ADZESUA 41
Ebɛn Asɛm Na Bible No Ka Fa Nda Mu Nkitahodzi Ho?
Nda ho asɛm dze, ɔyɛ dzen ma nyimpa pii dɛ wɔdze hɔn ano bɔbɔ do. Naaso Bible no dze, sɛ ɔreka nda ho asɛm a, ɔmmfa mmfefa nkyɛnkyɛn, ɔka no tsenn na ɔyɛ dɛm so wɔ enyidzi mu. Dza Bible no ka fa nda ho no, aso obotum aboa hɛn anaa? Nyew! Osiandɛ Jehovah na ɔkyerɛɛw Bible no, na ɔnoara so na ɔbɔɔ hɛn ntsi, onyim dza oye ma hɛn. Ndzɛmba a ɔsɛ dɛ yɛyɛ ama yaasɔ Jehovah n’enyi, nye ndzɛmba a yɛyɛ a ɔbɔboa hɛn ma yaatsena ase daa no, ɔaka akyerɛ hɛn.
1. Jehovah bu nda mu nkitahodzi dɛn?
Nda mu nkitahodzi yɛ akyɛdze a Jehovah dze ama nyimpa. Ɔpɛ dɛ banyin na ɔbaa a wɔyɛ awarfo dze gyegye hɔn enyi. Dɛm akyɛdze no ma awarfo tum wo mba. Naaso nnyɛ ɔno nko, ɔsan so ma awarfo da ɔdɔ edzi kyerɛ hɔnho, na ɔma hɔn enyiwa gye. Dɛm ntsi na Nyankopɔn n’Asɛm ka dɛ: “Ma w’enyi ngye wɔ wo mberantsɛber mu yer ho” no. (Mbɛbusɛm 5:18, 19, Baebor) Jehovah hwɛ kwan dɛ Christiannyi a ɔawar no bedzi no hokafo nokwar, amma ɔaannto awar da.—Kenkan Hebrewfo 13:4.
2. Ebɛnadze nye ndwamanbra?
Bible ka kyerɛ hɛn dɛ “ndwaman . . . rinnya Nyankopɔn ahenman no.” (1 Corinthfo 6:9, 10) Bible akyerɛwfo a wɔkyerɛɛw Bible no wɔ Greek kasa mu no dze kasafua por·neiʹa na wɔdze kyerɛɛ ndwamanbra ase. Dɛm kasafua no gyina hɔ ma ndzeyɛɛ bi tse dɛ (1) nda mu nkitahodzi a a ɔkɔ do wɔ ɔbarimba na ɔbaa a wɔnnyɛ awarfo ntamu, (2) mbarimba anaa mbaa a wɔnye hɔnho da, na (3) mbowa a wɔnye hɔn da. Sɛ ‘yɛtwe hɛnho fi ndwamansɛm ho’ a, ɔbɔboa hɛnankasa na Jehovah so bɛpɛ hɛn asɛm.—1 Thessalonicafo 4:3.
PƐNSAPƐNSA MU KƆ EKYIR
Ma yɛnhwɛ kwan a ibotum afa do atwe woho efi ndwamanbra ho. Afei so yebohu dɛ sɛ ema w’abrabɔ ho tsew a, ɔbɔboa wo paa.
3. Guan fi ndwamanbra ho
Aberantsɛ nokwafo bi a nna wɔfrɛ no Joseph bɔɔ mbɔdzen paa bɔɔ bra pa. Ma yɛnkenkan Genesis 39:1-12, na yensusu nsɛmbisa yi ho:
-
Ebɛnadze na ɔmaa Joseph guanee?—Hwɛ nyiyimu 9.
-
Ehwɛ a, gyinae a Joseph sii no yɛ papa? Ebɛnadze ntsi na ereka dɛm?
Sɛ obi yɛ aberantsɛ anaa akataasia a, ebɛnadze na obotum ayɛ dze esuasua Joseph na ɔaatwe noho efi ndwamanbra ho? Ma yɛnhwɛ VIDEO yi.
Jehovah pɛ dɛ obiara twe noho fi ndwamanbra ho. Ma yɛnkenkan 1 Corinthfo 6:18, na yensusu nsɛmbisa yi ho:
-
Ebɛn tsebea ahorow na obotum ama obi abɔ edwaman?
-
Ibesi dɛn eguan efi ndwamanbra ho?
4. Ibotum ako etsia nsɔhwɛ
Sɛ tsebea bi rotwetwe obi ma ɔaakɔbɔ edwaman a, ebɛnadze na obotum ama wɔaayɛ dzen ama nyimpa no dɛ ɔbɔko etsia dɛm nsɔhwɛ no? Ma yɛnhwɛ VIDEO yi. Yewie a, yebosusu asɛmbisa a odzi do no ho.
-
Ebɛnadze na onua a ɔwɔ video no mu no yɛe aber a ohun dɛ dza ɔrodwendwen ho nye dza ɔreyɛ no botum ama ɔaafa ne yer ekyir no?
Christianfo a wodzi nokwar no mpo, ɔyɛ a ɔgye mbɔdzembɔ paa ana woeetum ama hɔn nsusui ho atsew. Sɛ ndwamanbra ho adwen ba wo tsir mu a, ibesi dɛn eyi efi hɔ? Ma yɛnkenkan Philippifo 4:8, na yensusu nsɛmbisa yi ho:
-
Ebɛn ndzɛmba na ɔsɛ dɛ yɛdwendwen ho?
-
Sɛ yɛkenkan Bible no na yɛyɛ pii wɔ Jehovah no som mu a, obesi dɛn aboa hɛn ma yaako etsia nsɔhwɛ na yaannyɛ bɔn?
5. Sɛ yɛdze Jehovah ne mbra bɔ hɛn bra a, ɔbɔboa hɛnankasa
Jehovah nyim dza oye ma hɛn. Ɔakyerɛ hɛn dza yebotum ayɛ ama hɛn abrabɔ ho aatsew da biara, na sɛ yɛyɛ dɛm so a, ɔama yeehu mfaso a yebenya efi mu. Ma yɛnkenkan Mbɛbusɛm 7:7-27 anaa ma yɛnhwɛ VIDEO yi, na yensusu nsɛmbisa a odzidzi do no ho.
-
Aberantsɛ no sii dɛn dze noho kɔtoo nsɔhwɛ mu?—Hwɛ Mbɛbusɛm 7:8, 9.
-
Mbɛbusɛm 7:23, 26 ma yehu dɛ ndwamanbra botum akɛfa ɔhaw pii aba. Sɛ yɛkɔ do bɔ bra pa a, ebɛn ɔhaw ahorow na yebotum ekwetsir?
-
Ebɛn kwan do na ɔbra pa botum ama yeenya enyigye daa?
Binom tse nka dɛ dza Bible ka fa mbarimba anaa mbaa a wɔnye hɔnho da ho no nnkyerɛ ɔdɔ. Ɔnntse dɛm. Jehovah dɔ hɛn, na ɔpɛ dɛ hɛn enyi gye daa. Naaso, sɛ hɛn nsa botum aka dɛm enyigye no a, ɔsɛ dɛ yɛdze ne mbra bɔ hɛn bra. Ma yɛnkenkan 1 Corinthfo 6:9-11, na yensusu asɛmbisa yi ho:
-
Sɛ banyin bi nya akɔndɔ dɛ ɔnye banyin bi nda anaa ɔbaa bi nya akɔndɔ dɛ ɔnye ɔbaa fofor nda a, Nyankopɔn kyir. Aso iyi nkotsee na Nyankopɔn kyir?
Sɛ yebotum asɔ Nyankopɔn n’enyi a, ɔsɛ dɛ yɛyɛ nsesa. Sɛ yɛyɛ nsesa ahorow a ɔtse dɛm a, ana yebenya do mfaso? Ma yɛnkenkan Ndwom 19:8, 11, na yensusu nsɛmbisa yi ho:
-
Kwan a Jehovah pɛ dɛ yɛfa do bɔ hɛn bra no, ehwɛ a ntseasee wɔ mu a? Ebɛnadze ntsi na ereka dɛm?
Jehovah aboa nkorɔfo pii ma wɔrobɔ hɔn bra dɛ mbrɛ ɔpɛ. Obotum aboa woara so
BINOM KA DƐ: “Sɛ nyimpa beenu bi da a, mfom biara nnyi ho. Dza ohia ara nye dɛ wɔdodɔ hɔnho.”
-
Sɛ obi ka dɛm a, ebɛka dɛn akyerɛ no?
DZA ESUA
Nda mu nkitahodzi yɛ akyɛdze a Jehovah dze ama barimba na ɔbaa a wɔawar no dɛ ɔmma hɔn enyi ngye.
Mbobɔdo
-
Ebɛn ndzɛmba dɛm na obi yɛ a ɔkyerɛ dɛ ɔabɔ edwaman?
-
Ebɛnadze na ɔbɔboa hɛn ma yaatwe hɛnho efi ndwamanbra ho?
-
Sɛ yɛdze Jehovah ne mbra bɔ hɛn bra a, ɔboa hɛn dɛn?
HWEHWƐ PII KA HO
Sɛ nyimpa beenu bi a wɔnnwaree tse dan kor mu dɛ awarfo a, Jehovah Nyankopɔn tse nka dɛn wɔ ho?
Bible no kyerɛkyerɛ dɛ mbarimba anaa mbaa a wɔnye hɔnho da no yɛ bɔn. Ana iyi kyerɛ dɛ ɔsɛ dɛ yɛtan hɔn a wɔyɛ dɛm no enyi?
“Sɛ Ɔbarimba Nye Ɔbarimba Da Anaa Ɔbaa Nye Ɔbaa Da A, Ɔyɛ Bɔn?” (Asɛm bi a ɔwɔ wɛbsaet do)
Kenkan asɛm yi, na ibohu dɛ Nyankopɔn ne mbra a ɔfa nda mu nkitahodzi ahorow ho no bɔ hɛnankasa hɛnho bɔn.
Kenkan asɛm a wɔato dzin “Wodzii Me Nyi” no, na ibohu adze a ɔmaa owura bi a nna ɔnye mbanyin da no sesaa n’abrabɔ, na ɔyɛɛ dza Nyankopɔn pɛ.
a Dɛm nkitahodzi ahorow no bi nye dɛ banyin nye basia bi bɛda, obi ne banyin ho anaa n’ase a wɔtafer, wɔbɛfa obi wɔ no tun, nye dɛ obi bɛhyɛ da ara agor obi ne banyin ho anaa n’ase ma woeenya nda ho akɔndɔ.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
