Nkamuupuweleleni maaye mmoha ommureherera mwanawe weera arowe oxikola. Nto maaye owo onnaweha wakhala weera mwanawe khattweelenle ni wakhala weera ikuwo sawe siri sootteela ni sooreehereya. Mene nto etthu eyo ennamukhavihera mwaana owo ookhalano ekumi yooreera ni etthu eyo ennawoonihera atthu akina weera asitithawe annampwattha nnene naari neere, annamukosoopa. Ntoko hiihaale asitiithi antthunaaya weera anamwane aya ekhaleke ootteela, Yehova tho ontthuna weera hiyo-tho, nikhaleke ootteela vamakhalelo a veerutthuni ni a mmuupuweleloni. Okhala oowiirattela etthu yooreera wa hiyo ni ennanvuwiha Yehova.

1. Ninkela okhala hayi ootteela ni mukhaleloni wa weerutthuni?

Yehova onileenle weera ‘nikhaleke ootteela.’ (1 Pedru 1:16) Weera nikhale ootteela, ontthuneya okhala ootteela ni makhaleloni a weerutthuni ni ammuupuweleloni. Hiyo nnoowera okhala ootteela wakhala weera ninnarapa mahuku ootheene, otxapa soowara sahu, ovela vaate vahu ni otxapa ekaaro ahu ni okhala oorehereya. Nave-tho, hiyo pooti okhavihera oreherera Empa ya Omwene. Vaavo ninkhalaahu ootteela ni makhalelo ahu a weerutthuni hiyo ninnavuwiha Yehova.—2 Akorinto 6:3, 4.

2. Sookhovelela heeni sineera soovaliheni mwiikho?

Biblya onleela weera ‘mwiirapihe mwa soonanara sootheene [naari neere, soonyala] sa erutthu ni sa munepa.’ (2 Akorinto 7:1) Eyo entaphulela weera hiyo nintthuneya wiilipihera weera nisempe itthu sootheene sineera sinanarihe makhalelo ahu a weerutthuni ni a mmuupuweloni. Nintthuna weera nyuupuwelo sahu simusiveleke Yehova. Mwa yeeyo, ninnapaka ele ninweraahu weera nisempe nyuupuwelo soonanara. (Nsalmu 104:34) Hiyo-tho, nintthuna weera masu ahu ekhaleke oolipiha ni ooreera.—Mmusome Akolosi 3:8.

Eheeni yeera enivahe mwiikho ni makhalelo a weerutthuni ni ammuupuweloni? Itthu ikina pooti onanariha erutthu ahu. Mwa yeeyo, hiyo khannimpaha soona ni khannivarela muteko mirette soorukureeriha muru. Nipaka eyo, ninnakhalano okumi wooreera ni ninnattittimiha okumi. Ni moota heeni muneeraanyu mukhale ootteela mmuupuweloni? Weera niwane ni nyuupuwelo soonanara, ntoko wiivukula ni woona iviidiyu sa atthu oohiwara. (Nsalmu 119:37; Aefeso 5:5) Khahiyono ti wookhweya owina sookhovelela iyo, mene Yehova pooti wookhaviherani opaka eyo.—Mmusome Yesaya 41:13.

 WEERA MUXUTTERE SINTXIPALE

3. Wiirattela mweerutthuni onnanvuwiha Yehova

Naasomaka malamulo Yehova aavahaawe ana a Israeli, ninnaxuttera weera ti wootthuneya atthu a Yehova okhala ootteela. Mmusome Ottimula 19:10 ni 30:17-19. Avinyaka mutthekule ni ipontu sinttharelana:

• Soolepa iya sinninxuttiha heeni woohima sa moonelo wa Yehova sa wiirattela weerutthuni?

• Mikhalelo heeni sineera sookhavihereni okhala ootteela weerutthuni?

Onnatthuneya okhalano ehuhu ni wiilipihera weera nikhale oowiirattela weerutthuni. Pooti opaka eyo, nihipwatthaka mapuro ninkhalaahu naari naareene oopuha kapena oohaawa. Moone EVIIDIYU. Avinyaka mutthekule ni epontu enttharelana.

• Mwaha wa heeni vaavo itthu sahu sakhala sootteela sininvuwihaaya Yehova naalaleyaka?

4. Nwine sookhovelela sa mwiikho

Wakhala weera nyuwo munnampaha soona naari munnavarela muteko mirette soorukureeriha muru munoosuwela moota onxupaaya owina mikhalelo soonanara. Eheeni enkela wookhaviherani? Muupuwele moota mikhalelo iyo sinoonanarihaayani. Mmusome Matheyo 22:37-39. Avinyaka mutthekule ni ipontu sinttharelana: Moota heeni ompaha soona ni ovarela muteko mirette soorukureeriha muru sinnanarihaaya . . .

• onthamwene wa mutthu ni Yehova?

• amusi a mutthu ni atthu akina ankhala ni yoowo?

Mumpake palano moota woowina sokhovelela soonanara. a Moone EVIIDIYU.

Mmusome Afilipi 4:13. Avinyaka mutthekule ni epontu enttharelana

• Moota heeni ovekela veeli-veeli, omusoma Biblya ni woonela mithukumano oneeraaya onvahe mutthu ikuru soowinano sookhovelela soonanara?

 5. Nwaneno nyuupuwelo soonanara

Mmusome Akolosi 3:5. Avinyaka mutthekule ni ipontu sinttharelana:

• Ninsuwela hayi weera, woona epornografia, sexting [yookhovelela ya winviyarelana mensagem, ifootu ni iviidiyu mutelefoonini mutthu ohiwanre] ni mukhalelo woowiivukula sookhovelela soonanara vamaithoni va Yehova?

• Nyuwo munoona weera tiwoowereya okhala ootteela mmuupuweloni ntoko Yehova ontthunaawe? Mwaha wa heeni?

Moone moota nyuwo muneeraanyu nwine nyuupuwelo soonanara. Moone EVIIDIYU.

Yesu aavarela muteko ntakihero nimoha weera oonihere weera onnatthuneya othanla okhala ootteela mmuupuweloni. Mmusome Matheyo 5:29, 30. Avinyaka mutthekule ni ipontu sinttharelana:

• Yesu khaatthuna ohima weera nintthuneya wiisaata erutthu ahu, mene weera nintthuneya opaka etthu. Itthu heeni mutthu ontthuneyaawe opaka weera asempe nyuupuwelo soonanara? b

Wakhala weera nyuwo munwana ni nyuupuwelo soonanara, Yehova onnahela mwiitti wiilipihera wanyu. Musome Nsalmu 103:13, 14. Avinyaka mutthekule ni epontu enttharelana:

• Wakhala weera nyuwo munnakhalano maxupo oowina sookhovelela soonanara, moota heeni yoolepa ela eneeraaya ewooperereni ovirelela owanano?

 NYAHA SOOTTHUNEYA

Vaavo nniirattelaahu mweerutthuni, mmuupuweloni ni makhaleloni mwahu, ninnamusiveliha Yehova.

Wuuluula

• Mwaha wa heeni oraaya wootthuneya okhala oowiirattela mmakhaleloni mootheene?

• Moota heeni nyuwo muneeraanyu mukhale oowiirattela mmakhaleloni a weerutthuni?

• Moota heeni miteko sanyu ni nyuupuwelo sanyu sineeraaya sikhale sootteela?