạ kerea pěndang i Yehuwa soal u kawawurěsi mạeng měmarikěsa manga hukung’E gunang tau Israel tempong tamai. Basa Keluaran 19:10 dingangu 30:​17-​19, bọu ene bisarai manga kakiwal᷊o ini:

• Tumuhụ manga ayatẹ̌ ene, kerea pěndang i Yehuwa soal u kawawurěsi secara jasmani?

• Manga kebiasaan apa makatul᷊ung si kau tatapẹ̌ burěsi secara jasmani?

Tadeạu burěsi secara jasmani, i kitẹ harusẹ̌ mẹ̌tawakal᷊i. I kitẹ botonge měkoạ ene tawẹ soale su apa i kitẹ mětẹ̌tanạ, arau apa i kitẹ makalạ arau masusah. Putarẹ̌ VIDEONE, bọu ene bisarai kakiwal᷊o ini.

• Kawe nụe taumata nipẹ̌sombangeng i kitẹ su tempong měnginjilẹ̌ sarung limembong měngadatẹ̌ si Yehuwa mạeng i sire nakasilo manga barang i kitẹ burěsi?

4. Pěngědọe měkoạ kebiasaan dal᷊akị

Mạeng i kau měnẹ̌nosọ arau měpẹ̌pakẹ narkoba, i kau aramanung masingkạ měngědo měkoạ manga kebiasaan ene tantu masigěsạ. Apa wotonge makatul᷊ung si kau? Pẹ̌tiněna apa tětal᷊u kebiasaan dal᷊akị ene. Basa Matius 22:​37-​39, bọu ene bisarai kerea měnosọ arau měpakẹ narkoba ene piạ pěngarune . . .

• su pẹ̌dal᷊ahapịu dingangi Yehuwa.

• su keluarga dingangu taumata su rěduhu.

Pěkoạe rencana gunang měngědo měkoạ kebiasaan dal᷊akị. * Putarẹ̌ VIDEONE.

Basa Filipi 4:​13, bọu ene bisarai kakiwal᷊o ini:

• Kerea marading mẹ̌doa, měngěndung Alkitapẹ̌, dingangu duměnta su pěngangibadang makaghělị katatoghasẹ̌ gunang měngědo měkoạ kebiasaan dal᷊akị?

 5. Lawangke tiněna dingangu kakanoạ mal᷊amuhụ

Basa Kolose 3:​5, bọu ene bisarai manga kakiwal᷊o ini:

• Kerea i kitẹ masingkạ pornografi, sexting, dingangu masturbasi ene mal᷊amuhụ su těngong Yehuwa?

• Tumuhụ si kau, apa masuẹ̌ su akal᷊ẹ̌ mạeng Yehuwa mẹ̌dorong i kitẹ burěsi secara moral? Kawe nụe?

Pěmandạe kerea i kitẹ botonge lumawang tiněna mal᷊amuhụ. Putarẹ̌ VIDEONE.

Yesus něpakẹ sasihing gunang měnodẹ i kitẹ harusẹ̌ těgasẹ̌ tadeạu tatapẹ̌ burěsi secara moral. Basa Matius 5:​29, 30, bọu ene bisarai kakiwal᷊o ini:

• Yesus tawe naul᷊ị i kitẹ harusẹ̌ měnilakạ badang i kitẹ, katewe i sie něnodẹ i kitẹ harusẹ̌ měkoạ sěmbaụ hal᷊ẹ̌. Kakanoạ těgasẹ̌ apa harusẹ̌ koateng gunang měnděmẹ tiněna mal᷊amuhụ? *

Mạeng i kau mětẹ̌tawakal᷊i lumawang tiněna mal᷊amuhụ, Yehuwa měngẹ̌ngarěga tawakal᷊inu. Basa Mazmur 103:​13, 14, bọu ene bisarai kakiwal᷊o ini:

• Mạeng i kau mětẹ̌tawakal᷊i lumawang kebiasaan dal᷊akị, kerea ayatẹ̌ ini botonge makatul᷊ung si kau?

 RINGKASAN

I kitẹ makal᷊uasẹ̌ si Yehuwa mạeng měndiagạ badang, tiněna, dingangu kakanoạ i kitẹ tatapẹ̌ burěsi.

Apa seng nikaěndungangu?

• Kawe nụe sěbạe penting tatapẹ̌ burěsi?

• Kerea tadeạu i kau burěsi secara jasmani?

• Kerea tadeạu tiněna lai kakanoạu tatapẹ̌ burěsi?