KALANSEN 41
Bibulu bɛ mun de fɔ cɛnimusoya ko la?
A man nɔgɔn mɔgɔ caman ma ka kuma cɛnimusoya ko la. Nka ni Bibulu bɛ kuma cɛnimusoya ko la, a bɛ kuma o kan cogo jɛlen na nka a b’o kɛ bonya kɔnɔna na. Bibulu bɛ min fɔ o ko la, o bɛ an nafa. O ye hakilitigiyako ye ka d’a kan Bibulu bɔra Jehova de yɔrɔ, o min ye an Dabaga ye. Ale b’a dɔn fɛn min ka ɲi an ma. An ka kan ka min kɛ walasa an ko ka diya a ye, a bɛ o fɔ an ye. A b’a fɔ an ye fana fɛn min bɛna an dɛmɛ ka ɲɛnamaya kɛ nisɔndiya la fo badaa.
1. Jehova hakilina ye mun ye cɛnimusoya kan?
Cɛnimusoya ye nilifɛn ye ka bɔ Jehova yɔrɔ. A b’a fɛ cɛ ni muso minnu furula ɲɔgɔn ma, olu ka nisɔndiya sɔrɔ cɛnimusoya la. O nilifɛn b’a to furuɲɔgɔnmaw ka denw sɔrɔ nka a b’a to fana u k’u ka kanuya ani u ka tin jira ɲɔgɔn na cogo bɛnnen na ani nisɔndiya kɔnɔ. O de la Ala ka Kuma b’a fɔ ko: “I denmisɛnma muso ka kɛ i ɲagali sababu ye.” (Ntalenw 5:18, 19) Jehova b’a fɛ krecɛn furuɲɔgɔnmaw ka tilen ɲɔgɔn ye, o la u tɛna jɛnɛya kɛ abada.—Heburuw 13:4 kalan.
2. Kakalaya ye mun ye?
Bibulu b’a fɔ an ye ko “kakalaw . . . tɛna Ala ka masaya sɔrɔ.” (1 Kɔrɛntekaw 6:9, 10) Bibulu sɛbɛnbaga minnu ye sɛbɛnni kɛ Gɛrɛkikan na, olu ye baara kɛ ni pornéïa daɲɛ de ye walasa ka kakalaya ɲɛfɔ. O daɲɛ kɔrɔ ye min ye, nin fɛn ninnu sen bɛ o la: (1) cɛnimusoya a mɔgɔw ni ɲɔgɔn cɛ minnu furulen tɛ ɲɔgɔn ma, (2) cɛɲɔgɔn ɲini ni musoɲɔgɔn ɲini, ani (3) ka jɛ bagan fɛ. An ko bɛ diya Jehova ye ani an yɛrɛ bɛ nafa sɔrɔ ni an tɛ “jatɔya kɛ.”—1 Tesalonikekaw 4:3.
DƆ FARA I KA DƆNNIYA KAN
An k’a lajɛ mɔgɔ bɛ se ka a yɛrɛ tanga kakalaya ma cogo min na ani a bɛna nafa min sɔrɔ ni a saniyalen tora jogo ta fan fɛ.
3. A’ ye boli jatɔya ɲɛ
Yusufu banna muso dɔ ka laɲinita ma, o min tun b’a fɛ ka cɛnimusoya kɛ n’a ye. Jenɛse 39:1-12 kalan, o kɔ aw ka baro kɛ nin ɲininkaliw kan:
-
Mun de ye dusu don Yusufu kɔnɔ a ka boli?—Tilayɔrɔdennin 9 lajɛ.
-
Yala i hakili la, Yusufu ye latigɛli ɲuman kɛ wa? Mun na?
Funankɛninw bɛ se ka Yusufu ladege cogo di ani ka boli jatɔya ɲɛ an ka bi donw na? A’ye WIDEYO lajɛ.
Jehova b’a fɛ an bɛɛ ka an yɛrɛ tanga jatɔya ma. 1 Kɔrɛntekaw 6:18 kalan, o kɔ aw ka baro kɛ nin ɲininkaliw kan:
-
Ko sugu jumɛnw de bɛ se ka mɔgɔ bila ka jatɔya kɛ?
-
I bɛ se ka boli jatɔya ɲɛ cogo di?
4. I bɛ se ka se sɔrɔ kɔrɔbɔli kan
Kɔrɔbɔli min bɛ mɔgɔ bila ka jatɔya kɛ, mun de bɛ se ka se sɔrɔli gɛlɛya o kɔrɔbɔli kan? A’ye WIDEYO lajɛ, o kɔ aw ka baro kɛ nin ɲininkali kan:
-
Balimakɛ min bɔra wideyo kɔnɔ, tuma min na o y’a jateminɛ ko a ka miirina ni a ka kɛwale dɔw bɛ se ka a bila a kana kɛ kantigi ye a muso ma, a ye mun de kɛ?
Hali krecɛn kantigiw bɛ kɛlɛ kɛ tuma dɔw la walasa ka u ka miiriliw saniyalen to. Min ye ka to ka miiri jatɔya kow kan, i bɛ se ka i yɛrɛ tanga o ma cogo di? Filipekaw 4:8 kalan, o kɔ aw ka baro kɛ nin ɲininkaliw kan:
-
An ka kan ka to ka miiri fɛn sugu jumɛnw de ko la?
-
Bibulu kalanni ani ka ta’a fɛ ka an bolo degunnen to Jehova ka baara la, o bɛ se ka an dɛmɛ cogo di ka se sɔrɔ jurumu kɔrɔbɔliw kan?
5. Jehova ka sariyakolow bɛ an nafa
Jehova b’a dɔn fɛn min ka fisa an ma kosɛbɛ. A b’a fɔ an ye an saniyalen bɛ se ka to cogo min na jogo ta fan fɛ ani an bɛ nafa minnu sɔrɔ o kɛli la. Ntalenw 7:7-27 kalan walima a’ye WIDEYO lajɛ, o kɔ aw ka baro kɛ nin ɲininkaliw kan:
-
Kamalen y’a yɛrɛ bila kɔrɔbɔli kɔnɔ cogo di?—Ntalenw 7:8, 9 lajɛ.
-
Ka kɛɲɛ ni Ntalenw 7:23, 26 ye, jatɔya bɛ se ka na ni kɔlɔlɔ jugubaw ye. Ni an saniyalen tora jogo ta fan fɛ, an bɛ se ka an yɛrɛ tanga gɛlɛya jumɛnw ma?
-
Ka saniya jogo ta fan fɛ, o bɛ se ka an dɛmɛ cogo di an ka ɲɛnamaya kɛ nisɔndiya la fo badaa?
Mɔgɔ dɔw b’a miiri ko Bibulu bɛ min fɔ cɛɲɔgɔn ɲini ani musoɲɔgɔn ɲini kan, ko o ka gɛlɛn ko jugu ani ko o t’a jira ko kanuya bɛ Ala la. Nka Jehova ye kanuya Ala de ye, a b’a fɛ bɛɛ ka ɲɛnamaya kɛ nisɔndiya la fo badaa. Walasa ka o sɔrɔ, an ka kan ka ɲɛnamaya kɛ ka kɛɲɛ ni a ka sariyakolow ye. 1 Kɔrɛntekaw 6:9-11 kalan, o kɔ aw ka baro kɛ nin ɲininkali kan:
-
Yala cɛɲɔgɔn ɲini walima musoɲɔgɔn ɲini negew dɔrɔn de ye nege bɛnbaliw ye Ala ɲɛkɔrɔ wa?
An bɛɛ ka kan ka yɛlɛma dɔw kɛ walasa an ko ka diya Ala ye. Yala kun bɛ o yɛlɛmaw kɛli la wa? Zaburu 19:9, 12 kalan, o kɔ aw ka baro kɛ nin ɲininkaliw kan:
-
Jehova ka sariyakolow jogo ta fan fɛ, yala e hakili la, olu ye ko bɛnnen ye wa? Mun na e sɔnnen bɛ o ma walima mun na e ma sɔn o ma?
Jehova ye mɔgɔ caman dɛmɛ u k’u ka ɲɛnamaya kɛ ka kɛɲɛ ni a ka sariyakolow ye jogo ta fan fɛ. A bɛ se ka e fana dɛmɛ
MƆGƆ DƆW B’A FƆ KO: “Ni mɔgɔ fila bɛ ɲɔgɔn kanu ka ban, a bɛnnen don u ka cɛnimusoya kɛ o waati bɛɛ kɔnɔna na.”
-
I bɛna mun de fɔ ka o tigilamɔgɔw jaabi?
BAKURUBAFƆLI
Cɛnimusoya ye nilifɛn ye Jehova ye min di cɛ ni a muso ma walasa u k’a diyabɔ.
Seginnkanni
-
Fɛn jumɛnw sen bɛ kakalaya la?
-
Mun de bɛna an dɛmɛ an k’an yɛrɛ tanga kakalaya ma?
-
An bɛ nafa jumɛnw sɔrɔ ni an tugura Jehova ka sariyakolow kɔ jogo ta fan fɛ?
NINNU LAJƐ
Cɛ ni muso minnu b’a fɛ ka sigi ɲɔgɔn kun, Ala b’a fɛ olu ka furu ɲɔgɔn ma, o kun sɛgɛsɛgɛ.
Ala ye sariya minnu di cɛnimusoya suguw bɛɛ kan, olu bɛ an lakana cogo min na, o lajɛ.
“U ye danbe da ne kan,” o ko kɛlen kɔnɔ, a lajɛ fɛn min ye dusu don cɛɲɔgɔn ɲinina dɔ kɔnɔ a k’a ka ɲɛnamaya kɛcogo yɛlɛma walasa ka a kodiya Ala ye.
a O jɛɲɔgɔnya minnu dagalen tɛ, olu suguyaw ka ca, i n’a fɔ ka cɛnimusoya kɛ ni mɔgɔ ye i ni min furulen tɛ ɲɔgɔn ma, ka cɛ ka cɛya don i da la walima ka i da don muso ka musoya kɔnɔ, ka cɛnimusoya kɛ ni mɔgɔ kɔfɛla ye ni o ye a bodingɛ ye, ani ka mɔgɔ wɛrɛ cɛya walima a musoya mɔmɔ walima k’a saalo cɛnimusoya sira fɛ.
