CAWN DINGMI 41
Nupa Sinak Kong He Aa Tlaiin Baibal Chimmi Cu Zeidah A Si?
Mi tampi nih nupa sinak kong chim cu ningzak a si tiah an ruah. Asinain Baibal ah nupa sinak kong a chim tikah hlangfangte le upatnak tein a chim. Mah nih a kan ṭhathnemh. Baibal cu a kan Sertu Jehovah sinin a rami a si caah mah cu aa tlakmi a si. Jehovah nih kan caah a ṭha bikmi kha a hngalh. Cucaah a lunglawmhter awkah zeidah kan tuah awk a si ti le nunnak kha zungzal in i nuamhpi awkah zeinihdah a kan bawmh lai ti kha a kan chimh.
1. Jehovah nih nupa sinak kha zeitindah a hmuh?
Nupa sinak cu Jehovah sinin hmuhmi laksawng a si. Jehovah nih aa ṭhium cangmi nuva hna nih mah kha i nuamhpi hna seh ti a duh. Mah laksawng kha nuva hna nih fa ngeihnak ca lawngah si loin pakhat le pakhat an i dawtnak le an i sunsaknak langhternak caah an hman awk a si. Cun ningcangte le nuam tein an hman awk zong a si. Baibal nih hitin a ti: “Na tlanval lio i na nupi ah khan i lawm ko.” (Phungthlukbia 5:18, 19) Jehovah nih aa ṭhium cangmi Khrihfa hna cu an innchunghawi cungah zumhfek tein an um lai tiah aa ruahchan. Cucaah zeitikhmanh ah an zuanzam awk a si lo.—Hebru 13:4 rel.
2. Nupa sualnak timi cu zeidah a si?
Baibal nih hitin a ti: “Nu nih nu he sualnak, pa nih pa he sualnak a tuahmi . . . nih cun Pathian Pennak cu an co lai lo.” (1 Korin 6:9, 10) Baibal ṭialtu hna nih nupa sualnak kong an ṭial tikah por·neiʹa timi Greek biafang kha an hman. Mah biafang ah (1) aa ṭhium rih lomi hna nih an tuahmi nupa sualnak, a (2) neihkhat nih an tuahmi sualnak le (3) saram he an tuahmi sualnak hna aa tel. “Nu le pa sualnak aa summi” kan si tikah kanmah theng ṭhathnemhnak kan hmu i Jehovah lung zong kan lawmhter.—1 Thesalon 4:3.
TAM DEUH IN HLATHLAI
Nupa sualnak hrial khawh ning kong le ziazalei ah thiang tein na umnak thawngin ṭhathnemhnak na hmuh khawh ning kong kha hlathlai.
3. Nupa sualnak kha hrial
Zumhfekmi Josef cu ziazalei ah thiang tein um peng awkah aa zuam. Genesis 39:1-12 rel law mah biahalnak hna hi i ruah u:
-
Josef kha nupa sualnak hrial awkah zeinihdah a forh?—Caang 9 zoh.
-
Josef nih a ṭhami biakhiahnak a tuah tiah na ruat maw? Zeicah?
Tuchan ah mino pawl nih Josef kha zeitindah an i zohchunh khawh i nupa sualnak kha zeitindah an hrial khawh? VIDEO kha piah.
Jehovah nih kan dihlak in ziaza rawhralnak kha hrial hna seh ti a kan duh. 1 Korin 6:18 rel law mah biahalnak hna hi i ruah u:
-
Zei bantuk thil sining nih dah mi pakhat kha nupa sualnak a tuahter khawh?
-
Ziaza rawhralnak kha zeitindah na hrial khawh?
4. Lemsoinak kha na al khawh
Nupa sualnak tuah dingin lemsoinak kha al awkah zeinihdah a harter khawh? VIDEO kha piah, cun a tanglei biahalnak hna hi i ruah u.
-
Mah video ah unaupa nih a ruahnak le a tuahsernak nih a nupi cungah zumhawktlak loin a umter khawh ti kha a hngalh tikah zeidah a tuah?
Zumhfekmi Khrihfa hna hmanh a caan ah an ruahnak kha thiang tein chiah peng awkah an i zuam. Ziaza rawhralnak kong ruah pengnak kha zeitindah na hrial khawh? Filipi 4:8 rel law mah biahalnak hna hi i ruah u:
-
Zei bantuk thil kong hna dah kan ruah awk a si?
-
Baibal relnak le Jehovah rian i manh lo ngaiin ṭuan pengnak nih sualnak tuah dingin lemsoinak kha al awkah zeitindah a kan bawmh khawh?
5. Jehovah phunglam nih a kan ṭhathnemh
Jehovah nih kan caah a ṭha bikmi thil kha a hngalh. Cucaah ziazalei ah thiang tein um peng khawh ning kong le cutin tuahnak in hmuhmi ṭhathnemhnak kong kha a kan chimh. Phungthlukbia 7:7-27 rel asiloah VIDEO kha piah, cun a tanglei biahalnak hna hi i ruah u.
-
Minopa pakhat cu lemsoinak a simi thil sining tangah zeitindah a phanh?—Phungthlukbia 7:8, 9 zoh.
-
Phungthlukbia 7:23, 26 ningin nupa sualnak nih a ṭhalo tukmi thil a chuahter khawh. Ziazalei ah thiang tein kan um peng ahcun zei buaibainak hna dah kan hrial khawh lai?
-
Ziazalei ah thiang tein umnak nih nunnak kha zungzal in i nuamhpi awkah zeitindah a kan bawmh khawh?
Mi cheukhat nih neihkhat he sualnak tuahnak kong he aa tlaiin Baibal chimmi cu a har tuk tiah an ruah. Asinain Jehovah cu dawtnak Pathian a si caah ahopaoh nih nunnak kha zungzal in i nuamhpi hna seh ti a duh. Cutin i nuamhpi khawh awkah a phunglam ningin kan nun a hau. 1 Korin 6:9-11 rel law mah biahalnak hi i ruah u:
-
Pathian hmuhnak ah neihkhat he sualnak tuah lawng hi aa tlak lomi a si maw?
Pathian lunglawmhter khawh awkah kan dihlak in thlennak kan tuah a hau. Cutin i zuam cu a phu maw? Salm 19:8, 11 rel law mah biahalnak hna hi i ruah u:
-
Jehovah i ziazalei phunglam cu aa tlak tiah na ruat maw? Zeicah na ruah asiloah zeicah na ruah lo?
Jehovah nih ziazalei a phunglam ningin a nungmi hna kha lam tampi in a hnemh hna i a bawmh hna. Nang zong aan bawmh khawh ve
MI CHEUKHAT CHIMMI: “Pakhat le pakhat an i duh ahcun ahopaoh nupa sualnak an tuahmi cu cohlan khawh a si ko.”
-
Zeitindah na leh lai?
A TAWINAK
Nupa sinak cu nuva hna nih an i nuamh khawh nakhnga Jehovah sinin an hmuhmi laksawng a si.
I Ruahṭi Ṭhannak
-
Nupa sualnak ah zei hna dah aa tel?
-
Nupa sualnak hrial awkah zeinihdah a kan bawmh lai?
-
Jehovah i ziazalei phunglam kan zulh tikah zei ṭhathnemhnak dah kan hmuh?
HLATHLAI CHAP
Pathian nih hmunkhat ah umṭi a duhmi nu le pa kha zeicah i ṭhium hna seh ti a duh timi kong kha hlathlai.
“Ṭhitumnak Tuah Loin Hmunkhat ah Umṭinak He Aa Tlaiin Baibal Nih Zeidah A Chim?” (Website capar)
Baibal nih neihkhat he sualnak tuah cu a palh tiah a kan cawnpiak ko nain kan huat hna awk a si tiah a ti duhnak a si lo timi kong kha hlathlai.
Nupa sualnak dihlak kong he aa tlaiin Pathian nawlbia nih zeitindah a kan huhphenh timi kong kha hlathlai .
“Kaa In Nupa Sualnak Tuah Kha Zeitindah Kan Hmuh Awk A Si?” (Website capar)
“Upatnak He An Ka Pehtlaih” timi capar chungah neihkhat he sualnak a tuahmi pakhat cu Pathian lunglawmhter awkah a nunning thlen dingin zeinihdah a forh timi kong kha hlathlai.
a Mah ah nupa sualnak tuah, kaa le taw in nupa sualnak tuah le nupa sual duhnak lungput he midang chiaṭha tawnghtham ti bantuk a dang tuahsernak a phunphun zong aa tel.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
