REIREI 41
Tera ae E Taekinaki n te Baibara Ibukin te Wene n Taanga?
A bati aomata aika a mwerengau ni maroroakina te wene n taanga. Ma ngkana e taekinaki te wene n taanga n te Baibara, e kamatataaki raoi n te aro ae karinerine. Ti boni kakabwaiaaki ni baike a taekinaki iai. Ao e bon riai n riki anne ngkai Iehova bon ara tia Karikiriki. E ataa te kabanea n tamaroa ibukira. E tuangira baika ti na karaoi aika e na kukurei iai ao baika a na buokira bwa ti na kukurei n aki toki.
1. Tera ana iango Iehova ibukin te wene n taanga?
Te wene n taanga bon te bwaintangira mairoun Iehova. E tangiriia taanga ni mare bwa a na kukurei iai. E aki tii manena te bwaintangira aei ibukini karikaia natiia ma e manena naba ibukini kaotan aia tangira ao aia namakin n te aro ae riai i marenaia. Anne bukina ngkai e kangai Ana Taeka te Atua: “Ko bia kimwareirei irouni buum ae buum man am bongi n ataei.” (Taeka N Rabakau 5:18, 19) E kantaningaiia Iehova taanga ni mare aika Kristian bwa a na kakaonimaki ni koaua i marenaia, bwa a aonga n aki karaoa te wene ni kimoa.—Wareka Ebera 13:4
2. Tera te wene ni bure?
E tuangira te Baibara bwa “aomata aika taani wene ni bure . . . a na aki karekea ana Tautaeka n Uea te Atua.” (1 I-Korinto 6:9, 10) Taani korea te Baibara n te taetae ni Kuriiti a kamanena te taeka ae por·neiʹa ni kabwarabwaraa iai te wene te bure. Te taeka anne e nanona (1) te wene n taanga a i marenaia aomata aika tuai ni mare, (2) te wene ni bure i marenan te mwaane ma te mwaane ao te aine ma te aine, ao (3) te wene ni bure ma te man. Ti kakukureia Iehova ao ti kakabwaiaaki ngkana ti “rawa nakon te wene ni bure.”—1 I-Tetaronike 4:3.
REIAKINA AE BATI RIKI
Noria bwa ko na kangaa n rarawa nakon te wene ni bure, ao ni kakabwaiaaki ngkana ko kateimatoa aroaroni maium ae itiaki.
3. Birinako man te wene ni bure
E kakorakoraa te mwaane ae kakaonimaki ae Ioteba ni kateimatoa aroaroni maiuna ae itiaki. Wareka Karikani Bwaai 39:1-12, ao maroroakin titiraki aikai:
-
Tera ae e kaira Ioteba bwa e na birinako? —Nora kibuna 9.
-
N am iango, e karaoa te motinnano ae eti Ioteba? Bukin tera?
A na kangaa rooro n rikirake n ara bong aikai ni kakairi iroun Ioteba ao ni birinako man te wene ni bure? Kaota te TAAMNEI.
E tangirira Iehova bwa ti na rarawa nakon te wene ni bure. Wareka 1 I-Korinto 6:18, ao maroroakin titiraki aikai:
-
Baikara bwaai aika kona ni kaira temanna nakoni karaoan te wene ni bure?
-
Ko na kangaa ni birinako man te wene ni bure?
4. Ko kona n rarawa nakon te kariri
Tera ae kona ni kangaanga iai bwa ko na rarawa nakoni kaririam n te wene ni bure? Kaota te TAAMNEI, ao maroroakina te titiraki aei.
-
Tera ae karaoia te tari te mwaane are n te taamnei, ngke e a ataia ae e kona ana iango ao ana mwakuri, ni karekea mwina ae te aki kakaonimaki nakoni buuna?
A kakorakoraia naba n taai tabetai Kristian aika kakaonimaki ni kateimatoa itiakin aia iango. Ko na kangaa n rarawa nakon iaiangoani baika kammaira? Wareka I-Biribi 4:8, ao maroroakin titiraki aikai:
-
Baikara bwaai aika ti riai n iaiangoi?
-
E na kangaa warekan te Baibara ao katabetabeara n ara beku ibukin Iehova ni buokira n rarawa nakon te kariri ae karaoan te bure?
5. Ti kakabwaiaaki n ana kaetieti Iehova
E ataa Iehova te kabanea n tamaroa ibukira. E tuangira arora ni kateimatoa itiakin aroaroni maiura ao kakabwaia aika a na reke mani karaoana. Wareka Taeka N Rabakau 7:7-27 ke kaota te TAAMNEI, ao maroroakin titiraki aikai.
-
E kangaa te teinimwaane anne n toua te kawai nakon te kaririaki?—Nora Taeka N Rabakau 7:8, 9.
-
N aron ae oti n Taeka N Rabakau 7:23, 26, e kona te wene ni bure ni karekei mwina aika kakaiaki. Baikara kangaanga aika ti kona n totokoi rikia, ngkana ti kateimatoa itiakin aroaroni maiura?
-
E na kangaa bwainan te aroaro ni maiu ae itiaki ni buokira bwa ti na kukurei n aki toki?
A iangoia tabeman bwa e aki tatangira te bae taekinna te Baibara ibukin te wene ni bure i marenan te mwaane ma te mwaane ao te aine ma te aine. Ma Iehova ae te Atua ae nibwan te tangira, e tangiriia aomata nako bwa a na kukurei n aki toki. Ma ngkana ti kani kukurei n aki toki, ti riai ni maiuakin ana kaetieti. Wareka 1 I-Korinto 6:9-11, ao maroroakina te titiraki aei:
-
E koaua ae n ana taratara te Atua, tii tangiran te wene ni bure i marenan te mwaane ma te mwaane ao te aine ma te aine, ae ti riai n rarawa nako iai?
Ibukini kakukureian te Atua, ti riai ni bane ni karaoi bitaki. E materaoi ara kakorakora iai? Wareka Taian Areru 19:8, 11, ao maroroakin titiraki aikai:
-
N am iango, a manena ana kaetieti Iehova ibukin te aroaro ni maiu ae riai? Bukin tera?
E a tia Iehova ni buokiia aika bati bwa a na maiuakin ana kaetieti ibukin te aroaro ni maiu ae riai. E kona naba ni buokiko
A TAKU TABEMAN: “Akea buren te wene n taanga i marenaia aomata aika uoman ngkana a bon tangiriia.”
-
Tera ngkoe am kaeka?
KAKIMOTOTOANA
Te wene n taanga bon te bwaintangira mairoun Iehova ibukia taanga ni mare bwa a na kukurei iai.
Kauring
-
Baikara bwaai aika a mena i aan te wene ni bure?
-
Tera ae e na buokira bwa ti na rarawa nakon te wene ni bure?
-
Ti na kangaa ni kakabwaiaaki ngkana ti iri ana kaetieti Iehova ibukin te aroaro ni maiu ae riai?
NORI NABA AIKAI
Noria bwa e aera ngkai e tangiria te Atua bwa e riai ni mare te mwaane ao te aine aika a tangiria ni kaai ni maeka.
“Tera ae Taekinaki n te Baibara ni Kaineti ma te Tekateka ao n Aki Mare?” (Te kaongora n jw.org)
Noria bwa e aera ana kaetieti te Baibara ibukin te wene ni bure i marenan te mwaane ma te mwaane ao te aine ma te aine, e aki nanona ae ti na ribaiia naake a kakaraoi baikai.
“E Kairua te Wene ni Bure i Marenan te Mwaane ma te Mwaane ao te Aine ma te Aine?” (Te kaongora n jw.org)
Noria bwa e kangaa ana tua te Atua ibukin aeka ni wene ni bure nako, ni kamanoira.
“Bon te Wene ni Bure Naba te Oro n te Wi?” (Te kaongora n jw.org)
N te rongorongo ae “A Tabeakinai Raoi,” nora aroni bitakini maiun te mwaane ae taania raona ni mwaane ni kakukureia te Atua.
“E Bitii Maiuia Aomata te Baibara” (Te Taua-n-Tantani, Eberi 1, 2011)
a A irekereke baika ribaaki aikai ma aeka ni mwakuri n aron te wene n taanga ma te teei, te iein n te kurabe, te oro n te wi, ao riringan ana bwai ni kakariki temanna n te aro ae kammaira.
Ko Bae Naba n Tangira
TITIRAKI AIKA TATABEKAKI
Tera te Reirei n te Baibara?
Karekei kaekaan titiraki ni kaineti ma kairan te reirei n te Baibara iroura.
