41 NU GÈ NÒ
Éé Ní E Kpá Káí Kọ́ Kilma Ló Gbaa Ló Ea Di Zẹ̀ẹ̀ Págbálà Nè Pábia Ẹ́?
Lóó gã́bug nen náa ólò taaá gè ló bel ea kil ló gbaa ló ea di zẹ̀ẹ̀ págbálà nè pábia. Náa kal ló béè vó, tṍó e Kpá Káí gé ló bel ea kil ló gbaa lóí, à ólò lóe mm̀ sĩ́deè e nen é dã́ ból ló nè mm̀ bá fã̀ dẽe. Gbò nú ea kọ́ ólò dọ̀ bélè nèi. À bọ́ló kọ á dì naa vó boo béè kọọ̀ Kpá Káí aa bá Jìhóvà, ea dú Nen ea beè dèmii. À nyímá nú ea é palàge leeí ló. À kọ́ nèi gbò nú eé náa vaá nyíée ẹ́ẹ, nè nú ea é láá naa kọ é dé kpéè ló dùm dọ̀ọ̀mà dè-dè.
1. Jìhóvà ẹb gbaa ló ea di zẹ̀ẹ̀ págbálà nè pábia naa vàẹ?
Gbaa ló ea di zẹ̀ẹ̀ págbálà nè pábia dú dõ̀ònù ea aa bá Jìhóvà. À gbĩ́ kọọ̀ págbálà nè pábia e ba ni ílá á dé kpéè ló nakà gbaa lóí. Nakà dõ̀ònùí náa dú áá boo béè ge ié nvín, sõò à náa nagé kọọ̀ dóm nè va á láá zogè ba vulè nè tọa ló kilma ló ene mm̀ sĩ́deè e bàé dé kpéè ló. Níà nú ea náa vaá Kpá Káí à kọọ̀: “Zọ̀ o va eo beè ilí mm̀ o deè ãa ié ẹ́ẹ́ nyíe” ẽ́. (Próvẹẹ̀b 5:18, 19) Jìhóvà gbĩ́ kọọ̀ kọ̀láá kà dóm nè va e bà gé nyoone nvéè Kráìst á bọ́ló dẹ̀lẹ̀ nyíé boo kilma ló ene, kọbé bà náa kúná gã̀.—Bugi Híbrù 13:4.
2. Éé ní ea dú kúnàgã̀ ẽ?
Kpá Káí kọ́ọ̀ “gbò kùnà kúnà . . . náa é bã́ mm̀ Boṅ Méné Bàrì.” (1 Kọ́rìnt 6:9, 10, NW) Gbò e ba beè emí Kpá Káí mm̀ dém bel Gríìk beè tú moǹ bel ea kọlà por·neiʹa bààmà tẽ́ kúnàgã̀. Nakà moǹ belá bãàa mm̀ (1) gbaa ló a mà kẽ ea di zẹ̀ẹ̀ gbò e bà gáà ila, (2) ge kọọ̀ págbálà má ló págbálà àbèè kọọ̀ pábia má ló pábia, nè (3) ge kọọ̀ nen má ló nom. Be è ‘kpoolà lóó lọl ló kúnàgã̀,’ è náà kọọ̀ nyíè Jìhóvà á ẹẹ vaá àé dọ bélè nèi.—1 Tẹ̀sàlónaikà 4:3.
KPÁÁ NÓ BỌ̀Ọ̀VẸ̀
Bugi togó boo bé eo é láá bé èlbá kúnàgã̀ naa, nè bé e gè di õ̀òa mm̀ o láb é láá dọ̀ bélè nè ni naa.
3. Kpòòlà lóó lọl ló kúnàgã̀
Jósẹ̀f ea beè bọ́ló dẹ̀lẹ̀ nyíé booá náa beè zigà ge bã mm̀ dùm kúnàgã̀. Bugi Jénesìs 39:1-12, vaá ò gbóó aalai gbò bíbví:
-
Éé ní ea beè nvèè bá nè Jósẹ̀f kọ á láá teelá ààé bá ẹ́?—Ẹ̀b 9 gã́bel.
-
É kọ ò bulà kọọ̀ Jósẹ̀f beè nè lé béèlàfùl? Ló éé?
Mósĩ́ deè ní e gbò nvín ãa deè nieí é láá nó Jósẹ̀f vaá kpòòlà lóó lọl ló kúnàgã̀ ẽ? Bìlà VÍDIÒÍ.
Jìhóvà gbĩ́ kọọ̀ dénè bẹ̀ì é kpòòlà lóó lọl ló kúnàgã̀. Bugi 1 Kọ́rìnt 6:18, vaá ò gbóó aalai gbò bíbví:
-
Mókà gbò dìtõ̀ò ní ea é láá naa kọọ̀ nen á kuná gã̀ ẽ?
-
Mósĩ́ deè ní eo é láá kpòòlà lóó lọl ló kúnàgã̀ ẽ?
4. Òó láá bé èlbá ẹ̀bmà
Éé ní ea é láá naa kọ á tàvàlàí ló gè bé èlbá ẹ̀bmà ge kuná gã̀ ẽ? Bìlà VÍDIÒÍ, vaá ò gbóó aalai bíb ea nyoone.
-
Tṍó e vígà págbálà ea di mm̀ vídiòí mon kọọ̀ gbò a bug togó nè a láb é láá naa kọ á gá bọnàè ló dẹ̀lẹ̀ nyíé boo nè a va, éé ní ea beè naa ẽ́?
Bã̀àna gbò e bà gé nyoone nvéè Kráìst e bà bọ́ló dẹ̀lẹ̀ nyíé boo ólò be nágé bé boo gè ié õ̀òa bug sìgà tṍó. Mósĩ́ deè ní eo é láá òòà aa ló gè olòó bugi togó boo gbò nú e bè náa õoà ẽ? Bugi Fílipaì 4:8, vaá ò gbóó aalai gbò bíbví:
-
Gbò éé ní ea bọ́ló kọ é bugi togó boo é?
-
Mósĩ́ deè ní e gè olòó bugi Kpá Káí nè ge sí gã́bug tóm nè Jìhóvà é láá nvèè bá nèi kọ é bé èlbá ẹ̀bmà ge sí pọ́lọ́ ẹ́?
5. Gbò nòòkúù Jìhóvà ólò dọ̀ bélè nèi
Jìhóvà nyímá ló nú ea é palàge leeí ló. À kọ́ nèi bé eé láá di õ̀òa mm̀ bẹẹ láb naa, nè gbò bélè eé íe lọl ló gè naa vó. Bugi Próvẹẹ̀b 7:7-27 àbèè ò bilà VÍDIÒÍ, vaá ò gbóó aalai gbò bíb ea nyoone.
-
Mósĩ́ deè ní e nvín ãa gbálàa beè kyã̀à bã kiẽ́e ea túe nvee kèbá ẹ̀bmà ẽ? —Ẹ̀b Próvẹẹ̀b 7:8, 9.
-
Kpá Próvẹẹ̀b 7:23, 26 náa kọ é nyimá kọọ̀ agẹbá pọ́lọ́ ólò sìlà aa mm̀ kúnàgã̀. Mókà gbò tã̀àgã̀ ní eé aa bá bé è tõó dùm ea õoà ẽ?
-
Mósĩ́ deè ní e gè tõó dùm ea õoà é láá nvèè bá nèi kọ é dé kpéè ló dùm dọ̀ọ̀mà dè-dè e?
Sìgà nen bugi togó kọọ̀ nú e Kpá Káí kọ́ kilma ló gè kọọ̀ págbálà má ló págbálà àbèè kọọ̀ pábia má ló pábia náa lelà. Sõò, Jìhóvà ea dú Bàrì ea vulèi gbĩ́ kọ é dé kpéè ló dùm dọ̀ dè-dè. Kọbé è láá naa vó, èé íè ge tõó boo gbò a nòòkúu. Bugi 1 Kọ́rìnt 6:9-11, vaá ò gbóó aalai nakà bíbví:
-
Kèsĩ́ Bàrì, é kọọ̀ áá gè kọọ̀ págbálà íe tàn ge má ló págbálà àbèè kọọ̀ pábia ié tàn ge ma ló pábia ní ea dú pọ́lọ́ ẹ́?
À dú bíi kọọ̀ dénè bẹ̀ì é tõó dùm ea lelà kọbé è láá naa nú ea léémá Bàrì. É kọọ̀ ge naa vó é dọ bélè nèi? Bugi Psalm 19:8, 11, vaá ò gbóó aalai gbò bíbví:
-
É kọ ò bulà kọọ̀ nyìmànù di mm̀ gbò nòòkúù Jìhóvà ea kil ló gè tõó dùm ea õoà? Be ò náà ẽei àbèè ẽ́èe, ló éé?
Jìhóvà a nveè bá nè gã́bug nen kọ bàá láá tõó boo gbò a nòòkúu ea kil ló õ̀òa láb. Àé láá nvèè nàgé bá nè olo
SÌGÀ GBÒ KỌ́Ọ̀: “Tọ́ọ̀ kà pọ́lọ́ á gé ló kọọ̀ bàà nen e bà vulà má ló ene.”
-
Ńlóò bùlà kọ́ vàẹ?
NÚ E NI NÓ
Ge ié gbaa ló mà kẽ dú dõ̀ònù e Jìhóvà ne dóm nè va kọ bàá dé kpéè ló.
Ge Òòa Boo
-
Mókà gbò láb ní ea bãàa mm̀ kúnàgã̀ ẽ?
-
Éé ní ea é nveè bá nèi kọ é kìn dùm kúnàgã̀ ẽ?
-
Mósĩ́ deè ní e gè tõó boo gbò nòòkúù Jìhóvà ea kil ló õ̀òa láb ólò dọ̀ bélè nèi ẽ́?
KPÁÁ GBĨ́ TẼ́ LÓ
Nyimá nú ea náa vaá Bàrì à gbĩ́ kọọ̀ págbálà nè pábia á zẹ́ẹ́ ilá besĩ́ bà kálá tõ̀òà.
“What Does the Bible Say About Living Together Without Marriage?” (Web article)
Nyimá nú ea náa vaá gè kọọ̀ Kpá Káí náa nveè sãa kúm gè kọọ̀ págbálà má ló págbálà àbèè kọọ̀ pábia má ló pábia náa tõó dọ̀ kọọ̀ é ọbví gbò e bà náa vó.
Nó bé e log Bàrì ea kil ló kọ̀láá íb gbaa ló mà kẽ ólò kpènài naa.
Mm̀ nòòtẽ́ ea togó bel kọọ̀ “They Treated Me With Dignity,” nó nú ea beè siè kpóó ene kà gbálà ea beè olòó ma ló págbálà kọ á nyaaná a sĩ́deè tõò dùm vaá naa nú ea leemá Bàrì.
a Gbò gbaa ló e Bàrì náa ténmáí bãàa mm̀ kele-kele íb gbaa ló mà kẽ, dì belí gè tú ketõ̀ò págbálà àbèè pábia nvee gã́ ene, ge kúná pátẽ́ dõòna nen, nè ge gyù bá ló ketõ̀ò pábia àbèè págbálà nen mm̀ sĩ́deè ge kúnáe.
