XOOK 40
¿Bix jeʼel a pʼáatal limpioil tu táan Dioseʼ?
Máans ta tuukuleʼ juntúul maamatsileʼ yéetel yaabilaj táan u listokíintik u chan hijo utiaʼal u bin xook. Letiʼeʼ ku beetik u yichkíil u chan hijo yéetel ku tsʼáaik nookʼ limpio utiaʼal u búukinte. Lelaʼ ku beetik tumen maʼ u kʼáat ka kʼojaʼanchajak u chan hijoiʼ. Tsʼoʼoleʼ u maasiloʼobeʼ ku yilkoʼob jach kanáantaʼan le chan xiʼipaloʼ. Jéeoba xaneʼ juntúul Taatatsil jach u yaabiltmoʼon, le oʼolal u kʼáat ka pʼáatak limpioil k-kuxtal. Wa k-beetik le baʼax ku yaʼalikoʼ yaan u bintoʼon utsil yéetel yaan u yúuchul tʼaan maʼalob tu yoʼolal.
1. ¿Bix jeʼel u pʼáatal limpioil k-wíinklil bey xan le baʼaloʼob yaantoʼonoʼ?
Jéeobaeʼ ku yaʼalik: «Teʼexeʼ unaj a pʼáatleʼex santoil» (1 Pedro 1:16). Utiaʼal ka pʼáatkoʼon santoʼoneʼ kʼaʼabéet u pʼáatal limpioil k-wíinklil bey xan k-kuxtal. Utiaʼal k-pʼáatal limpioileʼ kʼaʼabéet k-ichkíil, k-pʼoʼik k-nookʼ, k-limpiokíintik k-otoch yéetel wa yaan k-cocheeʼ kʼaʼabéet k-ilik u pʼáatal limpioil xan. Tsʼoʼoleʼ k-ilik u pʼáatal limpioil le naj tuʼux ku beetaʼal le reuniónoʼoboʼ. Wa ku pʼáatal limpioil k-wíinklil bey xan le baʼaloʼob yaantoʼonoʼ yaan k-tsʼáaik tuʼux u alabartaʼal Jéeoba (2 Corintios 6:3, 4).
2. ¿Baʼaxoʼob jeʼel u pʼatik sucioil k-kuxtaleʼ?
Le Bibliaoʼ ku yaʼalik: «Koʼoneʼex limpiokíintikba tiʼ tuláakal baʼax jeʼel u yéekʼkuntik k-wíinklil yéetel k-tuukuleʼ» (2 Corintios 7:1). Yoʼolal le baʼax ku yaʼalik le Bibliaoʼ k-beetik tuláakal le ku páajtal utiaʼal maʼ k-kʼaskúuntik k-kuxtal mix k-tuukul (Salmo 104:34). Como k-yaabiltmaj Jéeobaeʼ k-kʼáat k-kiʼimakkúunt u yóol, le oʼolal k-kanáantik baʼax k-aʼalik yéetel k-ilik maʼ k-tuukul tiʼ baʼaloʼob kʼaastak (xok Colosenses 3:8).
¿Baʼax uláakʼ jeʼel u éekʼkuntik k-kuxtaleʼ? Por ejemploeʼ maʼ unaj k-tsʼuʼutsʼik chamaliʼ, maʼ unaj k-chaʼachik u leʼ junpʼéel cheʼ ku kʼaabaʼtik cocaiʼ mix unaj k-usartik uláakʼ drogaʼobiʼ. Wa maʼ t-usartik mix junpʼéel tiʼ le baʼaloʼobaʼ yaan u maas antaltoʼon toj óolal yéetel yaan k-eʼesik k-respetartik le kuxtal tsʼaʼantoʼonoʼ. Wa k-kʼáat xan ka pʼáatak limpioil k-kuxtaleʼ maʼ unaj k-beetik baʼaloʼob kʼaastak jeʼex u masturbarkuba máak wa u chaʼantik pornografíaiʼ (Salmo 119:37; Efesios 5:5). U jaajileʼ maʼ chéen chʼaʼabil u pʼatik máak le vicioʼobaʼ, pero Jéeobaeʼ jeʼel u yáantkoʼoneʼ (xok Isaías 41:13).
UTIAʼAL A MAAS NAʼATIK
Yaan k-ilik bix jeʼel u alabartaʼal Jéeoba wa limpio yanil k-wíinklil bey xan le baʼaxoʼob yaantoʼonoʼ. Tsʼoʼoleʼ yaan k-kanik bix jeʼel u páajtal k-pʼatik jujunpʼéel vicioʼobeʼ.
3. Wa limpio k-wíinklileʼ ku alabartaʼal Jéeoba
Kéen k-xok le leyoʼob tu tsʼáaj Jéeoba tiʼ u kaajil Israeloʼ k-naʼatik baʼaxten kʼaʼanaʼan u pʼáatal limpioil máak tu táan Dios. Xokeʼex Éxodo 19:10 yéetel 30:17-19, kéen tsʼoʼokkeʼ ka tsikbaltikeʼex lelaʼ:
-
Le tekstoʼoboʼ, ¿bix u yeʼeskoʼob Jéeobaeʼ u kʼáat ka pʼáatak limpioil u wíinklil máak?
-
¿Baʼax jeʼel u yáantik máak utiaʼal ka pʼáatak limpioileʼ?
Kʼaʼabéet u jóoʼsik tiempo máak utiaʼal u pʼáatal limpioil. Leloʼ jeʼel máaxak jeʼel u páajtal u beetkeʼ kex wa óotsil, ayikʼal yéetel kex jeʼel tuʼuxak kajaʼaneʼ. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
Le máaxoʼob k-tsikbaltiktiʼob u Tʼaan Diosoʼ, ¿jeʼel wa u maas respetarkoʼob Jéeoba wa ku yilkoʼob limpio yanil le baʼaxoʼob yaantoʼonoʼ? ¿Baʼaxten?
4. Pʼat le vicioʼoboʼ
Jéeobaeʼ ku yáantkoʼon k-pʼat jeʼel baʼalak vicioileʼ
Wa ka tsʼuʼutsʼik chamal, wa ka drogarkaba bey xan wa ka wukʼik tsʼaak kex maʼ kʼaʼabéettecheʼ a wojel maʼ chéen chʼaʼabil u pʼatik máak junpʼéel vicioiʼ. ¿Baʼax túun jeʼel u yáantkecheʼ? Letiʼe a jóoʼsik tiempo utiaʼal a tuklik baʼax problemasil ku taasiktechoʼ. Xokeʼex Mateo 22:37-39, kéen tsʼoʼokkeʼ ka tsikbaltikeʼex bix u afectartik le vicioʼob...
-
... u biskuba máak yéetel Jéeobaoʼ.
-
... u láakʼtsiloʼob máak bey xan uláakʼ máakoʼob.
Tukult bey baʼaxoʼob jeʼel a beetik utiaʼal a pʼatik uláakʼ vicioʼobeʼ. a Chaʼanteʼex le VIDEOOʼ.
Xokeʼex Filipenses 4:13, kéen tsʼoʼokkeʼ ka tsikbaltikeʼex lelaʼ:
-
A tuklikeʼ wa ku suuktal u orar máak, u xokik u Biblia yéetel u bin teʼ reuniónoʼoboʼ, ¿jeʼel wa u yáantik u pʼat junpʼéel vicioeʼ? ¿Baʼaxten bey a waʼalikoʼ?
5. Xuʼuluk a beetik yéetel a tuklik baʼaloʼob kʼaastak
Xokeʼex Colosenses 3:5, kéen tsʼoʼokkeʼ ka tsikbaltikeʼex lelaʼ:
-
¿Bix k-ojéeltik jach maʼ maʼalob u yilik Jéeoba u chaʼantik máak pornografía, u masturbarkuba wa u túuxtik mensajeʼob wa fotoʼob yaan yil yéetel sexo (sextear)?
-
Techeʼ bix a wilik, ¿maʼalob wa ikil u yaʼalik Jéeoba ka pʼáatak limpioil k-kuxtal? ¿Baʼaxten bey a tuukuloʼ?
Ilawil baʼax jeʼel u yáantkech utiaʼal u xuʼulul a tuukul tiʼ baʼaloʼob kʼaastakeʼ. Chaʼanteʼex le VIDEOOʼ.
Jesúseʼ tu tsʼáaj junpʼéel ejemplo utiaʼal u yilik máak baʼax unaj u beetik wa u kʼáat ka pʼáatak limpioil u kuxtal. Xokeʼex Mateo 5:29, 30, kéen tsʼoʼokkeʼ ka tsikbaltikeʼex lelaʼ:
-
Teʼ tekstooʼ Jesúseʼ maʼ tu yóotaj u yaʼal wa yaan u beetik loob tiʼ u wíinklil máakiʼ, baʼaxeʼ tu yaʼaleʼ kʼaʼabéet u beetik máak wa baʼax. ¿Baʼax túun kʼaʼabéet u beetik máak utiaʼal u xuʼulul u tuukul tiʼ baʼaloʼob kʼaastak? b
Wa táan a beetik tuláakal le ku páajtal utiaʼal u xuʼulul a tuukul tiʼ baʼaloʼob kʼaastakeʼ Jéeobaeʼ jach kiʼimak u yóol yéetel le baʼax táan a beetkoʼ. Xokeʼex Salmo 103:13, 14, kéen tsʼoʼokkeʼ ka tsikbaltikeʼex lelaʼ:
-
Wa táan a wilik a pʼatik junpʼéel kʼaakʼas vicioeʼ, ¿jeʼel wa u yáantkech le tekstoʼob tsʼoʼok a xokikoʼ? ¿Baʼaxten bey a waʼalikoʼ?
¡Seguernak a tsʼáaik a wóoliʼ!
Jach séeb u tuklik máak: «Tsʼoʼokten beyoʼ, maʼ tu páajtal in pʼatik». Chéen baʼaleʼ tuukulnen tiʼ lelaʼ: wa juntúul máak táan u yáalkab tiʼ junpʼéel carrera, pero ku lúubuleʼ maʼ u kʼáat u yaʼal wa tsʼoʼoktiʼ beyoʼ mix wa yaan u jel káajsik le carreraoʼ. Lelaʼ bey xan u yúuchul tiʼ le máaxoʼob taak u pʼatkoʼob junpʼéel viciooʼ. Wa ku kaʼa lúubloʼob tiʼ le viciooʼ maʼ u kʼáat u yaʼal wa maʼ tu páajtal u pʼatkoʼobiʼ. U jaajileʼ normal u lúubul máak tiʼ le vicio yaantiʼ kaʼachoʼ. ¡Pero maʼ u lúubul a wóol!, yéetel u yáantaj Jéeobaeʼ jeʼel u páajtal a pʼatik jeʼel baʼalak vicioileʼ.
BAʼAX SUUK U YAʼALAʼAL: «Maʼ tu páajtal in pʼatik tumen jach vicioten».
-
Wa yaan máax aʼaliktech beyoʼ, ¿baʼax tekstoil jeʼel a weʼesiktiʼ utiaʼal u yilik jeʼel u páajtal u pʼatik jeʼel baʼalak vicioil yéetel u yáantaj Jéeobaeʼ?
BAʼAX TSOʼOLI
K-kiʼimakkúuntik u yóol Jéeoba wa limpio k-wíinklil, k-tuukul bey xan baʼaxoʼob k-beetik.
Baʼax ta kanaj
-
¿Baʼaxten kʼaʼabéet u limpiotal máak?
-
¿Baʼax unaj k-beetik utiaʼal u pʼáatal limpioil k-wíinklil bey xan le baʼaxoʼob yaantoʼonoʼ?
-
¿Baʼax kʼaʼabéet k-beetik utiaʼal u pʼáatal limpioil le baʼaxoʼob k-beetik ichil k-kuxtaloʼ bey xan le baʼaxoʼob k-tuklikoʼ?
KAN U MAASIL
Kex wa óotsil máakeʼ yaan baʼaxoʼob jeʼel u páajtal u beetik utiaʼal ka pʼáatak limpioileʼ.
Xok baʼax jeʼel u yáantkech utiaʼal u xuʼulul a tsʼuʼutsʼik chamaleʼ.
«¿Bix jeʼel u xuʼulul a tsʼuʼutsʼik chamaleʼ?» (¡Aajkech!, mayo tiʼ 2010)
Ojéelt bix u afectartik máak le pornografíaoʼ.
«Pornografía: ¿tu jaajil wa kʼaas?» (U Pʼíich Tulumil Kanan, 1 tiʼ agosto tiʼ 2013)
Ilawil baʼax tu beetaj juntúul máak utiaʼal u xuʼulul u chaʼantik pornografía.
«Junpʼéel vicio talamchaj in pʼatik» (U Pʼíich Tulumil Kanan, núm. 4 2016)
a Teʼ jaats «Kan u maasil» yaan teʼ xookaʼ tiaʼan le xook «¿Bix jeʼel u xuʼulul a tsʼuʼutsʼik chamaleʼ?». Teʼeloʼ ku tsoʼolol bey baʼaxoʼob jeʼel u páajtal a beetkeʼ.
b Utiaʼal a wojéeltik baʼax jeʼel u beetik máak utiaʼal u xuʼulul u masturbarkubaeʼ ilawil le xook 25 ku kʼaabaʼtik «¿Bix jeʼel u xuʼulul in masturbarkinbaeʼ?», lelaʼ tiaʼan teʼ libro U núukil le preguntaʼob ku beetik le paalaloʼoboʼ (u yáax libroil).