PWONY ME 41
Gin Ango ma Baibul Waco Madok i kom Tim me Buto?
Pol pa dano lewic makogi me lok i kom tim me buto. Ento, ka Baibul oloko i kom tim me buto, loko i yo ma atir, dok ma kelo deyo. Gin ma Baibul waco kelo adwogi maber botwa. Meno rwatte pien Baibul a ki bot Jehovah, ma en aye obedo Lacwecwa. Pi meno, en ngeyo gin maber loyo piwa. En tittiwa gin ma omyero watim wek wayom cwinye ki gin ma bikonyowa me bedo ki kwo maber nakanaka.
1. Jehovah neno tim me buto nining?
Tim me buto obedo mot mamwonya ma oa ki bot Jehovah. En mito ni laco ki dako ma gunyomme aye gunong mit pa buto. Mot man pe weko jo munyomme gibedo ki kero me nongo lutino keken, ento bene me nyuto margi i yo ma keligi yomcwiny. Meno aye gin mumiyo Lok pa Lubanga waco ni: ‘Cwinyi myero obed yom i kom dakoni ma inyomo i kare me tinoni.’ (Carolok 5:18, 19) Jehovah mito ni jo munyomme gubed lugen bot luotgi, pi meno pe omyero gutim abor.—Kwan Jo Ibru 13:4.
2. Tim kwele obedo ngo?
Baibul tittiwa ni “lutim tim kwele . . . ker pa Lubanga pe bibedo megi.” (1 Jo Korint 6:9, 10) Luco Baibul ma gucoyo i leb Grik gutiyo ki nyig lok man ni por·neiʹa me lok i kom tim kwele. Nyig lok meno kwako (1) tim me buto i kin jo ma pe gunyomme, a (2) buto i kin co ki co nyo mon ki mon wadgi, ki (3) buto ki lee. Wayomo cwiny Jehovah dok wanongo adwogi maber ka ‘wagwokke ki i tim me kwele.’—1 Jo Tecalonika 4:3.
NONG NGEC MATUT
Nen kong kit ma itwero gwokke kwede ki i tim kwele, ki adwogi mabeco ma ibinongo ka ikwo kwo maleng.
3. Kwer tim kwele
Laco ma lagen ma nyinge Yucepu okwero woko dako ma onongo mito buto kwede. Kwan Acakki 39:1-12, ci wunyam lapeny magi:
-
Ngo ma otugo cwiny Yucepu me ngwec woko?—Nen tyeng me 9.
-
Tika itamo ni Yucepu omoko tam ma atir? Pingo?
I kare-ni jo matino gitwero lubo lanen pa Yucepu nining kun gikwero tim kwele woko? Tuk VIDIO.
Jehovah mito ni wan ducu wakwer tim tarwang. Kwan 1 Jo Korint 6:18, ci wunyam lapeny magi:
-
Jami ango ma twero weko ngat moni donyo i tim kwele?
-
Itwero bolo tim kwele woko nining?
4. Itwero loyo atematema
Gin ango ma twero weko bedo tek adada piwa me loyo atematema me donyo i tim tarwang? Tuk VIDIO, ci wunyam lapeny ma lubo-ni.
-
Gin ango ma omego ma i vidio-ni otimo i kare ma en oniang ni tamme ki jami mogo ma etye ka timo twero weko etimo abor?
Kadiwa Lukricitayo me ada i kine mukene giyelle adada me gwoko tamgi wek obed maleng. Itwero gwokke nining ki tamo tam macilo? Kwan Jo Pilipi 4:8, ci wunyam lapeny magi:
-
Kodi jami ango ma omyero watam iye?
-
Kwano Baibul ki lungo wiwa i tic pa Jehovah twero konyowa nining me loyo atematema me timo bal?
5. Rwom me kit ma atir pa Jehovah kelo adwogi maber botwa
Jehovah ngeyo gin maber loyo piwa. En tittiwa kit me kwo kwo maleng ki adwogi maber ma wanongo pi timo meno. Kwan Carolok 7:7-27 nyo tuk VIDIO, ci i ngeye wunyam lapeny ma lubo-ni.
-
Awobi-ni odonyo i atematema nining? —Nen Carolok 7:8, 9.
-
Ma lubbe ki Carolok 7:23, 26, tim tarwang twero kelo adwogi maraco adada. Ka wakwo kwo maleng, pekki ango ma watwero bwot ki iye?
-
Ka wakwo kwo maleng, mot ango ma wabinongo i kare me anyim?
Jo mukene gitamo ni gin ma Baibul waco i kom buto i kin co ki co nyo mon ki mon nyuto gingi tutwal dok pe nyuto ni Lubanga obedo lamar. Ento Jehovah, Lubanga me mar mito ni dano ducu gubed ki kwo maber nakanaka. Me bedo mupore pi mot meno, omyero wakwo ma lubbe ki rwomme me kit ma atir. Kwan 1 Jo Korint 6:9-11, ci wunyam lapeny man:
-
Ki tung bot Lubanga, tika miti me buto ki co luwoti nyo mon luwoti keken aye obedo miti ma omyero walweny kwede?
Me yomo cwiny Lubanga, wan ducu omyero watim alokaloka. Tika timo meno twero kelo mot boti? Kwan Jabuli 19:8, 11, ci wunyam lapeny magi:
-
Tika itamo ni lubo rwom me kit ma atir pa Jehovah tek tutwal? Pingo iye, nyo pe iye?
Jehovah okonyo dano mapol me lubo cikke ma kwako kwo ma atir. En twero konyi bene
JO MOGO GIWACO NI: “Tim me buto i kin jo aryo mo keken pe rac, teke gimare.”
-
In itwero gamone ningo?
WOT WIYE WIYE
Tim me buto obedo mot ma oa ki bot Jehovah me yomo cwiny laco ki dakone.
Ngo ma ipwonyo?
-
Tim kwele kwako gin ango?
-
Ngo ma bikonyowa me kwero tim kwele?
-
Adwogi maber ango ma wanongo ka walubo rwom me kit ma atir pa Jehovah?
TIM KWED
Pwony pingo Lubanga mito ni laco ki dako ma gimito bedo kacel myero kong gunyomme.
“Ngo ma Baibul Waco i kom Bedo Kacel Labongo Nyomme?” (Pwony ma tye i jw.org)
Nen pingo pwony me Baibul ni tim me buto i kin co ki co nyo mon ki mon obedo gin marac pe te lokke ni omyero wadag jo ma gitimo tim meno.
“Tika Tim Buto i kin Co ki Co Nyo Mon ki Mon Rac?” (Pwony ma tye i jw.org)
Pwony kit ma cik pa Lubanga madok i kom tim me buto gwokowa kwede.
“Tika Doto Kom me Co Nyo me Mon pa Ngat Mo Obedo Tim Buto?” (Pwony ma tye i jw.org)
I gin mutimme i kwo, ma wiye tye ni “Gin Gutera ki Woro Adada,” nen kong gin ma otugo cwiny laco ma onongo buto ki co luwote me loko kwone wek eyom cwiny Lubanga.
a Tim magi kwako rwatte i buto, doto kom me co nyo me mon pa ngat mukene, buto ki i ot konye, nyo bene bongo nyo tuku ki kom me co nyo mon pa ngat mukene i yo me buto.
