CɅNTESɅNTEL 41
¿Chuqui miʼ yʌl jiñi Biblia chaʼan jiñi piʼleya?
Cabʌl lac piʼʌlob quisintic miʼ yubiñob cheʼ bʌ miʼ yʌlob chaʼan bʌ piʼleya. Pero cheʼ bʌ jiñi Biblia miʼ taj ti tʼan chaʼan jiñi piʼleya, jamʌ tsiquil chuqui miʼ yʌl i wen jach bajcheʼ miʼ yʌl. Muʼ bʌ i yʌl jiñi Biblia chaʼan jiñi piʼleya wen ñuc i cʼʌjñibal chaʼañonla come jiñi Biblia tilem ti Jehová, jiñi tsaʼ bʌ i meleyonla (pʌtʌyonla), i jiñʌch yujil chuqui ñumen wem bʌ chaʼañonla. Jehová miʼ pʌsbeñonla bajcheʼ yilal yom lac melbal (chaʼlibal) chaʼan mi la cʌqʼuen i tijicñʌyel i chuqui mi caj i coltañonla chaʼan tijicña mi lac chumtʌl tiʼ pejtelel ora.
1. ¿Bajcheʼ yilal miʼ qʼuel Jehová jiñi piʼleya?
Jiñi piʼleya jumpʼejlʌch majtan tilem bʌ ti Jehová, pero yom chaʼan cojach juntiquil wiñic yicʼot xʼixic ñujpuñemoʼ bʌ miʼ piʼleñob i bʌ. Jiñʌch bajcheʼ miʼ mejlelob i taj i yalobil jiñi ñujpuñemoʼ bʌ, cheʼʌch bajcheʼ miʼ pʌsbeñob i bʌ cʼuxbiya yicʼot miʼ tajob i tijicñʌyel. Jin chaʼan jiñi i Tʼan Dios miʼ yʌl: «Yom tijicñayet a wicʼot a wijñam tsaʼ bʌ a pʌyʌ cheʼ chʼitoñet to» (Proverbios 5:18, 19). Jehová yom chaʼan jiñi xñoptʼañob ñujpuñemoʼ bʌ miʼ pʌsbeñob i bʌ i xucʼtʌlel. Jin chaʼan, juntiquil xñoptʼan mach yomic miʼ piʼlen yambʌ mach bʌ i piʼʌlic (pejcan Hebreos 13:4).
2. ¿Chuquiyes jiñi tsʼiʼlel?
Jiñi Biblia miʼ yʌl chaʼan «jiñi xtsʼiʼleloʼ bʌ [...] maʼañic mi caj i yʌqʼuentelob jiñi i Yumʌntel Dios» (1 Corintios 6:9, 10). Jiñi tsaʼ bʌ i tsʼijbuyob jiñi Biblia tsiʼ cʼʌñʌyob jiñi tʼan pornéia, am bʌ ti griego, chaʼan miʼ tajob ti tʼan jiñi tsʼiʼlel. Ti jiñi tʼan yaʼ ochem 1) jiñi muʼ bʌ i piʼleñob i bʌ cheʼ mach ñujpuñemobic, a 2) jiñi muʼ bʌ i chaʼ wʌlʌc piʼleñob i bʌ, yom i yʌl, cheʼ miʼ piʼleñob i bʌ jiñi laj bʌ wiñicob o laj bʌ xʼixicob yicʼot 3) jiñi i piʼlentel añimal tac. Cheʼ bʌ mi lac chaʼlen wersa chaʼan maʼañic mi lac mel jiñi tsʼiʼlel, mi la cʌqʼuen i tijicñʌyel Jehová i tijicña mi lac ñusan jaʼel (1 Tesalonicenses 4:3).
LAʼ LAC ÑUMEN ÑAʼTAN
Laʼ laj qʼuel chuqui miʼ mejlel a mel chaʼan maʼañic maʼ yajlel ti tsʼiʼlel i bajcheʼ mi caj i coltañet mi sʌcʌch maʼ wajñel ti a melbal.
3. Putsʼtan jiñi tsʼiʼlel
Juntiquil xucʼul bʌ wiñic, i cʼabaʼ José, tsiʼ chaʼle wersa chaʼan maʼañic miʼ yajlel ti tsʼiʼlel. Pejcanla Génesis 39:1-12 i tem alʌla iliyi:
-
¿Chucoch tsaʼ putsʼi José? (Qʼuelela jiñi versículo 9).
-
¿Wem ba tsaʼ bʌ i mele José maʼ wʌl? ¿Chucoch?
¿Bajcheʼ miʼ mejlel i lajibeñob i melbal José jiñi xcolelob i miʼ putsʼtañob jiñi tsʼiʼlel? Qʼuelela jiñi VIDEO.
Jehová yom chaʼan ti lac pejtelel mi lac putsʼtan jiñi tsʼiʼlel. Pejcanla 1 Corintios 6:18 i tem alʌla iliyi:
-
¿Chuqui tac miʼ mejlel i yʌsañonla ti tsʼiʼlel?
-
¿Bajcheʼ miʼ mejlel a putsʼtan jiñi tsʼiʼlel?
4. Miʼ mejlel a mʌlben jiñi mach bʌ weñic
¿Chuqui tac miʼ mejlel i yʌcʼ chaʼan wocol mi la cubin chaʼan mi lac putsʼtan jiñi tsʼiʼlel? Qʼuelela jiñi VIDEO i tem alʌla iliyi:
-
¿Chuqui tsiʼ mele jiñi hermano cheʼ bʌ tsiʼ qʼuele chaʼan jiñi i pensar yicʼot i melbal miʼ mejlel i yʌqʼuen i mel mach bʌ weñic tiʼ tojlel i yijñam?
Cheʼto jaʼel jiñi xucʼuloʼ bʌ xñoptʼañob yom miʼ chaʼleñob wersa chaʼan chʌn sʌc miʼ yajñelob i pensar. ¿Chuqui miʼ mejlel a mel chaʼan maʼañic maʼ chʌcʌ ñaʼtan jiñi mach bʌ weñic? Pejcanla Filipenses 4:8 i tem alʌla iliyi:
-
¿Chuqui tac yom bʌ mi la cʌcʼ ti lac pensar?
-
¿Muʼ ba i mejlel i coltañonla maʼ wʌl cheʼ mi lac pejcan jiñi Biblia yicʼot cheʼ mi lac wen melben i yeʼtel Jehová chaʼan maʼañic mi lac mel jiñi mach bʌ weñic? ¿Chucoch?
5. Jiñi i mandar tac Jehová miʼ coltañonla
Jehová yujil chuquiyes jiñi ñumen wem bʌ chaʼañonla. Jin chaʼan, miʼ subeñonla chuqui yom mi lac mel chaʼan sʌc lac melbal yicʼot baqui bʌ i wenlel cheʼ cheʼʌch mi lac mel. Pejcanla Proverbios 7:7-27 o qʼuelela jiñi VIDEO, i tem alʌla iliyi:
-
¿Bajcheʼ tsiʼ yotsa i bʌ ti wocol ili xcolel? (Qʼuelela Proverbios 7:8, 9).
-
Proverbios 7:23, 26 miʼ yʌl chaʼan jiñi tsʼiʼlel miʼ mejlel i yʌqʼueñonla tsʌts tac bʌ wocol. Mi mucʼʌch lac chaʼlen wersa chaʼan chʌn sʌc jiñi lac melbal, ¿chuqui ti wocol tac maʼañic mi caj lac taj?
-
Mi sʌc jiñi lac melbal, ¿chuqui ti bendición mi caj lac taj ti talto bʌ qʼuin?
An muʼ bʌ i ñaʼtañob chaʼan ñoj tsʌts muʼ bʌ i yʌl jiñi Biblia tiʼ tojlel jiñi muʼ bʌ i chaʼ wʌlʌc piʼleñob i bʌ. Pero jiñi mach i sujmic come Jehová juntiquilʌch Dios yujil bʌ cʼuxbiya i yom chaʼan ti lac pejtelel tijicña mi lac chumtʌl tiʼ pejtelel ora. I chaʼan mi lac taj jiñi majtañʌl yom mi lac chumtʌl cheʼ bajcheʼ miʼ yʌl jiñi i mandar. Pejcanla 1 Corintios 6:9-11 i tem alʌla iliyi:
-
¿Cojach ba mach weñic tiʼ wut Dios cheʼ bʌ juntiquil miʼ chaʼ wʌlʌc piʼlen yambʌ?
Mi la com chaʼan wen miʼ qʼuelonla Dios, ti lac pejtelel yom mi laj qʼuextan lac melbal. ¿Yomʌch ba mi lac chaʼlen wersa? Pejcanla Salmo 19:8, 11 i tem alʌla iliyi:
-
¿Weñʌch ba maʼ wʌl cheʼ mi lac jacʼben jiñi i mandar tac Jehová? ¿Chucoch cheʼ maʼ ñaʼtan bajcheʼ jiñi?
Jehová an i colta cabʌl lac piʼʌlob chaʼan miʼ jacʼbeñob i mandar, i mucʼʌch i mejlel i coltañet jaʼel.
AN MUʼ BɅ I YɅLOB: «Maʼañic i wocolel mi chaʼtiquil miʼ piʼleñob i bʌ mi mucʼʌch i cʼuxbiñob i bʌ».
-
Ixcu jatet, ¿chuqui maʼ wʌl?
TSAʼ BɅ LAJ CɅÑɅ
Jiñi piʼleya jumpʼejlʌch majtan tilem bʌ ti Jehová, pero yom chaʼan cojach juntiquil wiñic yicʼot xʼixic ñujpuñemoʼ bʌ miʼ piʼleñob i bʌ.
¿Chuqui tsaʼ cʌñʌ?
-
¿Chuqui tac ochem ti jiñi tsʼiʼlel?
-
¿Chuqui mi caj i coltañonla chaʼan maʼañic mi lac yajlel ti tsʼiʼlel?
-
¿Bajcheʼ miʼ coltañonla cheʼ mi lac jacʼben jiñi i mandar tac Jehová?
CɅÑɅ YAN TAC BɅ
Qʼuele chuqui yom Dios chaʼan miʼ mel juntiquil wiñic yicʼot xʼixic yomoʼ bʌ laja chumtʌl.
Qʼuele chucoch muʼ bʌ i yʌl jiñi Biblia maʼañic miʼ pʌs chaʼan yom miʼ tsʼaʼlentelob jiñi muʼ bʌ i chaʼ wʌlʌc piʼleñob i bʌ.
Qʼuele bajcheʼ miʼ cʌntañonla jiñi i mandar Dios chaʼan bʌ jiñi piʼleya.
«¿Yoque piʼleya ba cheʼ bʌ miʼ cʼʌñob i yej chaʼan miʼ piʼleñob i bʌ?» (Tema am bʌ ti jw.org)
¿Chuqui tsiʼ colta juntiquil wiñic chaʼan miʼ cʌy i mulan yambʌ wiñicob i chaʼan utsʼat miʼ qʼuejlel ti Dios? Pejcan tsaʼ bʌ ujti tiʼ tojlel ti jiñi tema «Wen jach tsiʼ pejcayoñob».
«Jiñi Biblia tsiʼ qʼuextʌbeyob i pensar» (Lac Tsictesʌbentel, 1 i chaʼan abril, 2011)
a Ti jiñi tsʼiʼlel yaʼ ochem jaʼel jiñi muʼ bʌ i cʼʌñob i yej o i tiʼ chaʼan miʼ piʼleñob i bʌ, jiñi muʼ bʌ i chaʼleñob piʼleya tiʼ yit, o cheʼ bʌ juntiquil miʼ tʌlben o miʼ yʌsiben i yat yambʌ lac piʼʌl.
Miʼ mejlel a qʼuel jaʼel iliyi
CʼAJTIYA TAC MUʼ BɅ I ÑUMEN MEJLEL
¿Bajcheʼ yilal jiñi estudio loqʼuem bʌ ti Biblia muʼ bʌ i yʌcʼob jiñi i testigojob Jehová?
Ti jiñi estudio muʼ bʌ i yʌcʼob jiñi i testigojob Jehová maʼ mejlel a cʼʌn baqui jach bʌ Biblia. Miʼ mejlel a pʌy pejtelel a familia o jiñi a wamigojob.
