ILUẸMHIN 41
Be IBaibo Tayẹ bhi Ẹmhọn Inegbenowẹ?
Ẹkhọle lo ẹbho ne bunbun rẹ tẹmhọn inegbenowẹ. Bhi obọ nọnkẹle, Baibo wo tẹmhọn inegbenowẹ, ọkpakinọn, bhi uwedẹ nọn gbale. Ẹmhọn nin Baibo tale dẹ sabọ rẹkpa mhan. Ranmhude Jehova hi ọnọn man mhan, ọle lẹn emhin ne ha mhẹn mhan bhi egbe. Ọle taman mhan emhin nin mhan ha lu ne ha ti ọle bhọ, yẹ rẹ mhan miẹn iẹnlẹn ọsi ighegheghe.
1. Ẹlo nela Jehova rẹ ghe inegbenowẹ?
Jehova man okpea bi okhuo ne ha ne egbe nowẹ. Ẹsele nọn na bhi obọ ọle vae, ọle inegbenowẹ khin. Okpea bi okhuo ne bọ egbe, ele ọkpa ọle guanọ ne ha ne egbe nowẹ. Ọnan ki rẹkpa ele rẹ biẹ imọn yẹ re oyẹẹ man egbe. Ọnan zẹle nin Baibọ da yọle: “Deba okhuo nin uwẹ re egbe usẹn-obhokhan re ha sọnyẹnmhẹn.” (Proverbs 5:18, 19) Jehova guanọ nin okhuo bi ọdọ sun-rẹkhan egbe. Ọle bha guanọ nin ọsoso bhi ẹwẹ ele ha ne ọria ọbhebhe nowẹ.—Tie Hebrews 13:4.
2. Be hi oghẹ?
Baibo yọle ghe, “ene gboghẹ ida nabhi Agbejele nọnsi Osẹnobulua.” (1 Corinthians 6:9, 10) Bhi obọ iBaibo nan re urolo iGreek gbẹn, ukpọta natiọle por·neiʹa, ọle hi oghẹ. Be ọne ukpọta nan mundia nan? (1) Nin itue eva ne bha bọ egbe rẹ ne egbe nowẹ, a (2) nin okpea rẹ ne okpea nowẹ, la nin okhuo rẹ ne okhuo nowẹ, bi (3) nin ọria rẹ ne elanmhẹn nowẹ. Mhan ha re “egbe nẹ bhi igboghẹ,” mhan ki re iJehova ha ghọnghọn. Imhan tobọmhan ki yẹ miẹn elele bhọ.—1 Thessalonians 4:3.
MANMAN LẸN OTỌLE NỌNSẸN
Luẹ ebi uwẹ ha rẹ sabọ rẹban igboghẹ yẹ, bi elele nin uwẹ ha miẹn bhọ sade uwẹ lu iriọ.
3. Re egbe nẹ bhi igboghẹ
Joseph bha ka deba okhuo Potiphar gboghẹ. Tie Genesis 39:1-12, bha ha zilo nyan ene inọnta nan:
-
Bezẹle nin Joseph da nẹ sibhi eji okhuo Potiphar ye re?—Fẹ ulọnlẹn 9 ghe.
-
Uwẹ be riale emhin nọn gbale iJoseph lu? Bezẹle?
Be elasẹre ha rẹ sabọ re egbe nẹ bhi igboghẹ yẹ beji Joseph lu? Ghe ọne IVIDIO.
Jehova guanọ nin mhan rebhe rẹban igboghẹ. Tie 1 Corinthians 6:18, bha ha zilo nyan ene inọnta nan:
-
Idia nela ha sabọ re ọria gboghẹ?
-
Be uwẹ ha lu nin uwẹ rẹ re egbe nẹ bhi igboghẹ?
4. Uwẹ dẹ sabọ khọn edọnmhẹn
Be ha sabọ re ọle ha nọghọ imhan rẹ rẹban igboghẹ? Ghe ọne IVIDIO, bha ha zilo nyan inọnta nọn rẹkhan ọlẹn.
-
Be ọne obhio mhan nan rẹman bhi ọne ividio lu yẹ, ẹghe nin ọle rẹ kere ghe, emhin nin ọle lu bi eria nin ọle ria dẹ sabọ re ọle gboghẹ?
Aharẹmiẹn mhan manman dọnmhegbe nin mhan rẹ ha ria eria ne gbale, iria-eria ne imhẹn sabọ yẹ san na mhan bhi ọkhọle ẹgheso. Be uwẹ ha lu nin uwẹ rẹ ne ene emhin nan sibhi ọkhọle re, nin uwẹ hẹi dọ ha ria eria nyan ele ẹghe rebhe? Tie Philippians 4:8, bha ha zilo nyan ene inọnta nan:
-
Unan emhin nela ọkhẹke nin mhan ha ria ẹmhọnlẹn?
-
Ahamiẹn mhan tie iBaibo yẹ lu ilọnmhọn oga, be ọnan ha rẹ rẹkpa mhan rẹ khọn edọnmhẹn yẹ?
5. Elele nabhọre sade mhan re obọ rẹkhan uhi nesi Jehova
Jehova lẹn emhin ne ha mhẹn mhan bhi egbe. Ọle yọle nin mhan rẹban igboghẹ. Ọle da yẹ taman mhan elele nin mhan ha miẹn bhọ sade mhan lu iriọ. Tie Proverbs 7:7-27 la ghe ọne IVIDIO. Bha ha ghe ọle fo, bha zilo nyan inọnta ne rekhan ọlẹn.
-
Be ọne usẹn obhokhan rẹ tobọle re oẹ nọnsọle khian nabhi ufi yẹ? —Fẹ Proverbs 7:8, 9 ghe.
-
Beji Proverbs 7:23, 26 rẹman, ọbalọ ne bunbun, ọle igboghẹ sire. Be hi ọbalọ eso ne ida sẹ mhan bhi egbe sade mhan rẹban igboghẹ?
-
Be uwedẹ iẹnlẹn nọn khiale ha rẹ rẹkpa mhan rẹ sọnyẹnmhẹn bhi ighegheghe yẹ?
Ẹbho eso riale ghe, uhi nin Jehova gbele, ghe nin okpea bi okpea la okhuo bi okhuo hẹi ne egbe nowẹ kaka gbe. Ọkpakinọn, Jehova hoẹmhọn mhan. Ọle guanọ nin mhan sọnyẹnmhẹn bhi ighegheghe. Nin mhan rẹ miẹn iẹnlẹn ọsi ighegheghe, ọkhẹke nin mhan re obọ rẹkhan uhi nesọle rebhe. Tie 1 Corinthians 6:9-11, bha ha zilo nyan ene inọnta nan:
-
Nin okpea rẹ ne okpea nowẹ, la nin okhuo rẹ ne okhuo nowẹ, ọle ọkpa be hi emhin ebe nin Jehova yọle nin mhan rẹban?
Imhan rebhe mhọn emhin kẹkẹ ne khẹke nin mhan fidenọ bhi iẹnlẹn nọnsẹmhan, nin mhan da sabọ ha ga iJehova nọnsẹn. Elele be ribhọ sade mhan fidenọ? Tie Psalm 19:8, 11, bha ha zilo nyan ene inọnta nan:
-
Uwẹ be riale ghe, uhi nin Jehova gbele bhi ẹmhọn inegbenowẹ kaka gbe? Bezẹle nin uwẹ da yọle, ehe la eye?
Jehova sẹ wo rẹkpa ẹbho ne bunbun rẹ fi uwedẹ iẹnlẹn nọnsele denọ. Ọle dẹ yẹ sabọ rẹkpa uwẹ
ẸBHO ESO SABỌ YỌLE: “Itue eva ne ki rẹ khin ne hoẹmhọn egbe dẹ sabọ ne egbe nowẹ, ọ iyi emhin ebe.”
-
Be uwẹ ha taman ọne ọria yẹ?
EBI MHAN LUẸLE
Jehova mhanmhan ọlẹn nin ọdọ bi amhẹn ha ne egbe nowẹ, nin ele rẹ ha re oyẹẹ man egbe.
Uwẹ Be Yẹ Yere?
-
Be a re igboghẹ ta?
-
Be ha rẹkpa mhan rẹ rẹban igboghẹ?
-
Elele nela mhan ha miẹn bhọ sade mhan re obọ rẹkhan uhi nin Jehova gbele bhi ẹmhọn inegbenowẹ?
FẸ ENE EMHIN NAN GHE
Luẹ ebezẹle nin Osẹnobulua da guanọ nin okpea bi okhuo bọ egbe ọkuẹsẹ ele kugbe ha nyẹnlẹn.
Uhi nin Baibo gbele, nin okpea bi okpea la okhuo bi okhuo hẹi ne egbe nowẹ, be rẹman ghe mhan dẹ he eria ne lu emhin ne sẹriọ?
“Emhin Ebe Be Nọn Nin Okpea bi Okpea La Okhuo bi Okhuo Rẹ Ha Ne Egbe Nowẹ?” (Ebe nọn ribhi jw.org)
Luẹ ebi uhi nin Osẹnobulua gbe bhi ẹmhọn inegbenowẹ rẹ gbega mhan yẹ.
“Igboghẹ Be Gene Nọn Nan Rẹ Re Unun Ha Fiofio Egbe Okpea La Egbe Okhuo ọsi Ọria Ọbhebhe?” (Ebe nọn ribhi jw.org)
Tie okha nọn mhọn uhọnmhọn-ọta nọn yọle, “Ele Da Wo Mun Ekpẹn Mẹn bhi Egbe,” nin uwẹ daghe ebe re okpea ọkpa nọn rẹ ha ne ikpea nowẹ fi iẹnlẹn nọnsọle denọ.
“Ẹmhọanta Nọn Ribhi Baibo Fi Iẹnlẹn ọsi Eria Denọ” (The Watchtower, April 1, 2011)
a Ọ iyi inegbenowẹ ọkpa por·neiʹa mundia nan. Ahamiẹn eria ne bha bọ egbe lu emhin bọsi, nan rẹ re unun fiofio egbe okpea ọsi ọria la egbe okhuo ọsi ọria, nan rẹ ho ọria bhi uhio-ọkpu, la nan rẹ re obọ so egbe okpea ọsi ọria la egbe okhuo ọsi ọria bhi uwedẹ nọn bha gba, por·neiʹa sẹyẹ nọn.
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
