TOLUMỌYE 41
Ere Mọ Owei Mọ Zọzọ Anga Gbelemọ Yọmị Bible Teeki Gbaa Wẹrị Emi A O?
Biin kịmịama zọzọ bụnụ egberi kẹrị ẹrẹ mụ yọmị bụụze mịnị. Anịa Bible mị gaan má diidụbamọ bara ka kị zọzọ bụnụ gbelemọ egberi gbaa wẹrị emi. Wó Ọkpọnanaowei Jehovah kị Bible nana wẹrị emi duonị, Bible gbaa yebosẹ arere mịẹpaamọ wó pịrị mịnị. Ọkpọnanaowei ebi akị wó pịrịmụ ye nimi wẹrị emi. Anị duonị ụ dịsẹ emi ye mịẹmụ bara mọ bá mịẹdẹ kị bẹseri bẹseri ụndụ nanamụ bara mọ omịnị mọ gbaa wẹrị emi.
1. Jehovah tebara ka kị zọzọ bụnụ diimọ wẹrị emi a o?
Zọzọ bụnụ Jehovah bara kị duo bo emi dịẹpịrịye. Zọzọ nanadẹ ere mọ owei mọ akị pọwẹị kị Jehovah mụ dọụ wẹrị emi. Bei dịẹpịrịye bị baratụa zọzọ nanadẹ ere mọ owei mọ pịrị wẹrị awọụ zii, má anị nana wẹrịemi tarị mịẹ ịmbẹlẹmọ dẹịn mịnị. Anị kị duonị Bible gbaa wẹrị emi: “Iné asịyaị-pesi a timi nana erema mọ pọwẹị.” (Proverbs 5:18, 19) Christtuuduo mịnị taa mọ yei mọ otu zọzọ mọ kpẹkpẹrẹẹtimi bá, mú zịnị kịmị mọ bụnụ kụmọ bara kị Jehovah mọ dọụ wẹrị emi.—Hebrews 13:4 goo.
2. Lịkaịlịkaị zọzọ-anga inyenrinbụọ mị te ye a o?
Bible gbaa mị “lịkaịlịkaị bara zọzọ bụnụ mịnị kịmịsẹ . . . Ọkpọnanaowei Daabụọ duo sụọgha fa.” (1 Corinthians 6:9, 10) Bible gẹẹ otubo por·neiʹa tịịn mịnị egberi ụngbọ ka kị lịkaịlịkaị zọzọ bụnụ inyenrinbụọ tịịn wẹrị emi. Bei egberi ụngbọ bolou bọọ sụọ emi yebo anị (1) naá zọzọ nanagha kịmịama zọzọ bụnụ, a (2) owei mọ owei mọ zọzọ bụnụ, má (3) kịmị mọ nama mọ zọzọ bụnụ kpọ sụọ emi. Omịnị angọ akị “lịkaịlịkaị zọzọ bụnụ inyenrinbụọ mọ naịngha sẹ,” Jehovah mịẹ pọwẹị mịnị má wó kpọ arere nana mịnị.—1 Thessalonians 4:3.
EBIBARA TUUDỌỤ
Lịkaịlịkaị zọzọ bụnụ inyenrinbụọ kịlẹmụ bara mọ, má bolou duo bo ị́ laa mịnị arerebo dii.
3. Lịkaịlịkaị zọzọ bụnụ inyenrinbụọ duo baịn serii
Erema bo Joseph mọ bụnụ dọụ ifiebosẹ, omịnị angọ kụrọmọ wẹrị mịẹgha fa bara gbaa mị. Genesis 39:1-12 goo dá, bei biibịbịmọ kẹrị ẹrẹtei:
-
Teeki baratụa Joseph pịrị wẹrị baịn serii ma o?—Gooyọ 9 dii.
-
Joseph tọn iroro bị ebi emi bara ị́ mọ tọn mị? Tetuu a?
Asịyaị-pesiama tebara ka kị Joseph diimịẹ a paa emi a o? VIDIO farị.
Kịmịsẹ lịkaịlịkaị zọzọ bụnụ inyenrinbụọ duo baịn serii kị Jehovah mọ dọụ wẹrị emi. Wó 1 Corinthians 6:18 goo dá, bei biibịbịmọ kẹrị ẹrẹtei:
-
Te yeama kị kịmị mịẹ lịkaịlịkaị zọzọ bụnụ inyenrinbụọ a koro sụọ a paa emi a o?
-
Ị́mịnị tebara ka kị lịkaịlịkaị zọzọ bụnụ inyenrinbụọ duo baịn serii a paa emi a o?
4. Ị́ kpọ daadiye dẹịnmọ a paa emi
Teeki lịkaịlịkaị zọzọ bụnụ daadiye dẹịnmọmụ yọ mịẹ kụrọmọ ị́ pịrị a paaemi a o? VIDIO farị dá, biibịbị kẹrị ẹrẹtei.
-
Vidio bolou bị, bịnaowei mị, bo nimi amọ, wo iroro mịnị yebo mọ mịẹ mịnị yebo mọ ụ mịẹ zịnị ere mọ bụnụ a paa emi bara nimi bị, omịnị teekị mịẹ ma o?
Zụa ifieama, peibolou nana wẹrị emi Christtuduo-otuama kpọ ebigha iroro yeama mọ andamịnị. Ị́mịnị teeki mịẹ dẹ kị laa lịkaịlịkaị zọzọ bụnụ inyenrinbụọ kẹrị irorogha fa o? Philippians 4:8 goo dá, bei biibịbịmọ kẹrị ẹrẹtei:
-
Omịnị te yeama kị kẹrị iroro agbẹị emi a o?
-
Bible goo mịnị yọ mọ bá ifiemọsẹ Jehovah fịrịwẹnị mịnị yọ mọ tebara ka kị baratua wó pịrị wẹrị daadiye dẹịnmọ a paa emi a o?
5. Jehovah olokomọ ebi wó pịrị emi
Jehovah kị ebi wó pịrị emi ye nimi wẹrị emi. Anị duonị Jehovah omịnị mịẹ dẹkị laa ebi inyenrinbụọ nanamụ bara mọ, bá bolou bọọ emi arerebo mọ gbaa wó pịrịdẹ. Proverbs 7:7-27 goo anịghakpọ VIDIO farị dá, biibịbịmọ kẹrị ẹrẹtei.
-
Asịyaị-pesi mị tebara ka kị wẹnị mú daadiye a sụọ ma o?—Proverbs 7:8, 9 dii.
-
Proverbs 7:23, 26 gbaa bara dii daba, akpotuama lịkaịlịkaị zọzọ bụnụ bolou bọọ emi. Omịnị bịsẹ inyenrinbụọ nanagha ba, te bụụdọọnyeama kị wó laagha fa o?
-
Wó inyenrinbụọ mị yalịyalịtimi daba, tebara ka kị baratụa wó pịrị wẹrị bẹseri bẹseri ụndụ nana mịnị a o?
Zụa kịmịama gbaa amọ Bible owei mọ owei mọ zọzọ bụnụ gbelemọ yọ bọọ gbaa wẹrị emi egberi mị kịrịịgha. Anịa Jehovah, tarị nana wẹrị emi Ọkpọnanaowei duonị, omịnị bẹseri bẹseri ụndụ akị wó pịrị dọụ emi. Anịa laa bịsẹ ụndụ nanamụ yọbị, omịnị Jehovah dọụbara kị inyenrin mịnị. Wó 1 Corinthians 6:9-11 goo dá, bei biibịbị kẹrị ẹrẹtei:
-
Owei mọ owei mọ zọzọ bụnụ dịsẹ nana yọ bẹtịbị kị Ọkpọnanaowei tọrụ ghọ sei emi a?
Jehovah mịẹ pọwẹịmọ dọụ mịnịse, omịnị Jehovah dịsẹgha yeama a barasin mịnị. Bịsẹ bara mịẹmụ yọbị yelaa emi? Psalm 19:8, 11 goo dá, mị biibịbịmọ kẹrị ẹrẹtei:
-
Jehovah dọụ emi yebị ebi emi bara ị́ mọ tọn mị? Tetuu a?
Zọzọ bụnụ gbelemọ yọbị Jehovah baratụa biin kịmịama pịrị wẹrị laa wo olokobo dii wẹnị mịnị. Omịnị baratụa ị́ kpọ pịrị a paa emi
ZỤA KỊMỊAMA GBAA MỊNỊ: “Maa kịmị zọzọ tarị emi aba, amịnị zọzọ bụnụ kpọ seigha.”
-
Teeki ị́ mọ gbaa a paa emi a o?
KỊLỌỌBARA
Zọzọ bụnụ yebi Jehovah mịẹ akị taa mọ yei mọ otu kị pịrị wẹrị emi ebi dịẹpịrịye.
Waị diitụa
-
Te yeama kị lịkaịlịkaị zọzọ bụnụ bolou bọọ sọụ emi a o?
-
Teeki baratụa wó pịrị wẹrị lịkaịlịkaị zọzọ bụnụ inyenrinbụọ kịlẹ mịnị a o?
-
Zọzọ bụnụ gbelemọ yọmị, omịnị Jehovah olokobo dii wẹnị daba, te arere-ama kị wó laa mịnị a o?
DIITỤA
Jehovah ere mọ owei mọ zọzọ-nana dẹkị inyenrin gbelei gbaa wẹrị emi tuu bi dii.
“What Does the Bible Say About Living Together Without Marriage?” (Web article)
Bible gbaa amọ owei mọ owei mọ zọzọ bụnụ ebigha, anịa omịnị bịsẹ inyenrinbụọ nanawẹrị emi kịmịbo golumọ agbẹịgha tuu dii.
Zọzọ bụnụ gbelemọ yọmị, Ọkpọnanaowei olokobo baratụa wó pịrị mịnị bara bi dọụ ẹrị.
“Amịnị Ị Diidụbamọ Mị” egberitịbị dii daba, owei mọ owei mọ zọzọ bụnụ inyenrinbụọ nanawẹrị kịmị bo wo ụndụ dei wẹrị Ọkpọnanaowei mịẹ pọwẹịmọ bara dii.
a Bei ebigha inyenrinbụọ mị, biin yeama kị sụọ emi, gbaamaba tọọn-bụnụ, tọọn-taba, bịẹn-bụnụ, agbẹịgha bara akị zịnị kịmị tọọn anịghakpọ tébi/tuu gbele.
