PES 41
Kii Bibel i nkal inyu jam li malal?
Ngandak bôt i ngwés bé i mpot i mam ma malal. Ndi Bibel i mpôdôl i jam li he kiki minjôha bé, ndi ni maliga. I mam momasôna Bibel i mpot inyu malal ma yé inyu loñge yés. Yéhôva a yé Nhek wés. A nyi kii i yé loñge inyu yés. I ngéda di gwé nlélém litehge li mam kiki nye, di nti nye lipém, di ban-ga botñem i niñ i boga ni boga.
1. Lelaa Yéhôva a ntehe malal?
Malal ma yé likébla Yéhôva a nti babiina. Likébla li, li nti bo pôla i bana bon ni i éba gwéha ba gwé wada ni nuu. Inyu hala nyen Bibel i nkal le: ‘Kon maséé ni nwaa nu binéñél gwoñ.’ (Bingéngén 5:18, 19) Yéhôva a ngwés le kristen i gwés sobiina wé, ni le kekikel a kenek bañ i ndéñg.—Añ Lôk Héber 13:4.
2. Kii i yé malal ma nyega?
Bibel i nkal le: “I bôt ba mboñ malal ma nyega . . . ba ga kôdôl bé Ane Nyambe.” (1 Korintô 6:9, 10) Bibuk bini le malal ma nyega bi nlôl i buk Lôk Grikia ini le por·neiʹa. Ba ngwélél bibuk bi inyu pôdôl (1) malal ipôla munlôm ni muda a ba ba ta bé mbiibaga, (2) malal ma munlôm ni munlôm tole muda bo muda (3) malal ipôla mut binam ni nuga. Ibale di ‘ntjél malal ma nyega,’ di ga lémél Yéhôva, di kôs ki bisai.—1 Tésalônika 4:3.
KÔNDE TÉM
Di béñge lelaa di nla tjél malal ma nyega, ni nseñ hala a ga lona bés.
3. Ni kee malal ma nyega ngwéé
Mañge wanda wada le Yôsep nu a bééna hémle a bi éba le a nke malal ma nyega ngwéé. Añ Bibôdle 39:1-12, i mbus ni kwélél mambadga mana:
-
Inyuki Yôsep a bi ke ngwéé?—Béñge nlôñ 9.
-
Baa u nhoñol le Yôsep a bi yoñ makidik malam? Inyuki?
Lelaa boñge ba wanda ba nla kôna ndémbél i Yôsep, ba kee ki malal ma nyega ngwéé? Tuk VIDÉÔ.
Yéhôva a nsômbôl le bagwélél bé bobasôna ba tjél malal ma nyega. Añ 1 Korintô 6:18, i mbus ni kwélél mambadga mana:
-
Kii i nla tinde mut i boñ malal ma nyega?
-
Lelaa di nla ke malal ma nyega ngwéé?
4. U nla keñgle i hiandi hi
I mbéda biliya bi ngui inyu ke malal ma nyega ngwéé. Ndi kii i nla boñ le hala a kônde lédél mut? Tuk VIDÉÔ, i mbus ni kwélél mbadga ini:
-
Kii i mankéé nunu a bi boñ i ngéda a bi léba le mahoñol mé ni maboñok mé ma nla tinde nye i ke i ndéñg?
Yak bikristen bi bi gwé hémle i ngui bi nlama jôs mahoñol ma ndéñg. Kii di nla boñ inyu boñ le mahoñol ma nyega ma yén bañ ikété yés? Añ Filipi 4:8, i mbus ni kwélél mambadga mana:
-
Mimbe mintén mi mam di nlama ke ni bisu i hoñol?
-
Lelaa i añ Bibel ni i pagap ni mam ma mbuu bi nla hôla bés i yémbél manoodana?
5. Matiñ ma Yéhôva ma yé inyu loñge yés
Yéhôva a nyi kii i yé loñge inyu yés. A ntoñle ki bés kii di nlama boñ inyu ke ni bisu i ba mapubi, ni bimbe bisai hala a nlona bés. Añ Bingéngén 7:7-27 tole tuk VIDÉÔ, i mbus ni kwélél mambadga mana.
-
Lelaa i mañge wanda nunu a bi lébna i béba homa?—Béñge Bingéngén 7:8, 9.
-
Inoñnaga ni Bingéngén 7:23, 26, malal ma nyega ma nlona bikuu. Ibale di ntjél malal ma nyega, bimbe bikuu di ga keñgle?
-
Lelaa i ba mapubi i pes maboñok i nla hôla bés i niñ i boga ni boga?
I ngéda Bibel i nkal le Djob a ngwés bé malal ipôla bôlôm ni bôlôm tole bôda ni bôda, hala a ntinde bôt bape i nhoñol le Yéhôva a ta bé Djob li gwéha. Yéhôva a yé Djob li gwéha, a nsômbôl le bôt bobasôna ba bana niñ ilam i boga ni boga. Ndi inyu bana i niñ i, di nlama nôgôl matiñ mé. Añ 1 Korintô 6:9-11, i mbus ni kwélél mbadga ini:
-
Baa malal ipôla bôlôm ni bôlôm tole bôda ni bôda motama mon Djob a ñoo?
Inyu lémél Djob di nlama boñ mahéñha momasôna ma mbéda. Baa hala a yé toi nseñ? Añ Tjémbi 19:8, 11, i mbus ni kwélél mambadga mana:
-
Baa u nhoñol le matiñ ma Yéhôva ma yé nseñ inyu yés? Inyuki u ntimbhe hala?
Yéhôva a bi hôla ngandak bôt i héñha, a nla hôla yak we
BÔT BAPE BA NKAL LE: “I ngéda bôt iba ba ngwéhna, béba i ta bé le ba lal.”
-
Kii we u nhoñol inyu jam li?
I SEM KWEP
Malal ma yé likébla Yéhôva a bi ti babiina.
Mambadga ma mbigda
-
Inoñnaga ni Bibel, kii i yé malal ma nyega?
-
Kii i nla hôla bés i tjél malal ma nyega?
-
Umbe nseñ di nla bana ibale di nôgôl matiñ ma Yéhôva mu jam li?
KÔNDE YÉÑ
Béñge inyuki litiñ li Bibel li li mbéñge malal ipôla munlôm ni munlôm tole muda ni muda, li ntinde bé bikristen i oo i bôt ba mboñ i mam ma.
“Kii Bibel i nkal inyu bôt ba ba niñ ibabé le ba ba mbiibaga?” (Kee i jw.org)
Béñge inyuki Djob a nsômbôl le ilole munlôm ni muda ba niñ ntôñ, ba bôk ndugi ba biiba.
“Baa malal ipôla bôlôm ni bôlôm tole bôda ni bôda ma yé béba?” (kee i jw.org)
Béñge inyuki mambén ma Djob ma ma mbéñge malal ipôla munlôm ni muda ma yé inyu loñge yés.
“Baa i gwélél nyo inyu tuk ni gwom bi mbôô bi mut numpe i yé toi malal?” (Kee i jw.org)
Munu ñañ unu le: “Ils ont respecté ma dignité,” béñge i yom i bi tinde munlôm nu a bé lal ni bôlôm i héñha niñ yé.
“La Bible transforme des vies” (Tour de Garde 1er avril 2011)
a Bibuk bini le malal ma nyega bi ngwéélana ki inyu pôdôl lem i gwélél nyo inyu tuk ni gwom bi mbôô bi mut, lem i gwélél linyil inyu malal, tole lem i tihba gwom bi mbôô bi mut numpe i nya i ntôdôl ngôñ i malal.
Yak ini i nla lémél we
MAMBADGA BÔT BA MBÉNA BAT
Lelaa Mbôgi Yéhôva i ntégbaha bôt yigil i Bibel?
Mbôgi Yéhôva i nla hôla we i nigil Bibel ibabé i saa; yigil i ntagbe kiki nkwel ipôla bôt iba, u nla ki gwélél to imbe ngobol i Bibel. U kon bañ woñi i naña lihaa joñ jolisôna tole mawanda moñ.
