ZAJ KAWM 41
Phau Vajlugkub Hais Li Cas Txog Kev Pw Ua Niam Txiv?
Txoj kev pw ua niam txiv yog ib yam uas txaj muag ces muaj coob tus yeej tsis tshua nyiam tham txog. a Tiam sis phau Vajlugkub tsis zais lus thiab ua zoo qhia txog qhov no. Tej uas phau Vajlugkub qhia yeej pab tau peb vim Yehauvas yog tus tsim peb ces nws yeej paub tias dab tsi zoo tshaj rau peb. Nws qhia tias peb yuav ua li cas thiaj haum nws siab thiab yuav ua li cas peb thiaj tau lub neej nyob kaj siab lug mus ib txhis.
1. Yehauvas hais li cas txog kev pw ua niam txiv?
Kev pw ua niam txiv yog Yehauvas tsim rau tus poj niam thiab tus txiv neej uas twb sib yuav lawm xwb, kom nkawd thiaj muaj kev zoo siab thiab muaj tub muaj ki. Twb yog li ntawd, Vajtswv Txoj Lus thiaj hais tias, ‘Koj cia li txaus siab thiab nrhiav kev zoo siab nrog tus poj niam uas koj yuav thaum koj tseem hluas.’ (Pajlug 5:18, 19) Ob niam txiv uas teev tiam Yehauvas, ib tug yuav tsum ua ncaj ncees rau ib tug thiab tsis txhob mus ua kev nkauj kev nraug.—Nyeem Henplais 13:4.
2. Kev ua nkauj ua nraug, sib daj sib dee yog dab tsi?
Phau Vajlugkub hais tias cov uas ua nkauj ua nraug sib daj sib dee yuav tsis tau nyob hauv Vajtswv lub Nceeg Vaj. (1 Kauleethaus 6:9, 10) Lo lus ua nkauj ua nraug yog los ntawm lo lus Kilis phauni-a (por·neiʹa) uas yog hais txog (1) cov uas sib deev b tiam sis tsis yog niam txiv, (2) txiv neej deev txiv neej los sis poj niam deev poj niam, thiab (3) cov neeg deev tsiaj. Vajtswv txoj lus sam hwm kom peb “tsis txhob ua kev nkauj kev nraug thiaj li haum Vajtswv siab.” Yog peb ua kom haum Vajtswv siab ces yuav zoo rau peb dua.—1 Thexalaunikes 4:3.
KAWM NTXIV
Kawm seb yuav ua li cas koj thiaj yuav tsis mus ua kev nkauj kev nraug thiab yog koj tsis ua tej ntawd ho yuav pab tau koj li cas.
3. Tsis txhob mus ua nkauj ua nraug
Thaum ib tug poj niam yuam Yauxej nrog nws pw, nws tso sas ntws khiav lawm los twb vim yog nws xav ua haum Yehauvas siab. Nyeem Chivkeeb 39:1-12 thiab tham txog ob lo lus no:
-
Ua cas Yauxej thiaj tsis kam nrog tus poj niam ntawd pw?—Saib nqe 9.
-
Koj sim piav seb ua li Yauxej ua ntawd puas yog?
Cov hluas yuav xyaum Yauxej tus qauv li cas lawv thiaj tsis mus ua kev nkauj kev nraug? Saib zaj YEEB YAJ KIAB.
Yehauvas xav kom peb tsis txhob mus ua plees ua yi ua nkauj ua nraug. Nyeem 1 Kauleethaus 6:18 thiab tham txog ob lo lus no:
-
Tej yam twg yuav coj tau koj mus ua kev nkauj kev nraug?
-
Koj yuav ua li cas koj thiaj zam tau tsis mus ua kev nkauj kev nraug?
4. Koj yeej kov yeej tej kev sim siab
Ua li cas thiaj nyuaj rau ib txhia tswj lawv tus kheej kom tsis txhob mus ua kev nkauj kev nraug? Saib zaj YEEB YAJ KIAB thiab tham txog lo lus no:
-
Tus kwv tij hauv zaj yeeb yaj kiab no ua li cas thaum nws paub tias nws txoj kev xav thiab tej nws ua yuav ua rau nws ntxeev siab rau nws tus poj niam?
Txawm yog cov Khixatias los muaj tej lub sij hawm yeej tsis yooj yim rau lawv tsis txhob xav txog tej uas tsis dawb huv. Yog li, koj yuav ua li cas koj thiaj tsis pheej xav txog tej uas tsis dawb huv? Nyeem Filipis 4:8 thiab tham txog ob lo lus no:
-
Peb yuav tsum xav txog tej yam zoo li cas xwb?
-
Vim li cas thaum peb nyeem Vajlugkub thiab rau siab ua Yehauvas tes hauj lwm thiaj pab tau peb tsis mus ua txhaum?
5. Vajtswv Yehauvas tej kev cai zoo rau peb
Yehauvas paub tias dab tsi zoo tshaj rau peb. Nws qhia tias peb yuav ua li cas peb thiaj ua tau neeg dawb huv thiab ua neeg dawb huv zoo rau peb li cas. Nyeem Pajlug 7:7-27 los sis saib zaj YEEB YAJ KIAB thiab tham txog cov lus no:
-
Ua li cas tus tub hluas no thiaj mus raug tus poj niam ntawd ntxias?—Saib Pajlug 7:8, 9.
-
Raws li Pajlug 7:23, 26, kev ua nkauj ua nraug yuav ua tau kev puas tsuaj li cas rau yus? Yog hais tias peb ua neeg dawb huv, peb yuav zam tau tej teeb meem twg?
-
Vim li cas qhov uas peb ua neeg dawb huv thiaj pab tau peb muaj kev kaj siab lug mus ib txhis?
Ib txhia hais tias qhov uas phau Vajlugkub txwv tsis pub txiv neej deev txiv neej thiab poj niam deev poj niam ntawd yog Vajtswv tsis hlub lawv thiab nws ua tsis yog lawm. Tiam sis tsis yog li ntawd. Vajtswv Yehauvas yog txoj kev hlub thiab nws xav kom txhua leej txhua tus tau nyob kaj siab lug mus ib txhis, tiam sis peb yuav tsum tau ua peb lub neej raws li nws tej kev cai dawb huv. Nyeem 1 Kauleethaus 6:9-11 thiab tham txog lo lus no:
-
Puas yog Vajtswv tsis pom zoo txiv neej deev txiv neej thiab poj niam deev poj niam nkaus xwb?
Peb yuav tau hloov peb thiaj ua haum Vajtswv siab. Ua li, puas tsim nyog peb hloov? Nyeem Phau Ntawv Nkauj 19:8, 11 thiab tham txog lo lus no:
-
Yehauvas sam hwm kom peb ua li nws tej kev cai dawb huv, koj puas xav hais tias peb yeej ua tau? Piav seb vim li cas koj thiaj xav li ko.
Yehauvas twb pab tau ntau tus hloov lawv lub neej los ua raws li nws tej kev cai dawb huv lawm. Nws yeej pab tau koj thiab
IB TXHIA HAIS TIAS: “Yog ob tug neeg sib nyiam lawm ces nkawd yuav pw ua ke los tsis ua li cas.”
-
Yog muaj neeg hais li no rau koj, koj yuav teb li cas?
KOJ KAWM TAU DAB TSI
Yehauvas tsuas tso cai rau ob tug neeg uas twb yog niam txiv lawm pw ua ke xwb.
Rov Tham Dua
-
Kev ua nkauj ua nraug sib daj sib dee yog hais txog dab tsi tiag?
-
Puas muaj dab tsi los pab peb kom peb tsis txhob mus ua kev nkauj kev nraug?
-
Thaum peb ua raws li Yehauvas tej kev cai dawb huv yuav pab tau peb li cas?
TSHAWB NTXIV
Kawm seb vim li cas Vajtswv thiaj hais kom tus poj niam thiab txiv neej sib yuav tso nkawd mam li sib sau los nyob ua ke.
“Phau Vajlugkub Hais Li Cas Txog Qhov Nyob Ua Ke Ua Ntej Sib Yuav?” (Nyeem hauv jw.org/hmn)
Txawm phau Vajlugkub txwv tsis pub txiv neej nyiam txiv neej thiab poj niam nyiam poj niam los phau Vajlugkub tsis hais kom peb ntxub cov uas coj li ntawd.
“Txiv Neej Nyiam Txiv Neej, Poj Niam Nyiam Poj Niam Puas Txhaum?” (Nyeem hauv jw.org/hmn)
Kawm seb Vajtswv tej kev cai rau txhua txoj kev sib daj sib dee tiv thaiv tau peb li cas.
“Yog Siv Qhov Ncauj Xwb Puas Yog Sib Deev?” (Nyeem hauv jw.org/hmn)
Hauv lub ntsiab me “Lawv Saib Taus Kuv,” tus kwv tij piav tias thaum ub nws nyiam txiv neej tiam sis nim no nws hloov lawm vim nws xav ua kom haum Vajtswv siab. Saib seb vim li cas nws thiaj hloov tau.
“Vajlugkub Kho Tau Lub Neej” (Phau Tsom Faj lub 4 Hlis tim 1 xyoo 2011)
a Hmoob ib txwm txaj muag piav txog tej uas yuav hais no, tiam sis yuav tau muab piav kom meej sawv daws thiaj yuav to taub tias Yehauvas xav kom nws cov neeg coj li cas tiag.
b Lo lus no kuj yog hais txog kev sib deev uas siv qhov ncauj, qhov quav, thiab sib kov sib xuas los sis rhoob lwm tus neeg qhov chaw mos.
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
