Mafaufau ki se mātua alofa telā e fakatoka tena tamaliki tagata ki te akoga. E fakamautinoa aka ne tou fafine me e koukou tena tamaliki kae ‵ma ana gatu. E fai ne te mea tenei ke malosi ‵lei tena tama kae fakaasi atu foki ki nisi tino me e tausi faka‵lei ana mātua ki a ia. E penā foki te ‵tou Tamana alofa ko Ieova, e manako a ia ke ‵ma tatou—i te feitu faka-te-foitino mo mea tau amioga. Kafai e ‵ma tatou, ka maua ne tatou i ei a mea aoga kae fakaaloalo atu foki ki a ia.

1. E mafai pefea o ‵ma tatou i te feitu faka-te-foitino?

E fai mai a Ieova ki a tatou: “E ‵tau mo koutou o tapu.” (1 Petelu 1:16) A te tapu e isi sena sokoga ki te ‵ma i te feitu faka-te-foitino mo mea tau amioga. E mafai o ‵ma tatou i te feitu faka-te-foitino mai te kou‵kou faeloa kae tausi ke ‵ma ‵tou gatu, fale, mo mea fakatele‵tele. E mafai foki o fesoasoani tatou ki te ‵fuluga o ‵tou Fale Tapuaki. A te tumau i te ‵ma i te feitu faka-te-foitino e fakaaloalo atu ei ki a Ieova.—2 Kolinito 6:3, 4.

2. Ke ‵ma tatou, ne a faifaiga masani e ‵tau o ‵kalo keatea mai i ei?

E fakamalosi mai te Tusi Tapu ke “faka‵ma la tatou mai i so se mea e fakalailai ei te foitino mo te agaga.” (2 Kolinito 7:1) Tela la, e taumafai malosi tatou o ‵kalo keatea mai i so se mea e fakamasei ne ia ‵tou foitino mo ‵tou mafaufau. E ‵tau o fakafiafia ‵tou mafaufauga ki a Ieova, tela la, e fakaoti ‵tou mafi ke ‵teke atu a mafaufauga sē ‵lei. (Salamo 104:34) E taumafai malosi foki tatou ke ‵ma ‵tou pati.—Faitau te Kolose 3:8.

Ne a nisi mea e mafai o fai ei tatou ke se ‵ma i te feitu faka-te-foitino io me ko mea tau amioga? E isi ne mea kolā e mafai o fakamasei ei ‵tou foitino. Tela la, e ‵kalo keatea tatou mai i vaegā mea pelā mo te paka, te lamulamuga o betel nut io me ko lau o te coca, mo te fakaaogaga ‵se o vailakau tapu. A te ‵kalo keatea mai mea konei, ka fai ei ke malosi ‵lei tatou kae fakaasi atu foki te āva ki te meaalofa ko te ola. E taumafai foki tatou ke ‵ma i mea tau amioga, mai te ‵teke atu ki faifaiga sē ‵ma, e pelā mo te fai tokotasi mo te onoono ki ata ma‵sei. (Salamo 119:37; Efeso 5:5) E mafai o faigata ke manumalo i faifaiga masani konei kae e mafai eiloa o fesoasoani mai a Ieova ki a tatou.—Faitau te Isaia 41:13.

 KELI MALOSI IFO

3. A te ‵ma i te feitu faka-te-foitino e fakaaloalo atu ei ki a Ieova

E mafai o iloa ne tatou te kilokiloga a Ieova e uiga ki te ‵tu ‵ma māfai e iloilo aka ne tatou ana fakatonuga ki te kau Isalaelu i aso mua. Faitau te Esoto 19:10 mo te 30:17-19, ko sau‵tala ei ki fesili konei:

• Ne a mea e fakaasi mai i fuaiupu konei e uiga ki te kilokiloga a Ieova ki te ‵ma i te feitu faka-te-foitino?

• Ne a faifaiga masani ‵lei ka fesoasoani atu ki a koe ke tumau i te ‵ma i te feitu faka-te-foitino?

E manakogina a taimi mo taumafaiga ke fakatumau te ‵ma i te feitu faka-te-foitino. Kae e mafai eiloa o fai tatou penā, faitalia te koga e ‵nofo i ei io me ko te tulaga o tatou i mea tau tupe. Pei te VITIO, ko sau‵tala ei ki te fesili tenei.

• E faka‵malu pefea a te galuega talai e auala i te tausiga o ‵tou kope ke ‵ma?

4. Ke manumalo i faifaiga masani sē ‵lei

Kafai koe e ‵pusi io me fakaaoga ‵se a vailakau tapu, kāti e iloa ne koe te faigata ke manumalo i te faifaiga masani tenā. Se a te mea e mafai o fesoasoani atu? Mafaufau ki te auala e mafai o pokotia ei koe i te faifaiga masani tenā. Faitau te Mataio 22:37-39, ko sau‵tala ei ki te auala e fai ne te paka mo te fakaaogaga ‵se o vailakau tapu ke pokotia . . .

• te va fakataugasoa o se tino mo Ieova

• a kāiga o se tino mo tino i ana tafa

Fai se palani ke manumalo i se faifaiga masani sē ‵lei. a Pei te VITIO.

Faitau te Filipi 4:13, ko sau‵tala ei ki te fesili tenei:

• E maua pefea ne se tino a te malosi ke ‵teke atu ki se faifaiga masani sē ‵lei mai te ‵talo, sukesuke ki te Tusi Tapu mo te kau atu faeloa ki fakatasiga?

 5. Ke ‵teke atu ki mafaufauga mo faifaiga sē ‵ma

Faitau te Kolose 3:5, ko sau‵tala ei ki fesili konei:

• E iloa pefea ne tatou me i te onoono ki ata ma‵sei, te aveavega o pati mo ata sē ‵lei i selefoni, mo te fai tokotasi e se ‵ma i te kilokiloga a Ieova?

• Se a tau faka‵tau, se mea ‵lei ke manako a Ieova ke ‵ma tatou i ‵tou amioga? Kaia?

‵Sala ki auala ke ‵teke atu ki mafaufauga sē ‵ma. Pei te VITIO.

Ne fakaaoga ne Iesu se tala fakatusa ke fakaasi mai me e ‵tau mo tatou o gasue‵sue fakavave ke tumau i te ‵ma i mea tau amioga. Faitau te Mataio 5:29, 30, ko sau‵tala ei ki te fesili tenei:

• E tiga eiloa ne seki fai mai a Iesu ke fakalogo‵mae ne tatou a tatou eiloa i te feitu faka-te-foitino, ne fakaasi mai ne ia me e ‵tau mo tatou o gasue‵sue fakavave. Ne a vaegā mea e ‵tau o fai fakavave ne se tino ke ‵kalo keatea mai mafaufauga sē ‵ma? b

Kafai e taumafai malosi koe ke manumalo i mafaufauga sē ‵ma, e fakatāua ne Ieova au taumafaiga. Faitau te Salamo 103:13, 14, ko sau‵tala ei ki te fesili tenei:

• Kafai e taumafai malosi koe o ‵teke atu ki se faifaiga masani sē ‵ma, e fakamalosi mai pefea te tusi faitau tenei ke tumau koe i te ‵teke atu ki ei?

 MANATU AOGA

E fakafiafia ne tatou a Ieova mai te tausiga o ‵tou foitino, ‵tou mafaufau, mo ‵tou amioga ke ‵ma.

Fesili

• Kaia e tāua malosi ei ke ‵ma tatou?

• E mafai pefea o tumau koe i te ‵ma i te feitu faka-te-foitino?

• E mafai pefea o fakatumau ne koe te ‵ma o ou mafaufauga mo au amioga?