Khawucinge nje ngomama olungisa unyana wakhe kuba eza kuya esikolweni. Uyamjonga ukuba uhlambile nokuba iimpahla zakhe zicocekile na. Ngenxa yale nto, unyana wakhe uhlala esempilweni, ibe nabanye abantu bayabona ukuba abazali bakhe bamhoyile. Njengokuba abazali befuna abantwana babo bacoceke, noYehova uTata wethu ufuna sicoceke kwizinto esizenzayo, esizicingayo nesizithethayo. Ukucoceka kuyasinceda, kwenza noYehova azukiswe.

1. Sinokucoceka njani emzimbeni?

UYehova uthi: “Nimele nibe ngcwele.” (1 Petros 1:16) Ukuba ngcwele kuthetha ukucoceka emzimbeni nakwizinto esizenzayo. Ukuze sicoceke emzimbeni sifanele sihlambe qho, size siqiniseke ukuba iimpahla zethu, iimoto zethu namakhaya ethu acocekile. Sinokuncedisa naxa kucocwa iiholo zethu zoBukumkani. Xa sicocekile emzimbeni, uYehova uyazukiswa.​—2 Korinte 6:3, 4.

2. Ziintoni esingamele sizenze ukuze sicoceke?

IBhayibhile ithi: “Masicoce imizimba yethu neengqondo zethu.” (2 Korinte 7:1) Yiloo nto sifanele sizimisele ukuphepha nantoni na enokungcolisa iingqondo zethu okanye imizimba yethu. Zimele zivuyise uYehova izinto esizicingayo, yiloo nto singafuni ukucinga izinto ezingcolileyo. (INdumiso 104:34) Asikufuni nokuthetha izinto ezimdaka.​—Funda amaKolose 3:8.

Zeziphi ezinye izinto ezinokusenza singacoceki emzimbeni nakwindlela esizenza ngayo izinto? Kukho ezinye izinto ezinokuyingcolisa imizimba yethu. Asifuni ke ukuzisebenzisa izinto ezinjalo, ezinye zazo licuba, intsangu, nokusebenzisa iziyobisi kuba sisithi siyazonwabisa. Xa singazenzi ezi zinto, siba sempilweni, kuye kucace nokuba siyabuxabisa ubomi. Sisoloko sizama ukucoceka kwindlela esizenza ngayo izinto, ngokungaziphatha-phathi amalungu esondo kuba sifuna ukwanelisa iminqweno yethu nangokungayibukeli iphonografi. (INdumiso 119:37; Efese 5:5) Kusenokuba nzima ukuziyeka ezi izinto, kodwa uYehova angasinceda.​—Funda uIsaya 41:13.

 FUNDA NEZINYE IZINTO

3. Xa sicocekile emzimbeni sizukisa uYehova

Ukufunda imithetho uYehova awayinika amaSirayeli kungasinceda sibone indlela ekubaluleke ngayo kuye ukuba sicoceke. Funda iEksodus 19:10 no-30:17-19, nize nincokole ngale mibuzo:

• Ezi vesi zibonisa ukuba uYehova ukujonga njani ukucoceka emzimbeni?

• Ziintoni ofanele uzenze qho ukuze uhlale ucocekile?

Ukucoceka ngumsebenzi ibe kuthatha ixesha. Kodwa singakwazi nokuba sihlala phi, siyasokola okanye sinemali. Dlala IVIDIYO, nize nincokole ngalo mbuzo:

• Xa sihlala sicocekile, kutheni abantu esishumayela kubo beza kumhlonipha kakhulu uYehova?

4. Ungohlukana njani nezinto ezimbi?

Ukuba uyatshaya okanye umane usebenzisa iziyobisi, kusenokwenzeka ukuba uyayazi indlela ekunzima ngayo ukuyeka. Yintoni enokukunceda? Cinga ukuba ezi zinto zenza ntoni kuwe. Funda uMateyu 22:37-39, nize nincokole ngokuba xa umntu esebenzisa icuba okanye iziyobisi, loo nto inokwenza ntoni . . .

• kubuhlobo bakhe noYehova.

• kwintsapho yakhe nasebantwini abasondeleyo kuye.

Cinga ukuba uza kwahlukana njani nokwenza izinto ezimbi. a Dlala IVIDIYO.

Funda amaFilipi 4:13, nize nincokole ngalo mbuzo:

• Ukuthandaza qho, ukufunda iBhayibhile nokuya ezintlanganisweni kungamnika njani umntu amandla okwahlukana nokwenza izinto ezimbi?

 5. Ungavumi ukucinga izinto ezingcolileyo nokuzenza

Funda amaKolose 3:5, nize nincokole ngale mibuzo:

• Sazi njani ukuba ukubukela iphonografi, ukuthumelelana imiyalezo neefoto ezingcolileyo nokuziphatha-phatha komntu amalungu esondo kuba efuna ukwanelisa iminqweno yakhe yesondo, akucocekanga emehlweni kaYehova?

• Ucinga ukuba uYehova ufanele ukulindela ukuba izinto sizenze ngendlela ecocekileyo? Kutheni usitsho?

Bukela ukuba unokuyeka njani ukucinga izinto ezingcolileyo. Dlala IVIDIYO.

UYesu wenza umzekelo obonisa ukuba sifanele sizimisele ukuhlala sisenza izinto ngendlela ecocekileyo. Funda uMateyu 5:29, 30, nize nincokole ngalo mbuzo:

• UYesu wayengathi simele sizonzakalise, kodwa wayesithi kufuneka kubekho into esiyenzayo. Yintoni umntu afanele ayenze ukuze angacingi izinto ezingcolileyo? b

Ukuba uzama ukuyeka ukucinga izinto ezingcolileyo, uyamvuyisa uYehova. Funda iNdumiso 103:13, 14, nize nincokole ngalo mbuzo:

• Ukuba kunzima kuwe ukuba wahlukane nento embi, ezi vesi zikunceda njani ukuze uqhubeke uzama?

 UFUNDE NTONI?

Xa imizimba yethu, iingqondo zethu nendlela esiziphethe ngayo icocekile, sivuyisa uYehova.

Khawutsho

• Kutheni kubaluleke kakhulu ukucoceka?

• Ungacoceka njani emzimbeni?

• Ungenza njani ukuze izinto ozicingayo nozenzayo zihlale zicocekile?