NIKASEMƆ 41
Mɛni Biblia Lɛ Kɛɔ Yɛ Bɔlɛnamɔ He?
Efeɔ mɛi pii hiɛgbele akɛ amɛbaawie bɔlɛnamɔ he. Shi kɛ́ Biblia lɛ miiwie bɔlɛnamɔ he lɛ, ehaaa hiɛ, fɛɛ sɛɛ lɛ, ewieɔ he yɛ bulɛ gbɛ nɔ. Wɔnáa nɔ ni ekɛɔ wɔ lɛ he sɛɛ. Enɛ bɛ naakpɛɛ, ejaakɛ Yehowa ji wɔ-Bɔlɔ lɛ. Ni ele nɔ ni hi hã wɔ. Ekɛɔ wɔ nɔ ni esa akɛ wɔfee koni ená wɔhe miishɛɛ, ni wɔhi shi kɛya naanɔ hu.
1. Te Yehowa naa bɔlɛnamɔ ehãa tɛŋŋ?
Bɔlɛnamɔ ji nifeemɔ fɛfɛo ko ni Yehowa to he gbɛjianɔ ehã adesai. Eto he gbɛjianɔ ehã nuu kɛ yoo ni ebote gbãla mli pɛ, koni amɛkɛná amɛhewɔ miishɛɛ. Jeee bifɔmɔ pɛ hewɔ wu kɛ ŋa náa bɔlɛ, shi eji nifeemɔ ni amɛtsɔɔ nɔ amɛjieɔ suɔmɔ kɛ hedɔɔ kpo amɛtsɔɔ amɛhe yɛ gbɛ ni sa nɔ, koni amɛná miishɛɛ. Enɛ hewɔ Nyɔŋmɔ Wiemɔ lɛ kɛɔ akɛ: “Okɛ oblahiiaŋ ŋa lɛ aná miishɛɛ” lɛ. (Abɛi 5:18, 19) Yehowa kpaa gbɛ akɛ, wu kɛ ŋa ni ji Kristofoi lɛ baaye amɛhe anɔkwa, koni amɛkɛ mɔ kroko akayaná bɔlɛ.—Kanemɔ Hebribii 13:4.
2. Mɛni ji ajwamaŋbɔɔ?
Biblia lɛ kɛɔ wɔ akɛ, “ajwamaŋbɔlɔi . . . anine shɛŋ Nyɔŋmɔ Maŋtsɛyeli lɛ nɔ.” (1 Korintobii 6:9, 10) Wiemɔ ni mɛi ni ŋma Biblia lɛ yɛ Greek mli lɛ kɛtsu nii ni atsɔɔ shishi yɛ Ga mli akɛ ajwamaŋbɔɔ lɛ ji por·neiʹa. Nakai wiemɔ lɛ kɔɔ (1) nuu kɛ yoo ni boteko gbãla mli lɛ ateŋ bɔlɛnamɔ, a (2) nuu kɛ nuu loo yoo kɛ yoo teŋ bɔlɛnamɔ, kɛ (3) gbɔmɔ kɛ kooloo teŋ bɔlɛnamɔ he. Kɛ́ ‘wɔtsi wɔhe kɛje ajwamaŋbɔɔ he’ lɛ, wɔbaaná he sɛɛ, ni Yehowa baaná wɔhe miishɛɛ hu.—1 Tesalonikabii 4:3.
KASEMƆ PII OFATA HE
Obaana bɔ ni obaafee otsi ohe kɛje ajwamaŋbɔɔ he, kɛ bɔ ni kɛ́ ohã ojeŋba he tse lɛ obaaná he sɛɛ.
3. Joo ajwamaŋbɔɔ naa foi
Kulɛ yoo ko miitao ni ekɛ nuu anɔkwafo ko ni atsɛɔ lɛ Yosef lɛ aná bɔlɛ, shi Yosef ekpɛlɛɛɛ. Nyɛkanea 1 Mose 39:1-12 lɛ, ni nyɛsusua sanebimɔi nɛɛ ahe:
-
Mɛni hewɔ Yosef jo foi lɛ?—Kwɛmɔ kuku 9 lɛ.
-
Kɛ́ okwɛ lɛ, nɔ ni Yosef fee lɛ ja? Mɛni hewɔ okɛɔ nakai?
Ŋmɛnɛ lɛ, mɛɛ gbɛ nɔ oblahii kɛ oblayei baanyɛ akase Yosef, ni amɛ hu amɛjo ajwamaŋbɔɔ naa foi? Jiemɔ VIDIO lɛ.
Yehowa sumɔɔ ni wɔ fɛɛ wɔjo ajwamaŋbɔɔ naa foi. Nyɛkanea 1 Korintobii 6:18 lɛ, ni nyɛsusua sanebimɔi nɛɛ ahe:
-
Mɛɛ shihilɛi baanyɛ ahã mɔ ko abɔ ajwamaŋ?
-
Mɛni obaanyɛ ofee koni onyɛ ojo ajwamaŋbɔɔ naa foi?
4. Obaanyɛ oye kaa nɔ
Mɛni baanyɛ ahã ewa kɛhã mɔ ko akɛ ebaajo ajwamaŋbɔɔ naa foi? Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Be ni nyɛmi nuu lɛ na akɛ esusumɔi kɛ enifeemɔi komɛi baanyɛ ahã eje eŋa sɛɛ lɛ, mɛni efee?
Bei komɛi lɛ, ewaa kɛhãa Kristofoi anɔkwafoi po akɛ amɛbaahã amɛsusumɔi ahe atse. Mɛni baawa bo ni okaya nɔ osusu nibii gbohii ahe? Nyɛkanea Filipibii 4:8 lɛ, ni nyɛsusua sanebimɔi nɛɛ ahe:
-
Mɛɛ nibii ahe esa akɛ wɔsusu?
-
Kɛ́ wɔkaneɔ Biblia lɛ ni wɔhiɛ dɔɔ yɛ Yehowa sɔɔmɔ lɛ mli lɛ, mɛɛ gbɛ nɔ no baawa wɔ ni wɔye kai anɔ?
5. Yehowa mlai kɛ shishitoo mlai lɛ ahe yɛ sɛɛnamɔ kɛhã wɔ
Yehowa le nɔ ni hi kɛhã wɔ. Etsɔɔ wɔ bɔ ni wɔbaafee wɔhã wɔjeŋba he atse, kɛ sɛɛnamɔi ni yɔɔ he akɛ wɔbaaya nɔ wɔfee nakai. Nyɛkanea Abɛi 7:7-27 lɛ loo jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.
-
Te fee tɛŋŋ oblanyo lɛ kɛ ehe yawo kaa mli?—Kwɛmɔ Abɛi 7:8, 9 lɛ.
-
Abɛi 7:23, 26 lɛ hãa wɔnaa akɛ ajwamaŋbɔɔ baanyɛ ekɛ naagbai wuji aba. Kɛ́ wɔhã wɔjeŋba he tse lɛ, mɛɛ naagbai wɔbaajo naa foi?
-
Kɛ́ wɔhã wɔjeŋba he tse lɛ, mɛɛ gbɛ nɔ ebaahã wɔhi shi kɛya naanɔ?
Mɛi komɛi susuɔ akɛ, nɔ ni Biblia lɛ wieɔ yɛ nuu kɛ nuu loo yoo kɛ yoo teŋ bɔlɛnamɔ he lɛ etsɔɔɔ suɔmɔ. Shi Yehowa, Nyɔŋmɔ ni yɔɔ suɔmɔ lɛ, miisumɔ ni mɔ fɛɛ mɔ ahi shi kɛya naanɔ. Shi ja wɔhi shi yɛ emlai kɛ eshishitoo mlai lɛ anaa dani wɔbaanyɛ wɔhi shi kɛya naanɔ. Nyɛkanea 1 Korintobii 6:9-11 lɛ, ni nyɛsusua sanebimɔ nɛɛ he:
-
Ani nuu kɛ nuu loo yoo kɛ yoo teŋ bɔlɛnamɔ pɛ Nyɔŋmɔ sumɔɔɔ?
Esa akɛ wɔteŋ mɔ fɛɛ mɔ afee tsakemɔi komɛi yɛ eshihilɛ mli koni esa Nyɔŋmɔ hiɛ. Ani sɛɛnamɔ yɛ he akɛ wɔbaafee nakai? Nyɛkanea Lala 19:8, 11 lɛ, ni nyɛsusua sanebimɔi nɛɛ ahe:
-
Kɛ́ okwɛ lɛ, jeŋba he mlai ni Yehowa ewo lɛ, jwɛŋmɔ yɛ mli? Kɛ́ okɛɛ ‘Hɛɛ’ lɛ, mɛni hewɔ, ni kɛ́ okɛɛ ‘Dabi’ hu lɛ, mɛni hewɔ?
Yehowa ewa mɛi pii ni amɛmiiye ejeŋba he mlai lɛ anɔ. Ebaanyɛ ewa bo hu
MƐI KOMƐI KƐƆ AKƐ: “Kɛ́ mɛi enyɔ sumɔɔ amɛhe lɛ—nuu kɛ yoo jio, nuu kɛ nuu jio, yoo kɛ yoo jio lɛ—tɔmɔ ko kwraa bɛ he akɛ amɛkɛ amɛhe baaná bɔlɛ.”
-
Kɛ́ mɔ ko kɛɛ nakai lɛ, mɛni obaakɛɛ?
EMLI OTI
Bɔlɛnamɔ ji nifeemɔ fɛfɛo ko ni Yehowa to he gbɛjianɔ ehã nuu kɛ yoo ni ebote gbãla mli pɛ, koni amɛkɛná amɛhewɔ miishɛɛ.
Mɛni Okase?
-
Mɛni kɛ́ mɔ ko fee lɛ ebɔ ajwamaŋ?
-
Mɛni baawa wɔ ni wɔtsi wɔhe kɛje ajwamaŋbɔɔ he?
-
Kɛ́ wɔhi shi yɛ Yehowa jeŋba he mlai lɛ anaa lɛ, te wɔnáa he sɛɛ wɔhãa tɛŋŋ?
EHE SAJI KROKOMƐI
Obaana nɔ hewɔ ni Nyɔŋmɔ sumɔɔ ni nuu kɛ yoo ni miitao amɛhi shi tamɔ wu kɛ ŋa lɛ abote gbãla mli lɛ.
Obaana nɔ hewɔ ni kɛ́ Biblia lɛ kɛɛ esaaa akɛ nuu kɛ nuu loo yoo kɛ yoo náa bɔlɛ lɛ, no etsɔɔɔ akɛ wɔnyɛ mɛi ni feɔ nakai lɛ.
“Ani Eji Tɔmɔ Akɛ Nuu Kɛ Nuu Loo Yoo Kɛ Yoo Baaná Bɔlɛ?” (jw.org lɛ nɔ sane)
Obaana bɔ ni Nyɔŋmɔ mlai ni kɔɔ bɔlɛnamɔ nifeemɔi fɛɛ ahe lɛ buɔ wɔhe.
“Ani Nuutso Ni Akɛwoɔ Daaŋ Loo Yoohe Ni Alɛmɔɔ Lɛ Ji Bɔlɛnamɔ?” (jw.org lɛ nɔ sane)
Yɛ sane ni yitso ji, “Amɛjie Bulɛ Kpo Amɛtsɔɔ Mi” lɛ mli lɛ, obaana nɔ ni hã nuu ko ni kɛ hii krokomɛi náa bɔlɛ lɛ tsake ejeŋba koni esa Nyɔŋmɔ hiɛ.
a Nifeemɔi krokomɛi hu ni esaaa ni fata enɛ he ji, nuutso ni akɛwoɔ daaŋ loo yoohe ni alɛmɔɔ, nuutso ni akɛwoɔ wamɔhe, kɛ mɔ kroko nuutso loo eyoohe ni akɛshwɛɔ loo ajeɔ gbɛ afeɔ lɛ nɔ ko koni ehe aba.
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
