Andao hatao tihoe misy rene raike mampiakanjo ty ana’e lahilahy kedekede handeha hianatse. Nampiandroe’e i ana’ey sady nampagnisie’e akanjo malio naho milamigne. Amy izay reke ho salama soa sady ho trea tie mikarakara aze soa ty baba’e naho i rene’e. Tea i Jehovah Babantikagne halio ka tikagne. Toko’e halio ty vatantikagne naho ty fanagnantikagne vaho ty findesam-batantikagne. Amy izay tikagne handrambe soa sady hagnomey voninahitse i Jehovah.

1. Akore ty ampisehoantika tie ndaty malio tikagne?

Misaontsy ty Jehovah tie: “Toko’e ho masigne nareo.” (1 Petera 1:16) Masigne tikagne naho malio ty vatantikagne naho ty fanagnantikagne vaho ty findesam-batantikagne. Toko’e hiandro mateteke areke tika sady halio naho hilamigne ty akanjontikagne vaho ty tragnontikagne. Toko’e halio ka ty tobilentikagne, ty motòntikagne naho ty biskaletantikagne. Toko’e ho lioventikagne ka i Anjomba i Fanjakagneỳ. Magnomey voninahitse i Jehovah tikagne naho zatse malio.​—2 Korintianina 6:3, 4.

2. Ino ty fahazaran-draty toko’e hohalavirentikagne naho te halio tikagne?

Risihe ty Baiboly tikagne mba “hagnalio ty vatantikagne amy ze kila raha mandoto ty nofotse naho ty saigne.” (2 Korintianina 7:1) Halavirentikagne areke ze raha va’e hanimba ty vatantikagne ndra handoto ty saintikagne. Ze raha mampifale i Jehovah ro toko’e hameno ty saintikagne, le toko’e hikezake mafe tikagne mba tsy hieretseretse raha raty. (Salamo 19:14) Toko’e halio ka ty raha rehafentikagne.​—Vakio ty Kolosianina 3:8.

Ino ka ty raha va’e hahavy antikagne tsy halio? Va’e misy raha ila’e hanimba ty vatantikagne. Tsy mifoke sigara areke tikagne, tsy magnosoke ndra mampibeake paraky, tsy mitsako rave kokà sady tsy mampiasa fagnafoly ndra rongony mba hahazoagne fahafinaretagne. Ho salama soa tikagne naho tsy manao o raha rehoe, sady izay ka ty ampisehoantikagne fa sarobily amantikagne o aigneo. Tsy toko’e hagnente sare vetaveta ka tikagne ndra hikasikasike ty maha lahilahy ndra ty maha ampela satria maloto ty fanoagne o raha rehoe. (Salamo 119:37; Efesianina 5:5) Va’e ho sarotse ty misintake amo o fahazaran-draty rehoe, faie afake magnampe ty Jehovah.​—Vakio ty Isaia 41:13.

 ANDAO HANDINEKE TY PITSOPITSO’E

3. Magnomey voninahitse i Jehovah ty ndaty malio

Akore ty fihevera i Jehovah ty fahaliovagne? Magnampe antikagne hahafantatse izay ty lalàna nimei’e o Israelitao. Vakio ty Eksodosy 19:10; 30:17-19, sady iharò midineke ty fagnonteneagne retoa:

• Akore ty fihevera i Jehovah ty fahaliovagne naho henteagne o andinin-teny rehoe?

• Inogne iaby ty fahazaragne toko’e hanagnantikagne, amy izay tikagne malio lognandro?

Mitake fotoagne naho kezake tihoe zatse malio. Faie sambe afake manao izay iaby tikagne ndra aia ndra aia ty toeragne itobohantikagne sady ndra mpagnarivo tikagne ndra mahantra. Alefaso i VIDEO oy, sady iharò midineke ty fagnonteneagne toy.

• Nagnino ro hagnaja i Jehovah ze ndaty itoriantikagne naho fa trea’e tie malio naho milamigne i fitaovantikagne rey?

4. Isintaho o fahazaran-dratio

Naho mifoke sigara rehe ndra mampiasa rongony, le azo antoke fa fanta’o tie sarotse ty misintake amo o fahazaragne rehoe. Ino areke ty hagnampe azo? Eretsereto ty ho voka-draty o raha rehoe. Vakio ty Matio 22:37-39, sady iharò midineke tie: Naho mifoke sigara ndra rongony ty ndaty raike, le ino ty ho voka izay amy ty...

• fifandrambesa’e amy i Jehovah?

• keleia’e naho amy ty ndaty mifagnosehose ama’e?

Dineho tie, ino ty toko’e hatao’o mba hisintaha’o amy ty fahazaran-draty. a Alefaso i VIDEO oy.

Vakio ty Filipianina 4:13, sady iharò midineke ty fagnonteneagne toy:

• Nagnino ro hahavita hisintake amy ty fahazaran-drati’e ty ndaty raike naho fa zatse mivavake vaho mianatse Baiboly sady magnatreke fivoriagne?

 5. Ko mieretseretse raha raty ndra manao raha maloto

Vakio ty Kolosianina 3:5, sady iharò midineke ty fagnonteneagne retoa:

• Akore ty ahafantarantikagne fa maloto ty fihevera i Jehovah tihoe magnente sare vetaveta, mandefa sms misy rehake tsikivetaveta, ndra mikasikasike ty maha lahilahy ndra ty maha ampela?

• Misaontsy ty Jehovah tie, toko’e halio ty findesam-batantikagne. Ho vitantikagne vao zay arake ty heve’o? Ino ty anto’e?

Ino ty hagnampe antikagne tsy hieretseretse raha raty? Alefaso i VIDEO oy.

Nanao fagnoharagne ty Jesosy mba hampisehoagne tie toko’e hanao raha hentetse tikagne naho teantikagne halio avao ty findesam-batantikagne. Vakio ty Matio 5:29, 30, sady iharò midineke ty fagnonteneagne toy:

• Tsy te hirehake ty Jesosy tie toko’e hafahantikagne ty ratsambatantikagne. Ty tea’e horehafegne le tihoe, toko’e hanao raha hentetse tikagne. Inogne zao ohatse ty toko’e hatao ty ndaty raike naho tsy te hieretseretse raha raty reke? b

Mikezake mafe vao rehe mba tsy hieretseretse raha raty? Lahibey amy i Jehovah ty kezake atao’o. Vakio ty Salamo 103:13, 14, sady iharò midineke ty fagnonteneagne toy:

• Nagnino o andinin-teny iohoe ro magnampe azo tsy ho kivy, naho ohatse rehe mialy mafe mba hisintake amy ty fahazaran-drati’o?

 FAMINTIGNAGNE

Mampifale i Jehovah tikagne naho malio lognandro ty vatantikagne naho ty saintikagne vaho ty findesam-batantikagne.

Fameregnagne

• Nagnino ro tena lahibey tihoe malio?

• Akore ty ampisehoa’o tie ndaty malio rehe?

• Ino ty azo’o atao mba halio ty raha eretserete’o naho ty findesam-bata’o?