WEKELO 40
Ngande wakokaso monga pudipudi lo washo wa Nzambi?
Ohɔsa dia mama kɛmɔtshi ka ngandji ekɔ lo nɔngɔsɔla ɔnande la pami dia nde ntshɔ otsha la kalasa. Nde amboyashikikɛ dia nde akɔki ndo ahɔndɔ ande wekɔ pudipudi ndo kɔmba. Dui sɔ kokɛka yoonge yande ya demba ndo mɛnyaka anto akina di’ambutshi ande ndjakiyanyaka dimɛna dikambo diande. Woho akɔ waamɛ mbele, Shɛso ka ngandji Jehowa nangaka dia sho monga pudipudi lo demba ndo lo lɔkɛwɔ. Etena keso pudipudi, sho kondjaka wahɔ ndo dui sɔ tombolaka Jehowa.
1. Ngande wakokaso monga pudipudi lo demba?
Jehowa totɛka ɔnɛ: “Nyu pombaka monga ekila.” (1 Petero 1:16) Dia monga ekila, sho pombaka monga pudipudi lo lɔkɛwɔ ndo lo demba. Sho kokaka monga pudipudi lo demba lo mbɔkaka mbala la mbala ndo lo salaka di’ahɔndɔ, luudu, mutuka, mututu kana dikalo diaso monga pudipudi ndo kɔmba. Sho koka nkimanyiya nto l’osolelo wa Mbalasa kaso ka Diolelo. Lo ntetemala monga pudipudi lo demba, sho mbishaka Jehowa lotombo.—2 Kɔrɛtɔ 6:3, 4.
2. Dia monga pudipudi, mbekelo yakɔna yahombaso mbewɔ?
Bible tokeketshaka dia sho “[ndjaɛdia] oma lo mindo tshɛ ya demba ndo ya yimba.” (2 Kɔrɛtɔ 7:1) Ɔnkɔnɛ, sho salaka tshɛ dia mbewɔ ɛngɔ tshɛ kakoka ndanya demba kana yimba yaso. Tokanyi taso pombaka ngɛnyangɛnya Jehowa, ɔnkɔnɛ sho salaka tshɛ dia mbikasha tokanyi ta mindo. (Osambo 104:34) Sho salaka nto la wolo dia nkamba l’ɛtɛkɛta wa pudipudi.—Adia Kɔlɔsayi 3:8.
Kakɔna nto kakoka todja mindo lo demba kana lo lɔkɛwɔ? Diangɔ dimɔtshi kokaka mbidja demba diaso mindo. Ɔnkɔnɛ, sho pombaka mbewɔ diangɔ diele oko mfɔka, kaandji ndo dinɔnɔ dia wolo. Lo mbewɔ diangɔ sɔ, sho mongaka la yoonge ya demba ya dimɛna efula ndo sho mɛnyaka dia sho nɛmiyaka woshasha wa lɔsɛnɔ. Sho salaka nto la wolo dia monga pudipudi lo lɔkɛwɔ lo ndɔshana la ditshelo dia kɔlɔ diele oko esuse ndo wendelo w’esato wɛnyawɔ anto etakataka. (Osambo 119:37; Ɛfɛsɔ 5:5) Kokaka monga tshondo y’okakatanu dia minya mbekelo shɔ, koko Jehowa kokaka tokimanyiya dia sho nsala dui sɔ.—Adia Isaya 41:13.
NYOMOTSHIMOLA
Enda woho wele pudipudi ka lo demba tombolaka Jehowa ndo woho wakokayɛ ntshika ditshelo dia mindo.
3. Pudipudi ka lo demba tombolaka Jehowa
Sho koka mbeya kanyi ya Jehowa lo kɛnɛ kendana la pudipudi lo nsɛdingola wadjango wakandasha Isariyɛlɛ w’edjedja. Nyadia Etombelo 19:10 ndo 30:17-19, ndo oma laasɔ, nyɔkɛtshanya ambola anɛ:
-
Kakɔna kɛnya avɛsa anɛ lo kɛnɛ kendana la kanyi ya Jehowa lo dikambo dia pudipudi ka lo demba?
-
Mbekelo yakɔna y’amɛna yayokokimanyiya dia ntshikala pudipudi lo demba?
Monga pudipudi lo demba mbɔsaka etena ndo nɔmbaka dia mbidja welo. Koko sho kokaka nsala dui sɔ oyadi dihole diakɔna diodjashiso kana ekondjelo kele la so. Nyende VIDƐO, ndo oma laasɔ, nyɔkɛtshanya dimbola diayela nɛ:
-
Ngande wele mbetɛ diangɔ diaso pudipudi ndo tɔkɔmba mbishaka olimu aso w’esambishelo nɛmɔ?
4. Totshike mbekelo ya kɔlɔ
Jehowa kokaka tokimanyiya dia ntshika mbekelo kɛmɔtshi ka kɔlɔ
Naka wɛ nɔɔka mfɔka kana didjoyadjoya dia ndjangɛnyangɛnya, kete eya dia wɛ ayonga l’okakatanu dia ntshika mbekelo kɛsɔ. Kakɔna kakoka kokimanyiya? Sɛdingola shɛngiya yele la mbekelo kɛsɔ le yɛ. Nyadia Mateo 22:37-39, ndo oma laasɔ, nyɔkɛtshanya woho wakoka ɔnwɛlɔ wa mfɔka kana okambelo wa kɔlɔ wa la didjoyadjoya monga la shɛngiya lo . . .
-
diɔtɔnganelo diasa onto la Jehowa
-
diɔtɔnganelo diasa onto la nkumbo kande ndo l’anto wodingi
Ɔsa yɛdikɔ ya ntshika mbekelo ka kɔlɔ. a Nyende VIDƐO.
Nyadia Filipɛ 4:13, ndo oma laasɔ, nyɔkɛtshanya dimbola nɛ:
-
Ngande wele monga la mbekelo ka dimɛna ka nɔmbaka, ka mbekaka ndo ka mbɔtɔka lo nsanganya koka mbisha onto wolo wa ntshika mbekelo kɛmɔtshi ka kɔlɔ?
5. Lɔshana la tokanyi ndo la ditshelo dia mindo
Nyadia Kɔlɔsayi 3:5, ndo oma laasɔ, nyɔkɛtshanya ambola anɛ:
-
Ngande weyaso dia wendelo w’esato wɛnyawɔ anto etakataka, mesajɛ wa kɔlɔ ndo esuse wekɔ mindo lo washo wa Jehowa?
-
Onde wɛ fɔnyaka dia ekɔ dui dia lomba le Jehowa dia nde tɔlɔmba dia sho monga pudipudi lo lɔkɛwɔ? Lande na?
Enda woho wakokayɛ ndɔshana la tokanyi ta mindo. Nyende VIDƐO.
Yeso akakambe l’ɛnyɛlɔ kɛmɔtshi dia tɛɛnya dia sho pombaka nsala tshɛ dia ntshikala pudipudi lo lɔkɛwɔ. Nyadia Mateo 5:29, 30, ndo oma laasɔ, nyɔkɛtshanya dimbola nɛ:
-
Kaanga mbele Yeso kototɛ dia ndjasalɛ kɔlɔ lo demba, nde akɛnya dia sho pombaka mbɔsa yɛdikɔ ya wolo. Naa yɛdikɔ ya wolo yakoka onto mbɔsa dia mbewɔ tokanyi ta mindo? b
Naka wɛ ekɔ lo ndɔshana la tokanyi ta kɔlɔ, kete eya dia Jehowa mbɔsaka welo wadjayɛ la nɛmɔ. Nyadia Osambo 103:13, 14, ndo oma laasɔ, nyɛkɛtshanya dimbola nɛ:
-
Naka wɛ ekɔ lo ndɔshana la mbekelo kɛmɔtshi ka kɔlɔ, ngande wakokeketsha divɛsa nɛ dia ntetemala ndɔshana la tɔ?
Tohekɔke!
Wɛ koka mfɔnya esadi eto ɔnɛ: ‘Lam’ele dimi kotondoya mbala ka ntondo, hatotondoya nto pondjo.’ Ohokanyiya dui nɛ: Naka ondawi ɔmɔtshi wa lowango ambotakana ko ambɔkɔ, kɛsɔ halembetshiya dia nde hayokoka ntetemala la lowango lande. Woho akɔ waamɛ mbele, kalolɛ mbekelo kɛmɔtshi ka kɔlɔ halembetshiya dia wɛ hatonga l’akoka wa kitondoya. Ndo dui sɔ hɛnya di’ehamelo tshɛ wamboyosala wambɔtɔ l’ashi. Naka wɛ ambɔkɔ, tɔkɔmɔke nɛ dia onto tshɛ takanaka. Tohekɔke. L’ekimanyielo ka Jehowa, wɛ kokaka ntshika mbekelo ka kɔlɔ kɛsɔ.
ANTO AMƆTSHI MBUTAKA ƆNƐ: “Dimi laya tshondo ya mfumbe ka didjoyadjoya. Handjokoka ntshika.”
-
Naa divɛsa diakoka nkamba la yɛ dia mɛnya onto ɔnɛ l’ekimanyielo ka Jehowa nde kokaka ntshika mbekelo kɛmɔtshi ka kɔlɔ?
LO TSHENA PE
Sho ngɛnyangɛnyaka Jehowa lo monga l’alemba, timba ndo la lɔkɛwɔ la pudipudi.
Ovuswelo
-
Lande na kele ekɔ ohomba monga pudipudi?
-
Ngande wakokayɛ monga pudipudi lo demba?
-
Ngande wakokayɛ ntetemala monga pudipudi lo tokanyi ndo lo lɔkɛwɔ layɛ?
SALA EYANGELO
Naa awui amɔtshi wa totshitshɛ wakokayɛ nsala dia monga pudipudi lo demba oyadi wɛ bu l’ekondjelo k’efula?
Enda wanya wa shikaa wakokayɛ ntakola dia ntshika nnɔ mfɔka.
Enda etombelo wele la wendelo w’esato wɛnyawɔ anto etakataka.
“Esato wɛnyawɔ anto etakataka—Wekɔ amɛna kana kɔlɔ?” (Tshoto y’Etangelo, Ngɔndɔ k’enanɛi 1, 2013)
Enda woho wakatshike pami kɛmɔtshi kaki mfumbe ka wendelo w’esato wɛnyawɔ anto etakataka mbekelo ka kɔlɔ kɛsɔ.
“Lakakɔ mbala efula la ntondo ka dimi ndjotondoya” (Tshoto y’Etangelo No. 4 2016)
a Sawo diele l’ɔtɛ a dui ɔnɛ: “Woho wa ntshika nnɔ mfɔka,” diele l’etenyi ka wekelo kata ɔnɛ Sala eyangelo, nembetshiyaka wanya w’eshika wakokaso ntakola dia ntshika monga mfumbe k’ɔnwɛlɔ wa mfɔka kana wa didjoyadjoya.
b Dia kokimanyiya dia ndɔshana la mbekelo ka kɔlɔ kendana la esuse, enda sawo diata ɔnɛ: “Ngande wakokami ntshika mbekelo ka salaka esuse?” lo dibuku Les jeunes s’interrogent. Réponses pratiques, volume 1, tshapita 25.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
