LEKSIYON 41
Ano an Sinasabi kan Bibliya Manungod sa Sex?
Dakul an dai komportableng pag-ulayan an manungod sa sex. Pero bakong arog kaiyan sa Bibliya. Prangka pero may dignidad pag nagsasambit iyan manungod sa sex. Makikinabang kita sa sinasabi kaiyan. Iyan nanggad an aasahan ta huling an Bibliya hali ki Jehova, an satong Kaglalang. Aram niya kun ano an pinakamarahay para sa sato. Sinasabi niya sa sato kun ano an dapat tang gibuhon para mapaugma siya asin kun ano an makakatabang sa sato para mabuhay nin maugma sagkod pa man.
1. Ano an pagmansay ni Jehova manungod sa sex?
An sex regalo hali ki Jehova. Gusto niya na magtao iyan nin kaugmahan sa sarong lalaki asin sarong babayi na legal na nag-iibanan bilang mag-agom. Itinao nin Diyos an regalong iyan bako lang para magkaaki an mga mag-agom, kundi para maipahiling man ninda an pagkamuot asin pagpadangat sa lambang saro sa natural asin nakakaugmang paagi. Kaya sinasabi kan Tataramon nin Diyos: “Lugod na maggaya-gaya ka sa babaying agom mo na puon kan hoben ka pa.” (Talinhaga 5:18, 19) Inaasahan ni Jehova sa mga mag-agom na Kristiyano na magigin maimbod sinda sa lambang saro, tanganing dai sinda makagibo nin pagsambay.—Basahon an Hebreo 13:4.
2. Ano an seksuwal na imoralidad?
Sinasabi sa sato kan Bibliya na “an mga tawong imoral . . . dai magmamana kan Kahadian nin Diyos.” (1 Corinto 6:9, 10) Ginamit kan mga kagsurat kan Bibliya an termino sa Griego na por·neiʹa para sa seksuwal na imoralidad. Kaiba sa terminong iyan an (1) seksuwal na relasyon a nin duwang tawo na bakong kasal, (2) homoseksuwalidad, asin (3) pakikidurog nin tawo sa hayop. Napapaugma ta si Jehova asin nakikinabang kita kun ‘malikay kita sa seksuwal na imoralidad.’—1 Tesalonica 4:3.
ARAMON PA
Aramon kun paano mo malilikayan an seksuwal na imoralidad asin kun paano ka makikinabang kun magdadanay kang malinig sa moral.
3. Dumulag sa seksuwal na imoralidad
Pinagmaigutan na marhay kan maimbod na lalaking si Jose na magdanay na malinig sa moral. Basahon an Genesis 39:1-12, dangan pag-ulayan an mga hapot na ini:
-
Taano ta nagdulag si Jose kan akiton siya kan agom ni Potifar?—Hilingon an bersikulo 9.
-
Sa hiling mo, tama daw an nagin desisyon ni Jose? Taano?
Paano maaarog kan mga hoben ngunyan si Jose sa pagdulag sa seksuwal na imoralidad? I-play an VIDEO.
Gusto ni Jehova na isikwal ta an imoralidad. Basahon an 1 Corinto 6:18, dangan pag-ulayan an mga hapot na ini:
-
Anong mga sitwasyon an puwedeng makatentar sa saro na gumibo nin seksuwal na imoralidad?
-
Paano mo madudulagan an imoralidad?
4. Malalabanan mo an mga sugot
Ano an puwedeng makapadipisil sa sato na malabanan an sugot na gumibo nin seksuwal na imoralidad? I-play an VIDEO, dangan pag-ulayan an hapot.
-
Ano an ginibo kan brother sa video kan mapag-isip-isip niya na posibleng dai siya magin maimbod sa saiyang agom dahil sa saiyang iniisip asin ginigibo?
Dawa an maimbod na mga Kristiyano puwedeng masakitan kun minsan na mapagdanay an malinig na kaisipan. Paano mo malilikayan na magparaisip nin imoral na mga bagay? Basahon an Filipos 4:8, dangan pag-ulayan an mga hapot na ini:
-
Anong mga bagay an dapat tang isip-isipon?
-
Paano makakatabang sa sato an pagbasa nin Bibliya asin an pagigin sibot sa paglilingkod ki Jehova na malabanan an sugot na magkasala?
5. Para sa ikakarahay ta an mga pamantayan ni Jehova
Aram ni Jehova kun ano an pinakamarahay para sa sato. Sinasabi niya sa sato kun paano kita magdadanay na malinig sa moral asin an mga pakinabang kan paggibo kaiyan. Basahon an Talinhaga 7:7-27 o i-play an VIDEO, dangan pag-ulayan an mga hapot.
-
Taano ta napaatubang an hoben na lalaki sa nakakatentar na sitwasyon?—Hilingon an Talinhaga 7:8, 9.
-
Uyon sa Talinhaga 7:23, 26, an seksuwal na imoralidad puwedeng magkaigwa nin marauton na mga resulta. Kun magdadanay kitang malinig sa moral, anong mga problema an malilikayan ta?
-
Kun malinig kita sa moral, paano iyan makakatabang sa sato na magin maugma ngunyan asin sagkod pa man?
May mga nag-iisip na an sinasabi kan Bibliya manungod sa homoseksuwalidad dai nagtutukdo nin pagkamuot. Pero bilang Diyos nin pagkamuot, gusto ni Jehova na an gabos magin maugma habangbuhay. Para makamtan iyan, dapat na mamuhay kita kauyon kan saiyang mga pamantayan. Basahon an 1 Corinto 6:9-11, dangan pag-ulayan an hapot na ini:
-
An homoseksuwal na mga pagmawot sana daw an bakong tama sa paghiling nin Diyos?
Para mapaugma an Diyos, gabos kita kaipuhan na gumibo nin mga pagbabago. Sulit daw kun gigibuhon ta iyan? Basahon an Salmo 19:8, 11, dangan pag-ulayan an mga hapot na ini:
-
Sa hiling mo, rasonable daw an mga pamantayan ni Jehova sa moral? Taano?
Dakul nang natabangan si Jehova na maiuyon an saindang buhay sa mga pamantayan niya. Matatabangan ka man niya
MAY MGA NAGSASABI: “Okey lang mag-sex an duwang tawo basta nagkakaminuutan sinda.”
-
Ano an sasabihon mo?
SUMARYO
An sex regalo ni Jehova para sa sarong lalaki asin babayi na kasal.
Rebyu
-
Anong mga gibo an kaiba sa seksuwal na imoralidad?
-
Ano an makakatabang sa sato para malikayan an seksuwal na imoralidad?
-
Paano kita nakikinabang pag sinusunod ta an mga pamantayan ni Jehova sa moral?
HILINGON MAN
Aramon kun taano ta gusto nin Diyos na kasal an sarong lalaki saka babayi bago mag-ibanan.
“Ano an Sinasabi kan Bibliya Manungod sa Pag-live-in?” (Artikulo sa jw.org/bcl)
Itinutukdo kan Bibliya na sala an homoseksuwal na mga gibo. Pero taano ta dai iyan nangangahulugan na dapat kitang maanggot sa mga homoseksuwal.
Aramon kun paano nakakaprotektar sa sato an mga pagbuot nin Diyos manungod sa sex.
“Maibibilang Daw Talagang Sex an Oral Sex?” (Artikulo sa jw.org/bcl)
Sa eksperyensiya na “Trinatar Ninda Ako na May Dignidad,” aramon kun ano an nakapahiro sa sarong homoseksuwal na baguhon an saiyang buhay para mapaugma an Diyos.
“Binago kan Biblia an Saindang Buhay” (An Torrengbantayan, Abril-Hunyo 2011)
a Kaiba sa salang mga gibong ini an pakikipag-sex, oral sex, anal sex, asin paghapiyap sa ikinabuhay nin iba na may seksuwal na pagmawot.
Puwede Mo Man Magustuhan
PARATING MGA IHINAHAPOT
Ano an Pag-adal sa Bibliya na Iinaalok kan mga Saksi ni Jehova?
Sa interactive na programa nin pag-adal na iinaalok kan mga Saksi ni Jehova, puwede mong gamiton an arin man na traduksiyon nin Bibliya. Dai mag-alangan na imbitaran an saimong bilog na pamilya o an siisay man sa mga amigo mo na umiba saimo.
