ISAMBILILO 41
Finshi Baibolo Ilanda pa Kulaala Pamo Ukwa Mwaume no Mwanakashi?
Abantu abengi balomfwa insoni ukulanda pa lyashi lya kulaala pamo ukwa mwaume no mwanakashi. Nomba Baibolo yalilanda pali ili lyashi mu kulungatika, kabili yalanda mu nshila iishingalenga twaumfwa insoni. Ifyo ilanda filatwafwa, pantu yafuma kuli Yehova uwatubumbile. Yehova alishiba bwino ifingatuwamina. Alitweba ifyo twingacita pa kuti tulecita ifingalenga alesekelela, ne fingalenga twaba ne nsansa umuyayaya.
1. Bushe Yehova amona shani ukulaala pamo ukwa mwaume no mwanakashi?
Ukulaala pamo ukwa mwaume no mwanakashi bupe ubo Lesa apeela abantunse. Yehova alanda ukuti umwaume no mwanakashi abaupana e bafwile fye ukulaala pamo. Ukulaala pamo ukwa baupana takulenga fye bakwata abana, lelo kulalenga balanga no kuti balitemwana, kabili ici cilenga balasekelela. E mulandu wine Icebo ca kwa Lesa cilandila ukuti: “Sekelela no mukashi wa ku bulumendo bobe.” (Amapinda 5:18, 19) Yehova afwaya Abena Kristu abaupana ukuba aba cishinka ku bena mwabo, pa kuti tabacitile ubucende.—Belengeni AbaHebere 13:4.
2. Bushe ubulalelale cinshi?
Baibolo itila “aba bulalelale . . . tabakapyane ubufumu bwa kwa Lesa.” (1 Abena Korinti 6:9, 10) Ishiwi lya ciGriki ilyo bapilibula ukuti ubulalelale ni por·neiʹa. Muli ili ishiwi mwaba (1) ukulaala pamo ukwa mwaume no mwanakashi abashaupana, a (2) ukuulungana kwa baume beka beka nelyo abanakashi beka beka, na (3) ukuulungana ne nama. Nga ‘twataluka ku bulalelale’ Yehova alatemwa kabili ifintu filatuwamina.—1 Abena Tesalonika 4:3.
SAMBILILENI NA FIMBI
Moneni ifingamwafwa ukutaluka ku bulalelale, e lyo no busuma bwaba mu kuba abasanguluka.
3. Fulumukeni ubulalelale
Yosefe ali uwa cishinka kabili alikeene ilyo umwanakashi amwebele ukuti alaale nankwe. Belengeni Ukutendeka 39:1-12, lyena lanshanyeni aya mepusho:
-
Cinshi calengele Yosefe akaane ukucita ubulalelale?—Moneni icikomo 9.
-
Bushe muletontonkanya ukuti Yosefe alicitile fye bwino? Cinshi mwa-asukila ifyo?
Finshi abacaice muno nshiku bafwile ukucita pa kuti bafulumuke ubulalelale nga filya Yosefe acitile? Tambeni VIDIO.
Yehova tafwaya tulecita ubulalelale. Belengeni 1 Abena Korinti 6:18, lyena lanshanyeni aya mepusho:
-
Finshi ifingalenga umuntu acita ubulalelale?
-
Kuti mwacita shani pa kuti tamucitile ubulalelale?
4. Kuti mwafulumuka ubulalelale
Cinshi cingalenga camukosela ukukaana itunko lya kucita ubulalelale? Tambeni VIDIO, lyena lanshanyeni icipusho cakonkapo.
-
Muli vidio twatamba, finshi munyinefwe acicita ilyo acishiba ukuti ifyo aletontonkanya ne fyo alecita kuti fyalenga acita ubucende?
Inshita shimo na Bena Kristu ba cishinka nabo bene kuti cabakosela ukulatontonkanya fye pa fyasanguluka. Kuti mwacita shani pa kuti muleke ukutontonkanya pa fyabipa? Belengeni Abena Filipi 4:8, lyena lanshanyeni aya mepusho:
-
Finshi tulingile ukulatontonkanyapo?
-
Bushe ukubelenga Baibolo no kubombesha mu mulimo wa kwa Yehova kuti kwatwafwa shani ukukanacita ulubembu?
5. Amafunde ya kwa Yehova yalatucingilila
Yehova alishiba bwino ifingatuwamina. Alatweba ifyo tufwile ukucita pa kuti tube abasanguluka, alatweba no busuma bwaba mu kuba abasanguluka. Belengeni Amapinda 7:7-27 nelyo tambeni VIDIO, no kulanshanya amepusho yakonkapo.
-
Cinshi calengele umulumendo umo atunkwe ukucita ubulalelale?—Moneni Amapinda 7:8, 9.
-
Baibolo pa Amapinda 7:23, 26 itila, mu kucita ubulalelale mulafuma ifintu ifyabipa. Mafya nshi tushingakwata nga ca kuti tuli abasanguluka mu mibele?
-
Bushe ukuba abasanguluka mu mibele kuti kwalenga shani twaba ne nsansa umuyayaya?
Abantu batontonkanya ukuti ifyo Baibolo ilanda pa baume abalaala na baume banabo, na banakashi abalaala na banakashi banabo tafyawama. Lelo Yehova ni Lesa uwaba no kutemwa, kabili afwaya abantu bonse baba ne nsansa umuyayaya. Pa kuti tukabe no mweo wa muyayaya tufwile ukulakonka amafunde ya kwa Lesa. Belengeni 1 Abena Korinti 6:9-11, lyena lanshanyeni ici cipusho:
-
Bushe Lesa apata fye abaume abalaala na baume banabo na banakashi abalaala na banakashi banabo?
Pa kuti tulecita ifingalenga Lesa alesekelela, bonse fye tulingile ukwaluka muli fimo. Bushe mwaliba ubusuma mu kwaluka? Belengeni Amalumbo 19:8, 11, lyena lanshanyeni aya mepusho:
-
Bushe muletontonkanya ukuti amafunde ya kwa Lesa ayalanda pa kuba ne mibele iisuma yaliba fye bwino? Cinshi mwa-asukila ifyo?
Yehova alyafwa abantu abengi ukwaluka no kulakonka amafunde yakwe ayalanda pa kuba ne mibele iisuma. Na imwe bene kuti amwafwa ukwaluka
ABANTU BAMO BATILA: “Cali ba fye bwino ukulaala no uuli onse, cikulu fye namutemwana.”
-
Kuti mwalanshanya shani nabo?
IFYO MUSAMBILILE
Ukulaala pamo ukwa mwaume no mwanakashi bupe ubo Yehova apeela abaupana pa kuti baleba ne nsansa.
Ukupitulukamo
-
Bushe mu bulalelale mwaba na finshi?
-
Finshi tufwile ukucita pa kuti tatucitile ubulalelale?
-
Busuma nshi tusangamo nga tulekonka amafunde ya kwa Yehova ayalanda pa kuba ne mibele iisuma?
ISHIBILENIPO NA FIMBI
Moneni ico Lesa afwaila ukuti umwaume no mwanakashi baupana ilyo bashilatendeka ukwikala pamo.
Moneni ifi Baibolo isambilisha ukuti abaume tabalingile ukulaala na baume banabo na banakashi tabalingile ukulaala na banakashi banabo, cishipilibwila ukuti tulingile ukupata aba bantu.
“Bushe Ukulaala Pamo Ukwa Baume Bekabeka Nelyo Abanakashi Bekabeka Lubembu?” (Icipande ca pa jw.org)
Sambilileni ifyo amafunde ya kwa Lesa ayalanda pa bulalelale bwa misango yonse yatucingilila.
“Bushe Ukufyompana Ifya Mfwalo Nako Bulalelale?” (Icipande ca pa jw.org)
Belengeni ilyashi ilileti “Balincindike” pa kuti mumone icalengele umwaume uwalelaala na baume banankwe aaluke no kutendeka ukucita ifyo Lesa atemwa.
“Baibolo Ilaalula Abantu” (Ulupungu lwa kwa Kalinda, April 1, 2011)
a Umwaume no mwanakashi tabafwile no kucita ifintu pamo nga ukufyompana ifya mfwalo, ukuulungana kwa ku matako, no kwikataula ifya mfwalo fya muntu umbi pa kuti omfwe insuna.
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
