KAPITE 40
Te Manatu ʼa Te ʼAtua ʼo ʼUhiga Mo Te Maʼa
Ka teuteuʼi e he faʼe hana kiʼi tama ki te ako, ʼe tokaga ke maʼa ʼo feia pe mo ʼona mutuʼi meʼa. Ka maʼa te fanau pea ʼe fua lelei ki tona maʼuli malolo fakasino. Pea ʼe toe ha ai te tokaga lelei ʼo ʼana matuʼā ki ai. ʼO toe feia pe mo tatatou Tamai ʼe ʼi selo. ʼE maʼuhiga ʼaupito kia te ia te maʼa. Ka tou maʼa, ʼe lelei ki totatou maʼuli fakasino mo te aga ʼae ʼe tonu ke tou fai. Pea ʼe tou fakakololiaʼi ai ia Sehova.
1. ʼE feafeaʼi hau maʼa ʼi te faʼahi fakasino?
ʼE ui mai e Sehova: “ʼE tonu ke kotou maʼoniʼoni.” (1 Petelo 1:16) Kapau ʼe ke fia maʼoniʼoni, ʼe tonu ke ke maʼa ʼi te aga ʼe tonu ke fai ʼo feia pe mo te faʼahi fakasino. Pea kapau ʼe ke fia maʼa ʼi te faʼahi fakasino, ʼe tonu ke ke maʼanu, mo tui ni mutuʼi meʼa ʼe maʼa, mo fakamaʼa tou ʼapi, mo tau motoka pea mo tou malaʼe. ʼE feala ke ke toe tokoni ki te fakamaʼa ʼo tou Fale Fono. Ka ke faiga ke ke aga maʼa, ʼe ke fakakololiaʼi ai ia Sehova.—2 Kolonito 6:3, 4.
2. Kotea te ʼu agamahani ʼe kovi ʼe tonu ke ke liʼaki?
ʼE ui fenei mai ʼi te Tohi-Tapu: “Tou fakamaʼa ia tatou mai te ʼu ʼuli fuli ʼo te sino pea mo te ʼatamai.” (2 Kolonito 7:1) Ko tona fakaʼuhiga ke ke liʼaki ia meʼa fuli ʼe fakatupu tuʼutamaki ki tou maʼuli fakasino pea mo ʼatamai. Kapau ʼe ke loto ke leleiʼia e Sehova ʼau manatu, ʼe tonu ke ke tekeʼi te ʼu manatu mo te ʼu holi ʼe kovi. (Pesalemo 104:34) ʼE tonu ke ke toe tokaga ki ʼau faʼahiga palalau.—Lau ia Kolose 3:8.
Kotea te tahi faʼahi ʼe feala ai ke ke liliu ʼo heʼe maʼa? Ohage la, ko te suluka mo te toloke. Koia ʼae ʼe tonu ai ke ke fakamamaʼo mai ai. Ko ʼae ʼe mole suluka mo toloke ʼe haohaoa mai te ʼu mahaki pea ʼe fakaʼapaʼapa ki te maʼuli. Kapau ʼe ke toe fia maʼa ʼi te aga ʼe tonu ke fai, ʼe tonu ke ke tekeʼi te aga ʼae ko te mulu pea mo te sioʼi ʼo ni ʼata mo ni pāki ʼe kovi. (Pesalemo 119:37; Efeso 5:5) ʼE mole faigafua tuʼumaʼu te tekeʼi ʼo te ʼu agamahani heʼe maʼa ʼaia, kae ʼe tokoni atu ia Sehova ke ke tekeʼi te faʼahi ʼaia.—Lau ia Esaia 41:13.
TA FAKALOLOTO
Ta vakaʼi pe koʼe ka tou aga maʼa ʼe fakakololiaʼi ai Sehova pea ʼe feafeaʼi hatatou liʼaki te ʼu aga heʼe maʼa.
3. ʼE fakakololiaʼi Sehova moka tou aga maʼa
Neʼe foaki e Sehova he ʼu fakatotonu ki te kau Iselaele. Neʼe fakamaʼuhigaʼi ai tana manatu ʼo ʼuhiga mo te aga maʼa. Lau ia Ekesote 19:10 mo te 30:17-19, pea fai te ʼu fehuʼi ʼaeni:
-
Kotea ʼe ha mai ʼi te ʼu vaega ʼo ʼuhiga mo te manatu ʼa Sehova ki te aga maʼa?
-
Kotea ʼe feala ke ke fai tuʼumaʼu ke ke maʼa ʼi te faʼahi fakasino?
ʼE ʼaoga he temi mo ni faiga ke tou fakamaʼa ʼi te faʼahi fakasino. Kae ʼe tonu ke tou fai te faʼahi ʼaia, tatau aipe pe ko te koga meʼa fea ʼe tou maʼuʼuli ai peʼe tou koloaʼia peʼe masisiva. Vakaʼi te ʼATA VITEO, pea fai te fehuʼi ʼae ʼe hoa mai.
-
Kapau ʼe tou aga maʼa, kotea ʼe feala ke ui e te hahaʼi ʼae ʼe tou faifakamafola ki ai?
4. Tou liʼaki te ʼu aga ʼae ʼe kovi
ʼE tokoni mai ia Sehova ke tou liʼaki he agamahani ʼe kovi
ʼE faigataʼa ki he tahi ʼe suluka peʼe toloke hana tuku te faʼahi ʼaia. Kapau ʼe ke tau mo te aluʼaga ʼaia, ʼe feafeaʼi hau liʼaki? ʼAki hau fakakaukauʼi ʼona fua kovi ki tou maʼuli. Lau ia Mateo 22:37-39, pea fai te fehuʼi ʼaeni: Kapau ʼe suluka he tahi peʼe toloke, kotea anai ʼona fua . . .
-
ki ʼana felogoi mo Sehova?
-
ki tona famili pea mo ʼihi?
Fai hau fakatuʼutuʼu ke ke liʼaki te aga ʼaia ʼe kovi. a Vakaʼi te ʼATA VITEO.
Lau ia Filipe 4:13, pea fai te fehuʼi ʼaeni:
-
Ka tou tauʼi he agamahani ʼe heʼe maʼa, ʼe tokoni feafeaʼi mai te faikole, te ako ʼo te Tohi-Tapu pea mo te ʼu fono?
5. Tou tauʼi ni manatu mo ni aga heʼe maʼa
Lau ia Kolose 3:5, pea fai te ʼu fehuʼi ʼaeni:
-
He koʼe ʼe heʼe maʼa kia Sehova te ʼu aga ʼaeni: te sioʼi ʼo ni ʼata peʼe pāki ʼe kovi, mo te momoli ʼo ni palalau peʼe ko ni pāki peʼe ʼata heʼe ʼaoga ʼi te ʼu kiʼi masini, pea mo te fai ʼo te aga ko te mulu?
-
ʼE fefeka fau koa ia Sehova ʼi tana kole mai ke tou maʼa ʼi te aga ʼe tonu ke fai? Kotea tona tupuʼaga?
ʼE feala ke tou tauʼi he ʼu aga heʼe maʼa. Vakaʼi te ʼATA VITEO.
Neʼe fakaʼaogaʼi e Sesu he ʼu palalau fakata moʼo fakaha te meʼa ʼae ʼe tonu ke tou fai ke tou maʼa ʼi te aga ʼe tonu ke fai. Lau ia Mateo 5:29, 30, pea fai te fehuʼi ʼaeni:
-
Neʼe mole fia ui e Sesu ke tou fakamamahiʼi ia tatou kae ke tou fai he puleʼaki. Kotea ʼe feala ke tou fakatotonu ke tou fai ke tou liʼaki he ʼu manatu heʼe maʼa? b
Kapau ʼe ke tauʼi ni manatu heʼe maʼa, pea ʼe sio ia Sehova ki ʼau faiga. Lau ia Pesalemo 103:13, 14, pea fai te fehuʼi ʼaeni:
-
Kapau ʼe ke tauʼi he aga heʼe maʼa, ʼe tokoni feafeaʼi atu te ʼu manatu ʼo te ʼu vaega ʼaeni ke ke haga tauʼi?
ʼAua naʼa ke lotovaivai!
ʼE lagi feala ke ke manatu ‘ʼe mole au lavaʼi, ʼe lelei age pe taku tuku.’ Kae tou toʼo te faʼifaʼitaki ʼo he tagata lele. ʼE mole leva ui neʼe tukia mo toka pea ʼe mole ina lava fakaʼosi tana lele peʼe tonu ke toe liliu ki te kamata. ʼO toe feia pe, ka ke toe to ki tou vaivaiʼaga, ʼe mole ui leva kua ʼosi ia meʼa fuli pea ʼe mole he ʼuhiga ʼo te ʼu faiga ʼae neʼe kua ke fai. Ko te ʼuhiga ia moka kita faiga ke kita tuku he agamahani ʼe kovi. Koia, ʼaua naʼa ke lotovaivai! ʼE ke lava tauʼi tau agamahani ʼaia ʼe kovi ʼaki te tokoni ʼa Sehova.
ʼE UI E ʼIHI: “ʼE mole kei au lava tuku.”
-
Ko te vaega fea ka ke fakaʼaogaʼi moʼo fakaha ki he tahi ʼe ina lava tuku te agamahani ʼaia ʼe kovi ʼaki te tokoni ʼa Sehova?
MANATU TAFITO
Ka tou maʼa ʼi te faʼahi fakasino, mo ʼatatou manatu pea mo aga, ʼe tou fakakololiaʼi ai ia Sehova.
Fehuʼi Fakamanatu
-
He koʼe ʼe maʼuhiga ke tou maʼa?
-
ʼE feafeaʼi hau maʼa ʼi te faʼahi fakasino?
-
ʼE feafeaʼi hau maʼu ni manatu mo he aga ʼe maʼa?
TE TAHI ʼU MANATU
He ʼu faʼahiga fai ʼe faigafua ke ke maʼa ʼi te faʼahi fakasino tatau aipe pe ʼe ke masiva.
He ʼu tokoni ʼaoga moʼo tuku te suluka.
Te ʼu fua kovi moka ke sioʼi ni ʼata peʼe pāki ʼe kovi.
“Te ʼu ʼAta Kovi—ʼE Kovi Moʼoni Koa?” (Ko Te Tule Leʼo ʼaho 1 ʼo Oketopeli 2013)
Te faiga ʼa he tagata ke ina tauʼi te sioʼi ʼo ni ʼata peʼe ko ni pāki ʼe kovi.
“Neʼe Au Lava Tekeʼi Taku Agamahani ʼe Kovi” (Ko Te Tule Leʼo N° 4 2016)
a ʼI te koga Te Tahi ʼu Manatu ʼo te kapite ʼaeni, ʼi te alatike “Comment arrêter de fumer” ʼe ke maʼu ai ni tokoni ʼaoga ke ke tekeʼi te aluʼaga ʼaia.
b Kapau ʼe ke fia liʼaki te aga ʼae ko te mulu, vakaʼi te kapite 25 ʼo te tohi Les jeunes s’interrogent. Réponses pratiques (volume 1) “Comment arrêter de me masturber ?”