Ãma rotsaꞌrata dana bötö tsidöpötsi tiꞌra te te ĩꞌupte na hã. Te natsi duré tsiwatsutu tiꞌra udza hã te te natsi uptsõ da. Ãne te te ꞌmanharĩ wa, tiꞌra hã hödzé ãna te dza ꞌre nomro duré õ hã te dza dama höiꞌré tiꞌra te te ĩꞌmadöꞌö wẽ na hã. Damama duré dana te te tsima ĩwẽ dzahuré ne tiꞌra norĩ rã na ꞌre höimana dzaꞌra mono da, Wamama Jeová te tsima wẽ, wa norĩ hã, warã na wahöimana dzaꞌra da wahöiba na, wanhimirotsaꞌrata na, wamreme na duré wa te ĩꞌmanharĩ dzaꞌra dzém na. Ĩrã na ꞌre wahöimana dzaꞌra mono wamhã, wama rowẽ dzaꞌra di dza duré Jeová ãma wa dza ꞌre wawata dzaꞌra mono.

1. E niha wahöiba rã na wa dza wahöimana dzaꞌra ni.

Jeová te wama nharĩ dzaꞌra: “Ĩpetse na ꞌre ĩꞌaihöimana dzaꞌra waꞌaba mono da tsi.” (1 Pedro 1:16 TNM) Ĩpetse na ꞌre wahöimana dzaꞌra mono da, wahöimanadzé duré wahöiba ĩrã na wa dza ꞌre wanomro. Wahöiba ĩrã na ꞌre wanomro mono da, wa dza natsi watsiꞌupte dzaꞌra ni, duré waꞌudza, wanhorõwa duré wate robduri wa dza natsi uptsõ dzaꞌra ni duré wa dza natsi tsaꞌra wẽ dzaꞌra ni. Wa dza duré pawaptob dzaꞌra ni datsiꞌrãꞌõtõdzéb uptsõ na. Warã na ꞌre wanomro mono wamhã Jeová ãma, waꞌuꞌöbö te dza ꞌre dawata dzaꞌra. — 2 Coríntios 6:3, 4.

2. Ĩrã da hã, e marĩ wi wa dza watsiꞌmadöꞌö dzaꞌra ni.

Ropotoꞌwai mreme te wama roti dzaꞌra: ‘Uburé marĩ ĩwatsété wi wa dza ꞌre watsiꞌmadöꞌö petse dzaꞌra ãma ꞌre watsihöiba watsété dzaꞌra mono tõ da, duré ꞌröwi wapẽꞌẽ ꞌre, ãma ꞌre watsiwatsété dzaꞌra mono tõ da.’ (2 Coríntios 7:1) Taha dzarina, wa dza watsiꞌmadöꞌö dzaꞌra ni uburé marĩ watsété wi wahöiba na duré wanhimirotsaꞌrata na watsiwamnarĩ dzaꞌra tõ da. Jeová te te tsima rowẽ da wanhimirotsaꞌrata na, wa dza wẽꞌõ dzaꞌra ni uburé rotsaꞌrada ĩwatsédé. (Salmo 19:14) Wa duré tsada ꞌre wanhiptete dzaꞌra wamreme upto ãna ꞌre wanomro mono da. — Tsõré na Colossenses 3:8.

E marĩ duré te dza wahöiba niwamhã wahöimanadzé uptob dzaꞌra. Nimahã marĩ norĩ te te upto waihuꞌu petse di wahöiba hã. Taha wa, wa wẽꞌõ dzaꞌra ni warĩ, warĩ ꞌwatsari duré warĩtsipãrĩ. Ãne wa te ꞌmanharĩ dzaꞌra wamhã, wahöiba wẽ na wa ꞌre wahöimana dzaꞌra duré wa wadzéb dzaꞌra ni Jeová, dahöimanadzé nhomriꞌwa hã. E niha wahöimanadzé upto ãna wa dza ꞌre wanomro. Wa dza duré wẽꞌõ dzaꞌra ni ꞌröwi datsiꞌre upi duré aiꞌuréiwi podo. (Salmo 119:37; Efésios 5:5) Ãté ãhã dahöimana watsété na wa te aiꞌuté pire dzaꞌra di, tadzahã Jeová te dza wapawaptob dzaꞌra. — Tsõré na 1 Pedro 5:10.

WAIHUꞌU DURÉ

3. Wahöiba upto ãna ꞌre wanomro mono wamhã wa dza wadzéb dzaꞌra ni Jeová

Wa te tsõré dzaꞌra wamhã Jeová nhimiroti Israel nhihudu norĩ ma, wa ꞌmadöꞌö dzaꞌra ni dahöimana upto ãna tãma ĩpire uptabi na hã. Atsiré tsõré aba Êxodo 19:10 duré 40:30-32. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

• E marĩ ãhã romnhihötö norĩ te wama waihuꞌu dzaꞌra Jeová nhimirotsaꞌrata na dahöiba upto ãna.

• E marĩ te dza natsi ĩꞌmanha wahöiba upto ãna ꞌre anomro mono da.

Wahöiba upto ãna ꞌre wanomro mono da, bödö wa dza watsima wadzere dzaꞌra ni duré wa dza watsiwatsutu dzaꞌra ni. Tadzahã tsada hã ãne wa te ꞌmanharĩ dzaꞌra da warom nherẽ, wanhimarĩꞌõ wamhã duré wanhibro petse wamhã. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã.

• E marĩ wa, wa te tãma ĩroꞌmahörö dzaꞌra norĩ hã te dza wadzéb dzaꞌra Jeová te te ꞌmadöꞌö dzaꞌra wamhã wanhimarĩ norĩ ĩrã na.

4. Dahöimana watsété na ãma aiꞌuté na

Warĩ na niwamhã warĩtsipãrĩ na atsiwairõrĩ wamhã, aima waihuꞌu petse di ĩpire na hã dahöimana watsété na ãma aiꞌuté da. E marĩ te dza aipawapto. Ãma rotsaꞌrata e niha ãhã dahöimana watsédé te dza aihöimana wamna. Atsiré tsõré aba Mateus 22:37-39. Taha parimhã atsima robdzanhamri aba e niha warĩtsipãrĩ na niwamhã warĩ na datsiwairõrĩ te dza wamna . . .

• datsiwaihuꞌudzé Jeová ãma.

• ĩtsiwairõrĩ te família norĩ duré ĩtsiwaihuꞌu norĩ.

Atsima rowaꞌõtõ dahöimana watsété na aiꞌuté da. a ꞌMadöꞌö aba ĨROPODO.

Atsiré tsõré aba Filipenses 2:13. Taha parimhã atsima robdzanhamri aba ãhã dadzadanharĩ ãma piꞌrebamhã:

• E niha natsi rowaptẽrẽ uꞌö, Bíblia na natsi romnhoré uꞌö duré datsiꞌrãꞌõtõ norĩ ꞌmadöꞌö uꞌö te dza dapawapto dahöimana watsété na da te ãma aiꞌuté da.

5. ꞌWapé na rotsaꞌrata watsédé duré dahöimana watsédé

Atsiré tsõré aba Colossenses 3:5. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

• E niha wama waihuꞌu petse dzaꞌra di aiꞌuréiwi poto ꞌmadö, dapoto nhitsébꞌõ duré damreme nhitsébꞌõ dama ĩme dahörödzém na duré ꞌröwi datsiꞌre upi ĩꞌuꞌre na hã Jeová ma.

• Aima hã, e tsada hã ĩrã na ꞌre wahöimana dzaꞌra mono da Jeová te te tsima ĩwẽdzéb dzarina. E marĩ wa.

ꞌMadöꞌö e niha te dza ĩꞌwapé rotsaꞌrata watsédé. ꞌMadöꞌö aba ĨROPODO.

Jesus ma tô ãma tsimiréꞌé te te wama waihuꞌu dzaꞌra da e marĩ wa, tsada ꞌre ĩwanhiptete dzaꞌra mono da tsi wahöimanadzé ĩrã na ꞌre wahöimana dzaꞌra mono da. Atsiré tsõré aba Mateus 5:29, 30. Taha parimhã atsima robdzanhamri aba ãhã dadzadanharĩ ãma piꞌrebamhã:

• Jesus te te nharĩ õ di watsiꞌuꞌa dzaꞌra da. Te ãma tinha tsada ꞌre ĩwanhiptete dzaꞌra mono da na hã. E niha niꞌwa te dza tsada ꞌre tsiptete rotsaꞌrata watsédé te te wẽꞌõ da. b

ꞌRe ꞌwapéi mono wamhã, rotsaꞌrata watsédé, Jeová ma rowẽ di ĩꞌatsiptetedzém na. Atsiré tsõré aba Salmo 103:13, 14. Taha parimhã atsima robdzanhamri aba ãhã dadzadanharĩ ãma piꞌrebamhã:

• Dahöimana watsété na ãma aiꞌuté pire wamhã, e niha ãhã romnhihödö te dza atsiptete ꞌre ꞌwapéi mono da.

ĨWAIHUꞌUDZÉ HÃ

Wahöiba hã, wanhimirotsaꞌrada hã duré wahöimanadzé hã ĩpetse na ꞌre wahöimana dzaꞌra mono wamhã Jeová ma wa rowẽ dzaꞌra ni.

Ãma aipoꞌre puꞌu

• E marĩ wa, ĩpire ĩpetse na ꞌre wahöimana dzaꞌra mono da uburé na.

• E niha aihöiba ĩrã na te dza ꞌre aihöimana.

• E niha ĩꞌmanharĩdzé duré atsimirotsaꞌrada ĩpetse na te dza ꞌre aihöimana.