Kalilakpuwanti chatum xapaxkina tse tiku makaxma aktsu xkgawasa xlakata naʼan kʼescuela. Xla kuentajtlawa pi xkgawasa paxnit, pi xlhakgat xaskulunku chu tlan tasiya. Uma makgtaya xlakata ni natatatla chu kalimasiyani amakgapitsin pi xnatlatni lu kuentajtlawakgo. Xlakata Jehová kinTlatkan chu kinkapaxkiyan, lakaskin pi xaskulunku natawila kimaknikan chu xaskulunku nalinaw kilatamatkan. Akxni xaskulunku tawilayaw kinkamakgtayayan chu tlan lichuwinankan kiDioskan.

1. ¿La tlan xaskulunku natawilayaw?

Jehová kinkawaniyan: «Xaskulunku miliwanatkan» (1 Pedro 1:16). Xaskulunku wankan kilhchanima nakuentajtlawayaw kimaknikan chu chuna la linaw kilatamatkan. Limasiyayaw pi xaskulunku tawilayaw akxni paxaw, xaskulunku wiliyaw kilhakgatkan, kinchikkan chu kimputlawkan. Nachuna, makgtayananaw xlakata xaskulunku natawila kimPukgalhtawakgakan. Komo xaskulunku natawilayaw, max natlawa pi amakgapitsin namalankikgo Jehová (2 Corintios 6:3, 4).

2. ¿Tuku talismanin nalakgmakganaw xlakata xaskulunku natawilayaw?

Biblia kinkamaxkiyan uma tastakyaw: «Kachakgamakgaw putum tuku maxkajwani makni chu espíritu» (2 Corintios 7:1). Wa xlakata lakgmakganaw putum tuku namaxkajwani kimaknikan o kintalakapastaknikan. Chu komo makgapaxuwaputunaw Jehová, lu liskujaw xlakata nalakgmakganaw xalixkajni talakapastakni (Salmo 104:34). Nachuna, lu liskujaw xlakata ni lixkajni nachuwinanaw (kalikgalhtawakga Colosenses 3:8).

¿Tuku atanu max xkinkamaxkajwanin? Makgapitsi tuku maklakaskinkgo latamanin maxkajwi makni. Wa xlakata, ni maklakaskinaw axkut o lixkuli, ni lakgtsakgayaw xatuwan coca, nipara nuez de areca, na ni maklakaskinaw drogas chu ni malakatsaliyaw akxni maklakaskinaw likuchun. Akxni lakgmakganaw putum uma, kuentajtlawayaw kimaknikan chu limasiyayaw pi xtapalh liʼakxilhaw latamat. Nachuna, xlakata ni xataxkajwani nawanaw, xlakaskinka nalakgmakganaw nixatlan talismanin la akxilhkan pornografía o akxni chatum lataman wi tuku tlawa xlakata namakgkatsi pi wi tiku tatalakgxtumima (Salmo 119:37; Efesios 5:5). Max tuwa tamakgkatsi nalakgmakganaw umakgolh talismanin, pero Jehová lu kinkamakgtayaputunan (kalikgalhtawakga Isaías 41:13).

 TLAKG KALAKPUTSANANIW

3. Akxni xaskulunku tawilayaw malanki Jehová

Akxni likgalhtawakgayaw limapakgsin nema Jehová kamaxkilh israelitas, akgatekgsaw pi Jehová lu xlakaskinka akxilha xaskulunku natawilayaw. Kalikgalhtawakgatit Éxodo 19:10 chu 30:17-19 chu kalichuwinantit uma:

• ¿Tuku masiyakgo umakgolh versículo xlakata la akxilha Jehová xaskulunku natawilayaw?

• ¿Tuku kilitlawatkan xlakata xaskulunku natawilayaw putum kilhtamaku?

Talakaskin lu naliskujaw chu nalimaxtuyaw kilhtamaku xlakata xaskulunku natawilayaw, pero tlan xaskulunku natawilayaw maski tanu tanu kachikinin lamaw chu maski kgalhiyaw lhuwa tumin o ni kgalhiyaw. Kaʼakxilhtit VIDEO chu kalichuwinantit uma:

• Komo latamanin tiku kalitachuwinanaw Dios naʼakxilhkgo pi ni xataxkajwani tuku linaw o tuku kgalhiyaw, ¿lakpuwana wix pi uma tlakg nalimaxkikgo kakni Jehová? ¿Tuku xlakata?

4. Kamakgxtakgti nixatlan talismanin

Komo wix xkuliya, maklakaskina drogas o malakatsaliya la maklakaskina likuchun, max katsiya pi lu tuwa tamakgkatsi makgxtakgkan umakgolh talismanin. ¿Tuku namakgtayayan? Wa nalilakpuwana tuku nitlan tlawaniman kmilatamat. Kalikgalhtawakgatit Mateo 22:37-39 chu alistalh kalichuwinantit pi xkulikan, maklakaskinkan drogas chu malakatsalikan la maklakaskinkan likuchun laktlawa...

• ... la talalinaw Jehová.

• ... la katalalinaw kifamiliajkan chu amakgapitsi latamanin.

Kalilakpuwanti tuku tlan xtlawa xlakata namakgxtakga akgtum nixatlan talismanin. a Kaʼakxilhtit VIDEO.

Kalikgalhtawakgatit Filipenses 4:13 chu kalichuwinantit uma:

• ¿Lakpuwana wix pi komo natlawaya oración, nalikgalhtawakgaya Biblia chu napina ktamakxtumit namaxkiyan litliwakga xlakata namakgxtakga nixatlan talismanin? ¿Tuku xlakata chuna lakpuwana?

 5. Kamakgatlaja xalixkajni talismanin chu xalixkajni talakapastakni

Kalikgalhtawakgatit Colosenses 3:5 chu kalichuwinantit uma:

• ¿Tuku likatsiyaw pi sexteo, b akxilhkan pornografía chu akxni chatum lataman wi tuku tlawa xlakata namakgkatsi pi wi tiku tatalakgxtumima wa makgapitsi talismanin nema xkajni Jehová?

• ¿Xlilat pi Jehová nakinkaskiniyan ni xataxkajwani nalinaw kilatamatkan? ¿Tuku xlakata?

Kaʼakxilhti la tlan namakgatlajaya xalixkajni talakapastakni. Kaʼakxilhtit VIDEO.

Jesús maklakaskilh akgtum liʼakxilhtit xlakata xkinkamasiyanin pi xlakaskinka lu naliskujaw komo skulunku limputunaw kilatamatkan. Kalikgalhtawakgatit Mateo 5:29, 30 chu kalichuwinantit uma:

• Jesús ni xwamputun pi akstu xkinkatlawanikan tuku nitlan, wata xwamputun pi lu xliskujwi xlakata ni xtlawaw tuku nitlan. ¿Tuku kilitlawatkan xlakata ni nakgalhiyaw xalixkajni talakapastakni? c

Komo lu liskujpat nalakgmakgana xalixkajni talakapastakni, liwana kakatsi pi Jehová xtapalh akxilha tuku tlawapat. Kalikgalhtawakgatit Salmo 103:13, 14 chu kalichuwinantit uma:

• Komo lu liskujpat namakgxtakga xalixkajni talismanin, ¿lakpuwana pi umakgolh versículo namakgtayayan chuntiya naliskuja? ¿Tuku xlakata?

 TUKU KATSINIW

Makgapaxuwayaw Jehová akxni ni xataxkajwani tawila kimaknikan, kintapuwankan chu tlan linaw kilatamatkan.

¿Tuku xkgalhtinanti?

• ¿Tuku xlakata lu xlakaskinka xaskulunku natawilayaw?

• ¿Tuku kilitlawatkan xlakata nitu nalixkajwanan kimaknikan?

• ¿Tuku kilitlawatkan xlakata kintayatkan chu kintapuwankan ni xataxkajwani nawan?