OZUMALƐDƖYƐ 41
Mɩnla Yɛ Bayɩbʋlʋ Ɩkã Ɩfalɩ Nna Nu Nkitanwʋlilɛ Nwʋ a?
Mmenii sʋ̃maa bɛ anyɩ ɩtʋnlɩ nwʋmɔ kɛɛ bɛkɛhã nna nu nkitanwʋlilɛ nwʋ odwokɔ. Naasʋ̃, sɛ Bayɩbʋlʋ ɩkãã nna nu nkitanwʋlilɛ nwʋ odwokɔ a, ɩkã yɩ penyi naasʋ̃ ɩyɛ ɔzɔ wɔ annidi ɔhʋanɩ zʋ. Yenyia mɔɔ ɩkã nɩ zʋ mfasʋ na ntɩyasɩ wɔ numɔ. Gyehova yɛ ɩwɔlɩ yɛ a, meti izi dɩyɛ mɔɔ ɩdɩ baaba ɩma yɛ. Ikile nninyeni mɔɔ yɛyɛ a, ɩkɛma yɛkɔzɔ yɩ anyɩ nɩɩ mɔɔ ɩkɛma yɛ anyɩ ikele daabaa.
1. Kɛ Gyehova bu nna nu nkitanwʋlilɛ ise a?
Nna nu nkitanwʋlilɛ ɩdɩ akyɛdɩ mɔɔ ɩzʋ̃ Gyehova yɩ ɛkɛ. Ɩpɛ kɛɛ benyia nɩɩ baalɛ mɔɔ begyia nkʋ̃tɩnyɩɩ yɛ benyia numɔ kyɛfʋã a. Akyɛdɩ eyi ɩáma agyiahʋnlɩmaa bɔwʋ nnwuakula la mfomi ɩma benyia ɔnwʋmɔ ɔhʋanɩ bɛda ɔlɔlɛ nɩɩ nɣanlɩdɩlɛ mɔɔ bɔwɔ bɛma bɔ nwʋ nɩ ali wɔ anyɩnlɩlelɛ ɔhʋanɩ zʋ. Eyi ti yɛ Nyamɩnlɩ Odwokɔ ɩkã kɛɛ: “Ɛ nɩɩ wʋ yɩ mɔɔ egyialɩ yɩ wɔ wʋ mmɩlantɩyɛ mmɩlɩ nu nɩ bɛ anyɩ ilé” yɩ a. (Ɛɣɛlɛwulɛ 5:18, 19) Gyehova ikilaa ɔhʋanɩ kɛɛ Kilisinyianɩ agyiahʋnlɩmaa bekeli nɔhʋanlɛ bɛkɛma bɔ nwʋ na ama bɛádʋnlɩ agyiahʋnlɩ mmɛla yɩ.—Kɩnga Hibulumaa 13:4.
2. Mɩnla yɛ lɛ adwomanlɩwɔlɛ a?
Bayɩbʋlʋ ɩkã ikile yɛ kɛɛ ‘adwomanlɩwɔlɛmaa bɔlɔ́kɔ Nyamɩnlɩ Bulombunlililɛ yi nu.’ (1 Kɔlɛntɩmaa 6:9, 10, NWT) Bɛzabɛ mɔɔ bɛhɛlɛlɩ Bayɩbʋlʋ yɩ wɔ Giliki nu nɩ bɛvalɩ odwokɔpɔkɔ por·neiʹa yɛ bɛva behileli adwomanlɩwɔlɛ tʋ a. Nyɛlɩyɛ mɔɔ ɩkɩnla por·neiʹa nwʋ nɩ ebiye yɛ lɛ (1) nna nu nkitanwʋlilɛ mɔɔ ɩkɔlɩ ɔzʋlɔ wɔ mmenii mɔɔ belékyialɩ bɛ avinli a, (2) mmenyia mɔɔ bɛ nɩɩ mmenyia da, nɩɩ mmaalɛ mɔɔ bɛ nɩɩ mmaalɛ da yɛɛ (3) mmenii mɔɔ bɛ nɩɩ nnamɩ da. Sɛ yɛtwɩ̃ yɛ nwʋ wɔ “adwomanlɩwɔlɛ” nwʋ a, ɩma Gyehova yɩ anyɩ ide na ɩbʋwa yɛzayɛ sʋ̃.—1 Tɛsalonikamaa 4:3.
SUMÁ SƲ̃MAA
Kilá kezimɔ ɔkɔhʋla ɔkɔhwɩ̃ wʋ nwʋ wɔ adwomanlɩwɔlɛ nwʋ na kila kezimɔ sɛ ɔbɔ ɛbɩla mɔɔ nwʋmɔ ɩtɩ a, ekenyia ɔzʋlɔ mfasʋ.
3. Ɣiandí adwomanlɩwɔlɛ
Benyia nɔhʋanlɛvʋlɔ be mɔɔ bɔfʋlɛ yɩ Dwosefi minyianlɩ yɩ nwʋ kɛɛ ɩlɛ́fa yɩ nwʋ ikowula adwomanlɩwɔlɛ nu. Kɩnga Gyɛnɛsɩsɩ 39:1-12, na akʋ̃ bozunzú ndwokɔɣizialɛ eyimmɔ nwʋ:
-
Mɩnla yɛ ɩhyɛlɩ Dwosefi ɛzɩzɩbɛ ma iɣiandinli a?—Kilá nkyɩkyɛmi 9.
-
Asʋ̃ osunzu kɛɛ Dwosefi izili pɔkɔba a? Mɩnla ti a?
Mɩnla ɔhʋanɩ zʋ yɛ mmɩlantɩyɛ nɩɩ nɣɛdɛkɛ bɔkɔhʋla bokozumazuma Dwosefi na bɛaɣiandi nna nu ɛbɩlazɩkɛlɛ wɔ nnɛ a? Yɩ́ VIDIYO nɩ.
Gyehova ɩpɛ kɛɛ ye munwala yɛtwɩ̃ yɛ nwʋ wɔ adwomanlɩwɔlɛ nwʋ. Kɩnga 1 Kɔlɛntɩmaa 6:18, na akʋ̃ bozunzú ndwokɔɣizialɛ eyimmɔ nwʋ:
-
Mɩnla bʋwabɩlɛ azʋlɔtʋ yɛ sa ɩkʋla ɩma abiye ɩfa yɩ nwʋ iwula adwomanlɩwɔlɛ nu a?
-
Kɛ ɩkɛyɛ na wʋahʋla wʋaɣiandi adwomanlɩwɔlɛ a?
4. Sa ɔkʋla ɔtwɩ̃ wʋ nwʋ wɔ odwohilalɛ nwʋ
Mɩnla yɛ ɩkɔhʋla ɩkɛma ɩkɛyɛ sɩ kɛɛ ɔkɔhwɩ̃ wʋ nwʋ wɔ odwohilalɛ mɔɔ ɩfalɩ adwomanlɩwɔlɛ nwʋ a? Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
-
Mmɩlɩ mɔ eliyema mɔɔ ɩwɔ vidiyo yi nu ɩɣa ɩnwʋnlɩ kɛɛ iákila bʋwɔ a, yɩ nzunzunlɩyɛ nɩɩ yɩ nyɛlɩyɛ ɩlɛ́ma ikeli yɩ yɩ nɔhʋanlɛ nɩ, mɩnla yɛ ɩyɛlɩ a?
Kilisinyiamaa mɔɔ bedi nɔhʋanlɛ po ɩyɛ a, ɩyɛ sɩ ɩma bɛ kɛɛ bɛkɛma bo nzunzunlɩyɛ nwʋ ɩkɛdɩ. Kɛ ɩkɛyɛ na wʋabʋ kɛɛ ɔkɔdwɩnɩndwɩnɩ nninyeni mɔɔ ɩfalɩ adwomanlɩwɔlɛ nwʋ a? Kɩnga Fɩlɩpɩmaa 4:8, na akʋ̃ bozunzú ndwokɔɣizialɛ eyimmɔ nwʋ:
-
Mɩnla nninyeni yɛ ɩsɛ kɛɛ yɛdwɩnɩndwɩnɩ nwʋ a?
-
Mɩnla ɔhʋanɩ zʋ yɛ Bayɩbʋlʋ ɛɣɩngalɛ nɩɩ Gyehova yɩ ɔzʋ̃mɩnlɛ mɔɔ yɛkɛva yɛ nwʋ yekowula numɔ nɩ ɩkɔwʋwa yɛ ma yɛkɔhʋ̃ yekediyia tanɩ nwʋ odwohilalɛ a?
5. Yenyia Gyehova yɩ mmɛla zʋ mfasʋ
Gyehova izi mɔɔ ɩdɩ baaba ɩma yɛ. Ɩkã mɔɔ sɛ yɛyɛ a, ɩkɛma yɛ ɛbɩlawɔlɛ nwʋ kɛdɩ nɩɩ mfasʋ mɔɔ yekenyia wɔ ɔzʋlɔ. Kɩnga Ɛɣɛlɛwulɛ 7:7-27 anzɛnyɩɩ yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.
-
Kɛ ɩyɛlɩ mɔɔ abɩlantɩyɛ nɩ ɩhɔ ɩdɔlɩ odwohilalɛ nu a?—Kilá Ɛɣɛlɛwulɛ 7:8, 9.
-
Kɛmɔ Ɛɣɛlɛwulɛ 7:23, 26 kile nɩ, adwomanlɩwɔlɛ ɩkʋla ɩma odwokɔ tanɩ ɩtʋ abiye. Sɛ yɛtwɩ̃ yɛ nwʋ wɔ adwomanlɩwɔlɛ nwʋ a, mɩnla ndwokɔzɩzɩbɛ yɛ yeléyiyia a?
-
Sɛ yɛma yɛ ɛbɩlawɔlɛ nwʋ tɩ a, mɩnla ɔhʋanɩ zʋ yɛ ɩkɛma yɛ anyɩ ikele daabaa a?
Abiyemmɔ bosunzu kɛɛ mɔɔ Bayɩbʋlʋ ɩkã ɩfalɩ mmenyia mɔɔ bɛ nɩɩ mmenyia da nɩɩ mmaalɛ mɔɔ bɛ nɩɩ mmaalɛ da nwʋ nɩ, ikile kɛɛ Nyamɩnlɩ ɩ́dɩ ɔlɔlɛ. Naasʋ̃ Gyehova yɛ lɛ ɔlɔlɛ Nyamɩnlɩ nɩ, ɩpɛ kɛɛ abiyela anyɩ ide daabaa. Sɛ yɛpɛ kɛɛ yenyia anyɩnlɩlelɛ daabaa a, mɛyɩ nɩ ɩsɛ kɛɛ yɛfa yɩ mmɛla yɛbɔ yɛ ɛbɩla. Kɩnga 1 Kɔlɛntɩmaa 6:9-11, na akʋ̃ bozunzú odwokɔɣizialɛ eyi nwʋ:
-
Asʋ̃ mmenyia mɔɔ bɛ nɩɩ mmenyia da nɩɩ mmaalɛ mɔɔ bɛ nɩɩ mmaalɛ da nɩ nkʋ̃ la yɛ Nyamɩnlɩ pɛ kɛɛ yɛtwɩ̃ yɛ nwʋ wɔ nwʋmɔ a?
Sɛ yɛpɛ kɛɛ yɛsɔ Nyamɩnlɩ anyɩ a, ɩsɛ kɛɛ ye munwala yɛyɛ nzɩnzanlɩyɛ. Asʋ̃ mfasʋ wɔ ɔzɔ mɔɔ yɛkɛyɛ nɩ zʋ a? Kɩnga Ndwomi 19:8, 11, na akʋ̃ bozunzú ndwokɔɣizialɛ eyimmɔ nwʋ:
-
Ekila a, Gyehova yɩ mmɛla mɔɔ ɩfalɩ ɛbɩlawɔlɛ nwʋ nɩ, ntɩyasɩ wɔ nu a? Mɩnla ti a?
Gyehova ɩwʋwa mmenii sʋ̃maa ma bɛva yɩ mmɛla mɔɔ ɩfalɩ ɛbɩlawɔlɛ nwʋ nɩ bɛyɛ egyima. Ɩkɔhʋla ɩkɔwʋwa wʋzawʋ sʋ̃
ABIYEMMƆ BƐKÃ KƐƐ: “Abiyela mɔɔ ɛpɛ yɩ nɩ sa ɔkʋla ɛ nɩɩ yɩ da, mɔɔ ihyinyia yɛ lɛ kɛɛ bɛzabɛ anwɩ̃ yɩ bɔdɔ bɔ nwʋ.”
-
Mɩnla yɛ ɛkɛhã a?
YƖ DƆKƆWƆLƐ
Nna nu nkitanwʋlilɛ ɩdɩ akyɛdɩ mɔɔ Gyehova ɩva ɩma ohunɛ nɩɩ ɛyɩlɛ kɛɛ bɛva bele bɛ anyɩ.
Kɛ Okowuwa Ekeze a?
-
Nyɛlɩyɛ mɔɔ ɩkɩnla adwomanlɩwɔlɛ nwʋ nɩ, ebiye yɛ lɛ mɩnla?
-
Mɩnla yɛ ɩkɔwʋwa yɛ ma yɛkɔhwɩ̃ yɛ nwʋ wɔ adwomanlɩwɔlɛ nwʋ a?
-
Sɛ yɛfa Gyehova yɩ mmɛla mɔɔ ɩfalɩ ɛbɩlawɔlɛ nwʋ nɩ yɛyɛ egyima a, mɩnla mfasʋ yɛ yekenyia wɔ zʋ a?
PƖBƐ́ SƲ̃MAA
Kilá sianti mɔɔ Nyamɩnlɩ pɛ kɛɛ benyia nɩɩ baalɛ bekyia ansaana bɛawʋwa bɛawɔ numɔ nɩ.
Bayɩbʋlʋ ikilehile kɛɛ mmenyia mɔɔ bɛ nɩɩ mmenyia da, nɩɩ mmaalɛ mɔɔ bɛ nɩɩ mmaalɛ da nɩ ɩdɩbɛ. Sumá sianti mɔɔ eyi iáhile kɛɛ ɩsɛ kɛɛ yɛtanɩ ɔzɔ mmenii nɩ.
Kilá kezimɔ Nyamɩnlɩ yɩ mmɛla mɔɔ ɩfalɩ nna nu nkitanwʋlilɛ nwʋ nɩ bɔ yɛ nwʋ banɩ.
Wɔ ozumalɛnwʋnlɛ mɔɔ ise “Bɛlalɩ Annidi Ali Behileli Mɩ” yi nu nɩ, kilá mɔɔ ɩhanlɩ benyia be mɔɔ nɩ ɩ nɩɩ mmenyia da nɩ ma ɩzɩnzanlɩ yɩ ɛbɩlawɔlɛ ma ɩzɔlɩ Nyamɩnlɩ anyɩ.
a Mɔɔ ɩkɩnla eyi nwʋ yɛ lɛ nna nu nkitanwʋlilɛ azʋlɔtʋ, benyia yɩ mmenyia anzɛnyɩɩ baalɛ yɩ azɩ mɔɔ bɛtavɩ, abiye yɩ mɛda mɔɔ bɛfa nɩɩ benyia yɩ mmenyia anzɛnyɩɩ baalɛ yɩ azɩ mɔɔ bɛfa bedi ɛɣɛlɛ wɔ ɔhʋanɩ mɔɔ ɩávata zʋ.
