EKIRAJAAYA 41
¿Jara nüinkaainjatka neʼe amaa wanee wayuu naashin Maleiwa?
Wainma na wayuu japüikana saaʼu naashajaain süchiki jaralüin nüinkaainjatüin neʼe amaa wanee wayuu. Lotusü tü nümakat Maleiwa süchiki tia otta kojutushii na wayuukana nümüin naashajaapa süchiki tia. Tü nümakat Maleiwa süpülajatü anain wakuwaʼipa, jama niain atüjaain saaʼu tü anakat wapüla. Nüküjain wamüin tü waaʼinrajatkat süpüla talatüin naaʼin watuma jee süpüla katüin woʼu waneepia.
1. ¿Jamüsü nünüiki Jehová süchiki jaralüinjatüin nüinkaain neʼe amaa wanee wayuu?
Naashin Jehová, ainkaainjachi neʼe wanee wayuu sümaa tü nuʼwayuusekat, kasaalüinjachipejeʼe nia sümaa palajana. Tia nnojotsü süpülajatüin kachooinjanain neʼe naya, neeʼiyatüinjatü naalinjiraa napüla otta nnojoluinjatü yarüttüin natuma sukuwaʼipa kaʼwayuusee. «Talata paaʼin sümaa tü puʼwayuuse pümaajatkat jimaʼaliiwaʼaya pia» müshi Maleiwa suluʼu tü Bibliakat (Proverbios 5:18, 19). Na wayuu anoujashiikana, waneepiainjana naya sümaa naʼwayuuse otta nnojotsü kawalaʼatainjatüin shia natuma (paashajeʼera Hebreokana 13:4).
2. ¿Kasa wayu tü amaʼüjirawaakalü akuwaʼipaa?
Nuluwataapa Maleiwa saashin tü Bibliakat, nnojoleena eein «na wayuu eekai nuʼluwajiraain nukuaippa sümaa wayuu jierü otta wane jierü nümaa wane toolo [...] je na wayuu eekai namaʼüjaain sümaa wayuu nnojotkat nuʼwayuusein otta nnojoikai suʼwayuusein, je na tooloyuu amaʼüjiraakana sümaa tooloyuu» (1 Corinto 6:9, 10). Tü «amaʼüjirawaa akuwaʼipaa» sümakat amüin tü Bibliakat, shia tü pütchikat griego pornéia. Tia shia (1) naainjiraale nukuwaʼipa wanee wayuu sümaa wanee jierü sümaa nnojolin kasaalüin nia sümaa, a (2) nümaʼüjiraale nukuwaʼipa wanee toolo nümaa wanee toolo, wanee jierü sümaa wanee jierü otta (3) nümaʼüjiraale nukuwaʼipa wanee wayuu sümaa mürüʼlü. Wayoutule tü amaʼüjirawaakalü akuwaʼipaa, talateechi Jehová watuma otta aneerü wakuwaʼipa (1 Tesalónica 4:3).
WEKIRAJAA SOOʼOMÜIN
Wekirajaa süchiki tü paaʼinrajatkat süpüla nnojoluin pia sünainpünaain amaʼüjirawaa akuwaʼipaa otta süchiki tü kasa anasü piʼreetkat müleka wulere pukuwaʼipa.
3. Piyouta tü amaʼüjirawaakalü akuwaʼipaa
Eeshi wanee wayuu kanüliakai José, nüchecherüin naaʼin suulia nümaʼüjiraain nukuwaʼipa. Jaashajeʼera Génesis 39:1-12 otta yooto jia süchiki tüü:
-
¿Jamüsü niyoutaka José nümaʼüjiraain nukuwaʼipa? (Jaashajeʼera süchikuaʼa wetsiikulokot 9).
-
¿Anasüche tü naaʼinrakat José? ¿Jamüsü anaka tia saaʼin pümüin?
¿Kasa eeka süpüla naaʼinrüin na jimaʼaliikana otta na majayünnüükana süpüla nayoutuin namaʼüjiraain nakuwaʼipa maʼaka niyoutuin shia José? Jünaja tü VIDEOKOT.
Naashin Jehová, wayoutajatü tü amaʼüjirawaakalü akuwaʼipaa. Jaashajeʼera 1 Corinto 6:18 otta yooto jia süchiki tüü:
-
Püküja süchiki waneirua kasa nümaʼüjiraajeetka atuma nukuwaʼipa wanee wayuu.
-
¿Kasa paaʼinrajatka süpüla nnojoluin pümaʼüjiraain pukuwaʼipa?
4. Püchechereerü paaʼin suulia pümaʼüjiraain pukuwaʼipa
¿Kasa suchunteetka atuma paaʼin pümaʼüjiraweein pukuwaʼipa? Jünaja tü VIDEOKOT otta yooto jia süchiki tüü:
-
Niyaawatapa chi wawalakai saaʼu mojuin tü jülüjakat naaʼin jee tü naaʼinrakat, ¿kasa naaʼinrakat süpüla nnojolinjachin nümaʼüjiraain nukuwaʼipa sümaa wanee wayuu nnojotka nuʼwayuusein?
Müshiʼiya wayakana, wayoutuinjatü tü amaʼüjirawaakalü akuwaʼipaa süpüla wuleinjatüin waaʼin. ¿Kasa paaʼinrajatka süpüla nnojoluinjatüin jülüjakuʼu müin paaʼin amaʼüjirawaa akuwaʼipaa? Jaashajeʼera Filipos 4:8 otta yooto jia süchiki tüü:
-
¿Kasa tü anakat süpüla jülüjain paaʼin?
-
Waashajeʼerawaire tü Bibliakat otta waʼyataale maʼin nümüin Jehová, wachechereerü waaʼin suulia wamaʼüjiraain wakuwaʼipa, ¿jamüsü wachechereetka waaʼin?
5. Eʼreena waya kasa anasü waaʼinrüle tü nümakat Jehová
Nütüjaa aaʼu Jehová tü anakat wapüla. Makalaka nüküjain wamüin tü waaʼinrajatkat süpüla nnojoliinjanain wamaʼüjiraain wakuwaʼipa otta nüküjain jamüin aneetka wakuwaʼipa nnojorüle waaʼinrüin tia. Jaashajeʼera Proverbios 7:7-27 otta jünaja tü VIDEOKOT. Süchikijee, yooto jia süchiki tüü:
-
¿Kasa nümaʼüjiraaka anainjee nukuwaʼipa chi jimaʼaikai? (Jaashajeʼera Proverbios 7:8, 9).
-
Saashin Proverbios 7:23, 26, eʼreena waya kasa mojusü sünainjee tü amaʼüjirawaakalü akuwaʼipaa. ¿Kasa nnojoleetka alatüin wamüin müleka nnojoliire wamaʼüjiraain wakuwaʼipa?
-
¿Kasa anasü weʼreetka mapeena nnojoliire wamaʼüjiraain wakuwaʼipa?
Süka mojuin saashin tü Bibliakat tü naaʼinrakat wanee wayuu amaʼüjiraakai nukuwaʼipa nümaa toolo jee shiale wanee jierü sümaa wanee jierü, maaliinsalii naya nüpüla Maleiwa naashin noʼutku na wayuukana. Nnojotpejeʼe shiimain tia, aipürai maʼin Jehová, aisü wayuu maʼleekalia nüpüla jee nücheka achikit kateein soʼu wayuu süpüla kaʼikat süpüshuaʼa. Süpüla katüinjatüin woʼu waneepia, waaʼinrüinjatü tü nuluwataakalü anain waya. Jaashajeʼera 1 Corinto 6:9-11 otta yooto jia süchiki tüü:
-
¿Shiache mojuka neʼe nümüin Jehová suchuntaain naaʼin wanee wayuu nümaʼüjiraain nukuwaʼipa nümaa wanee toolo jee shiale wanee jierü sümaa wanee jierü?
Süpüla anainjanain waya noʼuluʼu Maleiwa, weeʼiratüinjatü wakuwaʼipa. ¿Eʼreenache waya kasa anasü sünainjee weeʼiratüin wakuwaʼipa? Jaashajeʼera Salmo 19:8, 11 otta yooto jia süchiki tüü:
-
¿Kapüleesüche oonowaa sümaa tü nuluwataakalü anain waya Jehová? ¿Jamüsü mapüleeka shia saaʼin pümüin?
Wainma na wayuu nükaalinjakana Jehová süpüla nanouteʼerüin nakuwaʼipa wanaapünaa sümaa tü nuluwataakalü anain naya. Meeriaʼaya pukuwaʼipa nutuma Jehová, nunouteʼereerü shia.
EESHII WAYUU EEKAI NAMÜIN: «Jaʼitaichi nnojolin kasaalüin wanee wayuu sümaa wanee jierü, nnojotsü mojuin nüinkaale sümaa».
-
¿Jamüsüjaʼa pünüiki süchiki tia?
WATÜJAAITPAKA AAʼU
Naashin Jehová shiainjatü nüinkaaka neʼe amaa wanee wayuu tü kasaatkalü amaa nia.
Pusouta shiʼipajee
-
¿Kasa wayu tü amaʼüjirawaakalü akuwaʼipaa?
-
¿Kasa waaʼinrüinjatka süpüla nnojoliinjanain wamaʼüjiraain wakuwaʼipa?
-
¿Kasa anasü weʼreetka woonoole sümaa tü nuluwataakalü anain waya Jehová?
PÜNAʼLA SOOʼOMÜIN
Naashin Maleiwa, kaʼwayuusere wanee wayuu, kasaalüinjachi nia sümaa. Pikirajaa süchiki tia.
Mayaainjeʼe mojuin noʼuluʼu Maleiwa nümaʼüjiraale nukuwaʼipa wanee toolo nümaa toolo jee shiale wanee jierü sümaa wanee jierü, nnojoishii nuluwataain waya süpüla walerajüin jee waʼürülain naya.
Paashajeʼera tü sümakat tü Bibliakat süchiki aneerüin wakuwaʼipa nnojorüle wamaʼüjiraain wakuwaʼipa.
¿Jamüsü nunouteʼeraka nukuwaʼipa wanee wayuu amaʼüʼjiraapuʼukai nukuwaʼipa nümaa wanee toolo? Paashajeʼera süchiki tia suluʼu tü pütchikat «Kojutushi taya namüin»
«Sunouteʼerüin nakuwaʼipa tü Bibliakat» (Aapiria Wayuu, aaʼuriiroʼu 1, 2011)
a Süpüshi tia shia namaʼüjiraale naanükülüʼüpünaa, nachiiruapünaa otta namülejiraale nakorolo.
Eesüjaʼa kamalainjeerüle pümüin aashajeʼeraa tüü
SÜSAKIRAWAIKA ANAIN WAYUU
¿Jamüsü sukuwaʼipa shikirajia wayuu sünain tü Bibliakat natuma na Aküjaliikana pütchi?
Pikirajaale sünain tü Bibliakat namaa na aküjaliikana pütchi nüchiki Jehová, eesü süpüla pikirajaain süka tü Biblia eekat pümaʼana otta puunejaain püpüshi jee paʼaleewainyuu.
