Imadyina an usa nga mahigugmaon nga nanay nga igin-aandam an iya anak nga maeskwela. Ginsisiguro niya nga kinarigo an bata ngan an iya bado malimpyo. Tungod hini, magpapabilin hiya nga mahimsog ngan makikita han iba nga gin-aataman hiya han iya mga kag-anak. Ha pariho nga paagi, an aton mahigugmaon nga Amay, hi Jehova, karuyag nga limpyo kita​—ha pisikal ngan ha moral. Kon limpyo kita, kita mismo nagpapahimulos ngan napapasidunggan naton hiya.

1. Paonan-o kita magigin limpyo ha pisikal?

Hi Jehova nasiring ha aton: “Kinahanglan magin baraan kamo.” (1 Pedro 1:16) Basi kita magin baraan, kinahanglan magin limpyo kita ha pisikal ngan ha moral. Magigin limpyo kita ha pisikal kon pirme kita nakarigo ngan gintitipigan naton nga mahapsay ngan limpyo an aton mga bado, balay, ngan sarakyan. Puydi liwat kita bumulig ha paglimpyo ha aton Kingdom Hall. Pinaagi ha pagpabilin nga limpyo ha pisikal, napapasidunggan naton hi Jehova.​—2 Corinto 6:​3, 4.

2. Basi magin limpyo, ano nga mga buhat an kinahanglan naton likyan?

An Biblia nag-aaghat ha aton nga “limpyohan naton an aton kalugaringon ha ngatanan nga kahugaw ha unod ngan espiritu.” (2 Corinto 7:1) Salit naniningkamot kita nga likyan an bisan ano nga makakadaot ha aton lawas o ha aton hunahuna. An aton panhunahuna kinahanglan nakakapalipay kan Jehova, salit ginhihimo naton an ngatanan basi isalikway an sayop nga panhunahuna. (Salmo 104:34) Naniningkamot liwat kita nga limpyo an aton panyakan.​—Basaha an Colosas 3:8.

Ano pa an makakahimo ha aton nga mahugaw ha pisikal o ha moral? An pipira nga butang makakahugaw ha aton lawas. Salit ginlilikyan naton an pagtabako, pagmamâ, ngan pagdroga. Pinaagi ha paglikay hini, magigin mas mahimsog kita ngan maipapakita naton nga ginrirespeto naton an regalo nga kinabuhi. Naniningkamot liwat kita nga magin limpyo ha moral pinaagi ha pag-ato ha maghugaw nga buhat, sugad han masturbasyon ngan pagkinita hin pornograpiya. (Salmo 119:37; Efeso 5:5) Bangin makuri malamposan ini nga mga bisyo, pero ha bulig ni Jehova malalamposan naton ito.​—Basaha an Isaias 41:13.

 DUGANG NGA USISAHA

3. An pagin limpyo ha pisikal nagpapasidungog kan Jehova

Masasabtan naton an panhunahuna ni Jehova ha pagin limpyo pinaagi ha pag-usisa han iya mga sugo ha kadaan nga Israel. Basaha an Exodo 19:10 ngan 30:​17-19, katapos, hisguti niyo ini nga mga pakiana:

• Ano an iginsusumat hini nga mga bersikulo mahitungod ha panhunahuna ni Jehova ha kalimpyo ha pisikal?

• Ano an puydi mo buhaton hin regular basi magpabilin nga limpyo ha pisikal?

An pagin limpyo ha pisikal nagkikinahanglan hin panahon ngan pangalimbasog. Pero puydi kita magin limpyo riko man kita o pobre o diin man kita naukoy. I-play an VIDEO, katapos, hisguti niyo an masunod nga pakiana.

• Kay ano nga an mga tawo nga aton ginsasangyawan mas marespeto kan Jehova kon makita nira nga malimpyo an aton mga gamit?

4. Iundang an maraot nga mga bisyo

Kon naninigarilyo ka o nagdudroga, bangin maaram ka kon ano kakuri an pag-undang hito nga mga bisyo. Ano an makakabulig? Usisaha kon paonan-o an bisyo nakakaapekto ha imo. Basaha an Mateo 22:​37-39, katapos, hisguti niyo kon paonan-o an pagtabako o pagdroga nakakaapekto . . .

• ha pakigsangkay han usa nga tawo kan Jehova.

• ha pamilya han usa nga tawo ngan ha mga nakapalibot ha iya.

Pagplano nga iundang an maraot nga bisyo. a I-play an VIDEO.

Basaha an Filipos 4:​13, katapos, hisguti niyo ini nga pakiana:

• Paonan-o an maopay nga rutina ha pag-ampo, pag-aram ha Biblia, ngan pagtambong ha katirok makakahatag ha usa nga tawo hin kusog basi iundang an maraot nga bisyo?

 5. Atohi an maghugaw nga panhunahuna ngan buhat

Basaha an Colosas 3:​5, katapos, hisguti niyo ini nga mga pakiana:

• Paonan-o kita nahibaro nga an pornograpiya, sexting, ngan masturbasyon mahugaw ha pagkita ni Jehova?

• Ha imo hunahuna, makatadunganon ba nga maglaom hi Jehova nga magin limpyo kita ha moral? Kay ano?

Hibaroi kon paonan-o aatohan an maghugaw nga panhunahuna. I-play an VIDEO.

Hi Jesus naggamit hin ilustrasyon basi ipakita nga kinahanglan kita magin determinado nga buhaton an ginkikinahanglan basi magpabilin nga limpyo ha moral. Basaha an Mateo 5:​29, 30, katapos, hisguti niyo ini nga pakiana:

• Waray magsiring hi Jesus nga kinahanglan naton pasakitan an aton kalugaringon. Lugod, iginpapasabot niya nga kinahanglan kita gumios. Ano an kinahanglan buhaton han usa nga tawo basi malikyan an maghugaw nga panhunahuna? b

Kon naniningkamot ka nga atohan an maghugaw nga panhunahuna, ginpapabilhan ito ni Jehova. Basaha an Salmo 103:13, 14, katapos, hisguti niyo ini nga pakiana:

• Kon nakukurian ka nga malamposan an usa nga mahugaw nga buhat, paonan-o ini nga teksto magdadasig ha imo nga padayon nga maningkamot nga iundang ito?

 SUMARYO

Mapapalipay naton hi Jehova kon titipigan naton nga limpyo an aton lawas, an aton hunahuna, ngan an aton panggawi.

Repaso

• Kay ano nga importante gud an pagin limpyo?

• Paonan-o ka magigin limpyo ha pisikal?

• Paonan-o mo matitipigan nga limpyo an imo panhunahuna ngan an imo panggawi?