TJONÏK 41
¿Achkë nuʼij le Biblia chrij ri sexo?
Ye kʼïy winäq kan kʼixbʼäl chkiwäch taq yetzjon chrij ri sexo. Ye kʼa Ruchʼaʼäl Dios kan chöj yeruyaʼ naʼoj chrij riʼ chqä kan pa rubʼeyal nuʼän che rä. Ri naʼoj riʼ kan kʼo utzil nkikʼäm pä pa qawiʼ. Qataman riʼ rma jontir ri naʼoj ye kʼo chpan le Biblia petenäq rkʼë Jehová, ri xbʼanö qchë chqä retaman ri más ütz chqë. Ryä nukʼüt chqawäch achkë qanaʼoj kʼo chë nqaʼän rchë kiʼ rukʼuʼx nuʼän qkʼë chqä achkë xtbʼanö chë xtqïl ri kʼaslemal ri majun bʼëy xtkʼis ta.
1. ¿Achkë rubʼanik nutzʼët Jehová ri sexo?
Ri sexo jun spanïk ri nuyaʼ Jehová chqë. Ye kʼa ryä nrajoʼ chë xa xuʼ jun achï chqä jun ixöq ri ye kʼlan chik ütz njeʼ ya riʼ chkiwäch. Ri spanïk riʼ ma xa xuʼ ta nuʼän chë jun kʼlaj winäq yejeʼ kalkʼwal, xa kan ya riʼ chqä jun rubʼanik nkikʼüt chkiwäch chë nkajoʼ kiʼ chqä kiʼ kikʼuʼx nkiʼän. Rma riʼ ri Ruchʼaʼäl Dios nuʼij reʼ: «Kan kiʼ akʼuʼx tabʼanaʼ rkʼë ri ixöq ri achoq rkʼë xakʼleʼ wä taq kʼa yït kʼajol na» (Proverbios 5:18, 19). Jehová nrajoʼ chë ri cristianos ri ye kʼlan chik ma nkikanuj ta rukʼexel ri kikʼlaj. Rma riʼ jun cristiano majun bʼëy kʼo ta chë nuʼän riʼ (taskʼij ruwäch Hebreos 13:4).
2. ¿Achkë riʼ ri tzʼil taq bʼanobʼäl?
Le Biblia nuʼij chë «ri winäq ri yebʼanö tzʼil taq bʼanobʼäl [...] ma xkeʼok ta chpan Ruqʼatbʼäl Tzij Dios» (1 Corintios 6:9, 10). Ri tzij griego ri xkiksaj ri xetzʼibʼan le Biblia taq xetzjon chkij ri tzʼil taq bʼanobʼäl, ya riʼ pornéia. Re tzij reʼ najin ntzjon chrij 1) taq jun achï nwär qa rkʼë jun ixöq ri ma kʼlan ta rkʼë, a 2) taq kaʼiʼ achiʼaʼ o kaʼiʼ ixoqiʼ nkikʼwaj qa kiʼ y 3) taq jun winäq nuʼän tzʼil taq bʼanobʼäl rkʼë jun chköp. Taq röj ma yeqaʼän ta tzʼil taq bʼanobʼäl, Jehová kan kiʼ rukʼuʼx nuʼän qkʼë chqä kan kʼïy utzil nqïl (1 Tesalonicenses 4:3).
TQATAMAJ MÁS CHRIJ RE NAʼOJ REʼ
Tatzʼetaʼ achkë ütz naʼän rït rchë ma yaqä ta chkipan tzʼil taq bʼanobʼäl chqä achkë utzil xtawïl we nakʼwaj jun chʼajchʼöj kʼaslemal chwäch Dios.
3. Katanmäj chkiwäch ri tzʼil taq bʼanobʼäl
Jun achï ri rubʼiniʼan José kan xtäj ruqʼij rchë xkʼwaj jun chʼajchʼöj kʼaslemal chwäch Dios. Tiskʼij ruwäch Génesis 39:1-12 y kixtzjon chrij reʼ:
-
¿Achkë rma xanmäj äl José chwäch ri ixöq? (Titzʼetaʼ ri versículo 9).
-
¿Naʼij rït chë José kan xchaʼ xuʼän ri ütz? ¿Achkë rma?
¿Achkë ütz nkiʼän ri qʼopojiʼ kʼojolaʼ rchë nkikʼän kinaʼoj chrij José y yeʼanmäj chkiwäch ri tzʼil taq bʼanobʼäl? Titzʼetaʼ ri VIDEO.
Jehová nrajoʼ chë nqanmäj äl chkiwäch ri tzʼil taq bʼanobʼäl. Tiskʼij ruwäch 1 Corintios 6:18 y kixtzjon chrij reʼ:
-
¿Achkë rkʼë jbʼaʼ xtbʼanö chë jun winäq xtqä chpan jun tzʼil bʼanobʼäl?
-
¿Achkë ütz naʼän rït chë yatanmäj chkiwäch ri tzʼil taq bʼanobʼäl?
4. Rït yakowin naqʼät awiʼ chwäch ri mak
¿Achkë rkʼë jbʼaʼ xtbʼanö chë kʼayewal xtuʼän chqawäch xtqanmäj chkiwäch ri tzʼil taq bʼanobʼäl? Titzʼetaʼ ri VIDEO y kixtzjon chrij reʼ:
-
Taq ri qachʼalal xtzʼët chë ri ruchʼobʼonik chqä rubʼanobʼal xa najin wä chik nkiʼän che rä chë xtkanuj rukʼexel rixjayil, ¿achkë xuʼän?
Yajün ri cristianos ri kʼuqül chik kikʼuʼx chpan ruchʼaʼäl Dios kʼo mul kʼo chë nkitäj kiqʼij rchë ma yepë ta tzʼil taq chʼobʼonïk pa kijolon. ¿Achkë ütz naʼän rït rchë ma naquʼ ta rij jun tzʼil bʼanobʼäl? Tiskʼij ruwäch Filipenses 4:8 y kixtzjon chrij reʼ:
-
¿Achoq chrij ütz nqchʼobʼon wä?
-
¿Naʼij rït chë we nqaskʼij ruwäch le Biblia chqä nqayaʼ qan chuyaʼik ruqʼij Jehová nqrtoʼ rchë ma chaq bʼaʼ ta nqqä chpan jun mak? ¿Achkë rma?
5. Ri naʼoj yeruyaʼ Jehová kan nkikʼäm pä utzil pa qawiʼ
Jehová retaman achkë riʼ ri más ütz chqë. Rma riʼ nuʼij chqë achkë rubʼanik nqakʼwaj jun chʼajchʼöj kʼaslemal chwäch ryä chqä achkë utzil xtqïl we xtqaʼän riʼ. Tiskʼij ruwäch Proverbios 7:7-27 chqä titzʼetaʼ ri VIDEO. Chrij riʼ kixtzjon chrij reʼ:
-
¿Achkë xuʼän re kʼajol reʼ rma riʼ xtïtzʼ riʼ chpan jun kʼayewal? (Titzʼetaʼ Proverbios 7:8, 9).
-
Achiʼel nuʼij Proverbios 7:23, 26, ri tzʼil taq bʼanobʼäl nkikʼäm pä kʼayewal pa qawiʼ. ¿Achkë utzil xtqïl we xtqakʼwaj jun chʼajchʼöj kʼaslemal chwäch Dios?
-
We nqakʼwaj jun chʼajchʼöj kʼaslemal chwäch Dios, ¿achkë utzil xtqïl chqawäch apü?
Ye kʼo jojun winäq nkiʼij chë ri nuʼij le Biblia chrij taq kaʼiʼ achiʼaʼ o kaʼiʼ ixoqiʼ nkikʼwaj qa kiʼ nukʼüt chë Dios ma najowan ta. Ye kʼa Jehová ya riʼ jun Dios ri kowan najowan y nrajoʼ chë jontir winäq nkïl ri kʼaslemal ri majun bʼëy xtkʼis ta. Ye kʼa rchë xtqïl ri spanïk riʼ, kʼo chë nqasmajij jontir ri naʼoj nuyaʼ pä chqë. Tiskʼij ruwäch 1 Corintios 6:9-11 y kixtzjon chrij reʼ:
-
Taq jun achï nurayij njeʼ qa rkʼë jun chik achï o jun ixöq rkʼë jun chik ixöq, ¿xa xuʼ komä ya riʼ ma ütz ta nutzʼët Dios?
Rchë Dios kiʼ rukʼuʼx nuʼän qkʼë, jontir kʼo nkʼatzin nqajäl pa qakʼaslemal. ¿Kʼo komä utzil xtqïl we xtqaʼän riʼ? Tiskʼij ruwäch Salmo 19:8, 11 y kixtzjon chrij reʼ:
-
¿Naʼij rït chë kan nqʼax ruwiʼ ri nukʼutuj Jehová chqë? ¿Achkë rma naʼij riʼ?
Jehová yerutoʼon ye kʼïy winäq rchë nkismajij ri naʼoj yeruyaʼon pä chqë, y kan ke riʼ chqä xtuʼän awkʼë rït.
JOJUN WINÄQ NKIʼIJ REʼ: «Majun ta rubʼanon we kaʼiʼ winäq ri nkajoʼ kiʼ njeʼ sexo chkiwäch».
-
¿Achkë naʼij rït?
RI XQATAMAJ QA
Ri sexo jun spanïk ruyaʼon Jehová chkë ri winäq, ye kʼa ryä nrajoʼ chë xa xuʼ jun achï chqä jun ixöq ri ye kʼlan chik ütz njeʼ ya riʼ chkiwäch.
Tqakamluj ri xqatzʼët qa
-
¿Achkë bʼanobʼäl yeʼok chkipan ri tzʼil taq bʼanobʼäl?
-
¿Achkë xtqtoʼö rchë ma xtqqä ta chpan jun tzʼil bʼanobʼäl?
-
¿Achkë utzil xtqïl we xtqasmajij ri naʼoj yeruyaʼ Jehová chqë?
RCHË NATAMAJ MÁS
Tatamaj achkë rma Dios nuʼij chë jun achï y jun ixöq kʼo chë yekʼleʼ we nkajoʼ yejeʼ junan.
Tapeʼ le Biblia nuʼij chë ma ütz ta chë kaʼiʼ achiʼaʼ o kaʼiʼ ixoqiʼ nkikʼwaj qa kiʼ, reʼ ma ntel ta chë tzij chë itzel kʼo chë nqanaʼ chkë ri nkiʼän riʼ. Tatzʼetaʼ achkë rma nqaʼij riʼ.
Tatzʼetaʼ achkë rubʼanik yojkichajij ri naʼoj ye kʼo chpan le Biblia chrij ri sexo.
«¿Kantzij komä chë ri sexo oral ya riʼ chqä sexo?» (Reʼ xtawïl pa jw.org)
¿Achkë xtoʼö jun achï homosexual rchë xjäl rukʼaslemal y xuʼän ri nqä chwäch Dios? Taskʼij riʼ chpan ri peraj «Kan ütz kinaʼoj xkiʼän wkʼë chqä ma xkiqasaj ta nqʼij».
«Le Biblia xjäl kikʼaslemal» (Ri Chajinel, 1 de abril, 2011)
a Tapeʼ kan kʼixbʼäl chkiwäch ri qawinaq nqatzjoj ronojel reʼ, nkʼatzin nqaqʼalajsaj rchë nqʼax chqawäch achkë ma nrajoʼ ta Jehová chë nqaʼän. Chpan re bʼanobʼäl reʼ yeʼok chqä bʼanobʼäl achiʼel reʼ: taq jun achï nujuʼ rukowil pa ruchiʼ o chrachäq jun winäq chqä taq jun ixöq nuchapalaʼ rukowil jun achï o ri achï nuchapalaʼ rchë ri ixöq.
Rkʼë jbʼaʼ nawajoʼ natzʼët chqä reʼ
RI KʼUTUNÏK RI NBʼAN CHKIJ RI TESTIGOS DE JEHOVÁ
¿Achkë rubʼanik yekitjoj ri winäq chrij le Biblia ri testigos de Jehová?
Rkʼë ri tjonïk nkiyaʼ ri testigos de Jehová, rït ütz naksaj xa bʼa achkë Biblia nawajoʼ. Chqä ütz naʼän invitar jontir a-familia o xa bʼa achkë awachiʼil.
