ITYOUGH 40
Se Er Nan Ve Se Lu Wang sha Ishigh ki Aôndo?
Tôô wer ngô ugen ngu wan, wan na u nomso iyol i yemen makeranta. A ôô un iyol tsembelee shi akondo a na kpa nga tsembelee. Er i ver ishima sha wan ne yô, ngu gbang gbang shi mbagenev kpa fa je ér mbamaren nav mba nengen sha a na tsembelee. Kape Ter wase Yehova u se doo un ishima la kpa, a soo ér se lu wang sha iyol man sha mhen kua sha iliam man ieren yase je la. Ka sea lu wang yô, kwagh la a wase se shi se na un icivir.
1. Se er nan ve se lu wang sha iyolo?
Yehova kaa a vese ér: “Lu nen uicighanmbaiorov.” (1 Peteru 1:16) Saa se lun wang sha iyol man sha aeren ase ve se lu uicighanmbaiorov ye. Se fatyô u lun wang sha iyol sha u ôôn iyol hanma shighe shi nengen ser akondo ase kua ya wase man kwaghhendan wase cii mba tsembelee. Shi se fatyô u za wasen tom u sôron Iyou i Tartor. Ka sea lu tsembelee sha iyol yô, kwagh la a va Yehova a icivir.—2 Mbakorinte 6:3, 4.
2. Ka aeren a nyi i gbe u se palegh sha er se lu wang na?
Bibilo taver se ishima ér, se “kire . . . hanma kwagh u hôngorough u sha iyol man u ken jijingi.” (2 Mbakorinte 7:1) Sha nahan yô, gba u se palegh hanma kwagh u una fatyô u hôngor iyol shin ishima yase cii. Gba u mbamhen asev kpa vea lu mba doon Yehova, nahan gba u se nôngo sha afatyô wase cii se palegh mbamhen mba bov. (Pasalmi 104:34) Shi ka se nôngo kpoghuloo se palegh iliam i dang.—Ôr Mbakolose 3:8.
Ka nyi igen kpa ia na se kera lu wang sha iyol shin sha ieren yase ga? Akaa agen nga aa fatyô u hôngor iyol yase yô. Sha nahan yô, ka se palegh akaa er taav u man kua kure-taav man mcimbim ma gen ma garen ityough shin menan icigh sha er se hingir geng yô. Ka sea palegh akaa ne yô, i kpe se iyol shi se tese ser uma u Aôndo a ne se ne gba se kwagh. Shi ka se nôngo kpoghuloo se lu wang sha aeren a ase kpaa sha u palegh ieren i ngirigh ilyeegh ki yaven a or kua u nengen ufoto mba ijimbagh. (Pasalmi 119:37; Mbaefese 5:5) Alaghga a lu se ican kpishi u den aeren ne, kpa sha iwasen i Yehova yô, se fatyô.—Ôr Yesaia 41:13.
HEN KWAGH I ZA SHIMI
Hen fa er i hii ve ka sea lu wang sha iyol ve, Yehova a zua a icivir la man er se fatyô u den aeren a hôngorough yô.
3. Ka sea lu wang sha iyol yô, Yehova a zua a icivir
Aluer se time sha atindi a Yehova yange wa Mbaiserael mba sha ayange a tsuaa la yô, se fa er Yehova ka a soo ér ior nav ve luun tsembelee yô. Ôr Ekesodu 19:10 man 30:17-19, maa lam nen sha mbampin mban:
-
Avur ne tese se nyi sha gbenda u Yehova a nengen kwagh u lun wang sha iyol laa?
-
Ka aeren a dedoo a nyi aa wase se, se za hemen u lun wang sha iyolo?
Ka i gba u se na shighe wase shi se nôngo kwagh kpoghuloo ve se lu wang sha iyol ye. Hanma ijiir i se lu kpa se fatyô u lun tsembelee aluer se mba a kwagh ave shin se mba mi ga kpaa. Nenge VIDIO i i lu heen ne, maa lam nen sha mpin u a dondo ne.
-
Aluer se mba veren ishima sha akaa ase tsembelee yô, ior mba se pasen ve kwagh la, vea hemba nan Yehova icivir nena?
4. De aeren a bo ne
Yehova una fatyô u wasen se u den nyityô ieren i bo cii
Aluer u me taav shin u me mcimbim ma garen ityough ker yô, u fa er ka i taver kpishi u den akaa ne yô. Kpa ka nyi ia fatyô u wasen we? Nenge kwagh u ieren shon i lu eren a we ne. Ôr Mateu 22:37-39, maa lam nen sha gbenda u taav shin mcimbim ma garen ityough ma a fatyô u benden a . . .
-
ijende i or ye a Yehova la yô.
-
tsombor u or kua mbagen mba ve lu ikyua a nan yô.
Ker gbenda u u kar ve u de ma ieren i bo yô. a Nenge VIDIO i i lu heen ne.
Ôr Mbafilipi 4:13, maa lam nen sha mpin ne:
-
Aluer or ngu eren msen hanma shighe shi henen Bibilo shi zan mbamkombo yô, kwagh la una wase nan u den ma ieren i bo nena?
5. Nôngo palegh mbamhen man aeren a wang ga
Ôr Mbakolose 3:5, maa lam nen sha mbampin mban:
-
Er nan ve se fe ser ufoto mba ijimbagh man ieren i tindin ior a ilyoho shin ufoto gayô uvidio mba ve tese kwagh u yaven a or i i yer ér sexting la, kua ieren i ngirigh ilyeegh ki yaven a or la ka kwagh u hôngorough sha ishigh ki Yehova?
-
U nenge wer Yehova soo ér se lu wang sha aeren a ase nahan ka shami? Er nan u ôr nahana?
Hen fa er u fatyô u nôngon den aeren a bo yô. Nenge VIDIO i i lu heen ne.
Yesu yange ôr kwagh u a tese ér gba u se nôngo kwagh kpoghuloo sha er se lu wang sha aeren yô. Ôr Mateu 5:29, 30, maa lam nen sha mpin ne:
-
Yesu yange lu kaan ér se er kwagh u una vihi se iyol ga, kpa lu kaan ér gba u se er kwagh fese. Ka nyi i gbe u or nana er sha u palegh mbamhen mbabovo? b
Aluer u ngu nôngon wer u de aeren a hôngorough ne yô, fa wer iniôngon you la gba Yehova kwagh. Ôr Pasalmi 103:13, 14, maa lam nen sha mpin ne:
-
Aluer u ngu nôngon wer u de ma ieren i hôngorough yô, ivur Bibilo ne i taver we ishima ér u de yen ishima ga nena?
Aluer u nôngo gbeev kpa, de gbe uwer ga!
Alaghga a lu ican ga u or henen ér, ‘Hembam, nahan me hii kpa me fatyô ga.’ Kpa hen ase sha kwagh ne: Aluer or ngu gban ayem maa nan za nôngo gbeev nan gba yô, tese ér ayem la hemba nan shin gba u nana hide a za hii ken ityô naa? Ei. Nahan aluer u nôngo gbeev kpa, tese ér u fatyô u den ieren i bo la ga ze. Umbur wer u ngu vanden nôngon kpoghuloo wer u de ieren la, nahan iniôngon you la saa ishe ga. Iyôngo hide ijime kpa cia num ga. Nahan de gbe uwer ga cii! Sha iwasen i Yehova yô, u fatyô u den ieren i bo la.
IOR MBAGENEV KA VE KAA ÉR: “Kwagh la hoghol mo. Me fatyô u den ga.”
-
Ka hanma ivur Bibilo nahan u tese or la wer sha iwasen i Yehova yô, nana fatyô u den ma ieren i bo?
KA NYI U HENE?
Ka sea lu wang sha iyol man sha mhen man sha ieren yô, se eren kwagh u doon Yehova.
Mbampin mba umbur kwagh u i hen yô
-
Er nan i gbe hange hange u se lu wang na?
-
U er nan ve u lu tsembelee?
-
U er nan ve u lu wang sha mhen kua ieren youwe?
SEER HENEN KWAGH
Ka akaa a kiriki a nyi nahan u er ve u seer lun tsembelee, aluer u ngu a kwagh ave ga je kpaa?
Fa akaa a u er ve u fatyô u den taav u man yô.
Nenge kwagh u ufoto mba ijimbagh ka ve er a or yô.
“Foto u Ijimbagh—Vihin Or Shin Vihin Ga?” (Iyoukura, Setemba 1, 2013)
Nenge er orgen yange nôngo kpoghuloo de u nengen ufoto mba jimbagh yô.
“Yange M Nôngo Gbeev Kwa Imôngo Cii Ve M Va Tile Dông Ye” (Iyoukura Namba 4 2016)
a Ngeren u a lu a itinekwagh ér, “Er U De Taav u Man Yô” u a lu hen vegher u Seer Henen Kwagh u ken ityough kin la, pase igbenda i u kar ve u fatyô u den taav u man yô.
b Wea soo u fan kwagh u una wase u u de ieren i ngirigh ilyeegh ki yaven a or la yô, nenge ngeren u “How Can I Conquer the Habit of Masturbation?” (Me Er Nan Ve Me De Ieren i Ngirigh Ilyeegh ki Yaven a Or Laa?) la ken takeda u Questions Young People Ask—Answers That Work, Tihi u sha 1, ityough 25.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
