TƆM KƖKPƐLƖKƖTƲ 41
Suwe Bibl yɔɔdʋʋ kʋzʋʋ yɔɔ?
Pɩwɛ ɛyaa sakɩyɛ kaɖɛ se pɔyɔɔdɩ kʋzʋʋ tɔm. Ɛlɛ Bibl yɔɔdʋʋ kʋzʋʋ tɔm kpayɩ nɛ ñamtʋ. Nɛ tɔm ndʋ kɩyɔɔdʋʋ yɔ, tɩmʋnaa nɛ tɩwazɩɣ-ɖʋ. Toovenim taa lɛ Yehowa kɛnɩ ɖa-Lɩzɩyʋ. Ye mbʋ, ɛnʋ sɩmnɩ mbʋ pɩwazɩɣ-ɖʋ nɛ pɩkɩlɩ yɔ. Ɛwɩlɩ-ɖʋ lakasɩ nzɩ pɩwɛɛ se ɖɩwɛɛna nɛ ɖɔ-tɔm kɛdɩnɩ-ɩ nɛ ɖɩpɩzɩ nɛ ɖihiɣ wezuu maatɛŋ yɔ.
1. Lɩmaɣza wena Yehowa wɛnɩ kʋzʋʋ yɔɔ?
Kʋzʋʋ kɛ kʋjɔʋ ŋgʋ Yehowa labɩ nesi ɖɔkɩyaa yɔ. Ɛsɔɔlaa se kʋjɔʋ ŋgʋ kɩha-wɛ taa leleŋ. Kʋjɔʋ ŋgʋ, pɩtasɩnɩ se kɩsɩɣnɩ halʋ nɛ ɛ-walʋ se pɛwɛɛnɩ piya lɛ, kɩsɩɣnɩ-wɛ ɖɔɖɔ se pawɩlɩ ɖama sɔɔlɩm mbʋ pɛwɛnɩ ɖama yɔɔ yɔ. Pʋyɔɔ Ɛsɔtɔm yɔɔdʋʋ se: «Nɩɩ leleŋ, ña nɛ ñe-evebitu taa halʋ.» (Aduwa 5:18, 19) Yehowa sɔɔlaa se nesi ɖɔkɩyaa iheyiɣ ɖama toovenim nɛ pese acɛyɛ.—Kalɩ Ebree mba 13:4.
2. Ɛbɛ payaɣ se kʋzʋʋ kɩdɛkɛdʋʋ?
Bibl heyiɣ-ɖʋ se «mba pacakɩ kʋzʋʋ kɩdɛkɛdʋʋ wezuu yɔ [paakaɣ] hiɣu Ɛsɔ Kewiyaɣ.» (1 Kɔrɛntɩ mba 6:9, 10) Grɛɛkɩ tɔm piye pɔrɩneya pɛɖɛzaa se «kʋzʋʋ kɩdɛkɛdʋʋ.» Tɔm piye nɖɩ, palakɩnɩ-ɖɩ tʋmɩyɛ alɩwaatʋ ndʋ pɔyɔɔdʋʋ kʋzʋʋ lakasɩ sɩnɛ sɩ-tɔm yɔ: (1) Mba patɩɖɔkɩ nesi nɛ pasʋʋnɩ ɖama yɔ, a (2) mba paka kʋzʋʋ pilinzi nɛ pasʋʋnɩ ɖama yɔ nɛ (3) mba pasʋʋnɩ kpɩna yɔ. Ye ‘ɖikizi kʋzʋʋ kɩdɛkɛdʋʋ’ yɔ, ɖɔ-tɔm kɛdɩɣnɩ Yehowa nɛ pɩwazɩɣ ɖa-maɣmaɣ ɖɔɖɔ.—1 Tesalooniiki mba 4:3.
TAZƖ NƐ PILIMI
Tazɩ nɛ ŋna mbʋ ŋpɩzɩɣ ŋla nɛ ŋse kʋzʋʋ kɩdɛkɛdʋʋ yɔ, nɛ wazasɩ nzɩ ŋhikiɣ ye ŋwɛ kele kele ñe-wezuu caɣʋ taa yɔ.
3. Se kʋzʋʋ kɩdɛkɛdʋʋ
Evebu weyi payaɣ se Yosɛɛfʋ yɔ, ɛɛlʋbɩ siŋŋ se pɩsa nɛ ɛwɛɛ kele kele e-wezuu caɣʋ taa. Ɩkalɩ Kiɖe Tɛɛ Tɔm 39:1-12, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ yɔɔ Yosɛɛfʋ sewa?—Cɔnɩ kalɩtʋ 9.
-
Ŋmaɣzɩɣ se Yosɛɛfʋ kpaɣ lɩmaɣzɩyɛ kɩbanɖɛ na? Ɛbɛ yɔɔ?
Sɔnɔ, ɛzɩma piya evelisi pɩzɩɣ nɛ sɩmaɣzɩnɩ Yosɛɛfʋ nɛ sise kʋzʋʋ kɩdɛkɛdʋʋ? Ɩcɔnɩ VIDEO.
Yehowa pɔzʋʋ-ɖʋ se ɖise kʋzʋʋ kɩdɛkɛdʋʋ. Ɩkalɩ 1 Kɔrɛntɩ mba 6:18, nɛ pʋwayɩ lɛ ɩtazɩ tɔm tʋnɛ tɩ-taa:
-
Wɛtʋ ndɩ ndɩ ndʋ pɩzɩɣ nɛ tituyi nɔɔyʋ nɛ ɛtɔlɩ kʋzʋʋ kɩdɛkɛdʋʋ kpaca taa?
-
Ɛzɩma ŋpɩzɩɣ nɛ ŋse kʋzʋʋ kɩdɛkɛdʋʋ?
4. Ŋpɩzɩɣ nɛ ŋɖɔkɩ ña-tɩ alɩwaatʋ ndʋ pɩtakɩɣ-ŋ yɔ
Ɛbɛ pɩzɩɣ piyele nɛ pɩwɛɛ nɔɔyʋ kaɖɛ se ɛpɩzɩ nɛ ɛɖɔkɩ ɛ-tɩ alɩwaatʋ ndʋ pɩtakɩɣ-ɩ se ɛcaɣ kʋzʋʋ kɩdɛkɛdʋʋ wezuu yɔ? Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Video taa, koobu abalɩñɩnʋ nɔɔyʋ kɔma nɛ eɖiɣzina se ɛ-lɩmaɣza nɛ ɛ-lakasɩ pɩzɩɣ piyele nɛ ɛcaɣ kʋzʋʋ kɩdɛkɛdʋʋ wezuu lɛ, ɛbɛ ɛlaba?
Halɩ Krɩstʋ tʋ weyi ɛwɛ siɣsiɣ yɔ, nabʋyʋ taa ɛlʋkɩnɩ lɩmaɣza wena afɛyɩ kele kele yɔ. Ye lɩmaɣza wena afɛyɩ kele kele yɔ akɔŋ ña-ñʋʋ taa yɔ, ɛbɛ pɩwɛɛ se ŋla nɛ ŋpɩzɩ nɛ ŋlɔ-yɛ kpaagbaa? Ɩkalɩ Filiipi mba 4:8, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ nɛ ɛbɛ yɔɔ pɩwɛɛ se ɖɩmaɣzɩɣ ɖoŋ ɖoŋ?
-
Ye ɖɩkalɩɣ Bibl nɛ ɖɩlakɩ fezuu taa tʋma nɛ kpekpeka yɔ, ɛzɩma pɩsɩɣnɩ-ɖʋ se ɖɩɖɔkɩ ɖa-tɩ alɩwaatʋ ndʋ pɩtakɩɣ-ɖʋ se ɖɩla kɩdɛkɛdɩm yɔ?
5. Yehowa paɣtʋ wazɩɣ-ɖʋ
Yehowa sɩm mbʋ pɩwazɩɣ-ɖʋ nɛ pɩkpaɖɩ yɔ. Eheyiɣ-ɖʋ mbʋ pɩwɛɛ se ɖɩla nɛ ɖɩwɛɛ kele kele ɖe-wezuu caɣʋ taa yɔ nɛ wazasɩ nzɩ pɩ-labʋ kɔŋnɩ-ɖʋ yɔ. Ɩkalɩ Aduwa 7:7-27 yaa ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Ɛzɩma pɩɖɔma nɛ evebu nɔɔyʋ sʋʋ wɛtʋ ndʋ tɩtakɩ-ɩ se ɛla kɩwɛɛkɩm yɔ tɩ-taa? —Cɔnɩ Aduwa 7:8, 9.
-
Ɛzɩ Aduwa 7:23, 26 yɔɔdʋʋ yɔ, kʋzʋʋ kɩdɛkɛdʋʋ wezuu caɣʋ pɩzɩɣ nɛ pɩkɔnɩ ɛyʋ kaɖɛ siŋŋ. Ye ɖɩɖɔkɩ kpam nɛ ɖɩwɛɛ kele kele ɖe-wezuu caɣʋ taa yɔ, tɩlasɩ nzɩ ɖɩpɩzɩɣ nɛ ɖɩfɛɛ?
-
Ye ɖɩwɛ kele kele ɖe-wezuu caɣʋ taa yɔ, ɛzɩma pɩpɩzɩɣ nɛ pɩsɩnɩ-ɖʋ nɛ ɖɩnɩɩ wezuu leleŋ tam?
Ɛyaa nabɛyɛ maɣzɩɣ se tɔm ndʋ Bibl yɔɔdʋʋ mba paka kʋzʋʋ pilinzi nɛ pasʋʋnɩ ɖama yɔ pɔ-yɔɔ yɔ, tɩtɩmʋna. Ɛlɛ Ɛsɔ sɔɔlɩm tʋ Yehowa sɔɔlaa se paa ɛyʋ weyi lɛ, ɛnɩɩ wezuu leleŋ tam. Pɩsa nɛ ɖɩpɩzɩ nɛ ɖɩnɩɩ wezuu leleŋ tam lɛ, pɩwɛɛ se ɖɩɖɔ ɛ-paɣtʋ yɔɔ. Ɩkalɩ 1 Kɔrɛntɩ mba 6:9-11, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛsɔ ɛsɩndaa lɛ, ɛyaa mba paka kʋzʋʋ pilinzi yɔ, pa-ɖama sʋnʋʋ ɖeke kɛnɩ kɩdɛkɛdɩm na?
Pɩpɔzʋʋ se ɖa-tɩŋa ɖɩlɛɣzɩ ɖa-lakasɩ pʋcɔ nɛ ɖɔ-tɔm kɛdɩnɩ Ɛsɔ. Ɛzɩ pɩcɛyaa se ɖɩñaɣ pana nɛ ɖɩla lɛɣzɩtʋ ndʋ? Ɩkalɩ Keɣa 19:8, 11 nɛ pʋwayɩ lɛ ɩtazɩ tɔm tʋnɛ tɩ-taa:
-
Ŋmaɣzɩɣ se paɣtʋ ndʋ Yehowa ɖʋ wezuu kɩbaŋʋ caɣʋ nʋmɔʋ taa yɔ tɩmʋnaa yaa we? Ɛbɛ yɔɔ?
Yehowa sɩnɩ ɛyaa sakɩyɛ nɛ pɛlɛɣzɩ pe-wezuu caɣʋ nɛ kɩla nɔɔ kʋɖʋmaɣ nɛ ɛ-paɣtʋ. Ɛpɩzɩɣ nɛ ɛsɩnɩ-ŋ ɖɔɖɔ.
NABƐYƐ YƆƆDƲƲ SE: «Ɛyʋ pɩzɩɣ nɛ ɛsʋnɩ paa anɩ, ɛ nɛ ɩ pañɩtɩ nɛ pɔsɔɔlɩ ɖama.»
-
Suwe ŋpɩzɩɣ nɛ ŋcosi?
TOBI LƐ
Kʋzʋʋ kɛ kʋjɔʋ ŋgʋ Yehowa labɩ halʋ nɛ ɛ-walʋ yɔ.
Tɔm taa tazʋʋ
-
Ɛbɛ nɛ ɛbɛ payaɣ se kʋzʋʋ kɩdɛkɛdʋʋ?
-
Ɛbɛ pɩzɩɣ nɛ pɩsɩnɩ-ɖʋ nɛ ɖise kʋzʋʋ kɩdɛkɛdʋʋ?
-
Ye ɖɩñaŋ paɣtʋ ndʋ Yehowa ɖʋ wezuu kɩbaŋʋ caɣʋ nʋmɔʋ taa yɔ, wazasɩ nzɩ ɖihikiɣ?
WONDU LƐƐTƲ
Kalɩ nɛ ŋna mbʋ pʋyɔɔ pɩcɛyaa se halʋ nɛ abalʋ pɔɖɔkɩ nesi komina ɛsɩndaa pʋcɔ nɛ pacaɣ ɖama cɔlɔ yɔ.
«Vivre en couple sans être mariés : Qu’en dit la Bible?» (Intɛrnɛɛtɩ yɔɔ tɔm ñʋʋ)
Ɛbɛ yɔɔ pɔtɔŋ se lɩmaɣza wena Bibl wɛnɩ mba paka kʋzʋʋ pilinzi nɛ pasʋʋnɩ ɖama yɔ pɔ-yɔɔ yɔ, aaseɣtiɣ-ɖʋ se ɖɩpaɖɩ mba pacakɩ wezuu ŋgʋ yɔ.
Kalɩ nɛ ŋna ɛzɩma paɣtʋ ndʋ Yehowa ɖʋ kʋzʋʋ nʋmɔʋ taa yɔ tɩwazɩɣ-ɖʋ yɔ.
«Les relations buccogénitales sont-elles vraiment des relations sexuelles?» (Intɛrnɛɛtɩ yɔɔ tɔm ñʋʋ)
Kalɩ tɔm ñʋʋ «Ils ont respecté ma dignité» nɛ ŋna mbʋ pɩsɩnɩ abalʋ weyi ɛsʋwaɣnɩ abalaa yɔ nɛ ɛlɛɣzɩ e-wezuu caɣʋ yɔ.
«La Bible transforme des vies» (La Tour de Garde, 1er avril 2011)
a Ye nɔɔyʋ ɛsʋzʋʋ ɛ-kʋzʋʋ piliŋa lɛlʋ nɔɔ taa yaa ɛ-pɩndɩyʋʋ tɛɛ yaa ye nɔɔyʋ ɛsaɣyɩɣ lɛlʋ kʋzʋʋ piliŋa yɔɔ yɔ, pɩkɛ ɖɔɖɔ kʋzʋʋ kɩdɛkɛdʋʋ.
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
