UYONO 40
Mavọ Yen A sa Vwọ Dia Ihwo Efuanfon Vwẹ Ẹro rẹ Ọghẹnẹ?
Vwẹro roro oni ọvo ro muegbe rẹ ọmọshare rọyen kẹ isikuru. Ọ nabọ họ ọmọ na ji ku ewun ọfuanfon phiyọ. Ọnana nẹrhẹ ọmọ na vwo omakpokpọ je nẹrhẹ ihwo efa riẹn nẹ ọsẹ vẹ oni rọyen nabọ vwẹrote. Vwẹ idjerhe vuọvo na, Ọsẹ rẹ avwanre ro vwo ẹguọnọ, Jihova guọnọre nẹ avwanre dia fuanfon vwọrẹ ugboma vẹ iroro. A da dia fuanfon, a cha mrẹ erere ji brọghọphiyọ Jihova oma.
1. Mavọ yen a sa vwọ dia fuanfon vwọrẹ ugboma?
Jihova da ta: “Ovwan ke fon.” (1 Pita 1:16) A vwọ dia fuanfon, ofori nẹ iroro vẹ ugboma rẹ avwanre fon. A sa dia fuanfon vwọrẹ ugboma siẹrẹ a da họ ọkieje, fọnrọ iwun rẹ avwanre, hwere uwevwin ji ruẹ imoto rẹ avwanre fuanfon. E ji se ru Ọguan Ruvie rẹ avwanre fon. A da fon vwọrẹ ugboma, e che brọghọphiyọ Jihova oma.—2 Kọrẹnt 6:3, 4.
2. Iruemu vọ yen a cha kẹnoma kẹ a sa vwọ dia fuanfon?
Baibol na tare nẹ, “avwanre họ oma rẹ avwanre nẹ ẹgua rẹ ugboma vẹ erhi.” (2 Kọrẹnt 7:1) Ọtiọyena, avwanre kẹnoma kẹ obo re sa wan avwanre oma vwọrẹ ugboma yẹrẹ ẹwẹn. Ofori nẹ iroro rẹ avwanre shephiyọ ọhọre ri Jihova, eriyina avwanre kẹnoma kẹ erharhe iroro. (Une Rẹ Ejiro 104:34) Avwanre je davwẹngba vwọ ta eta esiri.—Se Kọlose 3:8.
Die ọfa yen sa nẹrhẹ ugboma vẹ iroro rẹ avwanre dia gbegbe? Erọnvwọn evo sa so imuoshọ kẹ ugboma rẹ avwanre. Ọtiọyena, avwanre kẹnoma kẹ itaba ese, isigati ephopho kugbe ihuvwun egangan. Avwanre ji muẹ ihuvwun rọ-ọ. A da kẹnoma kẹ ayen, ọ cha nẹrhẹ e vwo omakpokpọ ji muọghọ kẹ okẹ rẹ arhọ. Avwanre je dia fuanfon vwọrẹ iroro womarẹ a vwọ họnra vwọso iruemu ri jẹfuọn kerẹ e vwo duẹ omobọ rẹ ohwo kugbe e vwo nẹ ihoho rẹ ihwo re banphiyọ. (Une Rẹ Ejiro 119:37; Ẹfesọs 5:5) Ọ sa bẹn e vwo phi iruemu nana kparobọ, ẹkẹvuọvo Jihova sa chọn avwanre uko.—Se Aizaya 41:13.
HIẸ KODO
Roro kpahen oboresorọ ẹfuọn rẹ ugboma vwo brọghọphiyọ Jihova oma, wọ je mrẹ obo wo se vwo phi erharhe iruemu kparobọ.
3. Ẹfuọn rẹ ugboma brọghọphiyọ Jihova oma
A sa riẹn ẹro rẹ Jihova vwo nẹ ẹfuọn rẹ ugboma siẹrẹ a da fuẹrẹn iji rọ vwọ kẹ ihwo rẹ Izrẹl rẹ awanre. Se Eyanno 19:10 kugbe 30:17-19, ovwan ta ota kpahen enọ nana:
-
Die yen ẹkpo ri Baibol na ta kpahen ẹro rẹ Jihova vwo nẹ ẹfuọn rẹ ugboma?
-
Omamọ rẹ uruemu vọ yen cha chọn wẹ uko vwọ dia fuanfon vwọrẹ ugboma?
Ọ reyọ ọke vẹ ẹgbaẹdavwọn a ke sa dia fuanfon vwọrẹ ugboma, ẹkẹvuọvo e ghini se ruo otoro asan ra dia yẹrẹ uche igho re vwori-i. Hworo IVIDIO na, ovwan ta ota kpahen onọ ro nenire.
-
Die yen cha nẹrhẹ ihwo re ghwoghwota kẹ muọghọ kẹ Jihova siẹrẹ ayen da mrẹ nẹ ekuakua rẹ avwanre pha fuanfon?
4. Phi erharhe rẹ iruemu kparobọ
Jihova sa chọn avwanre uko vwo phi erharhe rẹ iruemu eje kparobọ
Ọ da dianẹ isigati yẹrẹ ihuvwun egangan yen wọ vwọ diotọ, kọyen wọ riẹn obo rọ bẹn te e vwo phio kparobọ. Die yen sa chọn wẹ uko? Roro kpahen oborẹ uruemu nana sa so vwẹ akpeyeren wẹn. Se Matiu 22:37-39, ovwan ta ota kpahen oborẹ itaba ese vẹ ihuvwun egangan vwo djobọte . . .
-
oyerinkugbe rẹ ohwo vẹ Jihova.
-
orua rẹ ohwo vẹ ihwo efa.
Jowọ wo vwo phi orharhe rẹ uruemu kparobọ. a Hworo IVIDIO na.
Se Filipae 4:13, ovwan ta ota kpahen onọ nana:
-
Mavọ yen ẹrhovwo ẹnẹ, uyono ri Baibol vẹ uyono ẹra ọkieje vwọ kẹ ohwo ẹgba re se vwo phi orharhe rẹ uruemu kparobọ?
5. Họnre vwọso iroro vẹ iruemu echọchọ
Se Kọlose 3:5, ovwan ta ota kpahen enọ nana:
-
Mavọ yen a vwọ riẹn nẹ ihoho rẹ ihwo re banphiyọ, e vwo si ovuẹ rẹ ọfanrhiẹn re ihwo kugbe e vwo duẹ omobọ rẹ ohwo eyen ijẹfuọn vwẹ ẹro ri Jihova?
-
Wo rorori nẹ ọhọ herọ rẹ Jihova vwo rhẹro rọyen nẹ avwanre cha fon vwọrẹ iroro? Kẹ, diesorọ?
Mrẹ obo re se vwo phi erharhe rẹ iroro kparobọ. Hworo IVIDIO na.
Jesu reyọ udje ọvo vwo djephia nẹ ofori nẹ a davwẹngba eje vwọ dia fuanfon vwọrẹ iroro. Se Matiu 5:29, 30, ovwan ta ota kpahen onọ nana:
-
Ọ dia Jesu tare nẹ avwanre kon oma rẹ avwanre phiyotọ-ọ, ẹkẹvuọvo, ọ tare nẹ a jowọ kpahọn. Mavọ yen a sa vwọ kẹnoma kẹ erharhe iroro? b
Ọ da dianẹ wọ davwẹngba wo vwo phi orharhe rẹ iroro kparobọ, gba riẹn nẹ Jihova vwẹ ẹro ọghanghanre vwo nẹ ẹgbaẹdavwọn wẹn. Se Une Rẹ Ejiro 103:13, 14, ovwan ta ota kpahen onọ nana:
-
Ọ da dianẹ wo nene orharhe iroro muabọ, mavọ yen ẹkpo ri Baibol na sa vwọ chọn wẹ uko vwọ họnre ohọnre na te oba?
Wo jẹ oma rhọ wẹ-ẹn!
Ọ sa lọhọ e vwo roro nẹ, ‘Me rhoma ruo, ofu dje vwe re.’ Ẹkẹvuọvo, di roro: Ọdjonẹ da kprowọ ji she, ọ dia ọyen o vwo mudiaphiyọ nẹ onẹ na va abọ re, yẹrẹ kọ cha rhoma tuẹn onẹ na phiyọ-ọ. Ọtiọyen ọ je hepha, wọ da rhoma ruo ọ dia ọyen o vwo mudiaphiyọ nẹ ẹgbaẹdavwọn wo vwo phi orharhe rẹ uruemu na kparobọ shefia-a. Oma je sa vwerhen owẹ kpahen ẹgbaẹdavwọn wẹn. Oma da rhọ wẹ, ọyen odjephia nẹ wọ davwan. Wo jẹ oma rhọ wẹ-ẹ! Womarẹ ukẹcha ri Jihova, wo se phi orharhe rẹ uruemu na kparobọ.
IHWO EVO TA: “Mi muomaphiyọ gan nọ re. Me cha sa dobọ ji-i.”
-
Ẹkpo ri Baibol vọ yen wọ sa vwọ chọn ohwo tiọyen uko vwọ mrẹvughe nẹ womarẹ ukẹcha ri Jihova ọ sa dobọ rọyen ji?
ỌDJẸKOKO
E che ru ubiudu ri Jihova ghọghọ siẹrẹ e de ru ugboma, iroro vẹ iruemu rẹ avwanre fuanfon.
Ẹrhomafuẹrẹn
-
Diesorọ a vwọ dia fuanfon?
-
Mavọ yen wọ sa vwọ dia fuanfon vwọrẹ ugboma?
-
Mavọ yen wọ sa vwọ dia fuanfon vwọrẹ iroro vẹ uruemu?
HIẸ GUỌNỌ
Erọnvwọn elọlọhọ vọ yen wo se ru vwọ dia fuanfon vwọrẹ ugboma ọ da tobọ dianẹ wo ghwe vwo igho-o?
Mrẹ obo wo se ru vwọ dobọ rẹ isigati ephopho ji.
“Obo Wọ sa Vwọ Dobọ rẹ Isigati Ephopho Ji” (Awake!, May 2010)
Yono kpahen obo ri se nẹ obuko rẹ eno rẹ ihoho rẹ ihwo re banphiyọ rhe.
“Ihoho rẹ Ihwo re Banphiyọ Vwo Imuoshọ Gbanẹ O Vwori-i?” (Uwevwin Orhẹrẹ rẹ August 1, 2013)
Mrẹ oborẹ ọshare ọvo sa vwọ dobọ rẹ eno rẹ ihoho rẹ ihwo re banphiyọ ji.
“Me Yan Chọ Ọke Buebun Tavwen Mi ki Phikparobọ” (Uwevwin Orhẹrẹ Ukeri 4 2016)
a “Obo ra sa Vwọ Dobọ rẹ Isigati Ephopho Ji,” rọhẹ ẹbẹre ri Hiẹ Guọnọ rẹ uyono nana che djekpahen obo re se vwo phi uruemu na kparobọ.
b Wo se vwo phi uruemu re ohwo vwo duẹ omobọ rọyen kparobọ, ni “Mavọ Yen Mi se Vwo Phi Uruemu re Vwo Duẹ Omobọ rọ Ohwo Kparobọ?” vwẹ ọbe rẹ Questions Young People Ask—Answers That Work, Ukori 1, uyovwinrota 25.
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
