ZANNOO 41
Bo Ka A Baabole Yel Kyaare Gaŋneŋ Taa Yɛlɛ?
A maŋ eɛ kpeɛŋaa ko noba yaga ka ba yele gaŋneŋ taa yɛlɛ. Kyɛ, ka a Baaboleŋ wa yele gaŋneŋ taa yɛlɛ, o maŋ yelee a yɛlɛ aŋ pɛle. Kyɛ gyeremɛ soriŋ ka a Baabole maŋ tu kyɛ yele a yɛlɛ. Yɛlɛ na a Baabole naŋ yel kyaare gaŋneŋ taa yɛlɛ na na toɔ̃ soŋ teŋ, bonso, Jehoova la vɛŋ baŋ sɛge a Baabole, onaŋ maale te meŋ, azuŋ o baŋɛɛ yɛlɛ naŋ soma ko te. Jehoova boɔrɔŋ ka o wuli te lɛ teŋ na toɔ̃ erɛ yɛlɛ te zemmo poɔŋ ka lɛ vɛŋ ka te taa popeɛloŋ, a kyɛ lɛ nyɛ nyɔvore naŋ ba taa baaraa meŋ.
1. Bo teɛroŋ ka Jehoova taa kyaare gaŋneŋ taa yɛlɛ?
Gaŋneŋ taa eɛ kyɔɔtaa Jehoova naŋ de ko dɔɔ neŋ pɔge naŋ kultaa. O ko baŋ a kyɔɔtaa ŋa ka lɛ na vɛŋ ka ba taa popeɛloŋ. Gaŋneŋ taa maŋ soŋɛɛ dɔɔ neŋ pɔge baŋ dɔge biiri, kyɛ lɛ yoŋ naane, gaŋneŋ taa eɛ sori kaŋa dɔɔ neŋ pɔge naŋ maŋ tu kyɛ wulo taa nɔmmo sori naŋ seŋ neŋ poɔŋ. A lɛ zuŋ ka Naaŋmen Yelbiri na yelka: “Nyagina neŋ ho baapaaloŋ saŋa pɔge.” (Yeng Yelibie 5:18, 19) Jehoova boɔrɔŋ ka Kristabie zaa e yelmeŋɛ soba ko o kultatɔ, Jehoova ba boɔrɔ ka kultaa deme tonɔ moɔrɔ toma, bee peɛ̃mo toma.—Kanne Hiburu 13:4.
2. Boŋ la sɛŋsɛŋ toma, bee peɛ̃mo toma?
A Baabole yelko teŋ ka, “banaŋ naŋ tonɔ peɛ̃mo toma . . . koŋ kpɛ a Naaŋmen Naaloŋ.” (1 Korinti 6:9, 10) Saŋa na a Baabole sɛgsɛgreba naŋ da sɛgrɛ a yɛlɛ ŋa na, Giriki kɔkɔre baŋ da de sɛgaa. Azuŋ, ba da de la a Giriki yelbiri naŋ la por·neiʹa a de wuli neŋ peɛ̃mo toma tɛgɛ. A yelbiri por·neiʹa na baŋ wulee yɛlɛ ata mine, a na la (1) dɔɔ neŋ pɔge naŋ ba kultaa kyɛ gana neŋ taa, a (2) dɔɔ neŋ dɔɔ naŋ gaŋneŋ taa, bee pɔge neŋ pɔge naŋ gaŋneŋ taa, ane (3) dɔɔ naŋ gaŋneŋ duŋo, bee pɔge naŋ tere sori ka duŋo gaŋnoo. Ka teneeŋ “tage [te] menne yi peɛ̃mo toma poɔ,” a maŋ vɛmeŋ ka Jehoova poɔ pɛle, a kyɛ lɛ soŋ te yaga zaa.—1 Tɛsalonika 4:3.
ZANNE YƐLƐ YAGA POƆ
Ho na zanne nyɛɛ lɛ hoŋ na toɔ̃ e a tage ho meŋɛ yi peɛ̃mo toma poɔŋ, ane tɔnɔ hoŋ na nyɛ ka hooŋ e lɛ.
3. Yɛ zagre peɛ̃mo toma
Dɔɔ kaŋa baŋ boɔlɔ Gyoosef da puoree Jehoova yelmennoŋ poɔŋ, a da wa ta la saŋa kaŋa ka pɔge kaŋa da boɔrɔ ka o neŋ Gyoosef gaŋneŋ taa. Kanne Munpiilee 39:1-12, a kyɛ gyieli a soorebie ŋa yɛlɛ:
-
Boŋ da soŋ Gyoosef oŋ zagre peɛ̃mo toma?—Kaa o wɛlbo 9.
-
Ho teɛre ka gbɛre na Gyoosef naŋ da de na somaŋ bee? Bonso hoŋ yel lɛ?
Wala ka baapaalba na toɔ̃ e a tɔgle Gyoosef ewuli soŋ na, a tage ba menne yi peɛ̃mo toma poɔŋ zenɛ ŋa? Ŋmɛ a VIDIO.
Jehoova boɔrɔŋ ka te zaa zagre peɛ̃mo toma. Kanne 1 Korinti 6:18, a kyɛ gyieli a soorebie naŋ tu na yɛlɛ:
-
Bo yɛlɛ mine la na baŋ vɛŋ ka neɛ toŋ peɛ̃mo toma?
-
Wala hoŋ na toɔ̃ e a zagre peɛ̃mo toma?
4. Ho na toɔ̃ arɛɛ pigrinyɛ noɔreŋ
Boŋ na toɔ̃ vɛŋ ka a e kpeɛŋaa ko neɛ ka o zo yi peɛ̃mo toma eŋɛŋ? Ŋmɛ a VIDIO, a kyɛ gyieli a soorebiri naŋ tu na yɛlɛ.
-
A vidio poɔŋ, saŋa na te yɔɔdɔɔ na naŋ wa nyɛ ka yɛlɛ na mine oŋ da teɛrɛ a kyɛ erɛ na na toɔ̃ vɛmeŋ ka o yi o pɔge puoreŋ na, wala oŋ da e?
Saŋa kaŋa a maŋ eɛ kpeɛŋaa ko Kristabiiri naŋ puoro Jehoova yelmennoŋ poɔŋ ka ba iri teɛroŋ faare yi ba teɛroŋ poɔŋ. Boŋ na toɔ̃ soŋ bo ka ho iri peɛ̃mo toma teɛrɛ zaa yi ho teɛroŋ poɔŋ? Kanne Filipae 4:8, a kyɛ gyieli a soorebie naŋ tu na yɛlɛ:
-
Bo yɛlɛ aŋ seŋ ka te maŋ teɛrɛ?
-
Sobuo ka Baabole kannoo ane teŋ na moɔ̃ niŋe tonɔ toma Jehoova puoruu poɔŋ na toɔ̃ soŋ te ka te are pigrinyɛ noɔreŋ?
5. Ka teneeŋ de Jehoova bege na tonɔ neŋ toma, tenee menneŋ na nyɛ a tɔnɔ
Jehoova baŋɛɛ yɛlɛ naŋ soma ko te. O wuli teŋ lɛ teŋ na toɔ̃ e a tage te menne yi peɛ̃mo toma poɔŋ, ane tɔnɔ teŋ na nyɛ ka teneeŋ e lɛ. Kanne Yeng Yelibie 7:7-27, kyɛbee ŋmɛ a VIDIO, ka a vidioŋ wa baare, yɛ gyieli a soorebie naŋ tu na yɛlɛ.
-
Bo yɛlɛ ka a bipɔlee ŋa da e ka lɛ vɛŋ oŋ te kpɛ a pigrinyɛ ŋa poɔ?—Kaa Yeng Yelibie 7:8, 9.
-
Yeng Yelibie 7:23, 26 vɛŋɛɛŋ teŋ baŋ ka, peɛ̃mo toma na toɔ̃ de la toɔrɔ naŋ e kpoŋ waneŋ te zuŋ. Ka teneeŋ tage te menne yi peɛ̃mo toma poɔŋ, bo toɔrɔŋ koŋ pɔge te?
-
Ka teneeŋ e forifori, sobuo ka lɛ na toɔ̃ vɛŋ ka te taa zeŋ laafeɛ tegitegilɛ?
Noba mine maŋ teɛreŋ ka, bege na Jehoova naŋ biŋ a kyaare dɔɔ neŋ dɔɔ gaŋneŋ taa, ane pɔge neŋ pɔge gaŋneŋ taa na ba wulo nɔmmo. Kyɛ, Jehoova eɛ nɔmmo Naaŋmen, azuŋ, o boɔrɔŋ ka neɛzaa taa zeŋ laafeɛ tegitegilɛ. Sɛre teŋ na nyɛ a zeŋ laafeɛ ŋa, aseŋ ka te de bege na oŋ biŋ na tonɔ neŋ toma. Kanne 1 Korinti 6:9-11, a kyɛ gyieli a soorebiri naŋ tu na yɛlɛ:
-
Naaŋmen nimitɔɔreŋ, dɔɔ neŋ dɔɔ gaŋneŋ taa vɔlaa, ane pɔge neŋ pɔge gaŋneŋ taa vɔlaa yoŋ la ba soma bee?
Aseŋ ka te zaa leɛre te eebo sɛre kyɛ na baŋ pɛle Naaŋmen poɔ. Ka teneeŋ leɛre te eebo te na nyɛɛ tɔnɔ kaŋa bee? Kanne Yieme 19:8, 11, a kyɛ gyieli a soorebie naŋ tu na yɛlɛ:
-
Wala hoŋ teɛre, bege na Jehoova naŋ biŋ a kyaare peɛ̃mo toma na seŋ nɛɛŋ bee? Bonso hoŋ yel lɛ?
Jehoova soŋɛɛ noba yaga baŋ de bege na oŋ biŋ a kyaare peɛ̃mo toma na tonɔ neŋ toma. Jehoova na toɔ̃ soŋɛɛ ho meŋ
NOBA MINE MAŊ YELEŊ KA: “Ka nobaŋ taa nɔmmo ko taa a ganna neŋ taa, yelfaa zaa kyebe.”
-
Wala hoŋ na yel?
A ZANNOO YELNIMIZEERE
Gaŋneŋ taa eɛ kyɔɔtaa Jehoova naŋ de ko dɔɔ neŋ pɔge naŋ kultaa, ka lɛ na vɛŋ ka ba taa popeɛloŋ.
Bo Hoŋ Zanne
-
Bo yɛlɛ ka neɛ na erɛ ka ba yelka o soba tonɛɛ peɛ̃mo toma?
-
Boŋ na toɔ̃ soŋ te ka te tage te menne yi peɛ̃mo toma poɔŋ?
-
Ka teneeŋ de Jehoova bege na tonɔ neŋ toma, bo tɔnɔ teŋ na nyɛ?
YƐLƐ MINE NAŊ LƐ BEBE
Bonso ka Naaŋmen boɔrɔ ka dɔɔ neŋ pɔge kultaa sɛre kyɛ laŋ kpeɛrɛ? Kanne a yɛlɛ ŋa a nyɛ a noɔre iribo.
“Bo Ka A Baabole Yel Kyaare Dɔɔ Neŋ Pɔge Naŋ Laŋ Kpeɛrɛ A Kyɛ Ba Kultaa Yɛlɛ?” (Intanɛt zu gane)
Yɛlɛ na a Baabole naŋ yel kyaare dɔɔ neŋ dɔɔ gaŋneŋ taa ane pɔge neŋ pɔge gaŋneŋ taa na wuleeŋ ka Naaŋmen ba nɔnɔ noba bee? Kanne a nyɛ a noɔre iribo.
“Dɔɔ Neŋ Dɔɔ Gaŋneŋ Taa Bee Pɔge Neŋ Pɔge Gaŋneŋ Taa Eɛ Yelfaa Bee?” (Intanɛt zu gane)
Bege na Naaŋmen naŋ biŋ a kyaare gaŋneŋ taa yɛlɛ na maŋ go teŋ. Sobuoŋ? Kanne a yɛlɛ ŋa a nyɛ a noɔre iribo.
Kanne a yelzu “Ba Da Wulo Maŋ Gyeremɛ Yaga,” a nyɛ yɛlɛ naŋ da soŋ dɔɔ kaŋa naŋ da de o meŋɛ eŋ dɔɔ neŋ dɔɔ gaŋneŋ taa yɛlɛ poɔŋ, oŋ toɔ̃ leɛre o eebo, a leɛ erɛ yɛlɛ naŋ pɛlɛ Naaŋmen poɔ.
“A Baabole Soŋ Baŋ Baŋ Leɛre Ba Zemmo Yɛlɛ” (A Watchtower, April 1, 2011)
a A peɛ̃mo toma ŋa mine na baŋ e la, dɔɔ neŋ pɔge naŋ gana neŋ taa, pɔge naŋ nyɔge dɔɔ dɔɔloŋ eŋ o noɔre poɔŋ a mugrɔ, kyɛbee dɔɔ naŋ mugrɔ pɔge pɔgeloŋ. Kyɛ, a yoŋ naane, a mine meŋ la, dɔɔ naŋ de o dɔɔloŋ eŋ pɔge munbiri poɔŋ a tu lɛ eŋɛŋ kyɛ gana ne o, kyɛbee ka dɔɔ de o nu bɔɔlɔ pɔge o naŋ ba de pɔgeloŋ, bee ka pɔge de o nu bɔɔlɔ dɔɔ naŋ ba e o serɛ dɔɔloŋ.
