LESEN 41
Met ewe Paipel A Apasa Usun ewe Mettóch Lisowu?
Chómmóng aramas rese kan kinamwe le fós usun ewe mettóch lisowu. Iwe nge, atun ewe Paipel a fós usun ena mettóch, a fataffatéch me ésúfél. Minne Paipel a apasa epwe álisikich. Me a weweéch pokiten ewe Paipel a feito seni Jiowa ewe Chón Férikichetá. A silei met a échitikich. A áiti ngenikich met sia tongeni féri pwe sipwe apwapwa i, me met sipwe féri pwe sipwe tongeni eáni ewe manaw mi pwapwa tori feilfeiló.
1. Ifa ekiekin Jiowa usun ewe mettóch lisowu?
Lisowu, ina eú liffang me ren Jiowa. A mochen pwe ena féffér epwe atoto pwapwa ngeni emén mwán me emén fefin, iir pwúpwúlú. Ena féffér a atufichi án eú pean pwúpwúlú repwe néúnéú me pwári ar tongfengen lefiler lón ewe napanap mi fich me mi atoto ngeniir pwapwa. Ina popun án Kot we Kapas a erá: “Kopwe . . . meseikeiti ewe föpwül ka pwülüeni lupwen om alüal.” (Än Salomon Fos 5:18, 19) Jiowa a mochen án ekkewe Chón Kraist mi pwúpwúlú repwe tuppwélfengen, ina popun resap fókkun lisowumwáál ngeni emén lúkún pwúlúwer.—Álleani Ipru 13:4.
2. Met weween lisowumwáál?
Ewe Paipel a erá pwe “chon föri föförün lisowu [“lisowumwáál,” NW] . . . resap mwüni mwün Kot.” (1 Korint 6:9, 10) Ekkewe chón makkeei Paipel lón fósun Krik ra néúnéú ewe kapas por·neiʹa le áweweei tipisin lisowumwáál. A kapachelong lón ena kapas por·neiʹa (1) féfférún lisowu lefilen chókkewe rese pwúpwúlú, a (2) lisowu lefilen mwán me mwán, fefin me fefin, me (3) lisowu ngeni man. Sia apwapwaai Jiowa me pwal pwisin kúna feiéch atun sia ttiisenikich “sokun föförün lisowu [“lisowumwáál,” NW].”—1 Tesalonika 4:3.
KÚTTAFICHI
Ppii ifa usun ka tongeni túmúnuk seni tipisin lisowumwáál me ifa usun kopwe kúna feiéch seni óm ákkeáni manaw mi liméch.
3. Sú seni tipisin lisowumwáál
Emén mwán mi tuppwél itan Josef a sú seni emén fefin mi mochen lisowu ngeni. Álleani Keneses 39:1-12, me mwirin pwóróusfengen wóón ekkeei kapas eis:
-
Met a álisi Josef le sú seni ena fefin?—Ppii wokisin 9.
-
Óm ekiek nge Josef a kefiléch? Pwata?
Ifa usun ekkewe sáráfé ra tongeni áppirú Josef me sú seni tipisin lisowumwáál lón ei fansoun? Fichi ei VIDEO.
Jiowa a mochen án oukich meinisin sipwe sú seni lisowumwáál. Álleani 1 Korint 6:18, me mwirin pwóróusfengen wóón ekkeei kapas eis:
-
Met a tongeni emmweni emén ngeni tipisin lisowumwáál?
-
Ifa usun ka tongeni sú seni tipisin lisowumwáál?
4. Ka tongeni ú ngeni sóssót
Met a tongeni áweiresi emén le sú seni ewe sóssótun tipisin lisowumwáál? Fichi ei VIDEO, me mwirin pwóróusfengen wóón ei kapas eis.
-
Met ewe Chón Kraist mwán lón ewe video a féri atun a esilla pwe an ekiek me féffér a tongeni emmwen ngeni an esap chúen tuppwél ngeni pwúlúwan we?
Fán ekkóch a pwal mwo nge weires ngeni Chón Kraist mi tuppwél ar repwe úkkú ngeni ekiek mi limengaw. Ifa usun ka tongeni túmúnuk seni óm ekkekieki mettóch mi limengaw? Álleani Filipi 4:8, me mwirin pwóróusfengen wóón ekkeei kapas eis:
-
Met sókkun mettóch sipwe ekkekieki usun?
-
Ifa usun ach ákkállea Paipel me achocho le féri chómmóng mettóch fán iten Jiowa epwe álisikich le ú ngeni sóssótun féri tipis?
5. Sia kúna feiéch seni án Jiowa kewe allúk
Jiowa a silei met a échitikich. A erenikich ifa usun sipwe akkamwéchú liméchúch me ifa usun sipwe feiéch seni ach féri ena. Álleani Än Salomon Fos 7:7-27 are fichi ei VIDEO, me mwirin pwóróusfengen wóón ekkeei kapas eis.
-
Ifa usun ewe alúwél a atolonga lón sóssót?—Ppii Än Salomon Fos 7:8, 9.
-
Me ren Än Salomon Fos 7:23, 26, emén a tongeni kúna watteen weires mwirin an féri tipisin lisowumwáál. Nge met sókkun osukosuk sia tongeni ttiisenikich ika sia akkamwéchú liméchúch?
-
Ifa usun ach akkamwéchú liméchúch epwe álisikich le eáni manaw mi pwapwa tori feilfeiló?
Ekkóch aramas ra ekieki pwe minne Paipel a apasa usun lisowu lefilen mwán me mwán, me fefin me fefin a kon péchékkúl me ese pwári pwe Kot mi tong. Nge Jiowa, ewe Koten tong, a mochen án aramas meinisin repwe eáni ewe manaw mi pwapwa tori feilfeiló. Nge ika sia mochen eáni manaw esemuch, a lamot ach sipwe álleasochisi an kewe allúk. Álleani 1 Korint 6:9-11, me mwirin pwóróusfengen wóón ei kapas eis:
-
Itá án emén mwán sani mwán are án emén fefin sani fefin, ikkena chék ekkewe sókkun féffér mi ngaw me ren Kot?
Ika sia mochen apwapwaai Kot, a lamot oukich meinisin sipwe ekkesiwil. Mi wor aúchean ach achocho? Álleani Kölfel 19:8, 11, me mwirin pwóróusfengen wóón ekkeei kapas eis:
-
En mi lúkú pwe a pwúng án Jiowa kewe allúk usun liméchún manaw? Ika ewer, pwata? Ika aapw, pwata?
Jiowa a fen álisi chómmóng le etipeeú manawer ngeni an kewe allúk usun liméchún manaw. A pwal tongeni álisuk
EKKÓCH RA ERÁ: “Ese i wor ngawen án rúúemén mi tongofengen lisowufengen.”
-
Met kopwe erá?
MENLAPAN
Ewe mettóch lisowu, ina án Jiowa liffang ngeni emén mwán me emén fefin iir pwúpwúlú.
Enniwili
-
Met a kapachelong lón tipisin lisowumwáál?
-
Met epwe álisikich le ttiisenikich tipisin lisowumwáál?
-
Ikkefa ekkewe feiéch sipwe kúna atun sia álleasochisi án Jiowa allúk usun liméchún manaw?
PWAL EKKÓCH PWÓRÓUS
Ppii ika pwata Kot a mochen án emén mwán me emén fefin pwúpwúlú epwe limeliméch.
“What Does the Bible Say About Living Together Without Marriage?” (Web article)
Ppii pwata minne Paipel a apasa usun án mwán me mwán, me fefin me fefin sikefengen ese wewe ngeni ach sipwe oputa chókkewe mi eáni ena esin manaw.
Ppii ifa usun sia kúna túmún seni án Kot kewe allúk usun sókkun féfférún lisowu.
Lón ewe lesen itelapan “They Treated Me With Dignity,” ppii ifa usun emén mwán mi sani mwán a siwili manawan pwe epwe tongeni apwapwaai Kot.
a A tongeni kapachelong sókkopaten féffér, áwewe chék ren án rúúemén méúrfengen, áeáán aw le urumwotei fán mesen emén, pwúlúweni leenien pinchéén, me urumwotei pisekin fán mesen pwal emén.
