LÈSON 41
Ka Labib ka di anrapò èvè sèks ?
Lè sé pou palé dè sèks, ni onlo moun ki ka santi-yo jenné. Men pawkont, Labib ka palé dè sa franchman, é san di pawòl malélivé. Sa i ka di anrapò èvè sèks sé pou byen an nou. Sa lojik, pas Jéova sé Kréyatè an nou é i sav sa ki pibon ban nou. I ka di-nou ka pou nou fè pou nou fè-y plézi é pou nou ni tchè-kontan pou touttan.
1. Ka Jéova ka di anrapò èvè sèks ?
Sèks sé on kado Jéova ka ofè moun-mayé. I vlé kè on misyé é madanm a-y pwofité dè kado-lasa. Sé on kado ki ka pèwmèt-yo fè timoun, men anplisdisa, i ka édé-yo montré tandrès a yo é lanmou a yo. Sé pousa Bib-la ka di : « Pran plézi èvè madanm a jénès a-w » (Pwovèb 5:18, 19). Jéova vlé kè on mari é madanm a-y rété fidèl é kè yo rèfizé fè adiltè (li Ébré 13:4).
2. Ka ki on péché sèksyèl ?
Bib-la ka di kè « moun ki ka fè péché sèksyèl [...] pé ké érité wayòm a Bondyé » (1 Korentyen 6:9, 10). Mo grèk la yo tradui la é ki bay « péché sèksyèl » sé pòwnéya. Yo ka sèvi èvè mo-lasa pou palé dè 1) moun ki ka fè lanmou a alòskè yo pa mayé, 2) misyé ki ka fè makonmè é madanm ki ka fè zanmi é 3) moun ki ka kouché èvè zannimo. Si nou ‘pa jen fè pon péché sèksyèl’, sa ké fè Jéova plézi é sé yenki bon biten sa ké pwokiré-nou (1 Tésalonisyen 4:3).
AN-NOU FOUYÉ PI FON
An-nou vwè ka ki ké édé-nou pa fè pon péché sèksyèl é ki byenfé sa ké pwokiré-nou.
3. Pran dé pyé a kouri a-w douvan tout péché sèksyèl
Jozèf, on misyé ki té enmé Bondyé, té oblijé goumé pou i pa té fè pon péché sèksyèl. Li Jénèz 39:1-12 é fè on ti kozé asi sé kèsyon-lasa :
-
Pou ki rézon Jozèf pran dé pyé a kouri a-y ? (gadé vèwsé 9 la).
-
Ès ou ka di Jozèf pran bon désizyon-la ? Pou ki biten ou ka di sa ?
Kijan sé jenn-la pé imité Jozèf é rété lwen a tout péché sèksyèl ki tini jòdijou ? Gadé VIDÉO-la.
Jéova ka di tout sèwvitè a-y pa fè pon péché sèksyèl. Li 1 Korentyen 6:18 é fè on ti kozé asi sé kèsyon-lasa :
-
On moun pé touvé-y adan plizyè sitiyasyon ki pé pousé-y fè on péché sèksyèl. Ki sitiyasyon ésa ?
-
Ka ou pé fè pou rété lwen a tout péché sèksyèl ?
4. Lè ou ka touvé-w douvan on tantasyon, ni mwayen ou di : « Non ! »
Pou métrizé-w pou ou pa fè pon péché sèksyèl, sa ka mandé onlo éfò. Ka ki té’é pé rann konba-lasa pi difisil ankò ? Gadé VIDÉO-la é fè on ti kozé asi kèsyon-la ki ka vin la.
-
Lè frè-la rann-li kont kè konpòwtèman a-y té’é pé pousé-y a twonpé madanm a-y, ka i fè ?
Dépawfwa, menm on moun ki bon zanmi èvè Jéova dwètèt lité pou woté lidé ki pa pwòp an lèspri a-y. Ka nou pé fè pou nou pa lésé on lidé ki pa pwòp fè rasin an lèspri an nou ? Li Filipyen 4:8 é fè on ti kozé asi sé kèsyon-lasa :
-
Asi ki kalté biten nou dwètèt réfléchi ?
-
Lè ou ka li Bib a-w é lè ou ka pòté bon mannèv ba Jéova, sa ka édé-w métrizé-w pou ou pa fè pon péché sèksyèl. Poukwa nou ka di sa ?
5. Tout konsèy Jéova ka ban-nou sé pou byen an nou
Jéova sav sa ki méyè ban nou. I ka di-nou ka pou nou fè pou nou pa fè pon péché sèksyèl, é ki bon biten sa ké pwokiré-nou. Li Pwovèb 7:7-27 oben gadé VIDÉO-la, é fè on ti kozé asi sé kèsyon-la ki ka vin la.
-
Pou ki biten jenngason-la touvé-y adan on sitiyasyon danjéré ? (gadé Pwovèb 7:8, 9).
-
Dapré Pwovèb 7:23, 26, lè nou ka fè on péché sèksyèl, sa pé pwokiré-nou gwo dézagréman. Si nou pa’a fè pon péché sèksyèl, ki pwoblèm nou pé ké jwenn ?
-
Si nou pa’a fè péché sèksyèl, kijan sa pé édé-nou pou nou viv èvè tchè-kontan pou touttan ?
Bib-la ka di kè lè 2 misyé oben 2 madanm ka kouché ansanm, sé on biten kè Bondyé hay. Ni dé moun ki ka touvé kè Bondyé two rèd, é kè i pa ni asé lanmou. Men Jéova sé on Bondyé ki plen lanmou. Sa i vlé, sé kè toutmoun viv èvè tchè-kontan pou touttan. Sèlman, pou nou rèsèvwa bénédisyon-lasa, fò-nou kouté konsèy a-y. Li 1 Korentyen 6:9-11 é fè on ti kozé asi kèsyon-lasa :
-
Dapré vèwsé-lasa, Jéova hay lè misyé ka fè makonmè é lè madanm ka fè zanmi. Men èskè sé yenki sa i pa enmé ?
Pou fè Bondyé plézi, fò-noutout chanjé sèwten biten an vi an nou. Men ès sa vo lapenn ? Li Sòm 19:8, 11 é fè on ti kozé asi sé kèsyon-lasa :
-
Ès ou ka di konsèy a Jéova difisil a suiv ? Poukwa ou ka di sa ?
Jéova ja édé onlo moun chanjé. I pé édé-w osi.
MI SA MOUN KA DI : « Dépi 2 moun enmé-yo, yo pé kouché ansanm. Ka i ni dè mal adan sa ? »
-
Ka ou té’é réponn ?
ON TI RÉZIMÉ
On mari é madanm a-y ni dwa fè lanmou. Sé on kado Jéova fè-yo.
Ka ou woutyenn
-
Sèlon Labib, ka ki on péché sèksyèl ?
-
Ka ki pé édé-nou pou nou pa fè pon péché sèksyèl ?
-
Jéova ka di-nou ka ki byen é ka ki mal. Lè nou ka suiv konsèy a-y, ki bon biten sa ka pwokiré-nou ?
AY GADÉ SA OSI
Pou Bondyé, on misyé é on madanm dwètèt mayé avan yo viv ansanm. Pou ki rézon ?
« Lè 2 moun ankaz é yo pa mayé : Ka Labib ka di asi sa ? » (on awtik ki asi jw.org)
Labib ka di kè lè misyé ka fè makonmè é lè madanm ka fè zanmi, sé on biten ki pa bon ditou-ditou. Men sa pa vlé di kè fò-nou hay moun ki ka fè sa.
« Lè misyé ka fè makonmè é lè madanm ka fè zanmi : ès sé on mové biten ? » (on awtik ki asi jw.org)
Lwa a Bondyé ki anrapò èvè sèks ka pwotéjé-nou. Poukwa ?
« Ès nou pé di kè rèlasyon sèksyèl pa bouch sé rèlasyon sèksyèl ? » (on awtik ki asi jw.org)
Gadé ka ki pousé on makonmè fè gran chanjman an vi a-y pou i té fè Jéova plézi (gadé istwa a Guadalupe Villarreal adan on awtik tit a-y sé : « Ils ont respecté ma dignité »).
« La Bible transforme des vies » (Tou dè Gad a 1é avril 2011 an fransé)
a Lè nou ka di ‘fè lanmou’, nou ka palé osi dè rèlasyon sèksyèl pa bouch ou pa fès é lè on moun ka karésé sèks a ondòt moun pou fè-y pran plézi.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
