LIJIGANYO 40
Ana Tutendeje Chichi Kuti Mlungu Atuwoneje Kuŵa Ŵachasa?
Aganichisye yakusatenda mayi jwachinonyelo pakumkosechelesya mwanache jwakwe kwawula kusukulu. Jwalakwe akusamjojesya mwanachejo soni akusam’wecha yakuwala yetakate. Yeleyi yikusakamuchisya kuti mwanacheju akole chilu chambone mwamti ŵane pakum’wona akusaŵecheta kuti achinangolo ŵakwe akusamsamalila. Mwakulandana ni yeleyi, Yehofa ŵali Atati ŵetu ŵachinonyelo akusasaka kuti tuŵeje ŵachasa paumi wetu soni ndamo syetu. Patukutenda yeleyi yikusatukamuchisya m’weji soni yikusamsangalasya jwalakwe.
1. Ana mpaka tutende yamtuli kuti tuŵe ŵachasa paumi wetu?
Yehofa akusatusalila kuti: ‘Tuŵeje ŵaswela.’ (1 Petulo 1:16) Kuti tuŵe ŵaswela tukusosekwa kola ndamo syambone soni kuŵa ŵachasa paumi wetu. Mpaka tuŵe ŵachasa naga tukusajogaga. Nambosoni naga yakuwala yetu, nyumba, njinga chinga galimoto jetu yili yakuwoneka chenene. Mpaka tukamuchisyesoni kuswejesya nawo Nyumba ja Uchimwene. Patukuŵa ŵachasa tukusamchimbichisya Yehofa.—2 Akolinto 6:3, 4.
2. Ana tukusosekwa kuŵambala yitendo yapi kuti tuŵe ŵachasa?
Baibulo jikusatulimbikasya kuti, “Tutyosye yindu yosope yakusakasya chilu chetu kapena mtima wetu.” (2 Akolinto 7:1) Yeleyi yikugopolela kuti tukusosekwa kuŵambala chilichose champaka chijonanje chilu chetu soni nganisyo syetu. Yatukusaganisya yikusosekwa yimsangalasyeje Yehofa. Myoyo tukusosekwa kutenda yiliyose yampaka tukombole kuti tuŵambaleje nganisyo syakusakala. (Salimo 104:34) Tukusosekwasoni kulingalinga kuti yakuŵecheta yetu yiŵeje yambone.—Aŵalanje Akolose 3:8.
Ana ni chindu chine chapi champaka chitendekasye kuti chilu chetu soni ndamo syetu yikaŵa yachasa? Pana yindu yine yampaka yijonanje chilu chetu. Myoyo tukusosekwa tuŵambaleje kwemba soona soni kamulichisya masengo mitela jakusokonasya mtwe. Patukuŵambala yeleyi tukusakola chilu chambone soni tukusalosya kuti tukuchimbichisya mtuka wa umi. Tukusakola ndamo syambone patukuŵambala ndamo syakusakala mpela kung’andila kuyalo soni kulolela yakuŵagula. (Salimo 119:37; Aefeso 5:5) Atamose kuti mpaka yiŵe yakusawusya kuleka ndamosi, nambope Yehofa mpaka atukamuchisye kusileka.—Aŵalanje Yesaya 41:13.
KULIJIGANYA YEJINJI
Alijiganye ligongo lyakwe tukusamchimbichisya Yehofa naga tukuŵa ŵachasa. Soni alole yampaka tutende kuti tumalane ni yitendo yakusakala.
3. Tukusamchimbichisya Yehofa naga tukuŵa ŵachasa
Mpaka tumanyilile nganisyo sya Yehofa pangani jachasa patukulijiganya malamusi gaŵapele Aisalaeli. Aŵalanje Ekisodo 19:10; 30:17-19, kaneko akambilane yiwusyo ayi:
-
Ana malembaga gakulosya chamtuli nganisyo sya Yehofa pangani ja chasa?
-
Ana ni ndamo syapi syampaka situkamuchisye kuti tuŵeje ŵachasa?
Pakusasosekwa ndaŵi soni kulimbichila kuti mundu aŵe jwachasa. Nambope mpaka tuŵe ŵachasa mwangajigalila ni kapate ketu soni kwatukusatamaga. Alolele FIDIYO, kaneko akambilane chiwusyo achi.
-
Ana ŵandu ŵatukusitwalalichilaga, mpaka achimbichisye chamtuli utenga wetu naga yindu yetu yili ya chasa?
4. Aleche ndamo syakusakala
Yehofa mpaka atukamuchisye kumalana ni ndamo jilijose jakusakala
Naga akusakwembaga kapena kamulichisya masengo mtela wakusokonasya mtwe, mpaka ajitichisye kuti yikusaŵa yakusawusya kuleka ndamosi. Nambo ana ni chichi champaka chakamuchisye kuti aleche? Aganichisyeje yakuyichisya yakwe. Aŵalanje Mateyu 22:37-39, kaneko akambilane mwele kwemba soona kapena kukamulichisya masengo mitela jakusokonasya mtwe mpaka yikwaye . . .
-
unasi wa mundujo ni Yehofa.
-
liŵasa lya mundujo soni ŵaŵandikene nawo.
Atende yakuti aleche ndamo jakusakala. a Alolele FIDIYO.
Aŵalanje Afilipi 4:13, kaneko akambilane chiwusyo achi:
-
Ana kupopela, kulijiganya Baibulo soni kusimanikwa pamisongano mpaka yimkamuchisye chamtuli mundu kumalana ni ndamo jakusakala?
5. Amalane ni nganisyo soni yitendo yakusakala
Aŵalanje Akolose 3:5, kaneko akambilane yiwusyo ayi:
-
Ana tukumanyilila chamtuli kuti kulolela yakuŵagula, kutumichisyana mautenga kapena yiwulili yakuŵagula soni kung’andila kuyalo, Yehofa akusayiwona kuŵa yakusakala?
-
Ana yakuti Yehofa akusasaka ŵandu kola ndamo syambone yili yakamuchisya? Ligongo chichi?
Amanyilile yampaka atende kuti amalane ni nganisyo syakusakala. Alolele FIDIYO.
Yesu jwasalile chiwanichisyo pakulosya kuti pakusasosekwa kulimbichila kuti mundu akole ndamo syambone. Aŵalanje Mateyu 5:29, 30, kaneko akambilane chiwusyo achi:
-
Yesu nganasalaga ya kuliwulasya chilu, nambope jwalakwe jwagombelechesyaga kuti tukusosekwa kutendapo kandu. Ana mundu akusosekwa kulingalinga kutenda chichi kuti amalane ni nganisyo syakusakala? b
Naga akulingalinga kuti amalane ni nganisyo syakusakala, Yehofa akusayamichila kulingalinga kwawo. Aŵalanje Salimo 103:13, 14, kaneko akambilane chiwusyo achi:
-
Naga yikwalema kumalana ni ndamo jakusakala, ana lilemba lyeleli mpaka lyalimbikasye chamtuli kuti akaleka kulingalingako?
Kutandilasoni ndamo jakusakala ngayikugopolela kuti alepele
Yili yangasawusya kuganisya kuti ‘ndepele bola ngambe kuleka.’ Aganichisye ayi: Jwakutenda masewela gakuwutuka pagwile yangagopolela kuti ngapunda mpikisanowo. Soni jwangasosekwa kutandilesoni. Mwakulandana ni yeleyi naga atandilesoni kutenda yakusakala ngayikugopolela kuti nganaŵa akombwele kumalana ni ndamojo. Soni kwangasimasya yambone yalinjilileje kutenda. Akadandawula naga atesilesoni ndamojo. Yeleyi yikusatendekwa naga mundu akusaka kuleka ndamo jakusakala. Akajasa mtima. Yehofa mpaka ŵakamuchisye kumalana ni ndamojo.
YAKUSAŴECHETA ŴANDU ŴANE: “Yasyoŵelele mwamti nganimba ndesile.”
-
Ana ni lilemba lyapi lyampaka alikamulichisye masengo kwa munduju pakulosya kuti Yehofa mpaka amkamuchisye kuleka ndamo jakusakalajo?
YALIJIGANYISYE
Tukusamsangalasya Yehofa naga chilu chetu, nganisyo syetu soni ndamo syetu yili ya chasa.
Yiwusyo Yakuwilisya
-
Ligongo chichi yili yakusosekwa mnope kuti tuŵeje ŵachasa?
-
Ana mpaka atende yamtuli kuti aŵe ŵachasa paumi wawo?
-
Ana mpaka atende yamtuli kuti nganisyo soni ndamo syawo yiŵe ya chasa?
YAKULINGA YINESONI
Ana ni yindu yangasawusya yapi yampaka atende kuti aŵe ŵachasa atamose aŵe ŵakulaga?
Alinje kupata matala gampaka gakamuchisye kuti aleche kwemba soona.
“Yampaka Atende Kuti Aleche Kwemba Soona” (Ajimuche!, Meyi 2010)
Amanyilile kusaka kwa kulolela yakuŵagula.
“Ana Kulolela Yakuŵagula Kwana Yakusawusya Yamtuli?” (Sanja ja Mlonda, Ogasiti 1, 2013)
Alole yaŵatesile jwamlume jwine kuti aleche chisyoŵe chakulolela yakuŵagula.
“Nakombwele Kumalana ni Cisyoŵe Cakusakala” (Sanja ja Mlonda Na. 4 2016)
a Ngani jakuti “Yampaka Atende Kuti Aleche Kwemba Soona,” jajili pasi pa kamtwe kakuti Yakulinga Yinesoni mu lijiganyoli, jikulondesya matala gampaka akuye kuti amalane ni chisyoŵe chakwemba soona.
b Kuti amanyilile yampaka atende kuti amalane ni kung’andila kuyalo alole ngani jakuti, “Ana Mpaka Ndende Yamtuli Kuti Malane ni Ndamo Jakung’andila Kuyalo?” m’buku jakuti Mayankho a Zimene Achinyamata amafunsa—Buku Loyamba, mtwe 25.
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
