LESN 41
Wa Di Baibl Av Fi Se Bout Seks?
Wol iip a piipl fiil a wie fi taak bout seks. Bot yu nuo se di Baibl taak bout seks duo? Bot wen di Baibl taak bout seks, it taak bout it iina wan gud wie, an wa it se kyan du wi gud. An it mek sens se wa di Baibl se bout seks a-go gud fi wi, kaaz a Jeuova mek wi an im nuo di bes ting fi wi. Im mek wi nuo wa wi kyan du fi mek im api, an wa fi du ef wi waahn fi api nou an fi eva.
1. Wa Jeuova av fi se bout seks?
Seks a wan prezent fram Jeuova. Im waahn wan man an wan uman we marid tu dem wan aneda fi enjai it. Im no onggl mek it so dem kyan av pikni, bot im mek it so dem kyan shuo ou dem lov dem wan aneda an enjai it di wie ou Gad waahn dem fi enjai it. A dat mek di Baibl tel wi se: “Yu fi fiil gud wid di waif we yu av fram yu yong.” (Pravorbz 5:18, 19) Jeuova waahn di Kristiyan dem we marid fi stik tu dem wan aneda, so dem wudn sliip wid sumadi we dem no marid tu.—Riid Iibruu 13:4.
2. A wa a seks sin?
Di Baibl mek wi nuo se “di piipl dem we tek paat iina aal kain-a seks sin . . . naa go tek paat iina Gad Kindom.” (1 Korintiyan 6:9, 10) Di man dem we rait di Baibl iina di Griik langwij, dem yuuz di wod por·neiʹa fi taak bout seks sin. Da wod de av fi du wid (1) piipl we sliip a wid piipl we dem no marid tu, (2) man we sliip wid man, an uman we sliip wid uman, an (3) piipl we av seks wid animal. Wi a du wa Jeuova waahn wi fi du an it a du wi gud wen wi “kip we fram aal kain-a seks sin.”—1 Tesaluoniyan 4:3.
LORN SOM MUO
Luk wa kyan elp yu fi kip faar fram aal kain-a seks sin, an yu a-go si som a di gud sitn dem we a-go gwaan fi yu wen yu du tingz di wie ou Jeuova waahn yu fi du it.
3. Ron we fram aal kain-a seks sin
Wan man we chos iina Gad we niem Juozif did afi ron we fram wan uman we did waahn av seks wid im so dat im kuda du tingz Jeuova wie. Riid Jenisiz 39:1-12, an den wi a-go taak bout dem kwestiyan ya:
-
Wa mek Juozif did ron we fram Patifa waif? —Luk pan vors 9.
-
Yu tingk Juozif did du di rait ting? An wa mek yu se so?
Ou yu tingk di yong piipl dem kyan du laik Juozif an ron we fram seks sin? Plie di VIDIYO.
Jeuova waahn wi kip we fram seks sin. Riid 1 Korintiyan 6:18, an den wi a-go taak bout dem kwestiyan ya:
-
Som piipl we en op iina seks sin, wa a som sitn we kuda kaaz dem fi dwi’it?
-
Wa kyan elp yu fi kip we fram seks sin?
4. Yu kyan kip we fram eniting we wi kaaz yu fi sin
Wa kyan mek it aad fi yu kip we fram seks sin? Plie di VIDIYO, an den wi a-go taak bout di neks kwestiyan.
-
Wen di breda iina da vidiyo ya si se di sitn dem we im did a tingk bout kuda mek im go gi im waif bon, wa dat did mek im du?
Wen it kom aan tu seks, aal wan Kristiyan we a sorv Jeuova di rait wie mait-a fain it aad fi tek im main aafa tingz we im nuo se no rait. Wa kyan elp yu fi tap tingk bout tingz we yu nuo se no rait? Riid Filipiyan 4:8, an den wi a-go taak bout dem kwestiyan ya:
-
Wa kain-a tingz wi fi a tingk bout?
-
Wen wi riid di Baibl an kip wiself bizi wid Jeuova bizniz, ou dem sitn ya kyan elp wi fi kip we fram seks sin?
5. Di wie ou Jeuova waahn wi fi liv a fi wi uona gud
Jeuova nuo di bes ting fi wi. Im tel wi wa wi fi du fi kip we fram aal kain-a seks sin an ou wi kyan betaraaf wen wi du dat. Riid Pravorbz 7:7-27 ar plie di VIDIYO, an den wi a-go taak bout di neks kwestiyan dem.
-
Ou di yong bwai en op wich paat im did de we mek im kuda get iina chobl?—Luk pan Pravorbz 7:8, 9.
-
Azkaadn tu Pravorbz 7:23, 26, seks sin kaaz wol iip a prablem. Ef wi kip we fram seks sin, wa a som prablem we wi naa go av?
-
Wen wi kip we fram seks sin, ou it kyan mek wi api nou an fi eva?
Som piipl tingk se Gad wikid kaaz a ou di Baibl tel wi se im fiil bout wen man sliip wid man an uman sliip wid uman. Bot Jeuova Gad lov wi an im waahn evribadi fi api nou an fi eva. Fi get da laif de, wi afi liv ou Jeuova waahn wi fi liv. Riid 1 Korintiyan 6:9-11, an den wi a-go taak bout da kwestiyan ya:
-
Bies pan ou Jeuova luk pan tingz, ef wan man fiil fi sliip wid wan man ar wan uman fiil fi sliip wid wan uman, a onggl dem fiilinz de rang?
Yu tingk it mek sens fi wi chienj op wi laif fi mek Gad api? Riid Saam 19:8, 11, an den wi a-go taak bout dem kwestiyan ya:
-
Wen it kom aan tu seks sin an dem ting de, yu tingk wa Jeuova se bout it fier? Wa mek yu se so?
Jeuova elp nof piipl fi chienj op dem laif fi mek im api wid wa dem a du, an im kyan elp yu tu
SUMADI MAIT-A SE: “Notn no rang fi piipl av seks so langks dem lov dem wan aneda.”
-
Wa yu wuda se bout dat?
DIS A WA YU FI MEMBA
Seks a wan nais sitn we Jeuova gi wan man an wan uman we marid so dat dem kyan enjai it.
Wa yu did lorn iina da lesn ya?
-
Wa an wa di Baibl se a seks sin?
-
Wa a-go elp wi fi kip faar fram seks sin?
-
Ou wi a-go betaraaf wen wi du wa Jeuova se wi fi du an kip we fram aal kain-a seks sin?
CHEK OUT SOM MUO SITN
Lorn wa mek Gad waahn wan man an wan uman we liv tugeda fi marid.
Lorn wa mek wen di Baibl se man no fi sliip wid man an uman no fi sliip wid uman it no miin se wi fi iet di piipl dem we du dat.
“It Rang Fi Man Sliip Wid Man An Uman Sliip Wid Uman?” (Sitn we yu kyan get pan di websait)
Luk pan ou wa Gad se bout seks protek wi.
“Wen Sumadi Yuuz Dem Mout Fi Av Seks, A Seks Dat?” (Sitn we yu kyan get pan di websait)
Luk pan wa elp wan man we yuus tu sliip wid man fi chienj op im wiez fi mek Gad api iina im tuori we niem “Dem Chriit Mi Gud.”
“Di Baibl Chienj Piipl Laif Fi Di Beta” (Di Wachtowa, Iepril 1, 2011)
a Wen it taak bout piipl we a sliip wid dem wan aneda we dem no marid tu, it naa onggl taak bout seks di naamal wie. Bot it a taak bout ef dem yuuz dem mout fi av seks, ef dem yuuz dem batam fi av seks, an wen dem fiil op fiil op di paat dem pan dem wan aneda badi we mek fi av seks.
