EHONGWA 41
Ombeibela i tja vi ohunga nomahakaeneno womonyama?
Ovandu ovengi ve ṱohoṋi okuhungira ohunga nomahakaeneno womonyama. Posi ya, indu Ombeibela tji mai hungire ohunga nomahakaeneno womonyama, i hungira oukahu nu momuano wondengero. Oyo i hungira oviṋa ovizuvakwa nu mbi tu etera ouwa. Ihi katjikumise, orondu Ombeibela ya za ku Jehova, ngu ri Omuute wetu. Eye u tjiwa imbi mbi ri oviwa ku eṱe. Eye u tu raera oviṋa mbi twa sokutjita kokutja tu mu yorokise, noviṋa mbi mavi tu vatere kutja tu yorokere ehupo nga aruhe.
1. Jehova u noumune uṋe ohunga nomahakaeneno womonyama?
Omahakaeneno womonyama otjiyandjewa Jehova tja yandja kovandu. Eye u vanga kutja omurumendu nomukazendu mbu va kupasana ve mune ondjoroka motjiyandjewa ho. Otjiyandjewa hi tji tjita kutja ovakupasane ve kare novanatje, nu wina tji tjita kutja owo ve raisasane orusuvero momuano omuwa nu wondjoroka. Embo ra Mukuru opu ri zokutja: “Paha enyando roye puna omusuko ngu wa kupa moumutanda woye.” (Omiano 5:18, 19) Jehova u undjira ko kutja Ovakriste mba kupasana ve raisasane ouṱakame, ku nao owo kave sokukatuka orukupo.—Lesa Ovaheberi 13:4.
2. Oruvakiro ru kamburira mo tjike?
Ombeibela i tu raera kutja “ovandu mbe vakirasana . . . kamaave kara norupa mouhona waNdjambi.” (1 Ovakorinte 6:9, 10) Ovatjange vOmbeibela mbu va tjanga Otjigrike va ungurisa embo ndi porneia okukahurura kutja oruvakiro otjikwaye. Embo ndi ri kamburira mo (1) omahakaeneno womonyama a pokati kovandu mbu ve hi ya kupasana, (2) omahakaeneno womonyama pokati kovarumendu vevari poo ovakazendu vevari, (3) nomahakaeneno womonyama pokati komundu notjipuka. Tu yorokisa omutima wa Jehova nu tu rietera oveni ouwa tji twe “ritjaere oparukaze koruvakiro.”—1 Ovatesalonika 4:3.
KONḒONONA OUKOTO
Tara kutja omomuano uṋe mu mo yenene okunakaura oruvakiro nokutja ouwa waye mbu mo munu mokuritjinda momuano omukohoke.
3. Taurireye oruvakiro
Omurumendu omuṱakame wena Josef wa panḓa okutjita oruvakiro pu nomukazendu ngwaa vanga okurara pu na ye. Lesa Genesis 39:1-12, nu okuzambo hungirira komapuriro nga:
-
Otjikwaye tji tja hinga Josef kutja ma tupuke?—Tara kezeva 9.
-
Mo munu kutja Josef wa toora omukambo omusemba? Omena raye?
Hapo omitanda mavi yenene vi okuhorera ku Josef nokutaurira oruvakiro ndino? Nyanda OKAVIDIO.
Jehova u vanga kutja atuhe tu nakaure oruvakiro. Lesa 1 Ovakorinte 6:18, nu okuzambo hungirira komapuriro nga:
-
Ozongaro zeṋe nḓu mape ya aze tjiti kutja omundu ma tjite oruvakiro?
-
Mo yenene vi okutaurira oruvakiro?
4. Ove mo yenene okunakaura omarorero
Ovikwaye mbi mavi tjiti kutja i rire ouzeu okunakaura omarorero wokutjita oruvakiro? Nyanda OKAVIDIO, nu okuzambo hungirira kepuriro ndi mari kongorere mba.
-
Indu omurumendu omukambure mokavidio tja muna kutja omeripura we novitjitwa vye mape ya avi tjiti kutja a ha rire omuṱakame komukazendu we, eye wa tjita vi?
Nandarire Ovakriste ovaṱakame povikando ve kondja nomeripura omavi. Ove mo yenene vi okunakaura omeripura omavi? Lesa Ovafilipi 4:8, nu okuzambo hungirira komapuriro nga:
-
Ovikwaye mbi matu sokuripurira ko?
-
Okulesa Ombeibela nokuungura oukukutu motjiungura tja Jehova, maku tu vatere vi okunakaura omarorero wokutjita ouvi?
5. Omirari vya Jehova vi tu vatera
Jehova u tjiwa imbi mbi ri ovisemba ku eṱe. Eye u tu raera kutja matu sokutjita vi kutja tu rire ovakohoke, nouwa mbu za mokutjita nao. Lesa Omiano 7:7-27 poo nyanda OKAVIDIO, nu okuzambo hungirira komapuriro ngu maye kongorere mba.
-
Omurumendu omutanda wa wira vi momarorero?—Tara kOmiano 7:8, 9.
-
Otja kOmiano 7:23, 26, oruvakiro ru ku hitisa moumba. Omauzeu yeṋe ngu matu yepe indu tji twa kara ovakohoke mongaro yetu yomeritjindiro?
-
Okuritjinda momuano omukohoke maku tu vatere vi kutja tu kare nehupo rondjoroka nga aruhe?
Ovandu tjiva ve muna kutja oviṋa Ombeibela mbi hungira ohunga nomahakaeneno womonyama, pokati kovarumendu vevari novakazendu vevari kavi raisa orusuvero. Posi ya, Jehova oMukuru worusuvero nu u vanga kutja ovandu avehe ve kare nehupo rondjoroka nga aruhe. Kutja tu mune ehupo ndo, matu sokuhupa otja komirari vye. Lesa 1 Ovakorinte 6:9-11, nu okuzambo hungirira kepuriro ndi:
-
Otja koumune wa Mukuru, omahakaeneno womonyama pokati kovarumendu vevari novakazendu vevari ootjiṋa atjiyerike otjivi, poo pe na vyarwe?
Kutja tu tjate ku Mukuru, atuhe matu hepa okutjita omarundurukiro. Nu hapo mu nouwa mokutjita nao? Lesa Epsalme 19:8, 11, nu okuzambo hungirira komapuriro nga:
-
Hapo ove mo munu kutja omirari vya Jehova ohunga nongaro yomeritjindiro omizeu? Omena raye?
Jehova wa vatera ovandu ovengi okukara nonḓuviro komirari vye ohunga nongaro yomeritjindiro. Eye ma yenene okukuvatera wina
OVANDU TJIVA VE TJA: “Omahakaeneno womonyama pokati kovandu vevari mba suverasana katjiṋa otjivi.”
-
Ove otjo tja vi?
OKUYARUKIRA PO OUSUPI
Omahakaeneno womonyama otjiyandjewa Jehova tja yandja komurumendu nomukazendu mba kupasana kutja ve mune mo ondjoroka.
Okurizemburukisa
-
Oruvakiro ru kamburira mo ye?
-
Ovikwaye mbi mavi tu vatere okunakaura oruvakiro?
-
Ouwa waye mbu tu muna indu tji twa kongorere omirari vya Jehova ohunga nongaro yomeritjindiro?
RIHONGA OVINGI
Rihonga kutja ongwaye Mukuru tje vanga kutja omurumendu nomukazendu mbe vanga okuhupa pamwe ve kupasane rutenga.
“Ombeibela i tja vi ohunga nokuhupa pamwe ngunda amu hi ya kupasana?” (Okarupa okasupi morungovi)
Tara kutja ongwaye omahongero wOmbeibela ohunga nomahakaeneno womonyama pokati kovikazezere, tji ye ha hee kutja matu sokuvetonda.
Rihonga kutja omatwako wa Mukuru ohunga nomahakaeneno womonyama ye tu tjevera vi.
“Hapo omaungurisiro wotjinyo momahakaeneno womonyama otjiṋa otjivi?” (Okarupa okasupi morungovi)
Tara kutja ovikwaye mbya hinga omurumendu ngwaa rara pu novarumendu ovakwao, okurundurura ehupo re kutja ma yorokise Mukuru, mehungi ndi “Owo ve ndji tjinda momuano ouwa.”
“Ombeibela i rundurura omiinyo vyovandu” (Oruhungu, 1 ku April, 2011)
a Omahakaeneno nge ha yakurwa ngo ye kamburira mo omahakaeneno womonyama, okuungurisa otjinyo koviṋepo vyourumendu novyoukazendu momahakaeneno womonyama, okutundukasana kotutu twokongotwe, nokuṱunasana koviṋepo vyourumendu novyoukazendu nondando yokukovisa ozonḓuma zoruvakiro.
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
