LISON 41
Kuzê ki Bíblia ta fla sobri séksu?
Txeu algen ka ta xinti avontádi pa pâpia sobri séksu. Má, óras ki Bíblia ta pâpia sobri séksu, el ta faze-l di un manera klaru, má ku ruspetu. Kuzê ki el ta fla é bon pa nos. Kel-li ta faze sentidu dja ki Bíblia ben di Jeová, ki é nos Kriador. Pur isu, el sabe kuzê ki é midjór pa nos. El ta fla-nu kuzê ki nu debe faze pa pô-l kontenti i kuzê ki ta djuda-nu vive filís pa tudu ténpu.
1. Kuzê ki Jeová ta pensa sobri séksu?
Séksu é un prezenti di Jeová. El krê pa un ómi ku un mudjer ki sta kazadu xinti alegria ku kel prezenti li. Tanbê, séksu é un manera ki un kazal ta pode ten fidju i mostra ses amor i karinhu pa kunpanheru di un manera natural. É pur isu ki Palavra di Deus ta fla: ‘Fika kontenti ku mudjer di bu mosindadi’. (Provérbios 5:18, 19) Jeová krê pa maridu ku mudjer ki ta adora-l ser lial pa kunpanheru, asi pa nunka es ka faze adultériu. — Lé Hebreus 13:4.
2. Kuzê ki é konportamentu seksual mariadu?
Bíblia ta fla-nu ma ‘kes ki ta faze konportamentu seksual mariadu ka ta erda Reinu di Deus.’ (1 Coríntios 6:9, 10) Kes algen ki skrebe Bíblia na gregu uza palavra por·neiʹa pa pâpia sobri konportamentu seksual mariadu. Kel palavra la krê fla (1) relason seksual entri dôs algen ki é ka kazadu ku kunpanheru, a (2) séksu ómi ku ómi ô mudjer ku mudjer i (3) faze séksu ku un animal. Nu ta poi Jeová kontenti i nu ta djuda nos kabésa óras ki nu ta ‘ivita ten konportamentu seksual mariadu.’ — 1 Tessalonicenses 4:3.
SABE MÁS
Odja modi ki bu pode ivita konportamentu seksual mariadu i kuzê ki bu pode ganha si bu kontinua ku un konportamentu linpu.
3. Fuji di konportamentu seksual mariadu
Un sérvu di Deus fiel ki txomaba Juzé, sforsa pa mante un konportamentu linpu. Lé Génesis 39:1-12, i dipôs pâpia sobri kes pergunta li:
-
Kuzê ki poi Juzé ta fuji? — Odja versíklu 9.
-
Bu ta atxa ma Juzé toma un bon disizon? Pamodi?
Modi ki jóvens oji pode imita Juzé i fuji di konportamentu seksual mariadu? Odja VÍDIU.
Jeová krê pa nos tudu ivita konportamentu seksual mariadu. Lé 1 Coríntios 6:18, i dipôs pâpia sobri kes pergunta li:
-
Ki situasons pode poi un algen ta faze konportamentu seksual mariadu?
-
Modi ki bu pode fuji di konportamentu seksual mariadu?
4. Bu pode vense tentason
Pamodi ki pode ser difísil vense tentason di faze konportamentu seksual mariadu? Odja VÍDIU, i dipôs pâpia sobri kel pergunta li:
-
Na vídiu, kantu kel irmon da kónta ma kes kuza ki el staba ta pensa i ta faze pode poba el ta trai se mudjer, kuzê ki el faze?
Ti mésmu sérvus di Jeová alvês ta luta pa mante ses pensamentu linpu. Modi ki nu pode ivita fika ta pensa na séksu? Lé Filipenses 4:8, i dipôs pâpia sobri kes pergunta li:
-
Ki tipu di kuzas nu debe pensa na el?
-
Modi ki leitura di Bíblia i mante okupadu na sirvisu di Jeová pode djuda-nu vense un tentason?
5. Leis di Jeová é bon pa nos
Jeová sabe kuzê ki é midjór pa nos. El ta fla-nu modi ki nu pode mante un konportamentu linpu i kuzê ki nu ta ganha si nu faze kel-la. Lé Provérbios 7:7-27 ô odja VÍDIU, i dipôs pâpia sobri kes pergunta li:
-
Modi ki un jóven poi se kabésa na tentason? — Odja Provérbios 7:8, 9.
-
Sima sta na Provérbios 7:23, 26, konportamentu seksual mariadu pode traze prublémas gravi. Ki prublémas nu pode ivita si nu mante un konportamentu linpu?
-
Modi ki ten un konportamentu linpu pode djuda-nu vive filís pa tudu ténpu?
Alguns algen ta atxa ma kuzê ki Bíblia ta fla sobri séksu entri ómi ku ómi ô mudjer ku mudjer, ta mostra falta di amor. Má Jeová, ki é kel Deus di amor, krê pa tudu algen vive filís pa tudu ténpu. Pa kel-li nu meste vive di akordu ku se leis. Lé 1 Coríntios 6:9-11, i dipôs pâpia sobri kel pergunta li:
-
Pa Deus, kel dizeju di faze séksu entri ómi ku ómi ô mudjer ku mudjer é kel úniku dizeju mariadu?
Nos tudu nu meste faze mudansas pa agrada Deus. Má bale péna faze kes mudansa? Lé Salmo 19:8, 11, i dipôs pâpia sobri kes pergunta li:
-
Bu ta atxa ma leis di Jeová sobri konportamentu é duru dimás? Pamodi?
Jeová dja djuda txeu algen vive di akordu ku se leis. El pode djuda-u tanbê.
ALGUNS ALGEN TA FLA: “Basta dôs algen ta ama kunpanheru é normal es faze séksu.”
-
Kuzê ki bu ta flaba?
REZUMU
Séksu é un prezenti di Jeová pa un maridu ku se mudjer.
Perguntas di rezumu
-
Kuzê ki ta inklui konportamentu seksual mariadu?
-
Kuzê ki ta djuda-nu ivita konportamentu seksual mariadu?
-
Kuzê ki nu ta ganha si nu sigi leis di Jeová sobri konportamentu?
DJOBE MÁS
Prende pamodi ki pa Deus é inportanti pa un ómi ku un mudjer ki krê vive djuntu sta kazadu.
“Kuzê ki Bíblia ta fla sobri mora djuntu sen sta kazadu?” (Artigu na jw.org)
Bíblia ta fla ma séksu entri ómi ku ómi ô mudjer ku mudjer é mariadu. Má odja pamodi ki kel-li ka krê fla ma nu debe ôdia kes algen.
Prende pamodi ki leis di Deus sobri séksu ta proteje-nu.
Na spiriénsa “Es trata-m ku ruspetu”, odja kuzê ki poi un ómi ki éra omoseksual muda se manera di vive pa el pode agrada Deus.
“Bíblia ta muda vida di algen” (Sentinéla, 1 di abril di 2011)
a Kel-li ta inklui txeu manera di faze séksu, sima séksu pa bóka, pa pólpa i poi mô na órgon seksual di otu algen ki é ka bu maridu ô bu mudjer, pa el xinti vontadi di faze séksu.
Bu pode gosta di kes-li tanbê
PERGUNTAS KI MÁS TA FAZEDU
Modi ki ta fazedu kel studu di Bíblia ki Tistimunhas di Jeová ta oferese?
Bu pode uza kalker traduson di Bíblia, pa bu studa Bíblia di grasa ku Tistimunhas di Jeová. Bu pode konvida tudu bu família ô kalker amigu ki bu krê.
