TOƁƁERE 41
Ko honɗun Deftere Alla nden haali fii waalidugol ?
Yimɓe buy no hersa haalugol fii waalidugol. Kono, si Deftere Alla nden haalii fii ɗun, nde haalay fii mun ko laaɓi pos e hoore teddungal. Ko nde haali kon nafay en. Tigi tigi on, ko Yahuwah Alla tagi en e himo anndi ko ɓuri en moƴƴande. Himo hollude en no kuuɗe men ɗen weltinirta mo e ko wallata en heɓugol ngurndan welɗan haa poomaa.
1. Ko honɗun Yahuwah Alla miijii fii waalidugol ?
Waalidugol ko dokkal iwrungal ka Yahuwah Alla. Himo faalaa yo gorko e debbo jommbindirɓe weltor ɗun. Ngal dokkal newnanay gorko e debbo heɓugol ɓiɓɓe e hollindirgol giggol. Ko ɗun waɗi, Deftere Alla nden wi’i : « weltor sonnaajo maa mo resuɗaa e cukaaku maa on » (Tindi 5:18, 19, VPFJ). Yahuwah Alla no faalaa almasiiyaaɓe jommɓindirɓe ɓen yo wonu sella-finndeeɓe hara ɓe jeenaali muk (janngee Yahuudiyankeeɓe 13:4).
2. Ko honɗun jinaa firi ?
Deftere Alla nden wi’i : « Ko fii mbeleeɗe ɓandu ɗen no waalii e kene, ɗen-le ko jinaa […] ɓen wuurirɓe nii heɓoytaa geɓal ka laamu Alla » (Galaasi 5:19-21). Winnduɓe Deftere Alla nden huutorno binndol « por·neiʹa » e haalaa gereeki fii jinaa : jeenugol no firi waalidugol a 1) hakkunde gorko e debbo ɓe jommbindiraa, 2) hakkunde gorko e gorko maa debbo e debbo e 3) hakkunde neɗɗo e kulle. Si en ‘woɗɗitike jinaa’, en weltinay Yahuwah Alla e en heɓay nafa mun (1 Tesalonii 4:3).
LUGGINEE
Anndee no selirton jinaa e no heɓirton nafa fii wonugol laaɓuɓe.
3. Woɗɗitee jinaa
Annabi Yuusufu wakkilino moƴƴa fii wonugol laaɓuɗo. Janngee Fuɗɗoode nden 39:1-12 (VPFJ) e yewton fii ɗee lanndaale :
-
Fii honɗun annabi Yuusufu dogani ? (Ndaaree aaya 9).
-
Hiɗon miijii annabi Yuusufu fewjuno ko moƴƴi ? Fii honɗun ?
Ko honno sukaaɓe ɓen e jiwɓe ɓen ɲemmɓirta annabi Yuusufu e hoore dogugol jinaa hannde ? Fijinee VIDIO on.
Yahuwah Alla no yamiri fow wikkagol jinaa. Janngee 1 Korenti 6:18 e yewton fii ɗee lanndaale :
-
Ko piiji honɗi waɗata goɗɗo jeena ?
-
Ko honno waawirton woɗɗitaade jinaa ?
4. Hiɗon waawi dartaade jarrabuyee
Fii honɗun no satti dartagol jarrabuyee fii jeenugol ? Fijinee VIDIO on e yewton fii lanndal jokkitungal ngal.
-
Ko honɗun musiɗɗo men ka dewal waɗunoo fewndo o anndunoo miijooji makko ɗin e kuuɗe makko ɗen haɗayno mo wonangol ɓeyngu makko sella-finndeejo ?
Wonnde, hay almasiiyaaɓe feewuɓe no haani wakkilaade fii heɓugol miijooji laaɓuɗi. Ko honno waawirton wikkaade miijo fii jinaa ? Janngee Filipii 4:8 e yewton fii ɗee lanndaale :
-
Ko fii piiji honɗi haanuɗen miijaade ?
-
Ko honno janngugol Deftere Alla nden e gollangol Yahuwah Alla wallirta en dartagol jarrabuyee fii jeenugol ?
5. Sariyaaji Yahuwah Alla ɗin no nafa en
Ko Yahuwah Alla anndi ko ɓuri en moƴƴande. O daalanii en no wonirten laaɓuɓe e nafa ko heɓeten fii waɗugol ɗun. Janngee Tindi 7:7-27 (VPFJ) maa fijinon VIDIO on e yewton fii lanndal jokkitungal ngal.
-
Ko honno suka on yaniri e nder jarrabuyee ? (ndaaree Tindi 7:8, 9, VPFJ).
-
Wano Tindi 7:23, 26 (VPFJ) haaliri non, jinaa no wondi e battane hulɓiniiɗe. Si en wonii laaɓuɓe ka ɓernde e ka kuuɗe, ko honɗun wikkotoɗen ?
-
Si en wonii laaɓuɓe ka ɓernde e ka kuuɗe, ko baraaji honɗi heɓeten fii ko aroyta ?
Woɓɓe goo no miijoo ko Deftere Alla nden wi’i kon fii waalido hakkunde gorko e gorko, maa debbo e debbo aldaa e giggol. Kono Alla yiɗuɗo en on no faalaa yo en heɓu ngurndan welɗan haa poomaa. Fii yo Alla jaɓan en, ko yo en jokku laawi makko ɗin. Janngee 1 Korenti 6:9-11 e yewton fii ngal lanndal :
-
Waalidugol hakkunde gorko e gorko maa debbo e debbo, ko ɗun tun woni ko Alla jaɓataa ?
Fii weltingol Alla, en fow hiɗen haani waylude jikkuuji men ɗin. Ɗun no wondani en e nafa ? Janngee Zabuura 19:8, 11 (VPFJ) e yewton fii ɗee lanndaale :
-
Hiɗon miijii laawi Yahuwah Alla ɗin no metti ɗoftaade ? Fii honɗun ?
Yahuwah Alla wallii yimɓe buy fii jokkugol laawi makko ɗin. O waaway on wallude onon kadi.
WOƁƁE GOO NO WI’A : « Si yimɓe ɗiɗo no yiɗindiri, waalidugol aldaa e ella. »
-
Ko honɗun wi’oton ?
RAWNOODE
Waalidugol ko dokkal Yahuwah Alla fii gorko e debbo jommbindirɓe.
Ndartannde
-
Ko honɗun jinaa firi ?
-
Ko honɗun wallata en wikkagol jinaa ?
-
Si en jokkii laawi Yahuwah Alla ɗin, ko baraaji honɗi heɓeten ?
TASKEE
Janngee fii honɗun Alla no faalaa yo gorko e debbo faalaaɓe wondude yo jommbindir.
« Ko honɗun Deftere Alla nden haali fii wondugol ɓaawo dewgal ? » (Winndannde ka jw.org)
Janngee fii honɗun ko Deftere Alla nden haali kon fii waalidugol hakkunde gorko e gorko maa hakkunde debbo e debbo moƴƴaa. Ɗun firaa hiɗen aɲi ɓe, kono ko kuuɗe maɓɓe ɗen.
« Waalidugol hakkunde gorko e gorko maa hakkunde debbo e debbo ko ko boni ? » (Winndannde ka jw.org)
Janngee no sariyaaji Alla ɗin fii waalidugol danndirta en.
« Waalidugol e hoore huutorgol hunnduko ko waalidugol tigi tigi ? » (Winndannde ka jw.org)
E nder taariika on « Ɓe teddino lan », janngee fii ko waɗi gorko waalidaynooɗo e worɓe goo wayliri jikku makko fii weltingol Alla.
« Deftere Alla nden no wayla ngurndan » (Suudu Aynirdu ndun, 1 awril 2011)
a Ko tawaa e ɗii jikkuuji ɗi Alla jaɓataa, ko waalidugol e goɗɗo e hoore huutorgol hunnduko kon maa rewrude boɓi ɗin. Mowlugol enɗi maa awra goɗɗo goo no tawaa.
