LESENI 41
Mahuta Hebou Karana Dekenai Baibel Ena Hereva be Dahaka?
Taunimanima momo ese mahuta hebou karana idia herevalaia be auka. To, Baibel be hemataurai dalanai mahuta hebou karana ia herevalaia, bona ena hereva ese ita ia durua. Unai be maoro, badina Baibel be Iehova amo ia mai, bona ia be iseda Havaraia Tauna. Unai dainai ia diba dahaka be namo ita totona. Ita ia hadibaia edena kara ese ia do ia hamoalea, bona dahaka ese ita do ia durua iseda mauri ita moalelaia hanaihanai totona.
1. Mahuta hebou karana dekenai Iehova ena lalohadai be dahaka?
Mahuta hebou karana be Iehova ese taunimanima dekenai ia henia harihari gauna. Ia ura headava tau bona hahine ese idia moalelaia. Unai harihari gauna amo headava taudia be natudia idia havaraia diba, bona edia lalokau ta ta dekenai idia hahedinaraia danu. Unai dainai Baibel ia gwau: “Emu matamata negana ai oi adavaia hahine ida oi moale hebou.” (Aonega Herevadia 5:18, 19) Iehova ia ura headava Keristani taudia ese edia adavana do idia badinaia, unai amo do idia heudahanai lasi.—Heberu 13:4 duahia.
2. Matabodaga karadia be dahaka?
Baibel ese ita ia hadibaia “matabodaga taudia . . . be Dirava ena Basileia do idia abia lasi.” (1 Korinto 6:9, 10) Baibel torea taudia ese Greek herevana por·neiʹa idia gaukaralaia matabodaga ena anina idia gwauraia hedinarai totona. Por·neiʹa be inai bamona kara ia herevalaia: (1) tau bona hahine idia mahuta hebou a to unai be ena adavana lasi, (2) tau be tau (o hahine be hahine) ida idia mahuta hebou karana, bona (3) animal ida idia mahuta hebou karana. Iehova do ita hamoalea bona namo do ita davaria, bema “matabodaga karadia [ita] dadaraia.”—1 Tesalonika 4:3.
DIBA MA HAIDA ABIA
Matabodaga karadia oi dadaraia bona Dirava ena taravatu goevadia oi badinaia ena namo do oi dibaia.
3. Matabodaga karana oi dadaraia
Abidadama tauna Iosepa be hahine ta ena matabodaga karana ia dadaraia. Genese 39:1-12 duahia, bena inai henanadai herevalaia:
-
Dahaka dainai Iosepa be unai hahine amo ia heau?—Siri 9 itaia.
-
Oi laloa Iosepa be abia hidi maorona ia karaia, a? Dahaka dainai?
Hari edena dala ai matamata taudia ese Iosepa ena kara idia tohotoho bona matabodaga karadia idia dadaraia diba? VIDIO itaia.
Iehova ia ura ita ibounai ese matabodaga karadia ita dadaraia. Korinto Ginigunana 6:18 duahia, bena inai henanadai herevalaia:
-
Edena bamona kara ese ta ia veria bona matabodaga karana ena hahetoho lalonai ia moru diba?
-
Edena dala ai matabodaga karana oi dadaraia diba?
4. Hahetoho oi dadaraia diba
Dahaka dainai nega haida matabodaga karana ena hahetoho ita dadaraia be auka? VIDIO itaia, bona henanadai herevalaia.
-
Vidio ai tadikaka ia laloparara ena lalohadai bona kara dainai matabodaga ena hahetoho lalonai ia moru diba neganai, dahaka ia karaia?
Abidadama Keristani taudia danu be nega haida idia hekwarahi edia lalohadai ia goeva totona. Edena dala ai lalohadai mirodia oi dadaraia diba? Filipi 4:8 duahia, bena inai henanadai herevalaia:
-
Edena bamona gaudia ita laloa be namo?
-
Edena dala ai Baibel duahia bona Iehova ena hesiai gaukara lalonai ita bisi karana ese ita do ia durua matabodaga ena hahetoho ita dadaraia totona?
5. Iehova ena taravatu ese ita ia gimaia
Iehova ia diba dahaka gaudia be idia namo ita totona. Ita ia hadibaia taravatu goevadia ita badinaia bona ena namo ia hahedinaraia danu. Aonega Herevadia 7:7-27 duahia eiava VIDIO itaia, bona henanadai herevalaia.
-
Edena dala ai mero matamata be hedibagani lalonai ia vareai?—Aonega Herevadia 7:8, 9 itaia.
-
Aonega Herevadia 7:23, 26 hegeregerena, matabodaga karana ese dika bada ia havaraia diba. Bema taravatu goevadia ita badinaia, dahaka dika do ita davaria lasi?
-
Iseda mauri lalonai taravatu goevadia ita badinaia neganai, vaira nega ai dahaka hahenamo do ita moalelaia?
Haida idia laloa Baibel ese tau be tau (o hahine be hahine) ida mahuta hebou karana ia taravatua be lalokau karana lasi. To, Iehova be lalokau Diravana, bona ia ura taunimanima ibounai ese mauri idia moalelaia hanaihanai. Unai hahenamo ita abia totona, iena taravatu ita badinaia be namo. Korinto Ginigunana 6:9-11 duahia, bena inai henanadai herevalaia:
-
Dirava ena taravatu hegeregerena, tau be tau (o hahine be hahine) ida mahuta hebou karana sibona be kerere, a?
Dirava ita hamoalea totona, ita ibounai ese eda mauri ita haidaua be namo. Unai ese namo do ia havaraia, a? Salamo 19:8, 11 duahia, bena inai henanadai herevalaia:
-
Oi laloa Iehova ena taravatu goevadia be maoro, a? Dahaka dainai unai bamona oi haere?
Iehova ese taunimanima momo ia durua ena taravatu goevadia idia badinaia totona. Oi danu ia durua diba
HAIDA IDIA GWAU: “Taunimanima rua idia mahuta hebou be kerere lasi. Gau badana be ta ta idia lalokau henia.”
-
Edena bamona do oi haere?
POINT BADANA
Mahuta hebou karana be Iehova ese headava tau bona hahine dekenai ia henia harihari gauna.
Riviu
-
Matabodaga karadia be dahaka?
-
Dahaka ese ita do ia durua matabodaga karana ita dadaraia totona?
-
Iehova ena taravatu goevadia ita badinaia neganai, dahaka namo ita davaria?
REFERENS ITAIA
Dirava ena ura be tau bona hahine do idia headava, bona ia ura lasi idia noho hebou kava ena badina do oi dibaia.
“Tau Bona Hahine Idia Noho Hebou Kava Karana—Baibel ena Hereva be Dahaka?” (Websait atikol)
Baibel ia gwau tau be tau (o hahine be hahine) ida idia mahuta hebou taudia edia kara be kerere, to ia gwau lasi unai taudia ita inai henia ena badina do oi dibaia.
Mahuta hebou karana dekenai Dirava ena taravatu ese ita ia gimaia dalana do oi dibaia.
Inai atikol ladana, “Mai Hemataurai ida Lau Idia Kara Henia” ai, tau ta be Dirava ia hamoalea totona, tatau ida mahuta hebou karana ia hadokoa ena sivarai do oi duahia. Dahaka ese ia durua unai ia karaia totona?
“Baibel ese Mauri Ia Haidaua” (Gima Kohorona, April 1, 2011)
a Por·neiʹa be Baibel ese ia taravatua mahuta hebou karadia ia herevalaia, hegeregere tau ese ena gau (usina) be ma ta ena uduna o kununa lalonai ia atoa vareai, bona ma ta ena gau (usina o kiona) ia gadaralaia.
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
