XCHANOBIL 40
¿Kʼuxi xuʼ sakutik ta stojolal li Diose?
Nopo noʼox avaʼi ti oy jun meʼil ti yakal tsmeltsan yuni kerem sventa xbat ta chanune. Tskʼel ti sakuk li skʼuʼe, ti tusbiluk sjole xchiʼuk ti lekuk xvinaje. Taje jaʼ sventa mu x˗ipaj li kereme xchiʼuk chilik yantik ti kʼanbil yuʼun stot smeʼe. Li Jeova ti jaʼ Jtotik xchiʼuk ti skʼanojutik tajeke tskʼan ti sakuk jbekʼtaltik o li kʼusitik oy kuʼuntike xchiʼuk ti sakuk jkuxlejaltike. Ta jtabetik sbalil kʼalal lek sakutike xchiʼuk lek chkom skʼoplal kuʼuntik li Diose.
1. ¿Kʼusi smakoj ti sakuk jbekʼtaltik xchiʼuk li kʼusitik oy kuʼuntike?
Xi chalbutik li Jeovae: «Skʼan me chʼulukoxuk» (1 Pedro 1:16). Sventa chʼulukutike, skʼan sakuk jbekʼtaltik o li kʼusitik oy kuʼuntike xchiʼuk ti sakuk li jkuxlejaltike. Jaʼ jech chkakʼtik ta ilel ti sakutik noʼox mi nopolik noʼox chij˗atine, mi chukʼbil li jkʼuʼtike, mi lek mesbil chʼubabil li jnatike xchiʼuk mi pokbil li jkarrotike. Jech xtok, skʼan ta yaviluk oy skotol. Skʼan jkolta jbatik xtok ta xchʼubael li Salon sventa Tsobobbaile. Kʼalal lek sakutike, lek skʼoplal chkom li Jeovae (2 Korintios 6:3, 4).
2. ¿Kʼusitik skʼan mu jpastik sventa sakuk li jkuxlejaltike?
Xi chalbutik mantal li Vivliae: «Jsakubtas jbatik ta sventa li kʼusi tsokes jbekʼtaltike xchiʼuk li kʼusi oy ta jnopbentike» (2 Korintios 7:1). Jaʼ yuʼun, chkakʼtik persa ti mu kʼusi sokes jbekʼtaltik o jnopbentike. Ta skoj ti ta jkʼantik ti lekuk xil Jeova li kʼusi ta jnoptike, chkakʼtik persa sventa mu jtikʼ ta jnopbentik li kʼusitik chopole (Salmo 104:34). Jech xtok, chkakʼtik persa ti mu xlokʼ ta ketik li kʼusitik chopole (kʼelo Kolosenses 3:8).
¿Kʼusitik yan xuʼ xikʼubtas li jbekʼtaltik o jkuxlejaltike? Oy kʼusitik xuʼ sokes li jbekʼtaltike, jaʼ yuʼun muʼyuk chijsikʼolaj, muʼyuk ta jlajestik kokaina xchiʼuk yan drogaetik. Jech xtok, muʼyuk ta jlajestik epal poxiletik ti mu jechuk yaloj doktore. Kʼalal muʼyuk ta jlajestik li kʼusitik taje, jaʼ jech ta jchabi jbatik xchiʼuk jaʼ jech chkakʼtik ta ilel ti jkʼuxubinojtik li jkuxlejaltike. Jech xtok, sventa sakuk li jkuxlejaltike, skʼan xkakʼtik persa ti mu jpastik li kʼusitik toj ibal sba jech kʼuchaʼal li yixtolanel jkʼuniltike o ti jkʼeltik pornografiae (Salmo 119:37; Efesios 5:5). Xuʼ van vokol chkaʼitik yiktael skotol taje, pe li Jeovae oy ta yoʼonton tskoltautik (kʼelo Isaias 41:13).
JCHANTIK TO BATEL MAS
Jkʼeltik batel kʼu yuʼun lek skʼoplal chkom Jeova mi sak noʼox jbekʼtaltik xchiʼuk li kʼusitik oy kuʼuntike. Jech xtok, jkʼeltik kʼuxi xuʼ xkom kuʼuntik li kʼusi meʼinem ta koʼontontike.
3. Lek skʼoplal chkom Jeova mi sakutik noʼoxe
Li mantaletik laj yakʼ Jeova ta sventa li j˗israeletik ta voʼnee chakʼ kiltik ti toj tsots skʼoplal chil ti sakukutike. Kʼelik Eksodo 19:10 xchiʼuk 30:17-19 xchiʼuk albeik skʼoplal li sjakʼobiltak liʼe:
-
Jech kʼuchaʼal chal li versikuloetik liʼe, ¿kʼu yelan chil Jeova ti skʼan sakuk jbekʼtaltik xchiʼuk li kʼusitik oy kuʼuntike?
-
¿Kʼusitik skʼan xnop xkaʼitik spasel sventa sakukutik noʼoxe?
Sventa spas kuʼuntike, skʼan jchʼak jkʼakʼaltik xchiʼuk skʼan xkakʼ kipaltik. Pe spas kuʼuntik, mu ventauk bu nakalutik, mi jkʼulejutik o mi povreutik. Kʼelik li VIDEOE xchiʼuk albeik skʼoplal li sjakʼobil liʼe:
-
Kʼalal ta jcholtik mantale, ¿kʼu yuʼun xuʼ xichʼik˗o ta mukʼ Jeova kʼalal chilik ti sak noʼox li kʼusitik oy kuʼuntike?
4. Iktao li kʼusi chopol meʼinem ta avoʼontone
Li Jeovae tskoltautik ta yiktael kʼusuk noʼox ti meʼinem ta koʼontontike.
Mi chasikʼolaj, mi chalajes droga o mi ta jech noʼox ep chalajes poxiletike, xuʼ van anaʼoj ti vokol ta iktaele. Li kʼusi tskoltaot sventa xkom avuʼune jaʼ ti xanopbe skʼoplal kʼu yelan tsokes li akuxlejale. Kʼelik Mateo 22:37-39 xchiʼuk albeik skʼoplal kʼu yelan tsokesvan li sikʼolal xchiʼuk yan drogaetik...
-
... ti kʼu yelan xkil jbatik xchiʼuk Jeovae.
-
... li ta kutsʼ kalaltik xchiʼuk ta stojolal li yantike.
Nopo kʼusi xuʼ xapas sventa stsal avuʼun li kʼusi meʼinem ta avoʼontone. a Kʼelik li VIDEOE.
Kʼelik Filipenses 4:13 xchiʼuk albeik skʼoplal li sjakʼobiltak liʼe:
-
Li buchʼu oy kʼusi meʼinem ta yoʼontone, ¿mi chkoltaat xanaʼ mi tspas orasion, mi chchan Svivlia xchiʼuk mi chbat ta tsobajeletike? ¿Kʼu yuʼun ti jech chavale?
5. Akʼo persa yiktael li kʼusi chopol chapas xchiʼuk chanope
Kʼelik Kolosenses 3:5 xchiʼuk albeik skʼoplal li sjakʼobiltak liʼe:
-
¿Kʼuxi jnaʼtik ti ibal sba chil Jeova li pornografiae, li sexteoe xchiʼuk li buchʼu chixtolan skʼunile?
-
¿Mi oy srason Jeova xanaʼ ti chalbutik ti skʼan sakuk jkuxlejaltike? ¿Kʼu yuʼun ti jech chavale?
Kʼelavil kʼuxi xuʼ xkom avuʼun li kʼusitik chopol chanope. Kʼelik li VIDEOE.
Li Jesuse oy kʼusi laj yal sventa xakʼ kiltik ti oy kʼusi skʼan jpastik sventa sakuk jkuxlejaltike. Kʼelik Mateo 5:29, 30 xchiʼuk albeik skʼoplal li sjakʼobil liʼe:
-
Li Jesuse maʼuk la skʼan laj yal ti ta jyayijes jbatike, jaʼ noʼox laj yal ti oy kʼusi skʼan jpastike. ¿Kʼusitik skʼan jpastik sventa jiptik lokʼel li kʼusitik chopol ta jnoptike? b
Mi yakal chavakʼ persa yiktael li kʼusi chopol chanope, naʼo me ti ep sbalil chil li Jeovae. Kʼelik Salmo 103:13, 14 xchiʼuk albeik skʼoplal li sjakʼobil liʼe:
-
Mi oy kʼusi yakal chavakʼ persa yiktaele, ¿kʼuxi chakʼ avipal li versikuloetik liʼe?
¡Mu xachibaj mi la apas yan veltae!
Xuʼ van xi chtal ta jnopbentik ta anile: «Laj xa noʼox jpas yan velta xtok. Jecheʼ xa chkakʼ persa». Jnoptik avaʼi ta stojolal jun j˗anilajel: kʼalal tstsʼuje, maʼuk skʼan xal ti te xa chʼay˗oe o ti chbat slikes tal yan veltae. Kʼalal ta jpastik yan velta li kʼusi chopol meʼinem ta koʼontontike, maʼuk skʼan xal ti mu xa stsal˗o kuʼuntike xchiʼuk ti muʼyuk xa sbalil li kʼusitik jpasojtik tale. Stalel onoʼox ti oy bu mu xkaʼitik ta jpastik yan veltae, yuʼun ta kʼunkʼun chkom kuʼuntik. Jaʼ yuʼun, ¡mu xachibaj! Tskoltaot Jeova sventa x˗iktaj avuʼun.
JUNANTIKE XI CHALIKE: «Meʼinem xa ta koʼonton, mu xa xkom kuʼun».
-
¿Kʼusi tekstoal ta Vivlia xuʼ xavakʼbe yil ti chkoltaat yuʼun Jeova yoʼ x˗iktaj yuʼune?
¿KʼUSI LA ACHAN?
Mi sak noʼox jbekʼtaltik, jnopbentik xchiʼuk jtalelaltike, xmuyubaj kuʼuntik li Jeovae.
Svulesobil ta joltik
-
¿Kʼu yuʼun tsots skʼoplal ti sakukutik ta skotole?
-
¿Kʼusi skʼan jpastik sventa sakuk noʼox jbekʼtaltik xchiʼuk li kʼusitik oy kuʼuntike?
-
¿Kʼusi skʼan jpastik sventa sakuk noʼox li jtalelaltik xchiʼuk jnopbentike?
XUʼ TO XAKʼEL LIʼE
Akʼo mi muʼyuk mas kʼusi x˗ayan kuʼuntik, ¿kʼusitik stakʼ jpastik sventa sakukutik noʼoxe?
Mu xij˗ipaj xchiʼuk sakuk noʼox jbekʼtaltik: jpok jkʼobtik (3:01)
Kʼelavil kʼusi xuʼ xapas sventa xavikta li sikʼolajele.
«Xuʼ xavikta li sikʼolajele» (¡Vikʼiluk me jsatik!, mayo ta 2010)
Kʼelavil kʼu yuʼun toj xibal sba li pornografiae.
«¿Mi tsokesvan li pornografiae?» (Li Jkʼel-osil ta toyole, 1 yuʼun agosto ta 2013)
Kʼelavil kʼusi koltaat jun vinik sventa xikta skʼelel li pornografiae.
«Ep ta velta mu onoʼox spas yaʼeluk, pe kom onoʼox kuʼun» (Li Jkʼel-osil ta toyole, num. 4 2016)
a Li ta xchanobil liʼe, ti bu chal «Xuʼ to xakʼel liʼe», xuʼ xakʼel li mantal «Xuʼ xavikta li sikʼolajele».
b Mi chakʼan chanaʼ kʼuxi ta iktael li yixtolanel jkʼuniltike, xuʼ xakʼel li mantal «¿Mi xkom kuʼun li yixtolanel jkʼunile?» (Li kʼusi tsjakʼ kerem tsebetike. Stakʼobiltak, volumen 1, kapitulo 25).
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
