UKỌCHẸ 41
Ẹñwu Baibul Ka Lugbo Udachi Ẹnẹkẹlẹ Kpai Onobulẹ?
I lọla ñwu amonẹ wewe ku ma kọla lugbo udachi ẹnẹkẹlẹ kpai onobulẹ n. Tabalẹ, iko duu ki Baibul kọla lugbo udachi ẹnẹkẹle kpai onobulẹ, Baibul aka pee lọna ojima. A la jile kwefu ẹñwu ki ka. Abalẹ i dukpẹ ki dẹ todu ki che Jihofa nyi wa. Owñ la m’ẹñwu ki nyọ ñwu wa tule. I ka ñwu wa ẹñwu k’a che ki ajẹñwu ẹdọ-wñ bọ kpai ẹñwu ki neke jẹñwu wa jura ogbegbelẹ.
1. Ẹñwu Jihofa ka lugbo udachi ẹnẹkẹlẹ kp’onobulẹ?
Udachi ẹnẹkẹlẹ kp’onobulẹ ch’ele ki kwugbo Jihofa. I atene k’udachi lẹ ki ch’ade ọkọ kp’ọya kate. Ele ki dẹ che todu k’ọkọ kp’ọya ki n’ọma kate n, ama todu ku ma ñọ neke d’ufẹdọ ñ’ọlama ku ma la jidadi ọlama. Todulẹ, Ọtakada Ọla Ọjọ kakini: “Ẹ ki la yọ ñwu ọya oj’okolobia-wẹ.” (Ita Ita 5:18, 19) Jihofa atene k’ọkọ kp’ọya ki ch’abo Kraist ochochi ku ma many’ọlama, ku ma we tene ẹnẹkẹlẹ abẹki onobulẹ omunẹ.—Gba Abo Hibru 13:4.
2. Ẹñwu ch’abutabu eche?
Baibul ka ñwu wa kakini “Amẹnabutabu . . . ajẹ ọda ojanẹ Ọjọ ogwu n.” (1 Abo Kọrint 6:9, 10) Abo ki kọ Baibul al’ichi Grik du por·neiʹa ch’ujiwe abutabu. Ọla lẹ ach’ujiwe amẹñwu-i: (1) udachi ẹnẹkẹlẹ kp’onobulẹ a ku ma ma n’ọlama n, (2) udachi ẹnẹkẹlẹ kp’ẹnẹkẹlẹ manyu onobule kp’onobulẹ (3) edachi kp’ẹla. A jile nana, a la ajẹñwu ẹdọ Jihofa bọ ichẹñwu k’a “f’ọwọ m’ọla nẹ b’ẹñwu abutabu eche tẹ.”—1 Abo Tẹsẹlonaika 4:3.
N’UMA NYỌGBA
Kọchẹ alu k’ẹ neke ra b’abutabu eche tẹ kpai ile k’ẹ nẹ ichẹñwu k’ẹ ch’abalẹ.
3. Ra b’abutabu eche tẹ
Josẹf kọ elẹ kpai onobulẹ ki atene ki Josẹf ki dachi kp’owñ. Gba Abakwanẹ 39:1-12, ubile mẹ ch’oluka oji am’ene-i:
-
Ẹñwu jẹñwu Josẹf ki neke ra?—G’ọgba 9.
-
Ẹ neju kaki ẹñwu ọmẹmẹlẹ Josẹf che-i? Ẹñwu chi k’ẹ kabalẹ?
Abu amagbadufu neke ch’awọli Josẹf ku ma la ra b’abutabu eche tẹ eñini-i? G’IFIDIO-i.
Jihofa atene k’ọgbọdu wa k’a ra b’abutabu eche tẹ. Gba 1 Abo Kọrint 6:18, ubile mẹ ch’oluka oji am’ene-i:
-
Am’uña ẹñwu neke k’onẹ ẹchẹ tefu abutabu eche?
-
Abu a neke ra b’abutabu eche tẹ?
4. Ẹ neke kpọna ny’ajama
Ẹñwu neke jẹñwu gbiti k’onẹ ki kpọna ny’ajama abutabu eche? G’IFIDIO-i, ubilẹ mẹ ch’oluka oji ene-i.
-
Ẹñwu ọmaye ẹnẹkẹlẹ ef’ifidio-i che ẹgba ki li kaki ibe ki akpẹ kpai uche-wñ neke jẹñwu ki dachi kpai ẹnẹ omunẹ ki ma ch’ọya-wñ n?
I n’iko ki agbiti ñwu Abo Kraist ochochi onugo ku ma we kpibe oji ẹñwu iwa. Ẹñwu ẹ neke che k’ẹ we na kpibe oji amẹñwu abutabu? Gba Abo Filipai 4:8, ubile mẹ ch’oluka oji am’ene-i:
-
Ẹñwu ch’amẹñwu ki dukpẹ k’a na kpibe oji-wñ?
-
Abu Baibul egba kpai ed’ọla wa tef’ukọlọ Ọjọ eche neke ch’atẹko wa k’a kpọna ny’ajama ech’ẹñwu ẹbiẹnẹ?
5. A jile kwefu am’ọda ki Jihofa du ñwu wa
Jihofa m’ẹñwu ki nyọ ñwu wa tule. I ka ñwu wa ọna k’a neke chẹ fẹ kpai ile k’a nẹ kwefu-wñ. Gba Ita Ita 7:7-27 abẹk’ẹ g’IFIDIO-i, ubilẹ mẹ ch’oluka oji am’ene-i.
-
Abu ẹnẹkẹlẹ lẹ d’ọla-wñ t’efu ajama le?—Go Ita Ita 7:8, 9.
-
Dabalu k’ọtakada Ita Ita 7:23, 26 ka, abutabu eche neke d’onẹ t’efu am’ihianyi wewe. Am’ihianyi ẹñwu neke we kẹrẹbu wa ichẹñwu k’a ma n’ọwọ efu abutabu eche n?
-
Ichẹñwu k’a ma n’ọwọ efu abutabu eche n, abu e-lẹ neke jẹñwu wa n’iñmi ogbegbelẹ ejọgba?
Abo ka akpibe kakini ẹñwu ki Baibul ka lugbo udachi ẹnẹkẹlẹ kp’ẹnẹkẹlẹ manyu udachi onobulẹ kp’onobulẹ chẹ gbiti ololo. Ama Jihofa ch’Ọjọ ufẹdọ, i la tene k’ẹnẹ duu ki n’iñmi ogbegbelẹ. K’a neke nyọ bọjọ, otila i che k’a leb’ọda Jihofa. Gba 1 Abo Kọrint 6:9-11, ubilẹ mẹ ch’oluka oji ene-i:
-
Ẹnẹkẹlẹ eb’ẹnẹkẹlẹ dachi kpai onobulẹ eb’onobulẹ dachi kate chẹñwu ẹbiẹnẹ eju Ọjọ?
Ọgbọ wa chaka dukpẹ k’a ch’arida efu ọlai wa ichẹñwu k’a tene jẹñwu ẹdọ Ọjọ bọ. Ile ẹñwu a nẹ ichẹñwu k’a ch’abalẹ? Gba Eli Ekọ D’Ọjọ 19:8, 11, ubile mẹ ch’oluka oji am’ene-i:
-
Ẹ neju kaki ọda ki Jihofa du ñwu wa lugbo abutabu eche che nyọ? Ẹñwu chi k’ẹ kabalẹ?
Jihofa ch’atẹko amonẹ wewe ku ma neke leb’ọda-wñ kwobi mẹ, i neke ch’atẹko wẹ onugo
ABO KA KAKINI: “Onẹ neke n’udachi kp’ẹnẹ du ki r’owñ eju ichẹñwu ku ma fẹdọ ọlama.”
-
Abu ẹ dohi?
ẸY’ỌLA UKỌ-I
Udachi ẹnẹkẹlẹ kp’onobulẹ ch’ele ki kwugbo Jihofa ñwu ọkọ kp’ọya kate.
Ẹñwu ẹ kọchẹ?
-
Am’uche ẹñwu dama ku ma dọ k’abutabu?
-
Ẹñwu ach’atẹko wa k’a ra b’abutabu eche tẹ?
-
Am’ile ẹñwu a nẹ ichẹñwu k’a leb’ọda ki Jihofa du ñwu wa lugbo abutabu eche?
KỌCHẸ MANYU
Kọchẹ ẹñwu ki chi k’Ojọ atene k’ẹnẹkẹlẹ kp’onobulẹ ki n’ọlama taku ma jọ dama.
“Ẹñwu Baibul Ka Lugbo Ẹnẹkẹlẹ Kp’onobulẹ Ku Ma Jọ Dama Ku Ma Ma La N’ọlama Ta N?” (I dẹ jw.org)
Baibul kọ wa kaki ẹnẹkẹlẹ eb’ẹnẹkẹlẹ dachi kpai onobulẹ eb’onobulẹ dachi chẹñwu ẹbiẹnẹ i che, ama e-lẹ che kaki i dukpẹ k’a na chulaka abo ki ach’uche-i? G’oji ọla ki d’ọganẹ-i.
“Ẹnẹkẹlẹ Eb’ẹnẹkẹlẹ Dachi Kpai Onobulẹ Eb’onobulẹ Dachi Chẹñwu Ẹbiẹnẹ I Che?” (I dẹ jw.org)
Kọchẹ alu k’ọda k’Ọjọ du ñwu wa lugbo udachi duu ad’ide wa.
“Ed’alu Fana Ẹñwu Ẹnẹkẹlẹ Abẹki Ẹñwu Onobulẹ Onẹ Ch’okate Kpai Elẹ Kp’onẹ?” (I dẹ jw.org)
Efu ọhiala “Ma D’ojima Ñwu Mi,” g’ẹñwu ki ch’atẹko ẹnẹkẹlẹ ka ki ab’ẹnẹkẹlẹ dachi ki r’ọlai-wñ da ki chanẹ echẹñwu ki ab’Ọjọ ẹdọ.
a Ekọla lugbo amẹñwu-i neke dabu ẹñwu anyọ ñwu abo wa Igala. Ama, a kọla oji amẹñwu-i todu k’amonẹ ki n’anẹreju alu k’amẹñwu-i dẹ eju Jihofa. Am’udachi ki ma nyọ eju Ọjọ ni lẹ che: udachi ẹnẹkẹlẹ kp’onobulẹ ku ma ma ch’ọkọ kp’ọya n, ed’alu fana ẹñwu ẹnẹkẹlẹ abẹki ẹñwu onobulẹ onẹ, elẹ kp’onẹ l’eju ofe-wñ kpai ed’ọwọ kwuru ẹñwu ẹnẹkẹlẹ abẹki ẹñwu onobulẹ ẹnẹ omunẹ ki rinyọ mọ.
