SAMBIRO 40
Kasi Tingachita Wuli Kuti Tiŵe Ŵakutowa mu Maso gha Chiuta?
Muŵe nga mukuwona mama wakunozgekereska mwana wake kuti walute ku sukulu. Wakumugegiska, kumuphaka mafuta na kumuvwalika malaya ghakutowa. Ivi vikovwira mwana kuti wawonekenge makora ndipo ŵanthu nawo ŵakumanya kuti ŵapapi ŵake ŵakumupwelelera chomene. Mwakuyana waka, Yehova uyo ni Dada withu wachitemwa nayo wakukhumba kuti tiŵenge ŵakutowa mu ivyo tikuchita, kughanaghana na kuyowoya. Para tili ŵatuŵa tikuŵa ŵakukondwa ndipo tikupeleka ntchindi kwa Yehova.
1. Kasi tingachita wuli kuti tiŵe ŵakutowa mwakuthupi?
Yehova wakutiphalira kuti: “Muŵenge ŵatuŵa.” (1 Petrosi 1:16) Tikwenera kuŵa ŵatuŵa mwakuthupi kweniso mwauzimu. Tingaŵa ŵakutowa mwakuthupi para tikugeza nyengo zose, tikuchapa vyakuvwara, galimoto panji njinga yithu, kweniso para tikupwelelera panyumba. Tikweneraso kovwirapo kutozga pa Nyumba ya Ufumu. Tikuchindika Yehova para tikuŵa ŵakutowa mwakuthupi.—2 Ŵakorinte 6:3, 4.
2. Kasi tikwenera kugega vinthu wuli kuti tiŵe ŵakutowa?
Baibolo likutichiska kuti “tijitozge ku ukazuzi wose wa thupi na wauzimu.” (2 Ŵakorinte 7:1) Ichi chikung’anamura kugega chinthu chilichose icho chingananga thupi panji maghanoghano ghithu. Maghanoghano ghithu ghakwenera kukondweska Yehova, ntheura tikwenera kukana kughanaghana vinthu viheni. (Salimo 104:34) Tikweneraso kuŵikapo mtima kuti tigege kayowoyero kaheni.—Ŵazgani Ŵakolose 3:8.
Kasi ntchivichi chinyake icho chingapangiska kuti tiŵe ŵambura kutowa mwakuthupi kweniso mwauzimu? Pali vinthu vinyake ivyo vingananga thupi lithu. Ntheura tikwenera yayi kukhweŵa hona panji kugwiliskira ntchito munkhwala wakuzweteska wongo. Para tikuleka kuchita vinthu ivi, tikuŵa na umoyo uwemi ndipo tikulongora kuti tikuwona umoyo kuti ntchawanangwa chapadera chomene. Tikulongoraso kuti ndise ŵatuŵa para tikukana vizgoŵi viheni nga kunyenyenkha nkhuli panji kuwonelera vyamuziro. (Salimo 119:37; Ŵaefeso 5:5) Chingaŵa chakusuzga chomene kuti munthu waleke vizgoŵi ivi, kweni Yehova wangamovwira kuti waleke.—Ŵazgani Yesaya 41:13.
MANYANI VINANDI
Wonani umo tikuchindikira Yehova para ndise ŵakutowa, kweniso ivyo tingachita kuti tileke vizgoŵi viheni.
3. Tikuchindika Yehova para ndise ŵakutowa
Para tikuŵazga malango agho Yehova wakapeleka ku Ŵaisrayeli, tikumanya kuti Yehova wakukhumba kuti ŵanthu ŵake ŵaŵenge ŵakutowa. Ŵazgani Ekisodo 19:10 na 30:17-19, kufuma apo dumbiskanani mafumbo agha:
-
Kasi mavesi agha ghakulongora kuti Yehova wakukhumba kuti ŵanthu ŵake ŵawonekenge wuli mwakuthupi?
-
Kasi ni vinthu wuli ivyo vingatovwira kuti tilutilire kuŵa ŵakutowa mwakuthupi?
Munthu wakwenera kufwilirapo kweniso kupatura nyengo kuti waŵe wakutowa mwakuthupi. Tose tingaŵa ŵakutowa, kwali ndise ŵasambazi panji ŵakavu. Wonelerani VIDIYO, kufuma apo dumbiskanani fumbo ili.
-
Kasi ŵanthu awo tikuŵapharazgira ŵakukhwaskika wuli para vinthu vithu vikuwoneka vyakutowa?
4. Lekani vizgoŵi viheni
Yehova wangatovwira kuti tileke vizgoŵi viheni
Para muli kukhweŵapo hona panji kugwiliskira ntchito munkhwala wakuzweteska wongo, mungamanya umo vikusuzgira kuti munthu waleke vizgoŵi viheni. Kweni kasi ntchivichi chingamovwirani? Ghanaghanirani uheni wa vizgoŵi ivi. Ŵazgani Mateyu 22:37-39, kufuma apo dumbiskanani umo kukhweŵa hona kweniso kugwiliskira ntchito munkhwala wakuzweteska wongo vingakhwaskira . . .
-
ubwezi winu na Yehova.
-
ŵa mu banja linu panji awo muli nawo pafupi.
Ŵikanipo mtima kuti muleke vizgoŵi viheni. a Wonelerani VIDIYO.
Ŵazgani Ŵafilipi 4:13, kufuma apo dumbiskanani fumbo ili:
-
Kasi lurombo, kusambira pamwekha, kweniso maungano vingawovwira wuli munthu kuti waleke vizgoŵi viheni?
5. Gegani maghanoghano ghaheni kweniso kuchita vinthu viheni
Ŵazgani Ŵakolose 3:5, kufuma apo dumbiskanani mafumbo agha:
-
Kasi tikumanya wuli kuti Yehova wakutinkha kuwonelera vinthu vyamuziro, kutumizgirana mameseji gha vya kugonana, kweniso kunyenyenkha nkhuli?
-
Kasi mukuwona kuti ntchakwenelera kuti Yehova wakhazgenge kuti tiŵe ŵakutowa? Chifukwa wuli?
Wonani ivyo mungachita kuti muleke kughanaghana vinthu viheni Wonelerani VIDIYO.
Yesu wakayowoya chiyelezgero icho chikulongora kuti tikwenera kuchitapo kanthu kuti tilutilire kuŵa ŵakutowa mwauzimu. Ŵazgani Mateyu 5:29, 30, kufuma apo dumbiskanani fumbo ili:
-
Apa fundo ya Yesu yikaŵa yakuti tikwenera kujipweteka nadi yayi, kweni wakang’anamuranga kuti tikwenera kuchitapo kanthu kuti tiŵe ŵakutowa. Kasi munthu wangachita wuli kuti wakanizge maghanoghano ghaheni? b
Yehova wakukondwa chomene para mukuyezeska kukanizga maghanoghano ghaheni. Ŵazgani Salimo 103:13, 14, kufuma apo dumbiskanani fumbo ili:
-
Kasi lemba ili, lingamovwirani wuli para vikumusuzgani kumazga vizgoŵi viheni?
Kugongowa yayi
Ntchipusu kuyowoya kuti, ‘Pakuti nabudiskaso, mbwenu vyanitonda ningakwaniskaso yayi.’ Kweni mungachita makora kughanaghanira fundo iyi: Para munthu uyo wakuchita chiphalizgano chakuchimbira wakhuŵara na kuwa, ndikuti waluza yayi panji kuti wakwambiraso pakwamba chiphalizgano, kweni wakuwuka na kulutilira kuchimbira. Mwakuyana waka, para munthu wakuyezeska kuleka vizgoŵi viheni kweni vikumutonda, chikung’anamura kuti ngwakutondeka yayi. Imwe wonani waka viwemi ivyo mukuyezgayezga kuchita. Para munthu wakukhumba kuleka kuchita chinthu chinyake chiheni, wakuleka nyengo yeneyiyo yayi. Kugongowa yayi! Yehova wangamovwirani kuleka vizgoŵi viheni.
IVYO ŴANYAKE ŴAKUYOWOYA: “Nazgoŵera kuchita ivi, ndipo vikunisuzga kuleka.”
-
Kasi mungamujulira lemba wuli ilo likulongora kuti Yehova wangamovwira kuleka vizgoŵi viheni?
MWAKUDUMURA
Tikukondweska Yehova para tikuŵa ŵakutowa mwakuthupi, mu maghanoghano kweniso mu vyakuchita.
Kuweleramo
-
Chifukwa wuli ntchakuzirwa kuŵa ŵakutowa?
-
Kasi mungachita wuli kuti muŵe ŵakutowa mwakuthupi?
-
Kasi mungachita wuli kuti mulutilire kuŵa ŵakutowa mu maghanoghano kweniso mu vyakuchita?
SANGANI FUNDO ZAKUSAZGIKIRA
Kasi ni vinthu wuli ivyo mungachita kuti muŵe ŵakutowa mwakuthupi nanga mungaŵa kuti muli ŵakavu?
Wonani vinthu vinyake ivyo mungachita kuti muleke kukhweŵa hona.
“Kasi Mungachita Wuli Kuti Muleke Kukhweŵa Hona?” (Wukani!, Meyi 2010)
Wonani uheni wakuwonelera vinthu vyamuziro.
“Chenjerani na Vinthu Vyamuziro!” (Gongwe la Mulinda, Ogasiti 1, 2013)
Wonani ivyo vikawovwira mwanalume munyake kuti waleke kuwonelera vinthu vyamuziro.
“Nkhatondeka Kanandi Waka, Kweni Pamanyuma Nkhasintha” (Gongwe la Mulinda Na. 4 2016)
a Nkhani ya mutu wakuti “Kasi Mungachita Wuli Kuti Muleke Kukhweŵa Hona?,” iyo yili pa chigaŵa chakuti Sangani Fundo Zakusazgikira, yikulongosora ivyo munthu wangachita kuti waleke vizgoŵi viheni.
b Kuti mumanye ivyo vingamovwirani kuti mumazge chizgoŵi cha kunyenyenkha nkhuli, wonani nkhani yakuti “Kasi Mungachita Wuli Kuti Muleke Chizgoŵi Chakunyenyenkha Nkhuli?” mu buku la Mazgoro gha Ivyo Ŵachinyamata Ŵakufumba, Buku Lakwamba, mutu 25.
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
