ARUFUDAHANI 41
Ka tariñagubei Bíbülia luagu agamariduni?
Masandiraguntiña saragu gürigia houngua buidu dan le hayanuhan luagu agamariduni. Ánhounti Bíbülia, furanguti tayanuhan luagu agamariduni ani adüga tumuti lau inebesei. Barüti le tariñagubei saragu buiti woun. Ani ligía agurabúbei ladüga lúmagiñe Heowá tiabin Bíbülia, ligía adügübaliwa ani subudi lumuti ka lan buídutimabei woun. Ariñaga lumuti woun ka lan lunbei wadügüni lun wagundaaragüdüni ani líderagubadiwa lun wawinwandun lau ugundani lun súnwandan.
1. Ida liña larihini Heowá agamariduni?
Aban idewesei lúmagiñeti Heowá agamariduni. Busenti lun lanügün agamariduni ugundani lun aban wügüri tuma aban würi ha maríeitiña hámagua. Mámarügüñein lun gasaanigu hamá maríeitiña lahuuda idewesei le, huuti giñe lun harufudun ínsiñeni hámagua lidan aban igaburi le ruti ugundani houn. Ligía tariñagunbei Lererun Bungiu: “Gundaabá tuma to úmaboun bamarieida danbei nibureingidibu” (Ariñawagúni 5:18, 19). Agurabati Heowá lun úaragua hamá kristiánugu maríeitiña hámagua. Ligíati moun lumuti lubéi hagabarahan kristiánugu (aliiha huméi Ebüréu 13:4).
2. Katei san magíagunibei?
Ariñagatu Bíbülia siñabei lan “hebelurun [gürigia ha adügübaña magíaguni] lidoun larúeihan Bungiu” (1 Korintuna 6:9, 10). Pornéia dimurei güriegu le hayusurubei abürühatiña Bíbülia lun hayanuhan luagu magíaguni. Lidan katei le, anihein 1) lagamaridun aban wügüri aban würi to úmaboun mamarieidun lan, a 2) lagamaridun wügüri wügüri líledi o würi würi tíledi luma 3) hagamaridun gürigia animaalugu. Gúndaagüda wamuti Heowá dan le maha wamá lun magíaguni ani barüti katei le saragu buiti woun (1 Tesalónikana 4:3).
SIGÍ HUMÁ AFURENDEIRA
Ariha waméi ka lan gayaraabei hadügüni lun méiguadun humá lidoun magíaguni luma kaba lan buiti lanüga hun anhaün akipuragua hungua harumañu luéi katei burí le.
3. Anuraha humá luéi magíaguni
Máhati meha aban wügüri úaraguati gíriti Hosé lun ladügün magíaguni tuma aban würi to áluguboun tarounrun luma. Aliiha huméi Agumesehani 39:1-12, ábameti hayanuhan luagu álügüdahani burí le:
-
Ka uagu léibaagua Hosé? (Ariha huméi bérusu 9).
-
Afiñetün san buidu lan le ladügübei Hosé? Ka uagu?
Ida luba háyeihani nibureintiña Hosé lun hanurahan luéi magíaguni? Ariha huméi BIDÉU.
Busenti Heowá lun wanurahan luéi magíaguni. Aliiha huméi 1 Korintuna 6:18, ábameti hayanuhan luagu álügüdahani burí le:
-
Ka katei gayaraabei ladügün lun léiguadun gürigia lidoun magíaguni?
-
Ida luba hanurahan luéi magíaguni?
4. Gayaraati hawanduni óuchawaguni
Ka katei gayaraabei ladügün lun hénrengu lan woun wagagibudagun luma magíaguni? Ariha huméi BIDÉU, ábameti hayanuhan luagu álügüdahani le.
-
Ka ladügübei íbiri le áfuachubei lidan bidéu dan le líchugunbei fe gayara lan ladügün le lasaminarubei luma ligaburi lóuserun lun lagabarahanu lani weiriou?
Íbini kristiánugu ha úaraguatiña anihein dan mosu lan hageindagun lun haruma lan hakipuruni hasaminan. Ka gayaraabei hadügüni lun merederun humá asaminara luagun magíaguni? Aliiha huméi Filipuna 4:8, ábameti hayanuhan luagu álügüdahani burí le:
-
Ka katei uágunbei lunti lan wasaminarun?
-
Afiñetün san ménrengutimabei lan woun lun méiguadun wamá lidoun óuchawaguni ánhawa aliihoun Bíbülia, beresegu ligíame wakipuragun woungua lidan weseriwidun lun Heowá? Ka uagu?
5. Barüti lilurudun Heowá saragu buiti woun
Subudi lumuti Heowá ka lan katei buídutimabei woun. Ligía lariñagunbalin woun ida luba lan wakipuruni wabagari harumañu luma kaba lan buiti lanüga woun. Aliiha huméi Ariñawagúni 7:7-27 o ariha huméi BIDÉU, ábameti hayanuhan luagu álügüdahani burí le:
-
Ida liña ládaragun nibureinti le lungua lidoun turobuli? (Ariha huméi Ariñawagúni 7:8, 9).
-
Según Ariñawagúni 7:23, 26, wuribati hagumuchun ha ádaragubaña houngua lidoun magíaguni. Ka burí turobuli ueibei wesefura dan le haruma lan wakipuruni wabagari?
-
Ida liña lídehan haruma lan wakipuruni wabagari lun gunda wamá lun súnwandan?
Añahein gürigia saminatiña le lan tariñagubei Bíbülia hawagu magüsi arufuda lan mínsiñehabuni. Ani le linarün katei, aban Bungiu lánina ínsiñeni Heowá, ani busenti lun wawinwandun lau ugundani lun súnwandan. Lun wibihini lira, mosu úaragua lan wawinwandun luma lilurudun. Aliiha huméi 1 Korintuna 6:9-11, ábameti hayanuhan luagu álügüdahani le:
-
Láurügüñein san magüsi hamá gürigia magundan lan Bungiu?
Sun wagía mosu wadügün asansiruni lun lagundaarun Bungiu wau. Lanügüba san áfaaguni ligía buiti woun? Aliiha huméi Sálumu 19:8, 11, ábameti hayanuhan luagu álügüdahani burí le:
-
Afiñetün san gayara lan lagunfulirúniwa lau le lamuriahabei Heowá wámagiñe? Ka uagu hasaminara ítara?
Íderaguaali Heowá saragu gürigia lun gaganbadi hamá lun lilurudun luáguti laruman ibagari ani gayaraati giñe líderagunün.
LE HARIÑAGUBEI FIU GÜRIGIA: “Anhein hínsiñegua habéi bián gürigia hámagua, maribanti harounrun hámagua”.
-
Agia huguya, ka hasaminarubei?
LE HAFURENDEIRUBEI
Aban idewesei lúmagiñeti Heowá agamariduni lun aban wügüri maríeiti tuma lani weiriou.
Águyuguagüdüni
-
Ka burí san katei lídanbei magíaguni?
-
Kaba íderaguawa lun mábürühan wamá lidoun magíaguni?
-
Ka buiti wibihubei dan le gaganbadi wamá lun lilurudun Heowá luáguti laruman ibagari?
FURENDEI HUMÁ LANWOUN
Ariha huméi ka lan uagu busén lubéi Bungiu lun lamarieidun wügüri tuma würi ha busenbaña hawinwandun úara.
Aliiha huméi ka lan uagu mínchahan lubaliwa le tariñagubei Bíbülia luagu lagamaridun wügüri wügüri líledi o würi würi tíledi lun wasandirun iyereehabúni hawagu magüsi.
“Wuribati san magüsi lan gürigia?” (Ariñahani lídangiñeti jw.org)
Ariha huméi ida liña lan lóunigiruniwa lilurudun Bungiu luéi échuni kamaniti le lídanbei agamariduni uguñe weyu.
Ka ínchahabalin aban magüsi asansirei libagari lun lagundaaragüdüni Bungiu? Aliiha huméi abahüdaguni luáguti ibagari “Me trataron con dignidad”.
“La Biblia les cambió la vida” (La Atalaya, to lánina 1 lidan gádürü-hati, irumu 2011)
a Lidan magíaguni, anihein layusurún iyumaü luma anagangiñeti lidan agamariduni luma giñe hamulidaagun gürigia hámagua.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
